RIWAYAIK RASUL-RASUL 19

1Samantaro Apolos barado di Korintus, nan Paulus sadang payi manjalani kuruak-kuruak daerah tu, mako sampailah inyo di Efesus. Tibo di sinan tu, inyo basuwo jo babarapo urang nan lah picayo kabake Isa Almasih. 2Inyo batanyo kabake urang-urang tu, ”Alah koh angku-angku manarimo Roh Allah, kutiko angku-angku muloi picayo kabake Isa Almasih?” Urang-urang tu bi manjawauk, ”Alun lai. Alun ado lai kami mandanga baraso ado Roh Allah.” 3Paulus batanyo, ”Jikok baitu, jo pamandian apokoh angku-angku dipamandikan?” Urang-urang tu bi manjawauk, ”Jo pamandian Yahya.” 4Mako, Paulus bakato, ”Yahya mampamandikan urang, untuak manyatokan baraso urang-urang tu lah batobaik dari doso-doso inyo tu. Tapi dalam pado itu, Yahya ma-agiah tawu pulo kabake urang-urang Israel, supayo inyo tu musti bi picayo pulo, kabake Baliau nan datang kudian daripado Yahya, iyolah Isa Almasih.” 5Kutiko urang-urang tu mandanga nan baitu, mako, inyo tu bi dipamandikan dalam namo Tuhan Isa Almasih. 6Di kutiko Paulus malatakkan tangannyo kabake urang-urang tu, Roh Allah manguwasoi urang-urang tu, mako, mulo-ilah inyo tu bi mangecek jo bahaso-bahaso nan ajaib, sarato manyampaikan barito nan dari Allah. 7Inyo tu kasadonyo ado kiro-kiro duwo baleh urang banyaknyo. 8Salamo tigo bulan, Paulus tatauk mangecek jo sacaro barani, kabake urang-urang di rumah ibadaik, sarato badebaik jo urang-urang tu untuak mayakinkan inyo tu, tantang Karajaan Allah. 9Tapi, ado babarapo urang di antaro inyo tu nan bi kareh kapalo, sarato indak bi namuah picayo. Di adok-an kasadonyo urang nan bakumpua di sinan tu, inyo tu bi mancacek ajaran tantang rancana Allah, untuak manyalamaikkan manusia malalui Isa Almasih. Dek karano itu, Paulus maninggakan urang-urang tu, sudah tu inyo payi ka tampaik ruwang kuliah nan banamo Tiranus, jo pangikuik-pangikuik Isa Almasih. Di sinan tu, satiyok ari inyo batanyo jawauk jo urang-urang nan bi tibo ka tampaik tu. 10Paulus mampabuwek nan bakcando itu taruih manaruih, salamo duwo tawun, sampai kasadonyo urang nan tingga di propinsi Asia tu, biya urang Yahudi atau pun urang banso lain, kasadonyo lah bi mandanga kato-kato Tuhan 11Allah mampabuwek mukjizat-mukjizat nan luwa biaso malalui Paulus. 12Jikok salabeta, atau kain ikek pinggang nan lah panah dipakai dek Paulus, jikok dirawokkan ka badan urang-urang nan sakik, mako cegaklah panyakik urang tu, sarato kaluwalah roh setan dari diri urang tu. 13Ado babarapo urang dukun Yahudi, nan payi kian kumari, untuak ma-usie roh jahek supayo kaluwa dari diri urang. Dukun-dukun tu, mancubo-cubo pulo mamakai namo Tuhan Isa Almasih, untuak ma-usie roh-roh setan tu. Inyo bi bakato kabake roh-roh setan tu, ”Ateh namo Isa Almasih nan dibaritokan dek Paulus tu, aden ma-usie kalian!” 14Ado tujuah urang anak laki-laki, dari surang imam kapalo nan banamo Skewa, nan mampabuwek pulo nan bakcando itu. 15Tapi, roh setan tu bakato kabake inyo tu, ”Aden tawu siya Isa Almasih, sarato tawu pulo siya Paulus, tapi, nan wa-ang ko siya?” 16Mako, urang nan kamasuak-an setan tu malompek, sarato manggarumehi inyo tu sajadi-jadinyo, sainggo inyo tu tapaso lari batilanjang dari rumah tu, dek karano pakaian inyo lah diruntuni, nan badan inyo lah luko-luko. 17Kasadonyo urang Yahudi, sarato jo urang banso lain nan tingga di Efesus, lah bi mandanga kajadian tu, mako, inyo tu bi tabik takuik. Namo Tuhan Isa Almasih makin disanjuang-sanjuang. 18Sambuah urang nan lah ba-iman kabake Isa Almasih, bi datang ka adok-an urang nan banyak, untuak ma-akui sagalo pabuatannyo di maso nan lapeh. 19Urang-urang nan biasonyo mangarajokan alemu sihie, bi mangumpuakan buku-buku inyo tu, sudah tu, inyo baka di adok-an urang nan banyak. Jikok di-etong arago buku tu kasadonyo, ado kiro-kiro limo puluah ribu pitih perak. 20Bakcando itulah jo caro nan luwa biaso, kato-kato Tuhan samakin tasebar, sarato samakin kuwaik pangaruahnyo. 21Sasudah kajadian-kajadian tu, mako Paulus ma-ambiak kaputusan untuak payi ka Makedonia, sarato jo ka Akhaya, sudah tu taruih ka Yerusalem. ”Sasudah ka sinan, ” kecek Paulus, ”ambo musti payi pulo ka Roma.” 22Mako, inyo ma-utuih duwo urang pambantunyo, iyolah Timotius jo Erastus, untuak payi ka Makedonia, nan inyo sandiri, untuak babarapo lamo lai tatauk di propinsi Asia. 23Kiro-kiro pado wakatu itulah, tajadi kakacauan gadang di Efesus, dek karano di ajaran tantang Isa Almasih. 24Dek karano dikota tu, ado surang tukang perak nan banamo Demetrius, nan mambuwek rumah-rumahan dewa untuak dewi Artemis. Usawonyo tu mandatangkan pangasilan nan gadang untuak anak buwahnyo. 25Dek karano itu, inyo mangumpuakan anak buwahnyo, sarato jo anak buwah tukang perak nan lain bagai, sudah tu bakato, ”Oih sudaro-sudaro! Kalian lah tawu, baraso kito mandapek pangasilan dari karajo kito ko. 26Nan kiniko kalian lah maliyek, sarato lah mandanga sandiri, apo nan dipabuwek dek si Paulus tu. Inyo mangatokan baraso patuang dewa-dewa nan dibuwek dek manusia, itu indak dewa tu doh. Inyo lah barasil, lah sambuah urang nan picayo kabake ajarannyo tu, indak di Efesus ko sajo doh, tapi lah ampia di kaciyek-annyo daerah Asia bagai. 27Bahayonyo iyolah, nan usawo kito ko ka mandapek namo buruak. Indak hanyo itu, mungkin pulo rumah dewi Artemis pun ka di anggauk remeh, sarato kabasarannyo ka dikalanyahkan; padohal inyo adolah dewi nan dipuji dek kasadonyo urang di Asia, sarato dek urang di muko bumi ko!” 28Baru mandanga nan baitu, mako, urang-urang tu bi tabik suga, sudah tu, inyo tu bi ma-ariak-ariak, ”Samakin mulielah dewi Artemis, dewi urang Efesus!” 29Mako, kakacauan gadang tu, lah marambak sampai ka kaciyek-annyo kota. Kamudian, garombolan pangacau tu, manangkok Gayus, sarato jo Aristarkhus, inyo tu adolah urangurang Makedonia nan mangawani Paulus dalam pajalanan, sudah tu, inyo tu dibawok masuak ka gaduang kasenian kota tu. 30Paulus nak masuak pulo manuruikkan inyo tu, tapi, urang-urang nan ba-iman kabake Isa Almasih nan ado di sinan tu, managah Paulus. 31Babarapo urang bapangkaik nan di propinsi Asia tu, nan bakanti jo Paulus, manyuruah urang untuak ma-agiah tawu kabake Paulus, supayo inyo jan manampakkan diri di gaduang kasenian tu. 32Samantaro itu, urang-urang nan bakumpua di gaduang kasenian tu lah kalibuik tunja. Ado nan ma-ariakkan bakcando iko, ado pulo nan ma-ariakkan nan lain, dek karano, kabanyakkan dari inyo tu indak bi tawu, baa mangko inyo tu bi bakumpua di sinan tu. 33Sabagian dari urang-urang tu manyangko, Aleksander-lah nan induak balanyo, dek karano inyolah nan ditulakkan dek urang-urang Yahudi ka adok-an. Mako, Aleksander ma-agiah kode jo tangannyo, mamintak supayo inyo dibuliahkan, untuak mangecek mambela diri di adok-an urang-urang tu. 34Tapi, baitu urang-urang tu tawu, baraso inyo adolah urang Yahudi, mako, urang-urang tu sarantak ma-ariakkan sakuwaik-kuwaiknyo, salamo duwo jam, ”Samangkin mulielah dewi Artemis, dewi urang Efesus!” 35Akienyo juru tulih kota, barasil mananangkan urang nan banyak tu. Inyo bakato, ”Oih panduduak Efesus! Satiyok urang lah tawu, baraso kota Efesus ko lah nan mamaliaro rumah dewi Artemis, sarato nan mamaliaro batu suci nan jatuah dari langik. 36Indak surang juwo doh urang nan dapek mambantah parkaro tu. Dek karano itu, tananglah, janlah mampabuwek sasuatu jo caro nan indak bakatantuan. 37Urang-urang ko, angku-angku bawok kamari, indak doh dek karano inyo lah marampok rumah dewa, atau dek karano inyo lah ma-ino dewi kito. 38Jikok nan Demetrius jo anak buwahnyo tu, mampunyoi suatu pangaduan taradok surang urang, biyalah inyo tu mambawok parkaro inyo tu ka pangadielan. Pangadielan tabukak untuak itu, pagawai-pagawai pamarentah pun tatauk ado. 39Tapi, jikok ado juwo lai sasuatu nan lain, nan angku-angku inginkan, itu musti disalasaikan dalam rapek nan sah, di adok-an urang nan banyak. 40Dek karano, apo nan tajadi kiniko, bisa mambahayokan kito. Kito bisa dituduah ma-adokan pambarontakkan, dek karano, kito indak ado punyo alasan, untuak mampatagak-i urang-urang nan mambuwek kakacauan ko.” 41Sasudah mangatokan kasadonyo tu, mako, juru tulih kota tu manyuruah urang nan banyak tu bi pulang. RIWAYAIK RASUL-RASUL

will be added

X\