RIWAYAIK RASUL-RASUL 18

1Sasudah tu Paulus barangkek dari Atena, sarato payi ka Korintus. 2Tibo di sinan tu, inyo basuwo jo surang urang Yahudi, nan banamo Akwila, nan barasa dari nagari Pontus. Akwila baru sajo datang dari Italia, jo bininyo Priskila. Inyo tu bi datang ka Korintus, dek karano kaisar Klaudius lah mamarentahkan, supayo kasadonyo urang Yahudi musti kaluwa dari nagari Roma. Paulus payi mangunjuangi kaduwo urang nan balaki bini tu, 3mako, Paulus tingga di sinan tu jo inyo tu, sarato bakarajo samo-samo jo inyo tu, dek karano mato pancarian inyo tu, samo jo Paulus, iyolah mambuwek kemah. 4Tapi, di satiyok ari Sabat, Paulus payi bacurito-curito ka rumah ibadaik, untuak ma-usawokan supayo urang-urang Yahudi atau pun urang-urang Yunani, buliah picayo kabake Isa Almasih. 5Sasudah Silas jo Timotius tibo dari Makedonia, mako, Paulus mam-pagunokan kasadonyo wakatunyo, untuak mambaritokan kato-kato Allah kabake urang-urang Yahudi, baraso Isa Almasih tu adolah Rajo Panyalamaik nan dijanjikan dek Allah. 6Tapi, dek karano urang-urang tu tatauk juwo bi manyolang sarato jo mancacek inyo, mako Paulus mangipehkan kabuik nan di pakaiannyo sabagai tando, untuak mamparingekkan kasalahan urang-urang tu. Paulus bakato, ”Jikok angku-angku cilako, itu salah di angku-angku sandiri! Ambo lapeh tangan! Muloi dari sajak kiniko ambo ka payi kabake urang-urang nan indak urang Yahudi.” 7Mako, Paulus barangkek maninggakan urang-urang tu, sarato payi manompang tingga di rumah nan di subalah rumah ibadaik tu. Rumah tu adolah rumah urang nan indak urang Yahudi, tapi, inyo manyambah kabake Allah. Namonyo Titius Yustus. 8Tapi Krispus, kapalo rumah ibadaik tu, inyo sarato jo kasadonyo kaluarganyo, bi picayo kabake Tuhan Isa Almasih. Sarato banyak pulo lai urang-urang Korintus nan lainnyo, nan mandanga barito nan dibawok dek Paulus, nan inyo tu bi picayo kabake Isa Almasih, mako inyo tu dipamandikan. 9Pado suatu malam, dalam suatu pangliyatan, Tuhan bakato kabake Paulus, ”Janlah takuik! Mangecek sajolah taruih, jan anok sajo. 10Dek karano, Aden ka tatauk ado samo-samo jo angkau. Indak ka surang juwo doh urang, nan ka bisa mampabuwek nan jahek kabake angkau, dek karano sambuah urang nan di kota ko adolah umaik-Den.” 11Dek karano itu, Paulus manatauk di Korintus tangah duwo tawun lamonyo, inyo ma-ajakan kato-kato Allah kabake urang-urang nan di sinan tu. 12Kutiko Galio manjadi gubenur di Akhaya, urang-urang Yahudi basatu malawan Paulus, sarato nak ka mambawok inyo ka pangadielan. 13Urang-urang tu manuduah Paulus, jo tuduahan nan bakcando iko, ”Urang ko lah mampangaruahi urang nan banyak, inyo manyuruahkan supayo manyambah Allah jo caro nan balawanan jo paratuaran Musa!” 14Baitu Paulus nak ka manjawauk, Galio lah labiah dulu bakato kabake urang-urang Yahudi, ”Oih urang-urang Yahudi! Jikok nan dikadukan ko adolah suatu palanggaran atau suatu karajo jahek, iyo lah sapatuiknyo ambo manarimo pangaduan angku-angku ko. 15Tapi kiniko nan angku-angku kadukan adolah, patangkaran tantang kato-kato, tantang namo-namo, sarato jo paratuaran angku-angku sandiri! Jadi angku-angku sajolah nan samustinyo manyalasaikan. Ambo indak basadiyo doh ma-adieli parkaro-parkaro nan bakcando iko!” 16Sudah tu, Galio ma-usie urang-urang tu ka luwa. 17Mako, urang-urang tu manangkok Sostenes, kapalo rumah ibadaik tu, sarato manangani inyo di adok-an meja pangadielan. Tapi, Galio indak paduli saketek juwo doh jo kajadian tu. 18Sasudah kajadian tu, lamo juwo lai Paulus tingga di Korintus. Kamudian, inyo mangucaukkan salamaik tingga, kabake urang-urang ba-iman nan di sinan tu, sudah tu, inyo barangkek balayie jo Akwila, sarato jo Priskila ka Siria. Tibo di Kengkrea Paulus mancukua abuaknyo, nan salamo ko lah inyo padiyakan panjang, dek karano kawuanyo kabake Tuhan. 19Kutiko lah sampai di Efesus, Paulus maninggakan Akwila jo Priskila, nan inyo sandiri payi masuak ka rumah ibadaik, sambia batuka pandapek jo urang-urang Yahudi nan ado di sinan tu. 20Urang-urang tu mamintak, supayo Paulus agak lamo tingga jo inyo tu di sinan tu, tapi Paulus indak namuah. 21Biyapun baitu, di kutiko ka barangkek, Paulus mangatokan, ”Jikok Allah ma-ijinkan, ambo ka babaliak baliak ka mari.” Sasudah bakato bakcando itu, inyo barangkek dari Efesus. 22Baru lah turun di Kaisarea, inyo payi ka Yerusalem, untuak mambari salam kabake jamaat nan di sinan tu, sudah tu inyo taruih ka Antiokhia. 23Sasudah tingga di sinan tu babarapo lamo, inyo barangkek pulo ka daerah Galatia, sarato jo Frigia, untuak manguwaikkan iman urang-urang nan picayo. 24Samantaro itu, datanglah ka Efesus surang urang Yahudi nan layie di Aleksandria, namonyo Apolos. Inyo santiang mangecek, sarato sabana paham tantang isi Alkitauk, 25sarato lah di aja untuak mangatawui ajaran tantang Isa Almasih. Mako, jo sumangaik nan barapi-api, inyo ma-aja jo sacaro taliti tantang Isa Almasih, biyapun, hanyo caro dipamandikan Yahya sajo baru nan inyo katawui. 26Tapi, jo sacaro barani Apolos muloi babicaro di rumah ibadaik. Di kutiko Priskila jo Akwila mandanga pangajaran Apolos, mako, inyo tu mambawok Apolos ka rumah. Di sinan tu, inyo tu bi manarangkan kabake Apolos, jo sacaro nan labiah tapek lai, tantang rancana Allah untuak manyalamaikkan umaik manusia malalui Isa Almasih. 27Kamudian, Apolos bamukasuik nak payi ka Akhaya. Mako, dibuweklah surek untuak sudaro-sudaro nan ba-iman di Akhaya, dek urang-urang nan ba-iman kabake Isa Almasih, nan di Efesus, supayo inyo tu bi namuah manarimo Apolos. Di kutiko Apolos tibo di Akhaya, dek karano rahmaik nan dari Allah, ruponyo inyo manjadi urang nan sangaik paguno, dek urang-urang di sinan tu, nan lah bi ba-iman kabake Isa Almasih. 28Dek karano, jo sacaro nan sangaik bawibawa, Apolos mangalahkan urang-urang Yahudi, di kutiko badebaik-debaik di adok-an urang nan banyak. Inyo manunjuakkan malalui ayaik-ayaik Alkitauk, baraso Isa Almasih tu adolah Rajo Panyalamaik, nan lah dijanjikan dek Allah. RIWAYAIK RASUL-RASUL

will be added

X\