RIWAYAIK RASUL-RASUL 17

1Paulus jo Silas manaruihkan pajalanannyo malalui Amfipolis jo Apolonia, mako, tibolah inyo tu di Tesalonika. Di sinan tu ado rumah ibadaik urang Yahudi. 2Mako, Paulus payi ka rumah ibadaik tu — dek karano, bakcando itulah nan dipabuweknyo, jikok basuwo jo rumah ibadaik urang Yahudi — mako inyo batuka pandapek jo urang-urang nan ado di sinan tu, tantang ayaik-ayaik Alkitauk. Inyo pabuwek nan bakcando itu, sampai tigo kali ari Sabat batirik-tirik. 3Badasarkan ayaik-ayaik Alkitauk, inyo manarangkan, sarato jo manunjuakkan, baraso Rajo Panyalamaik nan dijanjikan dek Allah, musti manangguangkan sansaro dulu, sudah tu, Baliau iduik baliak sasudah mati. Paulus bakato, ”Isa Almasih nan ambo curitokan kabake angku-angku tu, Baliau tu lah Rajo Panyalamaik nan dijanjikan Allah.” 4Babarapo urang manjadi picayo, sudah tu inyo bi payi manuruikkan Paulus jo Silas; ado pulo sarombongan gadang urang-urang Yunani, nan bi takuik kabake Allah, sarato banyak pulo urang-urang padusi nan takamuko, nan lah bi picayo pulo. 5Tapi, urang-urang Yahudi bi bingik. Inyo tu bi ma-imbau pareman-pareman galau di jalan-jalan, sarato mambuwek garombolan pangacau. Sudah tu, inyo tu bi mambuwek eboh di kaciyek-annyo kota tu, sarato manyarang rumah surang urang ba-iman, nan banamo Yason, untuak mancari Paulus jo Silas, dek karano inyo tu nak ka mambawok Paulus jo Silas kaluwa, ka inyo adokkan ka urang banyak. 6Tapi, kutiko inyo tu indak bi manamukan Paulus jo Silas, mako, inyo tu bi ma-elokan Yason, sarato jo babarapo urang ba-iman lainnyo, inyo bawok ka adok-an pagawai-pagawai nan bakuwaso di kota tu. Inyo tu bi ma-ariakkan, ”Urang-urang ko lah mambuwek kacau dima-dimanyo! Kiniko inyo lah tibo pulo di kota kito ko, 7nan Yason lah mambawok tompang urang-urang ko di rumahnyo. Inyo ko kasadonyo, lah bi malangga sagalo apo nan lah ditataukkan dek Kaisar Roma, dek karano inyo bi mangatokan, baraso ado lai Rajo nan lain, nan banamo Isa Almasih.” 8Jo kato-katonyo nan bakcando itu, inyo tu mambuwek urang nan banyak, sarato jo sagalo panguwaso di kota tu, bi manjadi eboh. 9Mako panguwaso-panguwaso kota tu, manyuruah Yason, sarato jo urang-urang ba-iman nan lainnyo, supayo mambayie pitih jaminan. Sasudah tu, baru inyo tu dilapehkan. 10Malam tu, urang-urang ba-iman nan di kota tu, manyuruah Paulus jo Silas payi ka Berea. Satibonyo di sinan tu, Paulus jo Silas bi payi ka rumah ibadaik urang Yahudi. 11Urang-urang Yahudi nan di Berea, labiah tabukak atinyo daripado urang-urang Yahudi nan di Tesalonika. Jo sacaro sanang ati inyo tu bi mandangakan barito tantang Isa Almasih, satiyok ari inyo tu bi manyalidiak-i isi Alkitauk, supayo dapek mangatawui, apokoh iyo lai batua pangajaran Paulus tu. 12Banyak di antaro inyo tu nan bi ba-iman kabake Isa Almasih, indak saketek pulo urang-urang Yunani nan takamuko, nan bi manjadi urang nan ba-iman; biya padusi atau pun laki-laki. 13Kutiko urang-urang Yahudi nan di Tesalonika mandanga kaba, baraso Paulus mangabakan kato-kato Allah pulo di Berea, mako inyo tu bi datang pulo ka Berea, untuak ma-asuang, supayo mambuwek urang-urang nan di sinan tu bi rasah. 14Tapi, sudaro-sudaro nan di Berea tu bagageh untuak ma-antakan Paulus ka tapi pantai, sadangkan nan Silas jo Timotius tatauk tingga di sinan tu. 15Sasudah ma-antakan Paulus sampai ka Atena, nan sudaro-sudaro tu babaliak ka Berea, sambia mambawok pasan dari Paulus, supayo sacapeknyo Silas jo Timotius, manuruik-inyo ka Atena. 16Samantaro Paulus manantikan Silas jo Timotius di Atena, atinyo sadiah sangaik, dek maliyek di kota tu sambuah bana patuang. 17Dek karano itu, tibo di rumah ibadaik Paulus batuka pandapek jo urang-urang Yahudi, sarato jo urang-urang nan lain, iyolah urang-urang nan ba-ibadaik kabake Allah. Baitu pulo di pasa-pasa, satiyok ari pulo inyo batuka pandapek jo urang-urang nan ado di sinan tu. 18Guru-guru dari aliran Epikuros, sarato jo aliran Stoa, badebaik pulo jo Paulus. Babarapo urang dari inyo tu bi bakato, ”Apo pulo nan ka tantu dek paja ko? Pangatawuannyo hanyo sagalemeng, tapi, curitonyo banyak pulo!” Babarapo urang nan lain bi bakato, ”Ruponyo, inyo mancuritokan tantang dewa-dewa banso lain.” Mangkonyo urang-urang tu bi bakato bakcando itu, dek karano Paulus mambaritokan tantang Isa Almasih, sarato tantang iduik baliak sasudah mati. 19Mako, urang-urang tu mambawok Paulus ka tampaik patamuan, di Bukik Areopagus. Tibo di sinan tu, inyo tu bi bakato kabake Paulus, ”Kami nak niyo tawu tantang pangajaran baru, nan angkau baritokan tu. 20Sabauk angkau mangamukokan, sagalo parkaro nan agak ganjie tadanganyo di talingo kami. Dek karano itu, kami nak niyo tawu, apo arati nan sabananyo.” ( 21Dek karano, kasadonyo urang Atena, sarato jo urang-urang marantau nan tingga di sinan tu, sangaik sukonyo ma-abihkan ari-ari luwangnyo, untuak mandangakan, sarato jo ma-ota-ota tantang parkaro-parkaro nan baru.) 22Kutiko Paulus tagak di adok-an urang-urang nan bakumpua di Areopagus tu, inyo bakato, ”Oih angku-angku urang Atena! Ambo liyek angku-angku dalam sagalo parkaro, bakcando urang nan siyak ba-ugamo. 23Dek karano, kutiko ambo bajalan-jalan, bakuliliang di kota angku-angku ko, sambia mamparatikan tampaik-tampaik sumbayang angku-angku, mako nampak pulolah di ambo sabuwah tampaik untuak mampasambahkan karoban; di sinan ado tatulih, ’Kabake Allah Nan Indak Tantu Dek Kami.’ Nah, baa pulo tu angku-angku manyambah Allah, tapi, angku-angku indak bakatawuan doh jo Baliau, Baliau tu lah, nan ambo baritokan kabake angku-angku. 24Allah nan manjadikan bumi ko, sarato jo sagalo isinyo, Baliau-lah Tuhan langik jo bumi ko. Baliau indak tingga di rumah-rumah dewa nan dibuwek dek manusia doh. 25Baliau indak mamaralukan bantuan manusia, dek karano Baliau-lah nan mambari iduik, sarato jo angok, sarato jo sagalo sasuatu kabake manusia. 26Dari surang manusia, Baliau jadikan sagalo banso, sarato manyuruah inyo tu bi ma-uni bumi ko kaciyek-annyo. Baliau pulolah nan lah manantukan sajak dari samulo, pabilo masonyo, sarato dima inyo tu buliah bi iduik. 27Allah mampabuwek nan bakcando itu, supayo umaik mukaluak mancari Baliau. Mudah-mudahan inyo tu bi batamu jo Baliau, pado wakatu inyo tu sadang bi mancari-cari Baliau. Tapi, nan sabananyo, Allah tu indak jauah doh dari satiyok-tiyok kito. 28Bakcando nan dikatokan urang, ’Kito iduik, sarato kito manggarik, sarato kito ado di dunie ko, kasadonyo tu, adolah dek karano kuwaso Baliau.’ Samo pulo jo apo nan dikatokan, dek babarapo urang tukang syair angkau. Inyo tu bi bakato, ’Kasadonyo kito ko, adolah anak-anak Baliau.’ 29Dek karano kito ko adolah anak-anak Allah, mako, kito indak buliah doh ma-anggauk Allah tu, samo jo patuang nan dibuwek dari ameh, atau dari perak, atau dari batu, nan dibuwek manuruik kapandaian manusia. 30Maso-maso ka-ongok-an kito lah dilupokan dek Allah, tapi, nan kiniko Allah manyuruah kasadonyo urang di muko bumi ko, supayo bi batobaik dari doso-doso inyo tu. 31Dek karano, Allah lah manantukan suatu kutiko, untuak ka ma-adieli kasadonyo umaik mukaluak ko, jo sacaro adie. Tugeh tu ka dikarajokan dek surang Urang, nan sangajo lah dipiliah dek Allah untuak itu. Supayo kasadonyo urang buliah yakin jo parkaro tu, mako Allah, lah ma-iduikkan baliak, Baliau nan dibari tugeh tu, sasudah Baliau mati!” 32Kutiko urang-urang tu mandanga, tantang parkaro iduik baliak sasudah mati, mako, ado di antaro inyo tu nan manggalakkan Paulus. Ado pulo nan bakato, ”Kami niyo nak mandangakan baliak tantang parkaro iko.” 33Sudah tu, Paulus barangkek dari tampaik patamuan tu. 34Tapi, ado di antaro urang-urang tu nan bapiyak kabake Paulus, sarato picayo kabake Isa Almasih, di antaronyo adolah: Dionisius, anggota karapatan Areopagus, sarato surang padusi nan banamo Damaris, sarato babarapo urang lai. RIWAYAIK RASUL-RASUL

will be added

X\