RIWAYAIK RASUL-RASUL 16

1Paulus manaruihkan paja-lanannyo ka Derbe, kamudian taruih ka Listra. Di sinan tu ado surang pangikuik Isa Almasih nan banamo Timotius. Mandehnyo urang Yahudi, nan lah ba-iman kabake Isa Almasih; tapi apaknyo urang Yunani. 2Di antaro urang-urang ba-iman nan tingga di Listra, sarato jo di Ikonium, mako, Timotius-lah nan tamusawua sabagai urang nan elok. 3Paulus niyo supayo Timotius payi jo inyo; dek karano itu, inyo manyunaikkan Timotius. Inyo mampabuwek nan bakcando itu, dek karano, kasadonyo urang-urang Yahudi di daerah tu lah tawu, baraso apak Timotius adolah urang Yunani. 4Disatiyok-tiyok kota nan disinggahi dek inyo tu, mako, inyo tu manyampaikan kabake urang-urang ba-iman nan di sinan tu, sagalo kaputusan-kaputusan nan lah diputuihkan dek rasul-rasul, sarato jo pamimpin-pamimpin di Yerusalem. Inyo tu bi mambari nasiyaik supayo sudaro-sudaro nan lah ba-iman tu, tatauk mamatuahi sagalo paratuaran tu. 5Mako, batambah kuwaiklah imannyo jamaat-jamaat tu, nan di satiyok ari bilangannyo samakin batambah. 6Roh Allah indak mambuliahkan Paulus jo Silas, untuak mambaritokan kato-kato Allah di propinsi Asia. Mako, inyo tu bi manaruihkan pajalanannyo ka daerah Frigia, sarato ka daerah Galatia. 7Kutiko tibo di pabatehan Misia, inyo tu mancubo masuak ka propinsi Bitinia, tapi, Roh Isa Almasih managah inyo tu untuak payi ka sinan tu. 8Jadi, inyo tu hanyo lalu sajo di Misia, sudah tu inyo lansuang ka Troas. 9Malamnyo, di Troas, Paulus mandapek suatu pangliyatan. Dalam pangliyatan tu, inyo manampak surang urang Makedonia, tagak di adok-annyo sambia mambana, supayo Paulus namuah payi ka Makedonia, untuak manolong urang-urang nan di sinan tu. 10Sasudah Paulus ma-ndapek pangliyatan tu, mako, kami lansuang basegeh-segeh untuak payi ka Makedonia. Dek karano, kami sabana yakin baraso Allah nan manyuruah kami, itu mangkonyo kami ambiak kasimpualan untuak payi mambaritokan Injil kabake urang-urang nan di sinan tu. 11Kami barangkek dari Troas, sarato balayie lansuang ka Samotrake, sarato bisuak arinyo ka Neapolis. 12Dari sinan tu kami ka Filipi, sabuwah kota di kabupaten nan partamu di Makedonia. Filipi adolah jajahan karajaan Roma. Kami tingga di sinan tu babarapo ari. 13Di ari Sabat, kami payi ka tapi batang ayie di luwa pintu kaporo kota, dek karano ati kami badatak, baraso di sinan tu ado tampaik sumbayang urang Yahudi. Mako, kami duduak sambia mangecek-ngecek, jo urang-urang padusi nan bi bakumpua di tampaik tu. 14Salah surang di antaro urang-urang padusi tu, adolah urang panggaleh kain kulabu bungo taruang, namonyo Lidia, inyo barasa dari Tiatira. Inyo adolah urang nan saliah ba-ibadaik kabake Allah, mako, Tuhan manggarakkan atinyo, supayo inyo manarimo sagalo apo nan di-ajakan dek Paulus. 15Mako, Lidia sarato jo urang nan sa-isi rumahnyo dipamandikan. Sasudah dipamandikan, inyo mambawok kami singgah ka rumahnyo. Inyo bakato, ”Jikok manuruik pandapek angku-angku, ambo ko iyo lah sabana-bana ba-iman kabake Isa Almasih, molah manompang di rumah ambo.” Sudah tu, inyo mandasak supayo kami mampalakukan pintaknyo. 16Pado suatu ari, kutiko kami sadang ka payi ka tampaik badowa, mako, kami basuwo jo surang padusi; inyo adolah pisuruah. Urang padusi tu dikuwasoi dek roh jahek, nan bisa manakok kajadian, nan ka tajadi. Jo karajo manakok-nakok nasib urang, inyo banyak mandatangkan ka-untuangan untuak induak-induak samangnyo. 17Urang padusi tu taruih bajalan manuruikkan Paulus, sarato jo kami, sambia ma-ariak-ariak, ”Urang-urang ko adolah pisuruah Allah Nan Mahatenggi! Inyo ko bi datang untuak ma-agiah tawu kabake Sudaro-sudaro, baa caranyo supayo Sudaro-sudaro dapek disalamaikkan!” 18Ado babarapo ari lamonyo, urang padusi tu ma-ariak-ariak taruih bakcando itu. Nan Paulus lah indak saba lai, sainggo inyo ma-engong ka balakang, sudah tu, bakato kabake roh tu ”Ateh namo Isa Almasih, den parentahkan angkau, kaluwalah dari urang padusi ko!” Sakutiko tu juwo, roh tu kaluwa dari urang padusi tu. 19Kutiko induak-induak samangnyo tawu, baraso kasampatan untuak mandapekkan pitih, indak ka mungkin lai, mako, inyo tu manangkok Paulus, sarato jo Silas, sudah tu, mambawok kaduwo-duwonyo ka tanah lapang, untuak mangadauk ka panguwaso. 20Urangurang tu mambawok Paulus jo Silas, kabake pagawai-pagawai pamarentah Roma, kamudian inyo tu bi bakato, ”Urang-urang ko adolah urang Yahudi. Inyo bi mambuwek kacau di kota kito. 21Inyo tu bi manyuruah urang untuak mangarajokan adaik kabiasoan, nan balawanan jo sagalo paratuaran kito urang-urang Roma. Kito indak bisa doh manarimo, atau manuruikkan adaik kabiasoan tu!” 22Urang nan banyak pun sato pulo manyarang Paulus jo Silas; pagawai-pagawai pamarentah, bi mancabiak-i pakaian nan di badan kaduwo urang rasul tu, sudah tu, manyuruah urang mancambuik inyo tu. 23Sasudah inyo tu dicambuik sajadi-jadinyo, mako, inyo tu dimasuakkan ka pinjaro. Kapalo pinjaro disuruah manjago arek kaduwo urang rasul tu. 24Dek karano parentah tu, mako, kapalo pinjaro mamuruakkan Paulus jo Silas, di biliak pinjaro nan paliang di dalam, sarato mampilanggu kaki inyo tu di kayu balok. 25Di tangah malam, Paulus jo Silas sadang badowa, sarato man-dendangkan lagu puji-pujian kabake Allah. Urang-urang tahanan nan lainnyo, bi mandangakan pulo den-dangan pujian inyo tu. 26Indak disangko-sangko, mako tajadilah gampo nan kuwaik sangaik, sampai jo sandi-sandi pinjaro tu pun sato pulo bagoyak. Kasadonyo pintu pinjaro tu bi tabukak, sarato kasadonyo rantai nan mangabek urang tahanan tu, bi talapeh. 27Kapalo pinjaro tasintak dek takajuik. Kutiko inyo maliyek pintu-pintu pinjaro lah bi tabukak, mako, inyo mancabuik padangnyo, untuak ka mambunuah diri, dek karano inyo manyangko, urang-urang tahanan lah bi lari kasadonyo. 28Tapi, Paulus ma-ariak sakuwaik-kuwaiknyo, ”Oih, jan mambunuah diri! Kami layi di siko juwo lai kasadonyo!” 29Kapalo pinjaro tu mamintak suluah, sudah tu inyo balari ka dalam, nan badannyo lah manggaretek, inyo tasungkua di adok-an Paulus jo Silas. 30Kamudian, inyo mambawok Paulus jo Silas kaluwa, sarato bakato, ”Oih angku-angku, apo nan musti ambo pabuwek, supayo ambo disalamaikkan?” 31Paulus jo Silas manjawauk, ”Picayolah kabake Tuhan Isa Almasih! Angkau ka salamaik — angkau sarato jo kasadonyo urang nan di rumah angkau!” 32Mako, Paulus jo Silas manarangkan kato-kato Tuhan kabake kapalo pinjaro tu, sarato jo kasadonyo urang nan ado di rumahnyo. 33Di tangah malam tu juwo, Paulus jo Silas dibawok dek kapalo pinjaro tu, untuak mambarasiahkan luko-luko inyo tu. Mako, kapalo pinjaro, sarato jo kasadonyo urang nan di rumahnyo, lansuang dipamandikan. 34Kamudian, inyo mambawok Paulus jo Silas ka rumahnyo, sarato ma-edangkan makanan kabake inyo tu. Sabana sanang ati kapalo pinjaro, sarato jo kasadonyo kaluarganyo, dek karano, inyo tu kiniko lah bi ba-iman kabake Allah. 35Bisuak arinyo, pagawai-pagawai pamarentah Roma ma-utuih patugeh kota ka pinjaro, untuak manyampaikan parentah supayo Paulus jo Silas dilapehkan. 36Kapalo pinjaro manyampaikan kaba tu kabake Paulus. Inyo bakato, ”angku-angku, pagawai-pagawai pamarentah, lah mambari parentah untuak malapehkan angku-angku. Kiniko angku-angku buliah pulang. Salamaik jalan!” 37Tapi, Paulus bakato kabake patugeh-patugeh tu, ”Kami ko adolah warga karajaan Roma. Indak tarago malalui sidang, kami lah dicambuik di adok-an urang banyak, sarato dimasuakkan ka pinjaro. Kiniko pagawai-pagawai tu ka malapehkan kami jo sacaro ba-anok-anok? Kami indak namuah doh! Suruahlah pagawai-pagawai pamarentah tu datang kamari, nan ka malapehkan kami.” 38Mako, patugeh-patugeh tu malaporkan masalah tu kabake pagawai-pagawai pamarentah Roma. Kutiko pagawai-pagawai tu mandanga, baraso Paulus jo Silas warga karajaan Roma, inyo tu bi tabik takuik. 39Sudah tu, inyo tu bi payi mintak maoh kabake Paulus jo Silas, kamudian, ma-antakan kaduwo urang rasul tu kaluwa dari pinjaro, sarato mambana supayo inyo tu bi maninggakan kota tu. 40Paulus jo Silas barangkek dari pinjaro, sudah tu, payi ka rumah Lidia. Baru lah basuwo jo urang-urang ba-iman nan di sinan tu, sarato mambari sumangaik kabake inyo tu, sudah tu, Paulus jo Silas bi barangkek. RIWAYAIK RASUL-RASUL

will be added

X\