RIWAYAIK RASUL-RASUL 15

1Babarapo urang dari Yudea bi tibo ka Antiokhia, sarato ma-ajakan nan bakcando iko, kabake urang-urang ba-iman nan di Antiokhia tu, jikok inyo tu indak disunaikkan manuruik paratuaran Musa, inyo indak dapek doh disalamaikkan. 2Paulus jo Barnabas manantang kareh pandapek urang-urang tu. Akienyo disupakaik-ilah, supayo Paulus jo Barnabas, sarato jo babarapo urang nan dari Antiokhia tu, payi ka Yerusalem untuak mambicarokan masalah tu jo rasul-rasul sarato jo pamimpin-pamimpin nan di sinan tu. 3Jamaat nan di Antiokhia payi ma-antakan urang-urang tu sampai kaluwa kota, kamudian, inyo tu bi taruih ka Fenisia, sarato jo Samaria. Tibo di sinan, inyo tu mancuritokan, baa caronyo urang-urang nan indak urang Yahudi, lah bi manyarahkan diri kabake Allah. Barito tu sangaik manggadangkan ati urang-urang ba-iman nan di sinan tu. 4Kutiko inyo tu sampai di Yerusalem, inyo tu disambuik jo sacaro elok dek jamaat, sarato dek rasul-rasul, sarato dek pamimpin-pamimpin. Mako, inyo tu mancuritokan kabake urang-urang tu, tantang kasadonyo, apo nan lah dipabuwek dek Allah malalui inyo tu. 5Tapi, babarapo urang dari golongan Farisi, nan lah ba-iman, bi tagak sambia bakato, ”Urang-urang banso lain nan lah ba-iman tu, inyo musti disunaikkan, sarato diwajibkan ma-ikuik-i paratuaran Musa.” 6Mako, rasul-rasul, sarato jo pamimpin-pamimpin bi bakumpua, untuak mambicarokan masalah tu. 7Sangaik lamonyo urang-urang tu mamparundiangkan. Akienyo tagaklah Petrus sambia bakato, ”Sudaro-sudaro! Angku-angku sandiri tawu, baraso sajak dari samulo, Allah lah mamiliah ambo di antaro kito kasadonyo, untuak ka mangabakan Injil kabake urang-urang nan indak urang Yahudi, supayo Kaba Baiak tu sampai kabake inyo tu, supayo inyo tu manjadi urang nan ba-iman pulo. 8Allah nan mangatawui isi ati manusia, lah ma-agiah tawu, baraso Baliau manarimo urang-urang nan indak urang Yahudi tu. Allah lah manyatokan, jo sacaro Baliau mambarikan Roh-Nyo kabake urang-urang tu, samo jo bakcando nan Baliau barikan kabake kito. 9Allah indak mampalainkan doh, antaro kito jo urang-urang tu. Baliau lah manyucikan ati urang-urang tu, dek karano inyo tu bi picayo. 10Jikok baitu, baa mangko kiniko angku-angku nak malawan kahandak Allah, jo sacaro mambarikan baban nan barek kabake pangikuik-pangikuik nan baru ko, padohal di niniak muyang kito, sarato dek kito sandiri, indak talok doh mamikuanyo? 11Sabaliaknyo, dek karano kito ba-iman, mangkonyo kito disalamaikkan, dek karano raso ibo dari Tuhan Isa Almasih; baitu pulo kabake urang-urang tu.” 12Mako bi ta-anoklah kasadonyo urang nan bi bakumpua di sinan tu. Kamudian, inyo tu bi mandangakan Barnabas jo Paulus, mancuritokan baliak kasadonyo mukjizat, sarato jo sagalo parkaro nan luwa biaso, nan lah dipabuwek dek Allah malalui inyo tu, di tangah-tangah banso lain nan indak urang Yahudi. 13Sasudah inyo tu salasai mangecek, mako, Yakobus bakato, ”Oih Sudaro-sudaro! Cubolah dangakan ambo mangecek. 14Simon lah manarangkan kabake kito, baa sabarmulonyo Allah ma-arahkan paratian-Nyo kabake urang-urang nan indak urang Yahudi, nan mukasuik-Nyo adolah untuak mamiliah urang-urang nan lain, ka manjadi umaik-Nyo. 15Itu sasuwai jo apo nan lah dinubuwaikkan dek nabi-nabi. Dek karano ado tatulih nan bakcando iko, 16’Sasudah tu Aden ka tibo baliak,' kecek Tuhan, ’Aden ka mambangun kemah Daud nan lah runtuah, nan lah runtuah tu ka Den paelok-i, sudah tu ka Den tagakkan baliak; 17supayo kasadonyo urang nan lain, bi mancari Tuhan, samo-samo jo kasadonyo banso nan indak urang Yahudi, nan lah Den imbau untuak ka manjadi umaik-Den.’ Bakcando itulah Tuhan bakato, 18nan lah ma-agiah tawu parkaro tu, sajak dari sa-isuak.” 19”Jadi, manuruik pandapek ambo, ” kecek Yakobus, ”kito indak buliah doh mampaseso urang-urang nan indak urang Yahudi tu, inyo nan lah bi manyarahkan diri kabake Allah. 20Tapi, kito musti mambuwek surek kabake inyo tu, untuak manasiyaik-i, supayo inyo tu jan bi mamakan, makanan nan najih, nan lah dipasambahkan kabake barhalo, atau mamakan dagiang binatang nan mati dicakiak, atau makan darah. Ciyek lai pulo, supayo inyo tu bi manjauahkan diri dari sagalo karajo nan cabua. 21Dek karano paratuaran Musa, lah sajak dari sa-isuak dibacokan disatiyok ari Sabat, di rumah-rumah ibadaik, sarato dibaritokan pulo dikasadonyo kota.” 22Rasul-rasul sarato jo pamimpin-pamimpin, samo-samo jo kasadonyo anggota jamaat tu, lah mamutuihkan untuak mamiliah babarapo urang dari inyo tu, untuak nan ka di-utuih ka Antiokhia, samo-samo jo Paulus, sarato jo Barnabas. Mako, inyo tu bi mamiliah Silas, sarato jo Yudas, nan dinamokan pulo Barsabas. Kaduwo urang ko, adolah urang-urang nan takamuko di antaro urang-urang nan ba-iman di Yerusalem. 23Samo-samo jo urang-urang utusan tu, inyo tu mangirinkan pulo sapucuak surek nan bunyinyo bakcando iko, ”Kabake sudaro-sudaro kasadonyo, nan barasa dari banso-banso nan indak urang Yahudi, nan tingga di Antiokhia, di Siria, sarato jo nan di Kilikia. Salam dari kami rasul-rasul, sarato jo pamimpin-pamimpin, nan kami adolah dunsanak-dunsanak angkau juwo. 24Kami mandanga kaba, baraso ado babarapo urang di antaro kami, nan lah datang kabake angkau, sarato mambuwek rasah, sarato mambuwek angkau tabik ragu jo ajaran inyo tu. Padohal kami indak ado doh manyuruah nan bakcando itu. 25Dek karano itu, kami lah barundiang, kasadonyo kami lah supakaik, untuak mamiliah babarapo urang nan ka di-utuih kabake angkau. Urang nan kami utuih tu, inyo barangkek samo-samo jo sudaro kito, Barnabas sarato jo Paulus nan kami kasiahi. 26Kaduwo urang ko, adolah urang-urang nan lah mangalangkan mariahnyo, dek karano di Tuhan kito Isa Almasih. 27Mako, kami ma-utuih Yudas, sarato jo Silas kabake sudaro-sudaro. Inyo ko lah nan ka manyampaikan sacaro lansuang jo muluiknyo kabake angkau, tantang isi barito nan tatulih dalam surek ko. 28Roh Allah lah manyatujui — kami layi satuju pulo — supayo angkau jan dibari baban nan labiah barek, salain daripado kawajiban nan sabana-bana paralu: 29janlah dimakan, makanan nan lah dipasambahkan kabake barhalo; janlah dimakan darah, janlah dimakan dagiang binatang nan mati dicakiak, jauahilah karajo-karajo nan cabua. Jikok angkau layi bi manjauahkan diri, dari sagalo karajo nan buruak tu, ba-arati angkau lah mangarajokan karajo nan baiak. Cukuik sakian sajo, mudah-mudahan salamaik!” 30Sasudah ba payilah ba tinggalah, mako, urang-urang nan di-utuih tu, barangkek ka Antiokhia. Tibo di sinan tu, inyo tu ma-imbau kasadonyo anggota jamaat untuak bakumpua, sudah tu, manyampaikan surek tu. 31Kutiko anggota-anggota jamaat mambaco isi surek tu, iyo bana sanang atinyo, dek karano isi surek tu ma-angekkan ati inyo tu. 32Nan Yudas jo Silas ko, adolah nabi pulo, inyo tu lamo mangecek jo sudaro-sudaro nan ba-iman di Antiokhia tu, untuak mambari sumangaik, sarato jo kabaranian kabake urang-urang tu. 33Sasudah Yudas jo Silas di sinan tu babarapo lamo, mako, urang-urang ba-iman nan di Antiokhia tu, malapeh inyo tu babaliak, sambia bakirin salam kabake urang-urang nan ma-utuih inyo tu. [ 34Tapi, nan Silas mamutuihkan untuak manatauk di Antiokhia.] 35Paulus jo Barnabas, tingga pulo babarapo lamo di Antiokhia. Salamo inyo tu di sinan tu, inyo tu samo-samo jo urang banyak nan lain, bi ma-aja sarato jo mambaritokan kato-kato Tuhan. 36Indak babarapo lamo sasudah tu, mako, Paulus bakato kabake Barnabas, ”Molah kito payi baliak, untuak mancaliak ka-adaan sudaro-sudaro kito nan ba-iman kabake Isa Almasih, di kota-kota nan lah kito jalani, kutiko kito mambaritokan kato-kato Tuhan dulu; supayo kito tawu baa ka-adaan inyo tu kiniko.” 37Barnabas niyo pulo nak mambawok Yahya Markus, 38tapi, Paulus maraso indak elok mambawok Markus, nan indak namuah bakarajo samo-samo jo inyo tu, sarato maninggakan sajo Paulus jo Barnabas di Pamfilia. 39Mako, Paulus jo Barnabas batangka kareh, sainggo akienyo inyo tu bapisah: Barnabas mambawok Markus payi balayie samo jo inyo ka Siprus. 40Nan Paulus ma-ajak Silas, sudah tu, sudaro-sudaro nan di Antiokhia tu manyarahkan inyo tu kabake rahmaik Tuhan, sudah tu, baru inyo tu bi barangkek. 41Inyo tu bi payi manguliliangi Siria, sarato jo Kilikia; tibo di sinan tu, inyo tu bi manguwaikkan iman jamaat. RIWAYAIK RASUL-RASUL

will be added

X\