RIWAYAIK RASUL-RASUL 14

1Tibo di Ikonium, Paulus jo Barnabas basuwo pulo jo masalah nan bakcando dulu. Inyo tu bi payi pulo ka rumah ibadaik urang Yahudi, inyo tu bi mangecek pulo bakcando nan talah sudah, sainggo banyak urang Yahudi, sarato jo urang nan indak Yahudi, nan bi picayo kabake Isa Almasih. 2Tapi, urang-urang Yahudi nan indak namuah picayo, inyo tu bi ma-asuang-i urang nan indak urang Yahudi, sainggo urangurang tu jajok kabake urang nan ba-iman kabake Isa Almasih. 3Dek karano itu, Paulus jo Barnabas agak lamo di sinan tu. Inyo tu jo sacaro barani babicaro tantang Tuhan. Mako, Tuhan pun manyatokan pulo kuwaso-Nyo, baraso, barito tantang kasiah Tuhan nan dikabakannyo tu, iyo sabana-bana batua; Tuhan mambarikan kuwaso kabake inyo tu untuak bi mampabuwek mukjizat-mukjizat, sarato jo sagalo parkaro nan luwa biaso. 4Tapi, panduduak kota tu, bi balawan sasamo inyo; ado nan bapiyak kabake urang-urang Yahudi, ado pulo nan bapiyak kabake rasul-rasul. 5Mako, urang-urang Yahudi, sarato jo pamimpin-pamimpinnyo, samo-samo jo urang-urang nan indak urang Yahudi, bi basupakaik untuak ka manangani, sarato ka mamungkangi rasul-rasul tu jo batu. 6Tapi, rasul-rasul tu tawu, jo rancana urang-urang tu, mako, inyo tu bi ma-inda ka Listra, sarato jo ka Derbe, iyolah kota-kota di Likaonia, sarato ka daerah di sakuliliangnyo. 7Tibo di sinan tu, inyo tu bi mambaritokan Injil pulo. 8Di Listra ado surang laki-laki, nan kakinyo lah lumpuah sajak dari layienyo, sainggo inyo alun panah bisa bajalan, dek karano kakinyo sangaik lamah. 9Urang tu duduak di sinan tu mandangakan Paulus mangecek. Paulus maliyek baraso urang tu picayo, nan dek karano itu urang tu dapek dicegakkan. Paulus mancaliak kabake urang tu, 10jo suwaro nan kuwaik Paulus bakato, ”Tagaklah jo kaki angkau!” Mako, urang tu manggalosang tagak, sudah tu inyo bajalan. 11Kutiko urang nan banyak lah maliyek, apo nan dipabuwek dek Paulus, mako, inyo tu bi basorak dalam bahaso Likaonia, ”Dewa-dewa lah turun ka dunie dalam ujuik manusia.” 12Mako, inyo tu bi manamokan Barnabas Zeus, nan Paulus inyo namokan Hermes, dek karano inyolah nan mangecek. 13Imam dewa Zeus, nan kuilnyo talatak di adok-an kota, tibo mambawok babarapo ikua jawi jantan, sarato jo karangan bungo ka pintu kaporo kota. Inyo nak sato pulo samo jo urang nan banyak tu, untuak mampasambahkan karoban kabake rasul-rasul. 14Kutiko Barnabas jo Paulus ma-ndanga, apo nan nak ka dipabuwek dek urang-urang tu, mako, inyo balari ka tangah-tangah urang nan banyak tu, sambia mancabiak-i bajunyo, sarato jo ma-ariak, 15”Oih angkau kasadonyo, baa mangko angkau pabuwek nan bakcando iko? Kami ko manusia biaso pulo nyo ko, samo jo bakcando angkau! Kami datang kamari untuak mambaritokan Injil kabake angkau, supayo angkau ma-antikan karajo-karajo nan indak bapayidah, sarato datanglah kabake Allah nan iduik, nan manjadikan langik jo bumi, sarato lauik jo sagalo isinyo. 16Pado maso nan lampau, Allah mampadiyakan sajo banso-banso iduik manuruik sasuko atinyo surang-surang. 17Tapi, Allah indak lupo doh mambari tando-tando, tantang adonyo diri-Nyo, iyolah jo sacaro babuwek baiak. Baliau manurunkan ujan dari langik, Baliau mambari asie tinaman pado musinnyo, untuak angkau. Baliau manyadiyokan makanan untuak angkau, nan ati angkau disanangkan pulo.” 18Tapi, jo kato-kato nan bakcando itu pun, sulik juwo lai dek rasul-rasul tu managahkan urang-urang tu, untuak mampasambahkan karoban kabake inyo tu. 19Babarapo urang Yahudi nan datang ka Listra dari Antiokhia di Pisidia, sarato nan dari Ikonium, inyo tu bi mampangaruahi urang nan banyak tu, sainggo urang banyak tu bapiyak kabake inyo tu. Urang-urang tu mamungkangi Paulus jo batu, kamudian, inyo irik kaluwa kota. Inyo tu bi manyangko Paulus lah mati, 20tapi, di kutiko urang-urang ba-iman bi tagak di sakuliliang Paulus, inyo tasintak, mako babaliaklah inyo ka kota. Bisuak arinyo inyo barangkek ka Derbe, samo-samo jo Barnabas. 21Di Derbe Paulus jo Barnabas mambaritokan Injil, sambuah urang nan manjadi picayo kabake Isa Almasih. Sasudah tu, inyo tu babaliak ka Listra, kamudian ka Ikonium, sudah tu ka Antiokhia di Pisidia. 22Di kota-kota tu, inyo tu bi manguwaikkan ati pangikuik-pangikuik Isa Almasih, sarato mambari nasiyaik kabake urang-urang tu, supayo tatauk taguah ba-iman kabake Isa Almasih. ”Sambuah parasaian nan ka ditangguangkan dulu, sabalun kito marasokan sukocito Karajaan Allah, ” bakcando itulah rasul-rasul tu, mambari pangajaran kabake pangikuik-pangikuik Isa Almasih nan di kota-kota tu. 23Di satiyok-tiyok jamaat, Paulus jo Barnabas ma-angkek pamimpin-pamimpin, untuak jamaat-jamaat tu. Sudah tu, jo sacaro badowa, sarato jo bapuwaso, inyo tu bi manyarahkan pamimpin-pamimpin tu kabake Tuhan nan inyo tu picayo-i. 24Sasudah tu, Paulus jo Barnabas manaruihkan pajalanan, inyo tu bi malalui daerah Pisidia, sarato taruih ka Pamfilia. 25Sasudah inyo tu bi mambaritokan kato-kato Allah di Perga, mako, inyo tu payi ka Atalia. 26Dari sinan tu, inyo tu balayie baliak ka Antiokhia. Itulah kota tampaik inyo tu dulu, disarahkan kabake rahmaik Allah, supayo inyo tu bi mangarajokan karajo, nan kiniko lah disalasaikan dek inyo tu. 27Kutiko lah tibo di Antiokhia, inyo tu bi mangumpuakan urang-urang dari jamaat tu, sudah tu, inyo tu bi mancuritokan kasadonyo, apo nan lah dipabuwek dek Allah malalui inyo tu. Inyo tu bi mancuritokan pulo, tantang baa caronyo Allah lah mambukak jalan, supayo urang-urang nan indak urang Yahudi, bi picayo kabake Isa Almasih. 28Lamo juwo Paulus jo Barnabas, bi tingga samo-samo jo urang-urang ba-iman nan di kota tu. RIWAYAIK RASUL-RASUL

will be added

X\