RIWAYAIK RASUL-RASUL 13

1Di dalam jamaat di Antiokhia, ado nabi-nabi, sarato jo guru-guru, iyolah Barnabas, Simeon, nan bagala si Itam, Lukius dari Kirene, Menahem nan digadangkan samo-samo jo Rajo Herodes, sarato jo Saulus. 2Kutiko urang-urang tu sadang ba-ibadaik kabake Tuhan, sarato jo bapuwaso, mako, Roh Allah bakato kabake inyo tu, ”Piliahlah Barnabas, sarato jo Saulus, nan sangajo untuak Den, supayo inyo tu bi mangarajokan, karajo nan lah Den tantukan untuak inyo tu.” 3Sasudah bapuwaso sarato jo badowa, inyo tu bi malatakkan tangan kabake Barnabas, sarato jo Saulus, sudah tu, ma-utuih kaduwo urang tu. 4Dek karano di-utuih dek Roh Allah, mako, Barnabas jo Saulus payi ka Seleukia. Dari sinan tu inyo tu balayie ka pulau Siprus. 5Kutiko sampai di Salamis, inyo tu bi mambaritokan kato-kato Allah, di rumah-rumah ibadaik urang Yahudi.Yahya Markus manolong inyo dalam pajalanan inyo tu. 6Kaciyek-annyo pulau tu dijalani dek inyo tu, sampai ka Pafos. Di sinan tu, inyo tu basuwo jo surang urang Yahudi, nan banamo Baryesus. Inyo adolah tukang sihie, nan mangaku sabagai nabi. 7Sergius Paulus, gubenur pulau tu, adolah konco arek tukang sihie tu. Gubenur tu adolah urang nan cadiak sarato bijaksano. Inyo mamanggie Barnabas jo Saulus, dek karano inyo niyo mandanga kato-kato Allah. 8Tapi, Barnabas jo Saulus, di-alang-alangi dek Elimas nan tukang sihie tu, dek karano Elimas, (itulah namonyo dalam bahaso Yunani) ba-usawo supayo gubenur tu, jan sampai picayo kabake Isa Almasih. 9Tapi Saulus — nan dinamokan pulo Paulus, — inyo dikuwasoi dek Roh Allah, inyo mancaliak ka si tukang sihie tu, 10inyo bakato, ”Oih pangicuah, anakjahanam! Wa-ang musuah sagalo nan baiak. Baa mangko wa-ang indak namuah baranti marusak rancana Allah untuak manyalamaikkan manusia? 11Kiniko liyeklah, Tuhan ka ma-ukun wa-ang! Mato wa-ang ka buto, sainggo wa-ang indak dapek lai maliyek cahayo matoari untuak samantaro wakatu.” Sakutiko tu juwo, Elimas marasokan ado kabuik itam nan manyawok-i matonyo, sainggo tapasolah inyo bajalan maresek-resek, mancari urang nan ka mambimbiang inyo. 12Kutiko gubenur tu maliyek, apo nan lah tajadi, mako, inyo picayo kabake Isa Almasih; dek karano, inyo tacangang sangaik taradok ajaran Tuhan. 13Dari Pafos, Paulus sarato jo kanti-kantinyo, balayie ka Perga di Pamfilia. Tibo di sinan tu, Yahya Markus maninggakan inyo tu, sudah tu, babaliak ka Yerusalem. 14Dari Perga, inyo tu bi manaruihkan pajalanan ka Antiokhia di Pisidia, kamudian, di ari Sabat, inyo tu bi payi ka rumah ibadaik, sudah tu, bi duduak di sinan tu. 15Sasudah Kitauk Musa, sarato jo Kitauk Nabi-nabi dibacokan, mako, pamimpin-pamimpin rumah ibadaik tu, manyuruah urang bi batanyo kabake Paulus, sarato jo kanti-kantinyo, ”Sudaro-sudaro, jikok sudaro mampunyoi sasuatu nasiyaik untuak urang-urang ko, mako, sampaikanlah nasiyaik tu.” 16Mako, Paulus tagak, sudah tu, ma-agiah kode jo tangannyo, kamudian bakato, ”Sudaro-sudaro ambo banso Israel, sarato jo kasadonyo sudaro-sudaro nan lainnyo di siko, nan bi patuah kabake Allah! Cubolah dangakan nan ambo katokan ko: 17Allah banso Israel lah mamiliah niniak muyang kito, sarato lah manjadikan banso ko manjadi banso nan gadang, samaso inyo tu bi tingga di Mesir sabagai urang asiang. Kamudian, jo kuwaso-Nyo nan kuwaik, Allah mambawok inyo tu kaluwa dari Mesir. 18Allah basaba taradok laku parangai inyo tu, salamo ampek puluah tawun di padang gurun. 19Tujuah banso lah dipunahkan dek Allah di tanah Kanaan. Sudah tu, Baliau mambagi-bagikan tanah tu kabake banso Israel, supayo tanah tu manjadi miliak inyo tu. 20Kasadonyo tu tajadi salamo labiah kurang [ 450 ] tawun. Sasudah tanah Kanaan tu dibagi-bagi, mako, Allah mambarikan hakim-hakim untuak banso Israel. Hakim nan tarakir iyolah Nabi Samuel. 21Kamudian, banso Israel mamintak surang rajo. Mako, Allah mambarikan kabake inyo tu Saul, anak Kis dari suku Benyamin, nan ka manjadi rajo inyo tu salamo ampek puluah tawun. 22Sasudah Allah manurunkan Saul dari kaduduakkannyo, mako, Allah ma-angkek Daud manjadi rajo banso Israel. Sarato ikolah nan dikatokan dek Allah tantang Daud, ’Lah tasuwo dek Waden si Daud anak si Isai, inyo lah urang nan manyanangkan ati Den. Inyolah urang nan ka ma-ujuikkan apo nan kahandak-Den.’ 23Dari katurunan Daud itulah, Allah manyadiyokan surang Rajo Panyalamaik untuak banso Israel, bakcando nan lah Baliau janjikan. Mako, Isa Almasih tu lah, nan Rajo Panyalamaik tu. 24Sabalun Isa Almasih mamuloi tugeh-Nyo, mako, Yahya lah manyarukan kabake urang-urang Israel, supayo inyo tu bi batobaik dari doso-doso inyo tu, sarato dipamandikan. 25Manjalang di akie karajonyo, Yahya bakato kabake urang nan banyak, ’Siyakoh ambo ko manuruik pandapek angkau? Indak ambo ko doh, Baliau nan angkau nanti-nanti. Katawuilah, Baliau tu kudian datangnyo dari ambo; tapi, untuak ka mambukak tarompa Baliau sajo, ambo ko urang nan indak patuik.’ 26Sudaro-sudaro katurunan Ibrahim, sarato jo kasadonyo Sudaro-sudaro nan lainnyo di siko, nan bi patuah kabake Allah! Allah lah mangirin kaba kasalamaiktan kabake kito; 27tapi, dek karano urang-urang nan tingga di Yerusalem, sarato jo pamimpin-pamimpin inyo tu, indak bi tawu, baraso Isa Almasih tu lah nan Panyalamaik tu. Inyo tu indak bi mangarati, tantang ajaran nabi-nabi nan dibacokan di satiyok ari Sabat, sainggo inyo tu bi ma-ukun Isa Almasih. Tapi, dek karano inyo tu bi mampabuwek nan bakcando itu, mako, basuwoanlah apo nan lah dinubuwaikkan dek nabi-nabi. 28Biyapun urang-urang tu indak bi manamukan sasuatu kasalahan di diri Isa Almasih, nan manjadikan Baliau patuik di-ukun jo ukunan mati, tapi, nan inyo tu tatauk juwo bi mamintak kabake Pilatus, supayo Isa Almasih dibunuah. 29Baru lah salasai kasadonyo dikarajokan dek urang-urang tu, apo nan lah tatulih di Alkitauk tantang Isa Almasih, mako, inyo tu manurunkan mayik Baliau dari ateh kayu salib, sudah tu inyo antakan masuak kubuaran. 30Tapi, Allah ma-iduikkan Baliau baliak, sasudah Baliau mati. 31Kamudian, ado babarapo ari lamonyo, Baliau tibo baliak manampakkan diri, kabake urang-urang nan samo-samo jo Baliau datang dari Galilea ka Yerusalem. Urang-urang tu lah kiniko nan manjadi sasi tantang Baliau kabake banso Israel. 32Jadi, nan kiniko kami manyampaikan Kaba Baiak tu kabake angku-angku: Iyolah, Kaba Baiak nan lah dijanjikan dek Allah kabake niniak muyang kito, 33nan Kaba Baiak tu lah di-ujuikkan dek Allah kabake kito, di kutiko Baliau ma-iduikkan Isa Almasih baliak, sasudah Baliau mati. Dek karano, di kitauk Zabur nan kaduwo ado tatulih, ’Angkau-lah Anak-Den, di ari ko Waden lah manjadi Bapak Angkau.’ 34Allah lah ma-iduikkan Baliau baliak, sasudah Baliau mati. Nan kiniko Baliau indak lai ka mangalami kamatian di dalam kubua. Tantang parkaro itu, Allah lah mangatokan, ’Aden ka mambarikan kabake Angkau, janji suci nan lah musti ka ditapek-i, nan lah Den janjikan kabake Daud.’ 35Baitu pulo dalam ayaik nan lain dikatokan, ’Angkau indak ka mampadiyakan, Pisuruah Angkau nan tuluih ati tu, mambusuak di dalam kubua.’ 36Daud lah mati, sarato lah dikubuakan pulo samo-samo jo niniak muyangnyo, sasudah inyo mangarajokan, apo nan disuruah karajokan dek Allah kabake inyo. Mayik Daud pun lah cayie, lah abih kasadonyo. 37Tapi, nan Isa Almasih, nan lah di iduikkan baliak dek Allah sasudah mati, nan Isa Almasih tu, indak ka cayie doh. 38- 39Dek karano itu Sudaro-sudaro, angkau musti bi tawu andaknyo, baraso malalui Isa Almasih tu, barito tantang pangampunan doso dibaritokan kabake angkau; angkau musti tawu, baraso, satiyok urang nan ba-iman kabake Isa Almasih, dilapehkan dari sagalo doso, nan indak bisa di-apuihkan, jo sacaro mangarajokan parentah-parentah Allah nan disampaikan dek Musa. 40Itulah sabauknyo, mangko angkau musti sabana-bana bi mamparatikan, jan sampai tajadi di diri angkau, apo nan tatulih di kitauk nabi-nabi, 41’Paratikanlah elok-elok, oih angkau urang-urang nan suko ma-ino! Angkau ka bi tacangang, sudah tu bi mati! Dek karano di jaman kiniko, Aden sadang mampabuwek sasuatu, nan angkau sandiri, indak ka bi mampicayo-inyo, biyapun ado urang nan manarangkannyo kabake angkau.’ ” 42Kutiko Paulus jo Barnabas barangkek dari rumah ibadaik tu, mako, urang-urang nan di sinan tu bi mamintak, supayo inyo tu datang baliak di ari Sabat nan ka tibo, untuak manarangkan labiah lanjuik tantang sagalo parkaro tu. 43Sasudah urang-urang tu bi kaluwa dari rumah ibadaik tu, mako, banyak urang Yahudi, sarato jo urang banso lain nan ba-ugamo Yahudi, nan bi manuruikkan Paulus jo Barnabas. Mako, rasul-rasul tu manasiyaik-i inyo tu, supayo inyo tu tatauk basanda hanyo kabake rahmaik Allah. 44Di ari Sabat nan sasudah tu, ampia kasadonyo urang di kota tu nan bi tibo, untuak mandangakan kato-kato Tuhan. 45Kutiko maliyek urang nan banyak tu, mako, urang-urang Yahudi sakik bana atinyo. Inyo tu bi ma-ino Paulus, sarato mambantah kasadonyo apo nan dikatokan dek Paulus. 46Tapi, nan Paulus jo Barnabas, jo sacaro labiah barani inyo mangecek jo taruih tarang. Inyo tu bi bakato, ”Nan kato-kato Allah, iyo musti disampaikan kabake angkau dulu. Tapi, dek karano angkau indak namuah manarimonyo, ba-arati angkau lah manantukan sandiri, baraso angkau indak patuik manarimo iduik sajati nan kaka. Jadi nan kiniko, kami ka barangkek hanyo lai, kami ka payi kabake banso nan lain. 47Dek karano, ikolah parentah Tuhan kabake kami; Tuhan lah mangatokan, ’Aden lah manantukan kalian, untuak ka manjadi cahayo tarang, untuak urang banso lain, nan indak urang Yahudi, supayo kalian mambawok kaba kasalamaiktan, untuak umaik mukaluak di muko bumi ko.’ ” 48Baru mandanga nan bakcando itu, urang-urang banso lain nan indak urang Yahudi, sanang bana atinyo, mako, inyo tu bi mamuliekan kato-kato Tuhan. Baitu pulo urang-urang nan lah ditantukan dek Allah, untuak mandapek iduik sajati nan kaka, inyo tu pun bi picayo. 49Kato-kato Tuhan lah tabarito kian kumari di kaciyek-annyo daerah tu. 50Tapi, pamimpin-pamimpin kota tu, sarato jo urang-urang padusi nan takamuko, nan bi takuik kabake Allah, di-ujah dek urang-urang Yahudi. Inyo tu bi mambuwek pamusuahan taradok Paulus jo Barnabas, sarato bi ma-usie kaduwo urang tu dari daerah tu. 51Mako, rasul-rasul tu mangipehkan abu nan lakek di kaki inyo tu, di adok-an urang-urang tu sabagai paringektan, sudah tu, inyo bi payi ka Ikonium. 52Pangikuik-pangikuik nan di Antiokhia sabana bi basukocito, sarato dikuwasoi dek Roh Allah. RIWAYAIK RASUL-RASUL

will be added

X\