RIWAYAIK RASUL-RASUL 12

1Kiro-kiro pado wakatu itu, Rajo Herodes muloi batindak kareh kabake anggota-anggota jamaat. 2Inyo mamarentahkan, supayo Yakobus karek-an Yahya dipancuang jo padang. 3Kutiko Herodes tawu, baraso tindakkannyo tu manyanangkan ati urang-urang Yahudi, mako, inyo lanjuikkan tindakkannyo; inyo manyuruah urang pulo untuak manangkok Petrus. Kajadian tu tajadi di kutiko Ari Rayo Roti Indak Baragi. 4Sasudah Petrus ditangkok, inyo dimasuakkan ka pinjaro. Ampek regu saradadu nan ditugehkan untuak manjago Petrus di sinan tu, — satiyok-tiyok regu ado ampek urang anggotanyo. Sasudah ari rayo Paskah, barulah Herodes ka ma-adieli Petrus di adok-an urang nan banyak. 5Jadi, Petrus ditahan di pinjaro; tapi, nan anggota-anggota jamaat, taruih juwo badowa kabake Tuhan jo sacaro basungguah-sungguah, untuak mandowakan Petrus. 6Di malam sabalun Herodes ka mambawok Petrus ka adok-an urang nan banyak, di kutiko itu Petrus lalok bakabek, jo duwo buwah pilanggu, di antaro duwo urang saradadu panjago. Di pintu pinjaro, panjago-panjago nan lain sadang bi tagak pulo manjago. 7Indak disangko-sangko, lah tagak sajo malekaik Tuhan di sinan tu, sarato ado cahayo nan mamanca di biliak pinjaro tu. Malekaik tu manggoyak-goyakkan badan Petrus, sampai inyo tasintak. Sudah tu, malekaik tu bakato, ”Oih, capeklah jago!” Sakutiko tujuwo, jatuahlah rantai basi nan di tangan Petrus. 8Sasudah tu, malekaik tu bakato, ”Kanakkanlah baju angkau, sarato kabekkanlah tali tarompa angkau.” Mako, Petrus manganakkan bajunyo, sarato mangabekkan tali tarompanyo. Kamudian, malekaik tu bakato pulo, ”Kanakkanlah jubah angkau, sarato turuikkanlah ambo.” 9Mako, Petrus manuruikkan malekaik tu kaluwa dari pinjaro. Tapi, Petrus indak manyadari doh, baraso, apo nan sadang dipabuwek dek malekaik tu, adolah sasuatu nan sabana-bana tajadi. Petrus manyangko itu hanyo suatu pangliyatan. 10Pado wakatu inyo tu lah malampaui tampaik urang manjago nan partamu, sarato jo nan kaduwo, mako, inyo tu tibo di pintu basi, nan manuju ka kota. Pintu basi tu tabukak jo sacaro sandirinyo, sudah tu, inyo tu bi kaluwa, sarato bajalan malalui sabuwah lorong. Indak tarago tawu, malekaik tu lah maninggakan Petrus. 11Sasudah tu, barulah Petrus manyadari, apo nan lah tajadi di dirinyo, mako, inyo bakato, ”Kiniko ambo lah tawu, baraso Tuhan batua-batua lah ma-utuih malekaik-Nyo, untuak ka malapehkan ambo dari kuwaso Herodes, sarato dari sagalo sasuatu nan ka dipabuwek, dek banso Yahudi kabake ambo.” 12Baru Petrus lah manyadari ka-adaan tu, mako, inyo payi ka rumah Maryam, mandeh dek Yahya, nan dinamokan pulo Markus. Di sinan tu banyak urang bi bakumpua, sarato sadang bi badowa. 13Petrus manokok pintu nan sabalah kaluwa, mako, tibolah surang pisuruah padusi nan banamo Rode, mambukakkan pintu. 14Inyo lansuang tawu jo suwaro Petrus. Dek karano kagadangan ati, inyo bagageh babaliak masuak, inyo indak jadi doh mambukakkan pintu, sudah tu, ma-agiah tawu kabake urang-urang nan di sinan tu, baraso Petrus ado di luwa. 15Urang-urang tu bi bakato, ”Akau lah gilo ko.” Tapi, nan si Rode basikareh juwo, baraso Petrus iyo sabana-bana ado di luwa. Mako, urang-urang tu bi bakato, ”Malekaiknyo tu nan tibo!” 16Samantaro itu, nan Petrus taruih juwo manokok-nokok pintu. Mako, kutiko urang-urang tu mambukakkan pintu, sarato bi maliyek Petrus, inyo tu bi tacangang sangaik. 17Petrus ma-agiah kode jo tangannyo, supayo urang-urang tu bi tanang, kamudian, baru inyo mancuritokan, baa caronyo Tuhan mambawok inyo kaluwa dari pinjaro. Sudah tu inyo bakato, ”Agiah tawu lah ko kabake Yakobus, sarato jo sudaro-sudaro nan lain bagai.” Sasudah tu Petrus barangkek dari tampaik tu, sarato payi ka tampaik nan lain. 18Bisuak paginyo, ebohlah kasadonyo saradadu panjago. Inyo tu bi tapana sangaik, dek mamikiekan kajadian nan lah tajadi taradok Petrus. 19Sudah tu, Herodes manyuruah urang untuak mancari Petrus, tapi inyo indak basuwo. Mako, Herodes mamarentahkan, supayo saradadu-saradadu panjago tu dipareso, sudah tu dibunuah. Sasudah tu, Herodes barangkek dari Yudea, sarato ado babarapo lamo, inyo di Kaisarea. 20Herodes bangih sangaik kabake urang Tirus, sarato jo urang Sidon. Dek karano itu, urang-urang tu basamo-samo bi mangadauk kabake Herodes. Mulo-mulo inyo tu bi mambujuak Blastus, nan mangapalo-i istano Herodes, sainggo inyo bapiyak kabake urang-urang tu. Kamudian, inyo tu bi payi mangadauk ka Herodes, sudah tu mintak badamai, dek karano bahan makanan di nagari inyo tu, bagantuang ka nagari Herodes. 21Pado suatu ari nan lah ditantukan, Herodes manganakkan pakaian kabasarannyo, sudah tu, inyo duduak di kurisi karajaan, sarato muloi bapidato di adok-an rakyaik. 22Rakyaik nan sadang mandangakan pidato tu, basorak-sorak, ”Iko adolah suwaro dewa, indak suwaro manusia doh ko!” 23Sakutiko tu juwo malekaik Tuhan manampa Herodes, dek karano inyo indak ma-aromaik-i Allah. Herodes dimakan dek ulek, sudah tu mati. 24Mako, kato-kato Allah samakin tasebar kian kumari, sarato batambah banyak didanga urang. 25Sasudah Barnabas jo Saulus manyalasaikan tugehnyo, mako, inyo tu babaliak ka Yerusalem, sarato mambawok Yahya Markus samo-samo jo inyo tu. RIWAYAIK RASUL-RASUL

will be added

X\