RIWAYAIK RASUL-RASUL 11

1Rasul-rasul, sarato jo urang-urang nan ba-iman di kaciyek-annyo Yudea, lah bi mandanga, baraso urang-urang nan indak ba-ugamo Yahudi, lah bi mayakini pulo kato-kato Allah. 2Kamudian, kutiko Petrus payi ka Yerusalem, urang-urang Yahudi nan lah ba-iman tu, inyo tu bi mampasalahkan Petrus. 3Inyo tu bi bakato, ”Baa mangko angkau payi ka rumah urang-urang nan alun basunaik? Angkau malah makan bagai samo-samo jo inyo tu!” 4Dek karano itu, Petrus manarangkan kabake urang-urang tu, kasadonyo apo nan lah tajadi, sajak dari mulo-mulo. Petrus bakato, 5”Ambo sadang badowa di kota Yope, mako, ambo maliyek suatu pangliyatan. Ambo maliyek ado sasuatu nan bakcando sa-alai kain nan laweh, diturunkan dari langik, ka-ampek suduiknyo bakcando bagantuangkan nampaknyo, kamudian, kain laweh tu baranti di dakek ambo. 6Kutiko ambo maliyek, mamparatikan ka dalam kain laweh tu, ambo manampak binatang-binatang nan bakaki ampek, binatang-binatang liya, binatang-binatang nan manjala, sarato jo buruang-buruang liya. 7Sudah tu, ambo mandanga suwaro nan bakato kabake ambo, ’Oih Petrus, capeklah tagak! Dabiahlah tu, sarato makanlah!' 8Tapi, ambo manjawauk, ’Indak doh Tuhan! Alun ado lai ambo mamakan, makanan nan aram, sarato jo nan najih.’ 9Tapi, suwaro tu bakato pulo baliak dari langik, ’Barang sasuatu nan lah dinyatokan ala dek Allah, janlah dikatokan aram.’ 10Ambo maliyek nan bakcando itu sampai tigo kali, nan akienyo, kasadonyo ta-angkek baliak ka sarugo. 11Tapek di kutiko itu pulo, katigo urang nan di-utuih dari Kaisarea tibo kabake ambo, di rumah tampaik ambo bamalam. 12Mako, Roh Allah manyuruah ambo, jan ragu-ragu payi jo urang-urang tu. Sudaro kito nan baranam ko pun payi pulo jo ambo ka Kaisarea, kasadonyo kami bi masuak ka rumah Kornelius. 13Kamudian, Kornelius mancuritokan pulo kabake kami, baa caro inyo manampak surang malekaik, tagak di rumahnyo sarato jo bakato, ’Suruahlah urang payi ka Yope, untuak manjapuik surang laki-laki nan banamo Simon Petrus. 14Inyo ka ma-agiah tawu kabake angkau, barito nan ka manyalamaikkan angkau, sarato jo kaluarga angkau.’ 15Di kutiko ambo muloi mangecek,” bakcando itulah Petrus manaruihkan curitonyo," Roh Allah turun kabake urang-urang tu, samo jo bakcando nan tajadi di kito dulu. 16Mako, takanalah dek ambo, Tuhan panah mangatokan, ’Yahya mampamandikan urang jo ayie, tapi, angkau ka dipamandikan jo Roh Allah.’ 17Jadi, kiniko lah jaleh dek kito, baraso Allah mambarikan pulo kabake urang-urang nan indak ba-ugamo Yahudi tu, pambarian nan samo, bakcando nan Baliau barikan kabake kito, di wakatu kito picayo kabake Tuhan Isa Almasih. Dek karano itu, dima pulo ka mungkin ambo managah Allah!” 18Sasudah mandangakan kasadonyo tu, mako, urang-urang tu indak lai bi mambantah. Malah inyo tu bi mamuji Allah. Inyo tu bi bakato, ”Jikok baitu, urang nan indak urang Yahudi pun, dibari pulo kasampatan dek Allah untuak batobaik dari doso-dosonyo, sarato mamimpin kabake iduik nan sajati!” 19Sasudah Stefanus dibunuah, mako, urang-urang nan ba-iman kabake Isa Almasih muloi di-aniayo, sainggo inyo tu lah bi bakecai-kecai lari kian kumari. Ado nan lari sampai ka Fenisia, ado pulo nan sampai ka Siprus, sarato jo ka Antiokhia. Inyo tu bi mambaritokan Injil hanyo kabake urang-urang Yahudi sajo. 20Tapi, di antaro urang-urang nan ba-iman tu, ado nan barasa dari Siprus, sarato jo Kirene, ado pulo urang-urang nan bi payi ka Antiokhia, kabake urang-urang nan indak ba-ugamo Yahudi, untuak mambaritokan Injil tantang Isa Almasih. 21Kuwaso Tuhan manyaratoi urang-urang tu, sainggo sambuah urang nan bi picayo, sarato manyarahkan diri kabake Tuhan. 22Sagalo curito tantang kajadian-kajadian ko, sampai pulo kabake jamaat di Yerusalem. Mako, inyo tu bi ma-utuih Barnabas ka Antiokhia. 23Kutiko Barnabas lah tibo di sinan tu, sarato lah maliyek, baa bana Allah sangaik mambarakaik-i urang-urang tu, mako, inyo sangaik basukocito. Sudah tu, inyo mintak kabake urang-urang tu, supayo sabana-bana tuluih kabake Tuhan jo sapanuah ati. 24Barnabas ko adolah urang nan elok ati, sarato dikuwasoi dek Roh Allah, nan imannyo kabake Tuhan indak talok di-ungkik, sainggo sambuah urang nan dibawok manjadi pangikuik Tuhan. 25Kamudian, Barnabas payi ka Tarsus untuak manamui Saulus. 26Sasudah batamu jo Saulus, mako, inyo mambawok Saulus ka Antiokhia, sarato satawun panuah inyo tu bi bakumpua jo jamaat nan di sinan tu, sambia ma-aja banyak urang. Di Antiokhia tu lah nan partamu kalinyo, urang-urang nan ba-iman kabake Isa Almasih tu, dinamokan urang-urang Kristen. 27Pado maso itu ado babarapo urang nabi, datang dari Yerusalem ka Antiokhia. 28Salah surang di antaronyo banamo Agabus. Dek karano garakkan dari Roh Allah, mako inyo banubuwaik, baraso di muko bumi ko ka tajadi musin lapa nan sangaik padiah. (Nubuwaik tu iyo sabana-bana tajadi di kutiko Kaisar Klaudius mamarentah.) 29Mako, kasadonyo pangikuik Isa Almasih tu, samupakaik untuak mangirin sumbangan kabake sudaro-sudaro nan tingga di Yudea; satiyok-tiyok inyo mangirin sabarapo nan talok dek inyo. 30Nan lah disupakaik-i tu di-ujuikkan juwo, mako, Barnabas sarato jo Saulus, di-utuih untuak ma-antakan sumbangan tu kabake pamimpin-pamimpin jamaat. RIWAYAIK RASUL-RASUL

will be added

X\