RIWAYAIK RASUL-RASUL 10

1Di Kaisarea ado surang laki-laki nan banamo Kornelius. Inyo adolah kumandan ”Pasukan Italia”. 2Inyo adolah urang nan takuik kabake Allah, baitu pulo kasadonyo kaluarganyo ba-ibadaik kabake Allah. Inyo banyak manolong urang-urang Yahudi nan bansaik, nan inyo tatauk badowa kabake Allah. 3Pado suatu ari kiro-kiro pukua tigo sanjo, inyo maliyek jo sacaro nan jaleh sangaik, dalam suatu pangliyatan, surang malekaik Allah datang, sarato ma-imbau inyo, ”Oih Kornelius!” 4Kornelius mati katakuik-an, sambia mancaliak ka malekaik tu inyo bakato, ”Baa kaba angku?” Malekaik tu manjawauk, ”Dowa angkau, sarato jo ati angkau nan suko mangasiahi, lah ditarimo dek Allah, nan Allah takana jo angkau. 5Nan kiniko, suruahlah urang payi ka Yope, untuak ma-imbau Simon, nan namo langkoknyo adolah Simon Petrus. 6Inyo kiniko sadang manumpang di rumah urang tukang panyamak kulik, nan banamo Simon, nan tingga di tapi lauik.” 7Sasudah malekaik nan mangecek jo Kornelius tu, payi, mako, Kornelius ma-imbau duwo urang pisuruah di rumahnyo, sarato jo surang saradadu pangawalnyo nan saliah. 8Kornelius mancuritokan apo nan tajadi kabake urang-urang tu, sudah tu, manyuruah inyo tu payi ka Yope. 9Bisuak arinyo, samantaro urang-urang tu sadang dipajalanan juwo lai, sarato lah ampia tibo di Yope, mako, Petrus nayiak ka ateh rumah untuak badowa, pado wakatu tangah ari. 10Dalam pado itu paruik inyo litak sangaik, sarato niyo nak makan. Samantaro makanan sadang disadiyokan, inyo mandapek suatu pangliyatan. 11Inyo manampak langik tabukak, sudah tu, ado sasuatu nan bakcando kain nan laweh bi diturunkan ka bumi, ka ampek suduiknyo, bakcando bagantuangkan nampaknyo. 12Di dalamnyo, ado sagalo rupo binatang nan bakaki ampek, sagalo binatang nan manjala, sarato jo buruang-buruang liya. 13Sudah tu, ado suwaro nan bakato kabake inyo, ”Oih Petrus, jagolah lai! Dabiahlah, sudah tu makanlah!” 14Petrus manjawauk, ”Indak doh Tuhan! Alun ado lai ambo mamakan sasuatu nan aram, atau nan najih.” 15Tapi, suwaro tu bakato pulo kabake inyo, ”Apo nan lah dinyatokan ala dek Allah, janlah angkau anggauk itu aram.” 16Pangliyatan tu batukeh-tukeh sampai tigo kali, kamudian, kain tu ta-angkek ka sarugo. 17Petrus tapana mamikiekan, apo arati dari pangliyatan tu. Samantaro Petrus bapikie-pikie, urang-urang nan disuruah dek Kornelius, lah tibo di rumah Simon, sarato lah tibo di adok-an pintu. 18Mako, urang-urang tu bi ba-imbau, sarato jo batanyo, ”Apokoh ado tamu nan bamalam di siko, nan banamo Simon Petrus?” 19Samantaro Petrus taruih juwo lai ba-usawo, untuak mangatawui apo arati dari pangliyatan tu, Roh Allah bakato kabake inyo, ”Oih Petrus, ado urang batigo nan sadang mancari angkau. 20Capeklah turun ka bawah, sarato jan ragu-ragu payi jo urang-urang tu, dek karano, Aden-lah nan manyuruah inyo tu.” 21Mako, Petrus turun ka bawah, sarato bakato kabake urang-urang tu, ”Ambo lah urangnyo nan angku-angku cari. Apo mukasuik angku-angku, mangko nak basuwo jo ambo?” 22Inyo tu bi manjawauk, ”Kumandan Kornelius manyuruah kami kamari. Inyo adolah urang elok, sarato nan takuik kabake Allah, sarato sangaik di aromaik-i dek kasadonyo urang Yahudi. Surang malekaik Allah manyuruah inyo, untuak mamintak angku datang ka rumahnyo, dek karano, sabagai jawaukban taradok dowanyo, inyo disuruah mampicayo-i, apo nan ka angku katokan kabake inyo.” 23Mako, urang-urang tu dibawok masuak dek Petrus, untuak bamalam di sinan tu. Bisuak arinyo Petrus jago, sarato payi samo-samo jo urang-urang tu. Babarapo urang ba-iman dari Yope, bi payi pulo. 24Sa-ari sasudah tu, mako sampailah urang-urang tu di Kaisarea. Di sinan tu, inyo tu lah dinanti-nanti dek Kornelius, sarato jo sanak sudaronyo, sarato jo konco-konco areknyo, nan lah inyo undang. 25Kutiko Petrus tibo, Kornelius datang manyambuik inyo, sarato sujuik di adok-an Petrus. 26Tapi, Petrus managakkan inyo, sudah tu bakato, ”Tagaklah! Ambo ko manusia biaso pulo nyo ko.” 27Samantaro mangecek jo Kornelius, Petrus masuak ka rumah. Tibo di dalam, inyo manampak urang banyak lah bi bakumpua. 28Sudah tu, inyo bakato kabake urang-urang tu, ”Sudaro-sudaro sandiri tawu, baraso urang Yahudi ditagah dek atuaran ugamonyo, untuak mangunjuangi, atau ba-ubuangan jo urang-urang dari banso lain. Tapi, Allah lah ma-agiah tawu kabake ambo, baraso ambo indak buliah doh ma-anggauk urang lain najih atau aram. 29Dek karano itulah mangko ambo indak manulak, di kutiko angku mamintak supayo ambo datang. Nan kiniko ambo nak niyo tawu, baa mangko angku mamintak ambo untuak datang.” 30Kornelius manjawauk, ”Tigo ari nan lapeh, kiro-kiro di pukua tigo sanjo, di wakatu nan bakcando iko pulo, ambo sadang badowa di rumah. Indak disangko-sangko, lah tagak sajo surang laki-laki di adok-an ambo. Pakaiannyo bakilek bakilauan. 31Inyo bakato, ’Oih Kornelius! Allah lah mampalakukan dowa angkau, sarato Baliau takana jo ati angkau nan suko mangasiahi tu. 32Dek karano itu, kiniko suruahlah urang payi ka Yope, untuak manjapuik urang nan banamo Simon Petrus. Inyo sadang manompang di rumah urang tukang panyamak kulik, Simon namonyo; rumahnyo tu di tapi lauik.’ 33Itulah sabauknyo, mangkonyo ambo bagageh manyuruah urang untuak payi manjapuik angku. Angku iyo urang nan elok ati sangaik, sainggo namuah datang kamari. Kiniko kasadonyo kami lah bi bakumpua di siko di adok-an Allah, untuak ka mandangakan kasadonyo dari angku, apo nan disuruah katokan dek Allah kabake kami.” 34Mako, Petrus bakato, ”Kiniko ambo lah sabana-bana manyadari, baraso Allah indak mampalain-lainkan urang. 35Urang nan takuik kabake Allah, sarato layi mampabuwek nan bana, urang tu ka ditarimo dek Allah, biyapun inyo dari banso mano pun juwo. 36Angku-angku lah tawu, isi barito nan disuruah sampaikan dek Allah kabake banso Israel barito tu adolah barito Injil tantang damai malalui Isa Almasih, nan Baliau tu adolah Tuhan kasadonyo umaik mukaluak. 37Angku-angku tawu apo nan lah tajadi di kaciyek-annyo daerah Yudea, iyolah kajadian nan muloi dari Galilea, sasudah urang-urang dipamandikan bakcando nan dibaritokan dek Yahya. 38Angku-angku tawu, baraso Allah lah mamiliah Isa Almasih urang Nazaret tu, sarato mambarikan kabake Baliau Roh Allah, sarato jo kuwaso. Angku-angku tawu pulo, baraso Isa Almasih tu payi kian kumari untuak babuwek baiak; Baliau mancegakkan kasadonyo urang nan dikuwasoi dek Ubilih, dek karano Allah manyaratoi Baliau. 39Kami ko lah urang-urang nan lah maliyek sandiri, sagalo sasuatu nan Baliau pabuwek di nagari urang Yahudi, sarato jo di Yerusalem. Nan urang-urang tu lah manyalibkan, sarato jo mambunuah Baliau. 40Tapi, di ari nan katigo, sasudah Baliau mati, Allah ma-iduikkan Baliau baliak, sarato mampaliyek-kan Baliau kabake manusia; 41indak doh kabake sadonyo urang, tapi, hanyo kabake kami nan sabalunnyo lah dipiliah dek Allah, nan ka untuak manjadi sasi-sasi-Nyo: Kami lah makan minun jo Baliau, sasudah Baliau iduik baliak dari kamatian. 42Nan Baliau lah manugehkan kami untuak mambaritokan Injil kabake umaik mukaluak, sarato mambari pangakuan, baraso Baliau-lah nan di-angkek dek Allah, untuak nan ka manjadi Hakim urang-urang nan iduik, sarato jo urang-urang nan lah mati. 43Kasadonyo nabi-nabi lah mancuritokan tantang Baliau. Nabi-nabi tu bi mangatokan, baraso kasadonyo urang nan ba-iman kabake Isa Almasih, ka di-ampuni dosonyo, dek karano kuwaso dari Isa Almasih.” 44Samantaro Petrus sadang mangecek juwo lai, mako turunlah Roh Allah, sarato manguwasoi kasadonyo urang nan sadang mandangakan barito tu. 45Urang-urang Yahudi nan lah ba-iman kabake Isa Almasih, sarato nan manuruikkan Petrus sajak dari Yope, kasadonyo bi tacangang maliyek, dek karano Allah mambarikan pulo Roh-Nyo, kabake urang-urang banso lain nan indak urang Yahudi. 46Dek karano urang Yahudi tu lah mandangakan, urang-urang tu mangecek jo babagai-bagai bahaso, sarato mamuji-muji kabasaran Allah. Mako, Petrus bakato, 47”Liyeklah ko, urang-urang ko lah mandapek Roh Allah samo jo bakcando kito. Jadi, apokoh ado juwo lai urang, nan ka ma-alang-alangi inyo tu, untuak dipamandikan jo ayie?” 48Mako, Petrus manyuruah urang-urang tu dipamandikan ateh namo Isa Almasih. Sasudah tu, urang-urang tu bi mamintak, supayo Petrus jo inyo tu dulu agak babarapo ari lamonyo. RIWAYAIK RASUL-RASUL

will be added

X\