RIWAYAIK RASUL-RASUL 1

1Teofilus nan baiak budi, Di dalam kitauk ambo nan partamu, lah ambo tarangkan kasadonyo, apo nan lah dipabuwek, sarato nan di-ajakan dek Isa Almasih, sajak Baliau mamuloi karajo Baliau, 2sampai ka ari Baliau di-angkek ka sarugo. Sabalun Baliau nayiak ka sarugo, jo kuwaso Roh Allah, Baliau mambari pitunjuak-pitunjuak, kabake rasul-rasul Baliau nan tapiliah. 3Sasudah Baliau mati, salamo ampek puluah ari Baliau acok manampakkan diri, jo caro nan sangaik jaleh kabake rasul-rasul tu, baraso Baliau iyo sabana-bana lah iduik baliak. Rasul-rasul tu lah bi maliyek Baliau, nan Baliau lah babicaro kabake inyo tu, tantang Karajaan Allah. 4Pado wakatu Baliau bakumpua samo-samo jo inyo tu, Baliau lah mambarikan parentah nan bakcando iko, ”Jan bi payi dari Yerusalem. Nantikanlah di sinan tu, sampai tibo wakatunyo Bapak mambarikan apo nan lah Baliau janjikan, iyolah, apo nan lah Ambo agiah tawu kabake angkau dulu. 5Dek karano, Yahya mampamandikan urang jo ayie, tapi, babarapo ari lai, angkau ka dipamandikan jo Roh Allah.” 6Kutiko rasul-rasul tu bi bakumpua samo-samo jo Isa Almasih, inyo tu bi batanyo kabake Baliau, ”Tuhan, apokoh kiniko Tuhan namuah, mambangun baliak karajaan banso Israel?” 7Isa Almasih manjawauk, ”Bapak Ambo sandiri nan ka manantukan ari, sarato jo wakatunyo. Itu indak paralu doh angkau katawui, dek karano, itu hak Bapak. 8Tapi, angkau ka manarimo kuwaso, jikok Roh Allah lah turun kabake angkau. Nan angkau, ka bi manjadi urang-urang nan mambari pangakuan tantang diri Ambo, di Yerusalem, di kaciyek-annyo Yudea, di Samaria, sampai ka ujuang bumi.” 9Sasudah Isa Almasih bakato bakcando itu, mako, Baliau di-angkek ka sarugo di adok-an urang-urang tu, nan awan manyawok-i Baliau, dari pandangan inyo tu. 10Samantaro inyo tu sadang bi mancaliak juwo lai ka langik, kutiko Isa Almasih ta-angkek, indak disangko-sangko, duwo urang nan bapakaian putiah, bi tagak di sabalah inyo tu. 11Kaduwo urang tu bi bakato, ”Oih urang-urang Galilea, baa mangko angkau bi tagak di sinan tu mancaliak ka langik? Isa Almasih, nan angkau liyek di-adok-an angkau ta-angkek ka sarugo tu, ka babaliak baliak, jo caro nan baitu pulo, bakcando nan angkau liyek cako.” 12Kamudian, rasul-rasul tu babaliak ka Yerusalem dari Bukik Zaitun. Bukik tu talatak kiro-kiro sakilo jauahnyo dari Yerusalem. 13Di Yerusalem inyo tu payi ka rumah tampaik inyo bi manompang, sudah tu, bi nayiak ka ruwangan nan di ateh. Rasul-rasul tu, iyolah Petrus, Yahya, Yakobus, Andreas, Filipus, Tomas, Bartolomeus, Matius, Yakobus anak Alfeus, Simon Patriot, Yudas anak Yakobus; 14kasadonyo tu tatauk bakumpua jo sa-ati untuak badowa. Inyo tu badowa samo-samo jo urang-urang padusi bagai, tamasuak Maryam mandeh Isa Almasih, sarato jo dunsanak-dunsanak Isa Almasih. 15Pado suatu ari, kutiko inyo tu sadang bi bakumpua — ado kiro-kiro saratuih duwo puluah urang banyaknyo — Petrus tagak untuak babicaro. Inyo bakato, 16”Sudaro-sudaro! Apo nan lah tatulih di Alkitauk, itu musti tajadi. Sa-isuak malalui Daud, Roh Allah lah banubuwaik tantang Yudas, pamimpin urang-urang nan manangkok Isa Almasih tu. 17Yudas adolah salah surang dari kito, nan inyo lah dipiliah pulo untuak sato bakarajo samo-samo jo kito.” ( 18Yudas lah mandapek tanah untuak kubuarannyo, dari upah karajo jaheknyo. Inyo jatuah tatungkuik, sarato mati jo paruiknyo pacah, sainggo isi paruiknyo lah taborai kaluwa kasadonyo. 19Kasadonyo urang nan tingga di Yerusalem lah bi tawu tantang kajadian tu. Itulah sabauknyo, mangko dalam bahaso inyo tu, inyo tu manamokan tanah tu Akeldama, nan aratinyo, ’Tanah darah'.) 20”Dek karano, di kitauk Zabur ado tatulih bakcando iko, ’Biyalah tampaik tingganyo indak ba-uni; jan ado surang juwo urang nan tingga di dalamnyo.’ Ado pulo tatulih nan bakcando iko, ’Biyalah kaduduakkannyo di-ambiak dek urang lain.’ 21- 22Dek karano itu, musti ado surang urang di antaro kito ko, nan manjadi sasi baraso Tuhan Isa Almasih lah iduik baliak sasudah mati. Urang tu, mustilah salah surang dari urang-urang nan salamo ko taruih samo-samo jo kito, samaso kito manuruikkan Tuhan Isa Almasih kian kumari, sajak dari Yahya muloi mampamandikan urang, sampai ka ari Isa Almasih di angkek ka sarugo dari adok-an kito.” 23Mako, urang-urang nan ado di sinan tu, ma-usulkan duwo urang, iyolah Yusuf nan dinamokan pulo Barsabas, (inyo dinamokan pulo Yustus), sarato jo Matias. 24- 25Sudah tu, inyo tu bi badowa. Inyo tu badowa bakcando iko, ”Oih Tuhan, Angkau mangatawui isi ati kasadonyo urang. Yudas lah baranti dari tugehnyo sabagai rasul, sarato lah mati. Dek karano itu, tunjuakkanlah kabake kami, siya di antaro kaduwo urang ko nan ka Tuhan piliah, untuak nan ka dibari tugeh manggantikan Yudas.” 26Sasudah tu, namo kaduwo urang tu di-undi, mako, jatuahlah piliahan kabake Matias. Dek karano itu, inyo di-angkek manjadi rasul, untuak batugeh samo-samo jo kasabaleh rasul nan lainnyo. RIWAYAIK RASUL-RASUL

will be added

X\