Matiye 4

1Fa dəɓa ha, Mesəfney ŋga Gazlavay a handa Yesu a wuzlah-ley amba Sataŋ, bay-malula, a jada ŋga bata. 2Kwa Yesu ta zəmey cek daa ba, ɗar kwakwar məfaɗ, taa vaɗ, taa pas. Fa dəɓa ha, may a car dəɓa. 3Ta’, bay-malula a daw a cakay a ŋga bata, aa guzlar, a ləvar: «Da kah Bəzey ŋga Gazlavay na, tərdata aŋgwa hay keɗe ŋga ɗaf taw!» 4Yesu a mbəɗdara, a ləvar: «Mawuzlalakaya daa ɗerewel ŋga Gazlavay, a ləvey: “Ndaw na, a njey ta cek mezəmey daada ba, ama ta mey cəpa masa ma bawa da mey Gazlavay.”» 5Cay, bay-malula ha ta’, a handa a Jeruzelem, berney ŋga Gazlavay. A təpda aa ray ŋga Way-mekey-kwakwas ŋga Gazlavay, 6a ləvar: «Da kah Bəzey ŋga Gazlavay na, jəvey a hwayak, maja Mey ŋga Gazlavay mawuzlalakaya a ləvey: “Gazlavay a da ka amba a slərwa maslaŋ aŋga hay, a sləwmaka la a har ata amba salay akah a gurzey fa aŋgwa ba.”» 7Yesu a mbəɗdara, a ləvar: «Mey ŋga Gazlavay mawuzlalakaya a ləvey saya: “Ka da jada Bay Gazlavay akah ba.”» 8Fa dəɓa ha, bay-malula ha, a handa saya, a təpda aa ray ŋga aŋgwa maazəma, a wuzdara hwayak hay da bəla cəpa ta zleley hay cəpa da hwaɗ a, aa guzlar, 9a ləvar: «Da kah ma ragadaya la, kah ma dərya daŋgay la na, hwayak hay a ta zleley hay cəpa da hwaɗ a keɗe na, ya vəldatakawa la.» 10Ta’, Yesu a mbəɗdara, a ləvar: «Sataŋ, hway la feɗe! Mbəkdaya maja Mey ŋga Gazlavay mawuzlalakaya a ləvey: “Ka da ragadar na, si ŋgada Bay Gazlavay akah gway. Dərar daŋgay ŋgada Bay Gazlavay pal taava aŋga.”» 11Daa ŋgene, bay-malula ha, mbak! a mbəkda Yesu. Ta’, maslaŋ hay ŋga Bay Gazlavay da vaɗ a samawa a cakay a, a jənmara, a vəlmar cek mezəmey. 12Menjey nekəɗey na, ta’, a kərzamara Jaŋ-Baptis, a mbəzdamara aa fərsəne. Masa Yesu ma cənda ata ma kərzamara Jaŋ-Baptis sem na, a sləkɗey, a vəhey aa hwayak ŋga Galile. 13Ta njey da slala Nezeret daa ba, ama a daw a njey a Kapernayum. Kapernayum na, ara slala da mey dəhwa ŋga Galile, masa daa hwayak ŋga səkway ŋga Zabulaŋw ta ŋga Naftali. 14Anda keɗe, cek aha ta key la anda Izay, ndaw ma təla mey ŋga Gazlavay, maa guzley zleezle, ma ləvey: 15«Ndəhay daa hwayak ŋga səkway ŋga Zabulaŋw ta ŋga Naftali, hwayak hay masa gweegwe ta dəhwa ŋga Galile, ta dey laŋgar ŋga wayam ŋga Jurdeŋ, hwayak ŋga Galile masa ndəhay Jəwif hay ba hay ma njam da hwaɗ a, 16ndəhay a, ata daa ləvaŋ, ama a hətmar meweɗey mahura la. Ata masa anda ndəhay maməctakaya, ama slam a weɗey la a ray ata.» 17Masa Yesu ma daw a Kapernayum a na, ara daa ŋgene, aŋga ma zlar mewuzey mey, a ləvey: «Mbəɗdamara menjey akwar da bəla, maja gweegwe cay, Gazlavay a wuzdərwa bay aŋga.» 18Pas pal daha, Yesu fa pəkey da mey dəhwa ŋga Galile. Ta’, a hətey məlmaŋ hay cew daha, ara ndəhay ma kərza ewet. Ata Simaŋw masa ma zəlmara Piyer ta məlmaha Andəre, fa kərzam ewet ta tabaw daa dəhwa ha. 19Yesu ta’, a zəltərwa, a ləvtar: «Samawa asi aɗaw. Akwar na, ndəhay ma kərza ewet, ama dəga wure keɗe ya da tərdakwar ŋga ndəhay ma zəlwa ndəhay aa cəveɗ ŋga Gazlavay.» 20Wure ŋgene, mbak! a mbəkdamata tabaw ata hay, ta’, a diyam asi Yesu. 21Yesu a ŋgəchey nekəɗey fa mey na, a hətey məlmaŋ hay cew mekele saya, ara ata Jak ta məlmaha Jaŋ, bəza hay ŋga Zebede. Ata manjatakaya daa kwambiwal ta papa ata Zebede, fa ɗiymata tabaw ata hay. Yesu ta’, a zəlta ata Jak ta Jaŋ ŋga diyam asiya. 22Wure ŋgene, mbak! a mbəkdamara kwambiwal leŋ papa ata, ta’, a diyam asi Yesu. 23Yesu fa pəkta slala hay cəpa daa hwayak ŋga Galile, faa sərkadata ndəhay daa way-mewuzey-mey hay ŋga Gazlavay, fa wuzey Mey-maaya-mawiya da ray mewey ŋga Bay Gazlavay da ray ndəhay, fa mbəley ndəhay daa macay hay wura wura cəpa leŋ ndəhay maahəlɓatakaya hay tabiya. 24Ndəhay tabiya daa hwayak ŋga Siri a cəndamara mey da ray a. Anda keɗe, a handamar ndəhay ga daa macay hay mekele mekele, siya hay masa vaw fa catar kalah, siya hay masa malula da ray, siya hay masa ta cek da ray fa ɓərzlam, leŋ masa maahəlɓatakaya hay. Ta’, Yesu a mbəldata. 25Ndəhay ga fa diyam asiya. Ndəhay a na, a samawa daa hwayak ŋga Galile, daa hwayak mezəley Berney-Hay-Kuraw, daa berney ŋga Jeruzelem, daa hwayak ŋga Jude, leŋ daa hwayak ta dey laŋgar ŋga wayam ŋga Jurdeŋ.

will be added

X\