Matiye 1

1Yesu Kəriste na, ara səkway ŋga Bay Davit. Davit e may, a yawa daa səkway ŋga Abəraham. Ndəhay daa səkway ŋga Yesu Kəriste he na, a zley ta Abəraham. 2Abəraham a na, aŋga papaŋ ŋga Izak. Izak may, papaŋ ŋga Jakwap. Jakwap, papaŋ ŋga ata Juda ta məlmaha hay. 3Juda, papaŋ ŋga ata Fares ta Zerah ma yatərwa ta ŋgwas aŋga mezəley Tamar. Fares, papaŋ ŋga Esraŋw. Esraŋw, papaŋ ŋga Aram. 4Aram, papaŋ ŋga Aminadap. Aminadap, papaŋ ŋga Naasaŋw. Naasaŋw, papaŋ ŋga Salmaŋ. 5Salmaŋ, papaŋ ŋga Bəwaz ma yarawa ta ŋgwas aŋga Rahap. Bəwaz, papaŋ ŋga Awbet ma yarawa ta ŋgwas aŋga Rut. Awbet, papaŋ ŋga Jese. 6Jese, papaŋ ŋga Bay Davit. Davit e na, aŋga papaŋ ŋga Salamaŋw. Mamaha ta key ŋgwas ŋga Uri la. 7Salamaŋw, papaŋ ŋga Rabəwam. Rabəwam, papaŋ ŋga Abiyah. Abiyah, papaŋ ŋga Asaf. 8Asaf, papaŋ ŋga Jawzafat. Jawzafat, papaŋ ŋga Jəwaram. Jəwaram, papaŋ ŋga Awziyas. 9Awziyas, papaŋ ŋga Jəwatam. Jəwatam, papaŋ ŋga Akaz. Akaz, papaŋ ŋga Ezekiyas. 10Ezekiyas, papaŋ ŋga Manase. Manase, papaŋ ŋga Amaŋw. Amaŋw, papaŋ ŋga Jawziyas. 11Jawziyas, papaŋ ŋga ata Yekwaniya ta məlmaha hay, a yatərwa daa masa ndəhay daa hwayak ŋga Babilaŋw ma həlmata Israyel hay aa hwayak ata. 12Fa dəɓa ha masa ata ma həlmata la a Babilaŋw a na, Yekwaniya a yawa Salatiyel. Salatiyel, papaŋ ŋga Zarubaabel. 13Zarubaabel, papaŋ ŋga Abiyut. Abiyut, papaŋ ŋga Eliyakim. Eliyakim, papaŋ ŋga Azawr. 14Azawr, papaŋ ŋga Sadakw. Sadakw, papaŋ ŋga Akim. Akim, papaŋ ŋga Eliyut. 15Eliyut, papaŋ ŋga Eliyazar. Eliyazar, papaŋ ŋga Mataŋ. Mataŋ, papaŋ ŋga Jakwap. 16Jakwap, papaŋ ŋga Jawzef, zel ŋga Mari ma yarawa Yesu ma zəlmara Kəriste, anda meləvey, ndaw masa Bay Gazlavay ma wala ŋga ləhdata ndəhay. 17Anda keɗe, dəga fa Abəraham haa kasl fa Davit na, dedeŋ ŋga dedeŋ hay kuraw a ray a məfaɗ. Dəga fa Davit e may haa kasl ta pas masa ata ma həlmata Israyel hay a Babilaŋw na, dedeŋ ŋga dedeŋ hay kuraw a ray a məfaɗ. Yaw, dəga ta pas a ŋgene kasl fa mayawa ŋga Kəriste na, dedeŋ ŋga dedeŋ hay kuraw a ray a məfaɗ saya. 18Ehe cəndamara mey da ray mayawa ŋga Yesu Kəriste. Mari mamaha na, ara kwakwa ŋga Jawzef. Daa masa Jawzef ta la Mari a way aŋga daa ba araŋ na, Mari ta key hwaɗ sem ta gədaŋ ŋga Mesəfney ŋga Gazlavay. 19Jawzef, maŋgasl ŋga Mari na, ara ndaw maaya ta leŋgesl. Daa masa aa ma cənda Mari ta key ta hwaɗ sem na, a wuɗey a par hwaray fa dey ŋga ndəhay ba. Da ray ŋgene, a wulkey ŋga mbəkda kwakwa aŋga, ama a wuɗey ŋga mbəkda na, kwa ndaw a səra mey a ba. 20Daa masa Jawzef fa wulkey da ray mey a na, maslaŋ ŋga Bay Gazlavay da vaɗ ta’, a sawa a ray a, aa guzlar daa mesəfney, a ləvar: «Jawzef, səkway ŋga Davit, ka da zlurey ŋga la kwakwa akah Mari ba, maja a key ta hwaɗ ŋgene na, ara ta gədaŋ ŋga Mesəfney ŋga Gazlavay. 21A yawa bəzey mezəle la, ka da par mezəley Yesu, maja a da ləhdata ndəhay aŋga hay daa mebərey ata hay.» 22Cek aha keɗe cəpa ta key la anda Gazlavay maa guzlwa zleezle ta mey ndaw ma təla mey aŋga, ma ləvey: 23«Nəka taw! dam-saɓara a key ta hwaɗ la manjar zel, a da yawa bəzey mezəle. A da zəlmara Emanəwel», anda meləvey, Gazlavay aa ta aləkwa. 24Jawzef a sləkɗey daa ɗar, fa dəɓa ha a ka anda maslaŋ ŋga Bay Gazlavay ma ləvar heyey. Leŋ! a la kwakwa aŋga Mari a way, 25ama ta cəmam cew e daa ba, haa kasl mayawa ŋga bəzey a. Jawzef a par mezəley Yesu.

will be added

X\