Luk 1

1Waa Teyewfil, Ndəhay ga ta kəɗam vaw la ŋga wuzleley da ray cek hay ma kam da wuzlah ala. 2A wuzlalam na, mey masa ala ma cəndamərwa fa ndəhay masa ma hətmərwa ta dey ata dəga ŋga mezley ŋga sləra ŋga Yesu. Ndəhay a, ara ndəhay ma wuzdamara mey ŋga Gazlavay. 3Ya taa cəfɗey ndəhay la ta dək-vaw da ray cek hay tabiya ma key dəga ŋga mezley ŋga sləra ŋga Yesu a. Yah may, a mbafaya ŋga wuzlalatakawa cek hay a ŋgada kah Teyewfil, ndaw mahura. 4Ya wuzlalakawa amba ka səra mey masa ata maa sərkadamakawa na, ara mey fara fara. 5Daa masa Herawt aŋga bay daa hwayak ŋga Jude na, ndaw ma ka kwakwas ŋga Gazlavay daha mezəley Zakari. Aŋga da wuzlah ndəhay ma ka kwakwas ŋga Gazlavay masa ata ma zəlmata ndəhay ŋga Abiyah. Ŋgwas ŋga Zakari a, mezəley Elizabet, aŋga səkway ŋga Araŋw, ndaw mahura da ray ndəhay ma ka kwakwas ŋga Gazlavay zleezle. 6Zakari a, ata cewete ta ŋgwas aŋga, ndəhay maaya fa mey ŋga Gazlavay, fa təɓmara mewey ŋga Bay Gazlavay maaya maaya, asaya, fa namar ray a kwakwas ŋga Gazlavay ta cəveɗ e. 7Ama bəzey ata daa ba, maja Elizabet a yey ba. Ata cewete maraw hay. 8Pas pal daha, Zakari fa key sləra ŋgada Gazlavay daa Way-mekey-kwakwas ŋga Gazlavay maja sləra ha ta pas ŋgene a ray ata ta ndəhay ŋga Abiyah heyey. 9Aŋga fa key sləra feteɗe maja ta kəɗam caca la amba a walamara anda kwakwas ata ma ləvey. Sləra aŋga ha na, ara ŋga mbəzey aa Slam masa Gazlavay aa da hwaɗ a daa Way ŋga Gazlavay amba aa wurey cek mezey maaya ŋgada Gazlavay. 10Daa ŋgene, ndəhay tabiya makustakaya daa ambaw fa dəram daŋgay. 11Ta’, maslaŋ ŋga Bay Gazlavay da vaɗ a wuzar vaw a Zakari. A lecey ta har-zəmay da cakay slam-meewurey cek mezey maaya ŋgada Gazlavay heyey. 12Masa Zakari ma hətar na, leŋgesl aŋga a mbəɗey, a zlurey. 13Ama maslaŋ ŋga Gazlavay a, a ləvar: «Ka zlurey ba, Zakari, maja Bay Gazlavay ta cənda medərey-daŋgay akah la. Elizabet, ŋgwas akah, a yaka bəzey mezəle la, ka da zəla bəzey a, Jaŋ. 14Kaa səmey la ga. Ndəhay ga aa səmam la fa mayawa aŋga ha may, 15maja a da key ndaw ma ka sləra mahura ŋga Gazlavay. Fa da sey wuzam daa ba, kwa fa da sey cek maməslkaya daa ba səlak. Mesəfney ŋga Gazlavay a sawa la a ray a, dəga aŋga da hwaɗ mamaha. 16A da jənta ndəhay Israyel hay ga amba a vəhmawa fa Bay Gazlavay ata. 17A da daw fa mey ŋga Bay Gazlavay ŋga ɗiyra cəveɗ. Aŋga ta gədaŋ leŋ ta mesəfney ŋga Gazlavay da ray a anda Eli, ndaw ma təla mey ŋga Gazlavay zleezle. A da cəmtar ɗay ŋgada papaŋ hay ta bəz ata hay. A da tərdata ndəhay makəwtakaya ŋga ndəhay ma wulkam maaya anda ndəhay ma kam cek ta cəveɗ e. Anda keɗe, a da ɗiyta ndəhay ŋga təɓey Bay Mahura ma da sawa.» 18Ama Zakari aa cəfɗa maslaŋ ŋga Gazlavay heyey, a ləvar: «Ya da səra masa cek aha a key la fara fara na, fa me? Maja wure keɗe na, yah maraw, ŋgwas aɗaw may, madaŋgwas.» 19Maslaŋ ŋga Gazlavay a, a mbəɗdara, a ləvar: «Ara yah, Gabəriyel, yah masa ma lecey fa mey ŋga Gazlavay ŋga kar sləra. Ara aŋga ma slərdiwa amba ya wuzdakawa mey maaya keɗe. 20Mey aɗaw masa yah ma kadakawa keɗe na, a key la fara fara ta pas masa Gazlavay ma wuɗey anda yah ma ləvka, ama kah ta təɓa daa ba. Da ray ŋgene, wure keɗe, ka da tərey madagazlam, ka fa da gwa ŋgaa guzley daa ba, haa kasl cek aha ma key la.» 21Daa masa Zakari a lawa daa Slam maaya daa Way ŋga Gazlavay heyey na, ndəhay makustakaya daa ambaw heyey fa səkwmara, a rəzlam maja ta njawa sem ga kalah daa slam aha. 22Zakari a bawa aa ambaw, a gwa ŋgaa guzltar saba. Da ray ŋgene, ndəhay a, a sərmara Gazlavay ta wuzar cek la daa slam aha. A gwa aa guzley ba, aa guzltar na, si ta har gway. 23Masa Zakari ta ndəvda sləra aŋga cay na, ta’, a daw a way. 24Fa dəɓa ha, Elizabet, ŋgwas aŋga, a key hwaɗ. Kiya zlam aa manjakaya da way da way, a ɓada hwaɗ a. Aa guzley daa ray aŋga, a ləvey: 25«Nəka, cek masa Bay Gazlavay ma kayawa. A wuɗey ŋga ɓəlyawa hwaray daa dey aɗaw fa dey ŋga ndəhay.» 26Masa Elizabet aa ta hwaɗ kiya maakwaw na, Gazlavay a slərwa maslaŋ aŋga, Gabəriyel, a Nezeret daa hwayak ŋga Galile, 27fa dam-saɓara, kwakwa ŋga ndaw mezəley Jawzef. Jawzef e na, ara səkway ŋga Bay Davit zleezle. Mezəley ŋga saɓara ha, Mari. 28Maslaŋ ŋga Gazlavay heyey kula! a mbəzey fa vəɗa, a car har, a ləvar: «Ya caka har, Mari. Bay Gazlavay a wuɗka kalah. Bay Gazlavay aa ta kah.» 29Mari ma cənda mey a na, mey a, a həɓar ray. A wulkey daa ray aŋga, a ləvey: «Mecey-har a, keɗe na, a wuɗey ŋga ləvey na, kwara?» 30Ta’, maslaŋ ŋga Gazlavay a, a ləvar: «Ka da zlurey ba Mari, maja ara Gazlavay ma pəska mey. 31Ka da key hwaɗ, ka da yawa bəzey mezəle, ka da zəla bəzey a, Yesu. 32A da key ndaw mahura, asaya, aŋga Bəzey ŋga Bay Gazlavay da vaɗ. Bay Gazlavay a da tərda ŋga bay aa slam a ŋga Bay Davit, ndaw daa səkway aŋga zleezle. 33A da wa səkway ŋga Israyel ŋga sərmataw. Bay aŋga fa da ndəvey daa ba səlak.» 34Mari aa guzlar a maslaŋ ŋga Gazlavay heyey, a ləvar: «Cek aha, a da key na, kwara? Maja ya səra zel ba.» 35Maslaŋ a, a mbəɗdara, a ləvar: «Mesəfney ŋga Bay Gazlavay da vaɗ a sawa la a ray akah ta gədaŋ aŋga, a bərɗaka la anda meezeɗ. Da ray ŋgene, bəzey a ma da yawa na, ara bəzey masa mapakaya wal ŋgada Gazlavay. Ndəhay a da zəlmara Bəzey ŋga Gazlavay. 36Nəka, Elizabet, səkway akah, kwa aŋga madaŋgwas na, aŋga ta hwaɗ wure keɗe may. A da yawa bəzey mezəle. Ndəhay a ləvam aŋga dərlay, ama wure keɗe aa ta hwaɗ kiya maakwaw, 37maja cek masa ta banay fa Gazlavay na, daa ba.» 38Fa dəɓa ha, Mari a ləvar: «Yah ndaw ma ka sləra ŋga Bay Gazlavay. Cek aha ŋga key anda kah ma ləvey.» Ta’, maslaŋ ŋga Gazlavay a, a mbəkda, a daw. 39Daa ɗar a ŋgene, Mari a sləkɗey, a wusey vaw, a daw a slala daa aŋgwa ŋga Jude. 40A wusey a slala ha, kula! a mbəzey a way Zakari, ta’, a car har a Elizabet. 41Daa masa Elizabet ma cənda mecey-har ŋga Mari na, bəzey da hwaɗ Elizabet a, a wusey. Wure ŋgene, Mesəfney ŋga Gazlavay a sawa a ray Elizabet. 42Da ray ŋgene, aa guzley ta gədaŋ, a ləvar a Mari: «Maaya ŋga Gazlavay aa da ray akah, a fəna da ray ŋgusay siya tabiya. Asaya, maaya ŋga Gazlavay aa da ray bəzey masa kah ma da yarawa! 43Yah na, wa may wa, amba mamaŋ ŋga Bay aɗaw Mahura a sawa a way aɗaw anda keɗe na! 44Ya səra kah mamaŋ ŋga Bay aɗaw Mahura na, maja, daa masa yah ma cənda ɗay akah, kah ma caya har na, bəzey da hwaɗ aɗaw a wusey ta meesəmey. 45Maaya ŋga Gazlavay aa da ray akah, maja ka ta təɓa mey aŋga la da ray cek ma da key fara fara.» 46Fa dəɓa ha Mari a ləvey: «Ya fa həlma Bay Gazlavay ta mevel aɗaw cəpa. 47Ya faa səmey maja Gazlavay, ndaw ma ləhdaya, 48kwa yah, ndaw mahura fa mey ŋga ndəhay ba na, aŋga fa nəkfaya dey, yah, ndaw ma ka sləra aŋga. Fara fara, dəga wure keɗe, ndəhay ma da yamawa tabiya, a daa guzlam da ray aɗaw, a ləvam: “Maaya ŋga Gazlavay aa da ray aŋga”. 49A da ləvam anda keɗe maja Bay Gazlavay Mawaca-waca, ta kaya cek maaya la. Aŋga na, Bay Gazlavay pal. 50A katar maaya la mandaw mandaw ŋgada ndəhay ma namar ray. 51Aa ta gədaŋ ŋga key sləra mahura, aa waɗatar ray ŋga ndəhay ma zlapam. 52A badata bay hay ma wamata ndəhay ta gədaŋ daa bay, a pata ndəhay masa ma namar ray ŋga mahura. 53Ndəhay masa may fa catar na, a rəhdata ta cek mezəmey, masa-zleley hay na, a vəhdata ta har ɓa’ kəne. 54Ta jənndakwar la, aləkwa ndəhay Israyel hay, ma ka sləra aŋga hay, anda aa ma ləvtar zleezle a papaŋ ŋga papa aləkwa hay. 55A ləvtar na, a da key maaya ŋgada Abəraham ta ŋgada ndəhay ma yamawa daa səkway aŋga hay ŋga sərmataw.» 56Mari a njey da way Elizabet a key gweegwe kiya maakar. Fa dəɓa ha, ta’, a vəhwa a way aŋga. 57Kiya ŋga Elizabet ta wuswa cay ŋga yey. A yawa bəzey mezəle. 58Meseembew aŋga hay ta səkway aŋga hay ma cəndamara masa Bay Gazlavay ta kar maaya la na, aa səmam ta ata Elizabet e. 59Masa bəzey a, ma key luma pal cay na, meseembew aŋga hay ta səkway aŋga hay heyey a samawa aa kwakwas ŋga mesley mandawal ŋga bəzey a ta ŋga pey mezəley. A wuɗam a pamar mezəley Zakari, mezəley ŋga papaha. 60Ama mamaha, a ləvtar: «Kəne ba, mezəley aŋga na, Jaŋ.» 61A mbəɗdamara, a ləvmar: «Ka zəla anda keɗe na, kwara? Ndaw mezəley daa səkway akwar anda keɗe daa ba.» 62Ta’, aa cəfɗamara Zakari, papaha, ta har, amba a sərmara a wuɗey ŋga zəla bəzey a me. 63Zakari a, ta’, aa cəfɗey hwadam kəslparah a ŋga wuzleley mezəley a. A wuzlala: «Mezəley aŋga, Jaŋ.» Ndəhay tabiya a rəzlam fa mezəley a. 64Wure wure ŋgene, Zakari a zlar meeguzley dəɓa, aŋga madagazlam saba. Ta’, a həlma Gazlavay ta gədaŋ. 65Meseembew aŋga hay tabiya mandərzay a katar. Ndəhay daa aŋgwa daa hwayak ŋga Jude he tabiya, fa kadamara mey a. 66Ndəhay tabiya ma cəndamara mey a, a wulkam daa ray ata, a ləvam: «Bəzey a keɗe na, a da tərey na, me?» A ləvam anda keɗe maja maaya ŋga Bay Gazlavay aa da ray a fara fara. 67Fa dəɓa ha, Mesəfney ŋga Gazlavay a sawa a ray Zakari, papaŋ ŋga bəzey heyey. A zlar ŋga wuzey mey anda ndaw ma təla mey ŋga Gazlavay, a ləvey: 68«Həlmakwa Bay Gazlavay, Gazlavay aləkwa Israyel hay, maja aŋga ta jənta ndəhay aŋga hay la, amba a ləhdata. 69Aa ta slərndakwar ndaw masa-gədaŋ la, ŋga ləhdandakwar daa mebərey. Ndaw aha, aŋga daa səkway ŋga Bay Davit, ndaw ma ka sləra aŋga zleezle. 70Bay Gazlavay taa guzlndakwar la dəga zleezle ta mey ndəhay ma təla mey aŋga hay. 71Ta ləvndakwar la, a da ləhdandakwar dasi har ŋga masa-gəra aləkwa hay, leŋ dasi har ŋga ndəhay ma wuɗam ŋga hətmandakwar fa dey ba. 72A wuzdərwa mewuɗey-vaw aŋga la, fa papaŋ ŋga papa aləkwa hay, A sərfada mejəwey-mey aŋga la ta aləkwa. 73Daa mejəwey-mey a na, Gazlavay taa guzlar la a Abəraham papaŋ ŋga papa aləkwa zleezle, a ləvar, 74a ləhdandakwar la dasi har ŋga masa-gəra aləkwa hay, amba ya kakwa sləra ŋgada Gazlavay ta mandərzay ba, 75amba ya tərkwa ndəhay maaya fa Gazlavay, ndəhay ma ka sləra ta cəveɗ e, haa kasl fa meməcey aləkwa. 76Bəz aɗaw, kah may, ka da tərey ndaw ma təla mey ŋga Bay Gazlavay da vaɗ maja ka da daw fa mey ŋga Bay Gazlavay ŋga ɗiyra cəveɗ. 77Ka da wuzdatara a ndəhay ŋga Gazlavay na, Gazlavay a, a da ləhdata maja a da mbəkdatara mebərey ata. 78A da ləhdata na, maja aŋga na, maaya kalah, asaya, a sərey dey-ceceh kalah fa ndəhay. Fa slərndakwar meweɗey da vaɗ anda pas, 79amba a waɗatar dey a ndəhay ma njam daa ləvaŋ masa fa da məcam, asaya, amba ya hətkwa ŋga njey ta zazay.» 80Bəzey a heyey, fa gəley, fa gəley, leŋgesl fa səkwa. Fa dəɓa ha, a daw a wuzlah-ley, aa manjakaya feteɗe, kasl pas masa aŋga ma zlar ŋga wuzey mey ŋga Gazlavay fa mey ŋga ndəhay Israyel hay.

will be added

X\