Tituc 3

1Dala i ma myetka jiek dala ɛkkɛn noŋdi ba jyek akuuma ɔci jyek ma kuuma maka ḍwaŋin. Dala ɛkkɛn bwagdɛ naŋka pwadin. 2Naa ɛkkɛn wooki menga bɛɛ. Dala ɛkkɛn ciyi iki ma te pwani, ɔci dala ɛkkɛn poŋi te maka pookɛn, ɔci dala ɛkkɛn noŋdi mati waakɛnda te wara bala iñɔ. 3Te baaṭiyɛ, ikin wyetkɔ bala ɔntɔ daŋkun. Ikin balkin tyeŋin jyek menga bɛɛ. Ikin noŋin ba yomg ikin pookɔ. Ɔci waka ikin buaginti ne tolan neeniyɛ, ikin mukkinyɔ naŋkin ba kɛɛnk ɛkkɛn, ɔci ikin balkin lieṭin waka ikin yomgɔ ñɔɔki ne pɛñany. Ɔci oŋkandayɛ, ikin balkin ciyin amaamo. Ɔci ikin korkɔ modɔ, ɔci ikin yookin te maka pookɛn, ɔci ikin balkin yoyyin ñin pookɔ daŋkun. 4Yeti oŋŋa Jwaŋa Tolan noŋni ne pwadan ikinti te anna ɛkɛ ani ikin neeniyɛ, 5ɛkɛ ikin yɔɔññin doki. Ikin yɔɔññin ɛkɛ acaan naŋki ikin pwad pwad ɛkɛti pookɔ bɛɛ. Ikin yɔɔññin ɛkɛ acaan ɛkɛ yomɛ pwad pwad ikinti. Ɛkɛ ikin yɔɔññin te Boŋ ɛkɛ Boŋa ikin luaŋŋin yomgɔti te nɔji, Boŋa ikin jiennin te jiedda woonɛ aŋka ikin aŋŋin maka wonkɛny. 6Ikin ‘wonnin Jwaŋa Tolan Boŋ ɛkɛ ne tolan te naŋka naŋŋɛ Yaccu Kiṭɔ Mena Yuoci ikiny. 7Ikin yɔɔññin ɛkɛ a ɔɔn acaan ɛkɛ buagɔn dala ikin pwattin Juaŋ ñamɛti te yom pwani ɛkɛ ikinti neeni. Ɔci a ɔŋŋiyɛ, ŋeecin ikin tɛɛtin baadi bɛɛ, tɛɛtin jyettin kɛɛtin ikin neeniyɛ, yuartin ikin ne baaṭi. 8Ikin yaakinti jyettin jyeka neeni acaan ɛkkɛn a jyeka awarɛ waakɛnda. Ɔci te jyeka neeniyɛ, ‘ya buaga dala i ma myetka te jyeka neeni ne pwadan aŋka naa ɛkkɛn yeya bɛɛ. Acaan maka jyeti Jwaŋa Tolanti dokiyɛ, dala ɛkkɛn woŋgɛn tiittan te kanŋa pwadin neeni. Kanŋa neeni pwad pwado, ɔci etti naŋka pwadin mati. 9Dala i ma myetka naa ma tyewɔ iki maka pookɛn te jyeka budan neeni bɛɛ. Naa ɛkkɛn tyewɔ te jyek yɔrg ɛkkɛn bɛɛ. Ɔci moki naa ɛkkɛn wɛyyɔ bɛɛ. Ɔci naa ɛkkɛn tyewɔ te jyek tiit jyek ganuun Ma Yahuud bɛɛ. Acaan tyewwinyɛ, etti jyeka pwadin mengati bɛɛ. Naŋka neeni a naŋka budan. 10Kan men gɛɛl buagɔn Ma Kiṭɔ kɛbdɛ jitin kaniicajiyɛ, dala i ɛkɛ ṭeya, ɔci kan ɛkɛ tieŋdi bɛɛyɛ, dala i ɛkɛ ṭeya moki. Ɔci kan ɛkɛ yookɔn men ɔɔnyɛ, dala i ɛkɛ dorka warɛti, ɔci naa i ñoodi iki ɛkɛ te genga moki bɛɛ. 11Çeecin ikin kan men gɛɛl naŋki ɛkɛ bala a ɔɔnyɛ, ɔci kan paŋi ɛkɛ bala ɔntɔ mokiyɛ, ɔci a ɔɔnyɛ, a nɔjjo. Ɔci te naŋki ɛkɛ wannayɛ, ɛkɛ warɛ lyɛldɛ ne naŋki ɛkɛ agi damgin awarɛy. 12Gɔṭṭi, ne Artɛmac walla Ticcikoc cuonda ‘ya ɛkkɛtiyɛ, dala i pocca bɛɛd ‘yati ne pɛñan. Ikin kooktin ban Nikɔɔpolic acaan ‘ya buaga coocca wɛnan te ñaal konɛ. 13Jinac mena kanŋa ɛkɛ a jyek ganuun, ɔci Apɔɔlɔcyɛ, dala i ɛkkɛn maga ne pwadan ne ɛkkɛn bwagdɛ woony. Dala i ɛkkɛn maga te waak aŋka naa genga bɔɔndi ɛkkɛnti bɛɛ. 14Ma ikinyɛ, dala ɛkkɛn kandi ne pwadan oŋkanda aŋka dala waak bala ɛkkɛnti aŋka ɛkkɛn moki maka pookɛn te wak ɛkkɛn, ɔci a ɔɔnyɛ, coodi ɛkkɛn aga coodda budan bɛɛ. 15Maka bala ‘yati wɛnniyɛ, ɛkkɛn waakɛnda ñiepi i. Ɔci iyɛ, dala i ma ñiiba te ɔɔn daŋkun. Gena maka ani ikiny, maka jyeti Juaŋti dokiy. Dala Juaŋ yomɛ pwada a pwani ɛkkɛti oŋkanda waakida. Bawwin.

will be added

X\