Tituc 1

1Gena ‘ya Buuluc kɛɛngɔn Jwaŋa Tolan. ‘Ya a cuuda Yaccu Kiṭɔ te jyek jyenna ma jyetki Juaŋti neeni. Gena maka muonɛ Juaŋ boray. Ɔci ɛkɛ ‘ya cuonna aŋka ‘ya lor ma te jyek ɛkɛ jyeka awarɛ, ɔci coodda ɛkɛ buagɛ ma cootɛ a ɔki te jyek ɛkɛy. 2Ikin jyettin kɛɛyin jyek tɛɛtin Juaŋ tɛɛtin baadi bɛɛ neeniy, acaan Juaŋ gɔki te baaṭi doki wona ṭɛɛr men baawi agi ikin ‘wontinti ɛkɛ tɛɛtin neeni. Ɔci Jwaŋa Tolan yaakinti dyeti ma ñingɛn bɛɛ. 3Ɔci ɛkɛ jyek tɛɛtin ɛkɛ lɛɛlnɛ bora mati te oŋŋa pwadan oŋŋa ɛkɛ buagɛtiy. Gena jyeka loṭa ‘ya ma a jyek Jwaŋa Tolany. Jwaŋa Tolan Mena Yuoci ikinyɛ, ɛkɛ ‘ya ‘wonna kanŋa miti ma te jyeka neeni bieŋuti. 4Hay! Kaci ‘ya Tituc, ‘ya kiewan worga neeni iti. I aŋŋi kaci ‘ya te jyenna i jyetti Kiṭɔti neeni. Ikin jyettin Juaŋti yaakkɔ. Dala Jwaŋa Tolan Wey ikin, ɔci Cieggɔn Yaccu Kiṭɔ Mena Yuoci ikin neeni yomgɛn pwada a pwani iti, ɔci dala ɛkkɛn i ‘wonti coodi pwanno. 5Ɛɛ, gɔṭṭi, Tituc, i dolninyɔ ‘ya Kaŋ Kriit wyeñɛti aŋka kanŋa dollanyɔ ‘ya wanna cwamja, ɔci aŋka i ma maga te jyek cyɛgji kaniicanji, bonka neeniti waakɛnda ba jyeka i myennin ‘ya te ñamuy. 6Cyekin kaniicanyɛ, naa ɛkkɛn naŋa i a maka waaktan ma bɛɛ. Ɔci maka neeni dala ɛkkɛn balki moong ne ciṭin. Dala kɛɛgin ɛkkɛn a maka jyeti Jwaŋa Tolanti. Naa ɛkkɛn balki kɛɛgin guaktan ma a kɛɛgin cooddɛn yeyin bɛɛ, ɔci walla kɛɛgin yookɔn te jyek weyyɛn bɛɛ. 7Mena gaciicyɛ, naa ɛkɛ a mena waaktan ma bɛɛ, acaan ɛkɛ a mena Ma Kiṭɔ bala ɛkɛ bieŋɛti. Walla naa ɛkɛ a mena yyɛcan bɛɛ. Ɔci walla naa ɛkɛ a mena loomgɛ cwalŋan bɛɛ. Ɔci walla naa ɛkɛ a mena ani mooy bɛɛ. Ɔci walla naa ɛkɛ a mena cooddɛ yaayan bɛɛ. Ɔci walla naa ɛkɛ a mena warɛ ḍigan ani waak bɛɛ. 8Dala ɛkɛ a mena yomɛ pwadan mena gɔṭi wɛlgo. Dala ɛkɛ a mena ani naŋka pwadin, ɔci dala ɛkɛ a mena mwoki warɛ ne pwadan. Dala ɛkɛ a mena pwadan Juaŋ ñamɛti. Dala ɛkɛ a mena ciyi noŋi ba naŋka Juaŋ buagɛy. Ɔci dala ɛkɛ a mena yaakinti poŋi te warɛ. 9Dala ɛkɛ waŋɛ tiittɛ te jyeka pwadin jyeka loṭɔn ɔɔn ma neeni, aŋka ɛkɛ ṭeyi ma ɔci loṭi ma te jyeka pwadin neeni, ɔci moki aŋka maka tieki jiek bwandɛ ɛkɛ. 10Ma Kiṭɔ maka coŋin gɛɛg bala noŋi ba yomg ɛkkɛn pookɛn. Ɛkkɛn tieŋdi jyek menga bɛɛ. Ɔci maka coŋin neeniyɛ, ɛkkɛn gɛɛg a Ma Yahuud. Ɛkkɛn balki jyeka coŋin tuggɛnti, ɔci ɛkkɛn noŋi ma ñingɛn. 11Dala ɛkkɛn yɔddɛ ñin te lali jyeka yeyin neeni. Acaan maka coŋin gɛɛg bala jyetcin ɔntɔ doki te jyek ɛkkɛn. Ɛkkɛn bala loṭi ma amaamo. Ɛkkɛn loṭi ma a ɔɔn acaan ɛkkɛn buagɔn ‘wontan ma waako. Naŋki ɛkkɛn neeni a labjo. 12Jyeka neeni bala ba men gɛɛl bɛɛn te ma maka neeniti, ɔci ɛkɛ gɔki te ma Kriit agi ma Kriityɛ, ɛkkɛn jomi jiek waakɛnda. Ɔci moki ɛkɛ gɔki agi ɛkki agi ywobk ba leyi gɛɛg, ɔci agi ɛkki waakcin pɛñgɔ te kanŋa waak ne tolan, yeti ɛkkɛn ati booti omi gena oomdin mati. 13Jyeka guaŋŋɛ mena neeni te ɛkkɛn neeni a jyeka awarɛ, hay! Ɔci acaan a ɔŋŋiyɛ, dala i ɛkkɛn ṭeya ne pɛñan te jyeka neeni aŋka ɛkkɛn yomgɛn tɛya te jyenna ɛkkɛn jyetkɛ Juaŋti neeni. 14Ɔci dala Ma Kiṭɔ mwondi te jyeka guaktan Ma Yahuud a jyeka budan neeni. Maka yookɔn te jyeka awarɛyɛ, ɛkkɛn bala gɔki mati te jyeka ɛkkɛn buagɛti dala naŋtan may. Jyeka neeni bɛɛn te Jwaŋa Tolanti bɛɛ. A’a, jyeka neeni bɛɛn te ma baanti budan. Dala i ma myetka naa ɛkkɛn tieŋdi jyek ɛkkɛn neeni bɛɛ. 15Yeti maka yomgɛn pwadinyɛ, waak waakɛnda pwadɔ ɛkkɛnti, ɔci maka jyeti jyek Juaŋti bɛɛyɛ, waak waakɛnda yeyɔ ɛkkɛnti, acaan maka neeniyɛ, ɛkkɛn waka pwadin walla waka yeyin ŋeecɔn yomgɛnti bɛɛ. Ɔci ɛkkɛn yaakinti poŋi paŋŋa pwadan bɛɛ. 16Ɛkkɛn gɔki te tuggɛn agi ɛkkɛn Jwaŋa Tolan ŋeejinti katan. Yeti te naŋka naŋtan ɛkkɛn yaayan neeniyɛ, ɔci ŋeecɔn ma ɛkkɛn Juaŋ ŋeecɔn awarɛ bɛɛ. Hay! Ɛkkɛn yeyɔ, ɛkkɛn bɛɛyi jyek Juaŋ neeni. Ɛkkɛn yaakinti noŋdi gena pwadan gɛɛl bɛɛ.

will be added

X\