Ḍɔɔm 9

1Gɔṭṭɛ, ‘ya gɔkka ɛkkɛti awarɛ Kiṭɔ ñamɛti. Çeejɛ Boŋ Jwaŋa Tolan Boŋa bala ‘ya yomuti neeni jyeka guagdi ‘ya ɛkkɛti neeni a jyeka awarɛ. 2’Ya gɔk ka ‘ya yomu yaayɛ. ‘Ya yomu wiak oŋkanda te modg ɔɔn ma Icrayiil. 3Kan te ma baan yaakinti yuoci makɛn te yaata ɛkkɛn waakɛn yaatɛti nuotti jitinyɛ, te war ‘ya doki ‘woñgan Juaŋ yiɛmnɛ bana yaayan aŋka ma ɔɔn ma Icrayiil eedɛ Juaŋ ban ɛkɛ te naŋki ‘ya neeni. 4Ma Icrayiil myennɛ Juaŋ agi ɛkɛ buagiti dala ɛkki agdi kɛɛgin ɛkɛ. Juaŋ bala iki ɛkkɛn te baaṭi doki. Jwaŋa Tolan jiek naŋɛ iki ɛkkɛn agi ɛkɛ noŋji naŋka pwadan ɛkkiti. Ɛkkɛn myennɛ ɛkɛ te ganuun ɛkɛ buagiti naŋtan ɛkkɛny. Ɔci ɛkkɛn ‘wonnɛ Juaŋ mali ɛkɛ. Ɔci ɛkkɛn myennɛ ɛkɛ te jyeka pwadin jyeka bɛya ɛkkɛnti ne baaṭiy. 5Yɔrg ɛkkɛn te baaṭi, ɛkkɛn a maka ḍwaŋin. Ɔci Yaccu Kiṭɔ daŋkunyɛ, ɛkɛ a kɛɛn ɛkkɛn. Yaccu Kiṭɔ ɛkɛ a Jwaŋa Tolan. Waak waakɛnda buannɛ ɛkɛ. Ɛkɛ pwad pwad yuonginda ɔɔn. Ɛɛ, dala bala a ɔɔn. 6Jyeka naŋŋɛ Juaŋ te ñamu aŋi jyeka budan bɛɛ. Kɛɛgin Icrayiilyɛ, kɛɛptin jitin, ɛkkɛn waakɛnda a ma Juaŋ bɛɛ. 7Kɛɛgin Abrahim kɛɛptin jitin acaan jiek naŋŋɛ Juaŋ te ñamu iki Abrahim. Juaŋ gɔki ɛkɛti agi, “Kɛɛgin bɛya te kaci i Icaaktiyɛ, ɛkkɛn owwa ‘ya bora.” 8Maka bɛɛn te Abrahimtiyɛ, ɛkkɛn a ma Juaŋ acaan ɛkkɛn a kɛɛgin Abrahim? A’a, a ɔɔn bɛɛ. Ma Juaŋyɛ, gena maka bornɛ Jwaŋa Tolan ba jwalla ḍuaññɛ ɛkɛ Abrahimti te ñamuy. Ɛkkɛn aŋka a kɛɛgin Abrahim kɛɛgin awarɛ. 9Jyeka guaŋŋɛ Juaŋ Abrahimti te ñamu te jyek kaci ɛkɛ Icaak parɛ neeni gɔki agi, “Ne ywoniti ba wɔɔka ḍuañi ‘yayɛ, ‘ya dɔɔkka wɛnni, ɔci ɛŋ i Caara jieda kacca ‘uano.” 10Ɔci jwalla parɛ gɛɛl bala daŋkun. Gena jwali Ribɛɛka acaan kɛɛgin ɛkɛ kɛɛgin ne yyɛɛwɔ neeni bɛɛn te weya ne cyɛɛlɔ. Gena kɛɛgin yɔr ikin Icaak. 11Ɔci ne ɛkɛ jienni men bɛɛyɛ, ɛkɛ myennɛ Juaŋ te kɛɛgin laayi ɛkɛ neeni agi, 12“Kacca jieda i ne ŋoyɔyɛ, ɛkɛ aŋka aga ba kacca tolan, ɔci kacca jieda i ñamuyɛ, ɛkɛ aga ba kacca ḍiɛran.” Ne Juaŋ noŋŋi jyeka neeniyɛ, ɛkɛ poŋi te naŋka naŋtan kɛɛgin neeni bɛɛ. Acaan ɛkkɛn noŋi gena pwadan walla gena yaayan gɛɛl men bɛɛ. Ɛkkɛn baaw men bala te mɛɛgɛn konɛti men. Jyeka kiigin jyeka guaŋŋɛ Juaŋ te baaṭi gɔki agi, “‘Ya an Yaakub, ɔci ‘ya yomu baaw Icɔti.” Jyek naŋki Juaŋ bala a ɔɔn kɛɛgin neeniti ogo? Naŋki Juaŋ bala a ɔɔn acaan ɛkɛ ma oodɛ bora aga ma ɛkɛ te naŋka naŋtan ma baan bɛɛ. Ɛkɛ ma oodɛ bora te yom ɛkɛ parɛ. 14Oŋ acca ikin gɔktin a ɔki te jyeka neeni? Ne Juaŋ noŋi a ɔɔnyɛ, ɛkɛ noŋi amaamɔ? Hayɛllɛ! 15Acaan Juaŋ gɔki Muucati agi, “Kan ‘ya buaga yomu pɔkka mengatiyɛ, gena yom ‘ya.” Ɔci agi, “Kan ‘ya buaga menga magdiyɛ, gena yom ‘ya.” 16Menga dɛndi ban Jwaŋa Tolan te yom ɛkɛ parɛ bɛɛ. Kan men kanŋan ne pɛñanyɛ, kanŋa neeni yɔmdi bɛɛ. Kan Jwaŋa Tolan yomɛ pɔktɛ mentiyɛ, mena neeni ɛkɛ dɛndi ban Juaŋo. 17Jyeka guaŋŋɛ Juaŋ Pɛɛrɔti neeniyɛ, bala worgaji agi, “I ḍuannin ‘ya aŋŋi ḍuaŋa tolan aŋka ma gɔrti naŋka tɛyan naŋka naŋdi ‘ya iti aŋka yenti ‘ya ooddi baan konɛ warda.” 18Te naŋka naŋŋi Juaŋ neeniyɛ, ŋeecin ikin kan Juaŋ buagɔn yomɛ pɔktɛ matiyɛ, ɛkɛ yomɛ pɔktɛ ba yom ɛkɛ. Ɔci kan ɛkɛ buagɔn noŋdi naŋka tɛyan mati aŋka ma wyetkɛn tɛɛtiyɛ, ɛkɛ moki noŋdi a ɔɔn ba yom ɛkɛ parɛ. 19Ɛkkɛ toottɛ ‘yati kaapun gɔktɛ agi, “Oŋ kan Jwaŋa Tolan noŋi ba yom ɛkɛ parɛ mati a ɔɔny, men gɛɛl yaakinti dɛyi ɛkɛ boki? Oŋ kan a ɔɔnyɛ, Juaŋ wooki ma te naŋka naŋtan ɛkkɛn ogo?” 20Kan ɛkkɛ toottɛ a ɔɔnyɛ, a ɔɔn pwatcin bɛɛ. Mug ɔɔn, i a menɛ aŋka i gɔki a ɔɔn Juaŋti wan? Lomma eeki ma waak ɛkɛ yaakinti gɔkti mena eyi waakti agi, “I ‘ya eeda a ɔɔn ogo?” Hayɛllɛ! Ɛkɛ gɔkti a ɔɔn bɛɛ. 21Ɔci kan mena eyi waak buagɔn eyi gena parɛ gɛɛl mokiyɛ, ɛkɛ ooddi etti lomi te lomi mɛɛgɛnti, ɔci ɛkɛ eedi gena parɛ neeni moki. Yeti ɛka parɛ neeniyɛ, pwad pwad ba ɛki ñontan ɔɔn bɛɛ. Yeti ɛkkɛn bɛɛn te lomma ne cyɛɛlɔti. Mena eyi waak neeniyɛ, ɛkɛ yaakinti waak kɛbdɛ jitin te een ba yom ɛkɛ. 22Maka cɔnnɛ Juaŋyɛ, ɛkkɛn bala ba lomi Jwaŋa Tolan bieŋɛti. Ɔci ɛkɛ noŋi ɛkkɛnti ba yom ɛkɛ. Ɔci ba waka eetan ma gɛɛg ne damkiti ma te eenyɛ, bala ba maka nɔɔtk daŋkun. Ɛkkɛn bala Juaŋ bieŋɛti, ɔci ne baaṭi ywobji Juaŋ bɛya ɛkkɛnti, ɔci te naŋka neeniyɛ, Juaŋ ŋeettan ma ne ɛkɛ tɛyi awarɛy. Yeti acaan Juaŋ loomgɛ tɛy tɛy maka yeyintiyɛ, ɛkkɛn bala ciyi men ɔɔn. 23Ma gɛɛg muonɛ Juaŋ bora te baaṭi doki, ɔci ɛkɛ yomɛ pɔŋnɛ ɛkkɛnti, ɔci ɛkɛ buagɔn dala pwani ɛkɛ ŋeettan ma acaan ɛkɛ tol tolo. 24Maka muonɛ ɛkɛ bora neeniyɛ, gena ikin. Ma gɛɛg ikinti ɛkkɛn a ma Icrayiil, ɔci maka pookɛn gɛɛg moki ikintiyɛ, ɛkkɛn a Keedin Pookɛn. 25A ɔɔnyɛ, bala ba jyeka kiinɛ Hɔɔca mena a bɔwa Jwaŋa Tolan agi, “Maka a ma ‘ya bɛɛyɛ, ɛkkɛn bardi ‘ya a ma ‘ya. Ɔci maka ana ‘ya bɛɛyɛ, ɛkkɛn bardi ‘ya a maka ana ‘yay.” 26Te ñamu Juaŋ gɔki Keedin Pookɛnti agi ɛkki agi ma ɛkɛ bɛɛ. Ɔci oŋŋa parɛ moki ɛkɛ gɔki agi, “Maka neeni bartan ma agi ɛkki agi kɛɛgin Jwaŋa tɛɛti.” 27Icaaya ma nɔɔnnɛ te jyek ma Icrayiil agi, “Ma Icrayiilyɛ, ɛkkɛn kɔɔna kɔɔni bala ba ŋɔmi ñingɛ. Yeti ɛkkɛn waakɛnda dɛndi ban Jwaŋa Tolan bɛɛ. 28Acaan Juaŋ noŋdi godan ma baanti baan warda, ɔci Juaŋ jiek kɔɔktɛ ɛkkɛn wyetkɛnti. Juaŋ noŋdi godan ne pɛñan ɛkkɛnti. Ɛkɛ jwali gɛɛl daldɛ bɛɛ.” 29Jwalla guaŋŋɛ Icaaya gɛɛl bala moki. Gena jwali jyeka gɛɛka bɛya ne ŋoyɔ agi, “Kan te Juaŋ ma ikin gɛɛg dɔɔnɛ bora te lienti bɛɛyɛ, te ikin balkin ba ma Caduum, ɔci ma Gamɔɔra daŋkun.” 30Oŋ acca ikin gɔktin a ɔki te jyeka neeni? Keedin Pookɛnyɛ, te ñamu ɛkkɛn bala lieṭi pɔya ɛkkɛn pwatti Juaŋ ñamɛti bɛɛ. Yeti acca ɛkkɛn pwadgin Juaŋ ñamɛti doki te jyenna ɛkkɛn jyetki Jwaŋa Tolantiy. 31Ɔci ma Icrayiilyɛ, ɛkkɛn poŋi gɔki agi kan ɛkkɛn jyek ganuun tiidintiyɔyɛ, a ɔɔn ɛkkɛn pwaddinti Juaŋ ñamdanti. Yeti ɛkkɛn pwadgin Juaŋ ñamɛti men bɛɛ. 32Ɛkkɛn pwadgin Juaŋ ñamɛti men bɛɛ ogo? Acaan ɛkkɛn gɔki agi ma pwaddɔ Juaŋ ñamdanti te jyenna ma jyetki neeni bɛɛ. Ɛkkɛn gɔki agi ɛkkɛn pwaddinti pookɛn te naŋki ɛkkɛn. A ɔŋŋiyɛ, ɛkkɛn tworŋɛ guonan tuor ma. 33Ma Icrayiilyɛ, ɛkkɛn jiek pɔɔdɛ. Ɛkkɛn bala ba maka twordɛ guonan ɔci ḍɛɛmdi iñɔy. Acaan jyeka guaŋŋɛ Juaŋ bala worgaji gɔki agi, “Gɔṭṭɛ, guonan tuor ma ḍuaccan ‘ya ban ma Icrayiilji ɔci ma twordɛ ɛkɛ. Ɛkɛ a guonan yooci ma yomgɛn. Yeti kan mena jyeddi ɛkɛtiyɛ, ɛkɛ yomɛ wiakti oŋgati bɛɛ.”

will be added

X\