Ḍɔɔm 8

1Maka Yaccu bala ɛkkɛnti dokiyɛ, jyek godan Juaŋ bɛya ɛkkɛnti moki bɛɛ. 2Jyek nɔji tɛy tɛyo. Ɔci jyek lien tɛy tɛy moki. Yeti acaan Yaccu Kiṭɔ bala ikintiyɛ, ikin pɔŋnin Boŋ Jwaŋa Tolan te jyeka neeni, acaan Boŋ ɛkɛ tɛy tɛyo, ɔci ikin ‘wonnin ɛkɛ tɛɛtin. 3Naŋka jyek ganuun yaaŋnɛti naŋŋɛ bɛɛ acaan war ma baan koocinyɛ, cwamnɛ Jwaŋa Tolan. Jwaŋa Tolan naŋka neeni naŋŋɛ te cuoññin ɛkɛ kaci ɛkɛ waanɛ cuonnɛ iñɔ aŋŋi ba men baan mena a nɔɔdɔn neeni aŋka aga ‘yɛṭa nɔjiy. A ɔŋŋiyɛ, Juaŋ nɔji men baan nuuññɛji. 4Ɔci a ɔŋŋiyɛ, kan ikin tieŋtin jyek yomg ikin yomga yeyin bɛɛ, ɔci kan ikin tieŋtin gena jyek Boŋ Jwaŋa Tolanyɛ, ikin yaakinti jyek ganuun tiitinyɔ. 5Maka noŋi ba yomg ɛkkɛn budanyɛ, ɛkkɛn ani naŋki ɛkkɛn. Maka noŋi ba jyek Boŋ Juaŋyɛ, ɛkkɛn ani jyek ɛkɛ. 6Maka poŋi ba paŋi ɛkkɛn neeniyɛ, lien yuartan ɛkkɛn. Maka poŋi ba jyek Boŋ Jwaŋa Tolanyɛ, tɛɛtin bala ɛkkɛnti, ɔci coodda pwadan bala ɛkkɛnti moki. 7Jiek bala a ɔɔn kan ma poŋi ba paŋi ɛkkɛn pookɛnyɛ, a ɔɔn bala ba ɛkkɛn yookɔn te Jwaŋa Tolan. Yomg ma baan yomga buagɔn noŋi ne yaayanyɛ, ɛkkɛn tieŋdi ganuun Juaŋ bɛɛ, ɛkkɛn yookɔn. 8Maka noŋi ba yomg ɛkkɛn pookɛn budanyɛ, ɛkkɛn yaakinti noŋi naŋka pwadan Juaŋti bɛɛ. 9Ɛkkɛyɛ, jyek ɛkkɛ da pookɛn. Kan Boŋ Jwaŋa Tolan bala ɛkkɛti awarɛyɛ, ɛkkɛ yaakɛti ciyɛ te jyek yoma te baaṭi moki bɛɛ. Ɛkkɛ ciyɛ te war tɛɛn Boŋ Jwaŋa Tolan. Mena Boŋ Yaccu Kiṭɔ baaw ɛkɛtiyɛ, ɛkɛ a men Yaccu Kiṭɔ bɛɛ. 10Acaan ne Yaccu Kiṭɔ baali ɛkkɛtiyɛ, yoma te baaṭi tuun doki. Ɔci yoma woonɛ aŋka bala ɛkkɛti te naŋki Yaccu, ɔci acca ɛkkɛ balgɛ noŋɛ naŋka pwadin. 11Ne Boŋ mena Yaccu luolnɛ ñaalɔ te koolji tɛɛti moki neeni baali ɛkkɛtiyɛ, ɛkkɛ da ‘wondɛ ɛkɛ tɛɛtin te Boŋ ɛkɛ Boŋ Jwaŋa Tolan mena bala ɛkkɛti neeni. 12Modg ɔɔn, jiek bala aŋka naŋtin ikin. Yeti gena jyek yomg ikin pookɔ bɛɛ. 13Acaan kan ɛkkɛ noŋdɛ ba jyek yomg ɛkkɛ pookɔ budanyɛ, ɛkkɛ tuudɛ. Yeti kan naŋki ɛkkɛ naŋka yaayan lɛgdɛ ɛkkɛ jitin te Boŋ Jwaŋa Tolanyɛ, ɛkkɛ uddɛ. 14Maka wɛɛdɛ Boŋ Jwaŋa Tolan oŋkandayɛ, ɛkkɛn a kɛɛgin Jwaŋa Tolan waakɛnda. 15Acca ɛkkɛ buayɛ ɛkɛ ba maka kɛɛnk moki bɛɛ. Ɛkkɛ pirŋɛ Jwaŋa Tolan, ɔci ɛkkɛ yaakɛti gɔktɛ Juaŋti agi, “Wey ɔɔn!” 16Boŋ Jwaŋa Tolan ɛkɛ waanɛ parɛ gɔkti ikin yomgɔti agi ikin akcin kɛɛgin Jwaŋa Tolan. 17Ɔci kan ikin akin kɛɛgin Jwaŋa Tolan a ɔɔnyɛ, wak ɛkɛ aga wak ikin daŋkun. Ɔci waka aga wak Yaccu Kiṭɔyɛ, aga wak ikin daŋkun. Kan taab Yaccu aŋi taab ikin daŋkunyɛ, ne baaṭi jyeka pwadin jyeka bɛya ɛkɛtiyɛ, bɛya ikinti daŋkun. 18Paŋi ‘ya neeni, jyeka bɛya ikinti ne baaṭiyɛ, pwanna pwanno. Ɔci taab bala wɛnni ikinti accayɛ, ɛkɛ a genga bɛɛ. 19Ɔci waak waakɛnda, waka cɔnnɛ Juaŋyɛ, ɛkkɛn kɛɛy oŋŋa pwani bɛɛdi bora kɛɛgin Jwaŋa Tolantiy. 20Waka cɔnnɛ Juaŋ neeniyɛ, ɛkkɛn yiegin te jyek ɛkkɛn pookɛn budan bɛɛ. Gena naŋki Jwaŋa Tolan ɛkkɛnti. Yeti ɛkkɛn jyeti kɛɛy oŋŋa jyeka pwadin bɛɛti ɛkkɛnti daŋkuny. 21Oŋŋa kɛɛtan ɛkkɛn neeniyɛ, gena oŋŋa ɛkkɛn pɔktɛ Juaŋ te jyeka yeyin. Ba jyek pɔkkin Juaŋ ma pɔŋni neeniyɛ, jyek pɔkkin neeni ooddi waka cɔnnɛ ɛkɛti daŋkun, ɔci ɛkkɛn pwada. 22Çeecin ikin waka cɔnnɛ Juaŋ waakɛndayɛ, ɛkkɛn bala wiak waakɛnda bolja ne cyɛɛlɔ oŋkanda kɛɛy oŋŋa Juaŋ ɛkkɛn pɔktɛ, ɔci ne acca ɔɔn. 23Ɔci jwalla parɛ bala daŋkun. Ikinyɛ, ikin akin maka dɛccin Boŋ Jwaŋa Tolan a dɛccin wɛnni. Ɔci Boŋ Jwaŋa Tolan yuartin ikin ne tolan ne baaṭi. Ɔci ikin wiakin yomgɔti ne ikin kɛɛyin oŋŋa bɛya neeniy. Ikin kɛɛyin oŋŋa ikin aktin kɛɛgin ɛkɛ ne pwadany. Gena oŋŋa waak ikin akti waaka wonkɛny. 24Ikin jyettin jyeka guaŋŋɛ Juaŋ te naŋka bɛya ne baaṭi, ɔci ikin yɔɔññin ɛkɛ doki. Yeti ikin jyettin kɛɛyin yɔɔta bɛya ne ŋoyɔy. Kan gen yuarɛ ma te woŋgɛnyɛ, ma yaakinti jyeddi kɛɛy ɛkɛ moki bɛɛ. 25Ɔci ikinyɛ, ne ikin kɛɛyin gena yuarŋin ikin te woŋgɔ men bɛɛ neeniyɛ, naa ikin yomgɔ tieki agi gen bɛɛdɔ baaw bɛɛ. Dala ikin kɛɛyin te yoma pwadan ɔɔn. 26Ne ikin waakɔ kooki men ɔɔnyɛ, ikin maktin Boŋ Jwaŋa Tolan te cɔŋŋo. Ne ikin cɔkin Juaŋti ɔci ne jyeka cɔkin ikin neeni ŋeecin ikin ne pwadan bɛɛyɛ, Boŋ Jwaŋa Tolan Boŋa bala ikin yomgɔti neeni cɔkti Juaŋti te ikin te jyeka ikin yaakinti gɔɔtin bora te tugi ikin bɛɛy. 27Ɔci Jwaŋa Tolan mena yomg ma baan ŋeejɛyɛ, paŋŋa paŋdi Boŋ Jwaŋa Tolanyɛ, ŋeejɛ ɛkɛ ne ɛkɛ cɔki te ma ɛkɛ ba yom Jwaŋa Tolany. 28Ɔci moki ŋeecin ikin maka ani Jwaŋa Tolan maka muonɛ ɛkɛ bora ba jyeka naŋŋɛ ɛkɛ te ñamu neeniyɛ, naŋka bɛya ɛkkɛnti waakɛnda naŋdɛ Juaŋ etti naŋka pwadin ɛkkɛnti. 29Ne ma baaki menyɛ, maka jyeddi Juaŋti ne baaṭi ŋeejɛ Juaŋ doki. Ɔci ɛkkɛn oonɛ ɛkɛ bora te maka pookɛnti ɔci aŋi ma ɛkɛ. Ɛkkɛn oonɛ Juaŋ bora acaan ɛkɛ buagɔn ɛkkɛn aga ba Kaci ɛkɛ Yaccu. Ɔci a ɔŋŋiyɛ, Kaci ɛkɛ neeni aga ba mod ikin moda tolan waakida. 30Maka oonɛ Juaŋ bora te ñamu neeniyɛ, ɛkkɛn oonɛ ɛkɛ, ɔci ɛkkɛn jiek ywaŋɛ iki ɛkɛ. Ɔci ɛkkɛn pwadgin ɛkɛ ñamɛti te naŋki ɛkɛ neeni. Ɔci maka pwadgin Juaŋ ñamɛti neeniyɛ, coodi ɛkkɛn pwanna pwani te naŋki ɛkɛ ɛkkɛnti neeni. 31Oŋ acca ikin gɔktin a ɔki te jyeka neeni? Kan Juaŋ buagɔn ikin a ɔɔny, oŋ men gɛɛl yaakinti noŋdi gena yaayan ikinti boki? A’a, 32Jwaŋa Tolan jyek taab bɛya Kaci ɛkɛ Yaccutiyɛ, ŋeejɛ ɛkɛ. Yeti ɛkɛ yookɔn bɛɛ. Ɛkɛ ikin ‘wonnin Yaccu ɔɔn. Oŋ acaan a ɔŋŋiyɛ, ɛkɛ ikin da ‘wontin waak waakɛnda te yoma pwadan bɛɛ? Ikin ‘wontin, hay! 33Maka oonɛ Juaŋ bora neeni menga yaakinti ɛkkɛn tiagdɛyɔ Juaŋtɛ? A’a, menga yaakinti ɛkkɛn tiagdɛyɔ bɛɛ. Acaan ɛkkɛn pwadgin Juaŋ ñamɛti doki te naŋki ɛkɛ. 34Ɔci menga yaakinti jiek kɔɔdɛ ɛkkɛn ḍɔɔggɛnti moki? A’a, Yaccu Kiṭɔ mena tuun ɔci luolnɛ Juaŋ ñaalɔ moki neeniyɛ, ɛkɛ bala ciyi Juaŋ taaŋɛti te byeŋa byerɔn, ɔci ɛkɛ bala cɔki Juaŋti te ikin oŋkanda. 35A menɛ yaakinti ikin kɛptin jitin te anna Kiṭɔ ani ikin? Menga bala bɛɛ. Baawo. Kan a taab bɛya ikinti te jyek Juaŋ, ɔci kan a coodi tɛɛnɛ, ɔci kan a naŋka noŋki ma ne yaayan ikinti te jyek Juaŋ, ɔci kan a koñ, ɔci kan ikin ankin, ɔci kan waka etti taab ɔci lien ikin waakɔti bala, ɔci kan ma noki ikinyɛ, jyeka neeni yaakinti ikin kɛptin jitin iki Yaccu Kiṭɔ te anna ani ɛkɛ ikin neeni bɛɛ. 36Jyek taab neeniyɛ, bala ba jyeka kiigin te baaṭi. Jyeka kiigin gɔki agi, “Ɔɔn balgɔn lien jitin oŋkanda te jyek i. Ɔɔn balgɔn ba kulin ŋartan ma a ŋarto.” 37Kan taab neeni bala ikinti waakidayɛ, ikin yaakinti yɔɔttin ne tɛyan te mena ani ikiny. Ikin bwantin genga bɛɛ. 38Lien walla coodi ikin iñɔ wɛnni, walla malɛɛkan, walla ḍuaŋan ñaalɔ pɔliji, walla war tɛɛn pookɛn gɛɛg war tɛɛn bala ñaalɔ neeni bɛɛ. Waka neeni yaakinti ikin kɛptin jitin iki Jwaŋa Tolan te anna ani ɛkɛ ikin neeni bɛɛ. Gena ikin kɛptin jitin iki Juaŋ bala bɛɛ, ɔci gɛɛl bala ne baaṭi daŋkun bɛɛ. 39Jɔkin yeyinyɛ, kan bala ñaalɔ pɔliji walla kan bala iñɔ ṭɛɛrjiyɛ, ɛkkɛn gɛɛl yaakinti ikin kɛptin jitin iki Juaŋ te anna ani ɛkɛ ikin neeni bɛɛ. Ɔci moki waka cɔnnɛ Juaŋ waakɛndayɛ, gen gɛɛl yaakinti ikin kɛptin jitin iki ani Juaŋ neeni bɛɛ. Anna Juaŋ ani ikin neeniyɛ, ŋeecin ikin te naŋki Ciɛggɔn ikin Yaccu Kiṭɔ.

will be added

X\