Ḍɔɔm 7

1Modg ɔɔn, maka jyek ganuun ŋeecɔny, kwoyɛ ɛkkɛ? Kan men tuun dokiy ganuun yaakinti noŋi genga ɛkɛti moki? Acaan ɛkɛ bawwin doki. 2Mena ɛɛŋ kan ‘war ɛkɛ bala menyɛ, ɛkkɛn ciy yaakkɛn ba jyek ganuun. Yeti kan ‘war ɛkɛ tuun dokiyɛ, jyek ḍɛɛwin ɛkkɛn bawwin doki. 3Mena ɛɛŋ kan ‘war ɛkɛ bala men ɔci kan ɛkɛ ḍɛɛdɛ ‘wana parɛyɛ, ɛkɛ bartan ma agi ɛŋa toban. Yeti kan ‘war ɛkɛ tuun dokiyɛ, ɛkɛ oŋ ḍɛɛtan ma oŋo. Acaan ḍɛɛwin iki ‘wana te ñamu bawwin dokiyɛ, a ɔɔn ma gɔki agi ɛŋa neeni a ɛŋa toban moki bɛɛ. 4Ba jyek ɛŋa neeniyɛ, bala ba jyek ɛkkɛ daŋkun. Oŋŋa ɛkkɛ tuunɛ iki Yaccu a cyɛɛlɔyɛ, ɛkkɛ pɔŋnɛ Juaŋ te jyek ganuun doki. Jyek ganuun yaakinti noŋi genga ɛkkɛti moki bɛɛ. Ɛkkɛ pɔŋnɛ Juaŋ a ɔɔn aŋka ɛkkɛ agdɛ ma mena parɛ, mena luolnɛ Juaŋ ñaalɔ te koolji tɛɛti mokiy, ɔci moki aŋka ɛkkɛ yomgɔ kuma te naŋka pwadin ba jana wyeñɛ kuumi te ṭɔlgɛy. 5Yomg ikin yomga buagɔn nɔji neeniyɛ, bala gɔki waak ikinti te jyek nɔjjo. Ɔci naŋki waak ikin neeni etti gena lien budan. Te ñamu ne ikin balkin ciyin amaam te yomg ikin pookɔ budanyɛ, yomg ikin buagɔn nɔjjo, ɔci te jyek ganuunyɛ, ikin pɛɛnnin te nɔjjo. 6Yeti acca ikin pɔŋnin Juaŋ te jyek ganuun. Acaan ikin tuunin iki Yaccu a cyɛɛlɔyɛ, ikin akin kɛɛnk ganuun moki bɛɛ. Acca ikin noŋin kanŋa te Boŋ Jwaŋa Tolan te yoma pwadan. 7Jiek bala a ɔki? Jyek ganuun yeyɔ? Hayɛllɛ! Jyek ganuun yeyɔ bɛɛ. Kan te jyek ganuun baakiyɛ, te jyek naŋka yeyin ŋeej ‘ya bɛɛ. Jyek ganuun gɔki agi, “Naa ma ani wak maka pookɛn bɛɛ.” Yeti ‘ya baal an wak maka pookɛn ɔɔn, ɔci te jyek ganuun neeniyɛ, ŋeejjan ‘ya naŋki ‘ya neeniyɛ, a nɔjjo. 8Ne jyek ganuun ŋeenna ‘yayɛ, ɔci jyek nɔji ŋeejjan ‘ya. Ɔci ŋeejjan ‘ya yom ‘ya buagɔn waka budan ne pɛñan. 9Kan te jyek ganuun baakiyɛ, te nɔji bala niin ma yomgɛnti lieda ɔɔn. Ɔci ‘ya daŋkun, ne jyek ganuun baaki ‘yati menyɛ, ‘ya baal ba mena tɛɛta. Ɔci ne jyek ganuun ŋeenna ‘yayɛ, nɔji ŋeejjan ‘ya yomuti a ‘ya yaakati noŋ gena pwadan gɛɛl bɛɛ. ‘Ya aŋi ba mena tuuta doki. 10Jwaŋa Tolan buagɔn dala ma uda te jyek ganuun. Yeti jyek ganuun neeniyɛ, eccin gena lien ‘yati, 11acaan te oŋŋa jyek ganuun ŋeenna ‘yayɛ, nɔji warɛ lɛɛlnɛ bora, ɔci a ɔŋŋiyɛ, ‘ya aŋi ba mena tuuta doki. 12Jyek ganuun pwadɔ. Gena naŋka Juaŋ buagiti ikin noŋtin neeni. Ɛkkɛn pwadɔ waakɛnda, ɔci yɔmjin moki. 13Gena pwadan neeni eccin lien ‘yatɛ? A’a, a ɔɔn bɛɛ. Gena nɔji aŋka bala ‘ya yomuti yaayɛy. Acaan ne jyek ganuun bɛɛki borayɛ, nɔji yaakinti niin lieda ‘ya yomuti moki bɛɛ. Jyek nɔji bɛɛn bora, ɔci a ɔŋŋiyɛ, ‘ya aŋi ba mena tuuta. Jyek ganuun bɛɛn aŋka ‘ya jyek nɔji ŋeenna ‘ya ɛkɛ yaayɛ ne pɛñan ‘yati wanna. 14Çeecin ikin jyek ganuun bɛɛn te Jwaŋa Tolanti. ‘Ya aŋka a men baan budan. ‘Ya a kɛɛngɔn nɔjjo. 15Naŋka naŋdi ‘yayɛ, yuarca ‘ya bɛɛ. Kan ‘ya buaga noŋja gengayɛ, ‘ya yaakati bɛɛ. Kan ‘ya buaga naŋka yaayan daljayɛ, ‘ya yaakati bɛɛ, ‘ya noŋ ɔɔn. 16Ne ‘ya noŋa naŋka yaayan a ɔɔnyɛ, ɔci ne yom ‘ya yookiti te naŋka wannayɛ, a ɔɔn bala ba ‘ya gɔk ka jyek ganuun aŋka pwadɔ. 17Gena ‘ya noŋ naŋka yaayan neeni bɛɛ. Gena nɔjja niin ‘ya yomuti oŋkanda aŋka noŋi naŋka yaayan neeniy. 18Çeej ‘ya ‘ya yaayo. ‘Ya buaga noŋja naŋka pwadan, yeti ‘ya yaakati noŋ a ɔɔn bɛɛ. 19’Ya noŋ naŋka yaayan naŋka yom ‘ya yookɛtiy. 20Kan ‘ya noŋ naŋka ‘ya buaga bɛɛyɛ, gena ‘ya waanu noŋ naŋka neeni bɛɛy, gena nɔjja niin ‘ya yomuti aŋka noŋi naŋka neeniy. 21Jiek tɛy tɛyo. Kan yom ‘ya buagɔn noŋdi ne pwadanyɛ, ɔci ‘ya kɛkta yom ‘ya yoma yaayan agi naa ‘ya noŋji ne pwadan bɛɛ. Ɔci a ɔŋŋiyɛ, ‘ya aŋi kɛɛngɔn te nɔjja bala ‘ya yomuti neeni. 22Yom ‘ya yoma awarɛyɛ, gɔki agi ganuun Jwaŋa Tolan pwad pwado. 23Yeti yoma parɛ bala men. Gena yoma yaayan yoma neeni aŋka yookɔny. Yomg ‘ya noowɔ a ɔɔn. 24’Ya yomu yaayɛ, hay! ‘Ya pɔkta menɛ yeti te yoma buagɔn noŋi naŋka yaayan naŋka etti lien neeniy? 25’Ya gɔk Juaŋti a pwatcin acaan ‘ya pɔŋna ɛkɛ doki te naŋka naŋŋi Ciɛggɔn ikin Yaccu Kiṭɔy. ‘Ya noŋ kanŋa Juaŋ te war ‘ya ɔci te paŋi ‘ya moki, ɔci war ‘ya war ma baan noŋi kanŋa ganuun nɔjjo.

will be added

X\