Ḍɔɔm 6

1Oŋ acca ikin noŋtin a ɔki? Ikin noŋtin nɔji oŋkanda aŋka Jwaŋa Tolan ikin ‘uottinti yom pwani ɛkɛ? 2A’a, a ɔɔn bɛɛ. Oŋ kan jyek nɔji a jyek ikin moki bɛɛy, oŋ ikin noŋtin nɔji moki a ɔki? 3Jyeka neeni ŋeejɛ ɛkkɛ doki, oŋŋa ikin buulkin mayɛ, ikin aŋŋin yoŋŋa ne cyɛɛlɔ iki Yaccu Kiṭɔ. A ɔŋŋiyɛ, lyena tuuni ɛkɛ neeni aŋi ba lyen ikin daŋkun. 4Te bulta neeniyɛ, ikin jokkin ma i Yaccu a cyɛɛlɔ. Ɔci moki, ba lulta Yaccu luolnɛ Weegɛn ñaalɔ te koolji tɛɛti moki te naŋki ɛkɛ naŋka tɛyan naŋka pwadan neeniyɛ, bala ba jyek ikin daŋkun. Ikin jɔŋnin ñaalɔ iki ɛkɛ a cyɛɛlɔ, ɔci acca coodi ikin aŋi coodda woonɛ ba coodi ɛkɛ ɔɔn. 5Acaan jyek ikin ñoowin iki jyek Yaccu te jyek lyen ɛkɛyɛ, ɔci unna ɛkɛ unni te oŋŋa ɛkɛ jɔŋni ñaalɔ te lienti neeni aŋi ba uni ikin daŋkun. Ikin unnin ba ɛkɛ ɔɔn. 6Çeecin ikin yom ikin yoma buagɔn noŋi nɔji neeniyɛ, tuun iki Yaccu a cyɛɛlɔ. Ikin tuunin iki ɛkɛ a ɔɔn aŋka yoma buagɔn noŋi nɔji neeniyɛ, baadi. Ɔci a ɔŋŋiyɛ, ikin akin kɛɛnk nɔji moki bɛɛ. 7Kan men gɛɛl tuun dokiyɛ, pɔya ɛkɛ tieŋdi jyek nɔji bala moki bɛɛ. 8Kan ikin tuunin iki Kiṭɔ a cyɛɛlɔyɛ, ɔci jyek tɛɛtin ŋeecin ikin daŋkun, agi ne Yaccu unniyɛ, ɔci ikin da unnin te ɛkɛ. 9Çeecin ikin Kiṭɔ neeniyɛ, luolnɛ Juaŋ ñaalɔ te koolji tɛɛti moki, ɔci ɛkɛ tuwa ywongati moki bɛɛ. Lien yaakinti ɛkɛ nogdɛ moki bɛɛ. 10Oŋŋa Yaccu tuuniyɛ, ɛkɛ tuun te jyek nɔji ma baano. Ɛkɛ tuun oŋi ne cyɛɛlɔ budan, ɔci te oŋŋa tuuni ɛkɛ wannayɛ, jyek nɔji bawwin ɛkɛti doki. Ɔci acca ɛkɛ ciyi iki Jwaŋa Tolan oŋkanda a cyɛɛlɔ. 11Ɔci ɛkkɛ daŋkun dala paŋŋa neeni bala ɛkkɛti a ɔɔn. Dala ŋeeddɛ ɛkkɛ jyek nɔji neeniyɛ, a jyek ɛkkɛ moki bɛɛ. Dala ŋeeddɛ ɛkkɛ ɛkkɛ aŋŋɛ maka tɛɛti Jwaŋa Tolanti te naŋki Yaccu Kiṭɔ. 12Naa nɔji aga ciɛggŋ waak ɛkkɛ moki bɛɛ, acaan ciɛggɔn neeni buagɔn ɛkkɛ tieŋdɛ jyek yomg ɛkkɛ yomga buagɔn noŋi nɔji neeni. 13Naa ɛkkɛ Jwaŋa Yaayan ‘wondɛ waak ɛkkɛ noŋdi nɔji waak ɛkkɛti bɛɛ. Ɛkkɛ balgɛ ba maka luolnɛ Juaŋ ñaalɔ ɔci ‘wonnɛ tɛɛtin ɛkɛ. Ɔci a ɔŋŋiyɛ, dala waak ɛkkɛ ‘wondɛ Jwaŋa Tolan bieŋɛti aŋka Jwaŋa Tolan noŋdi kanŋa te waak ɛkkɛ. 14Ɔci nɔji aga ciɛggɔn ɛkkɛ moki bɛɛ. Jyek ganuunyɛ, ɛkkɛ pwaddɛ te ɛkkɛn bɛɛ, gena yom pwani Jwaŋa Tolan parɛ. 15Oŋ kan Juaŋ yuoci ikin te tiid jyek ganuun moki bɛɛy, oŋ ikin noŋtin a ɔki? Ikin noŋtin nɔji oŋkanda ɔɔn acaan Juaŋ yomɛ pwani ikinti doki? Hayɛllɛ! 16Kan ɛkkɛ waakɔ ‘wondɛ genga oŋkanda ɔci ɛkkɛ noŋdɛ ba jyek ɛkɛyɛ, ɛkkɛ aŋŋɛ kɛɛnk ɛkɛ doki. Kan a jyek nɔjiyɛ, ɛkkɛ nogdɛ lien ne baaṭi. Kan gena jyek Jwaŋa Tolan tiidɛyɔ ɛkkɛ wannayɛ, ɛkkɛ pwaddɛ Juaŋ ñamɛti. 17Ikin gɔktin Juaŋti a pwatcin, acaan acca ɛkkɛ agɛ kɛɛnk nɔji moki bɛɛ. Jyeka ɛkkɛ lalkɛ ma neeniyɛ, tiiññɛyɔ ɛkkɛ doki te yoma pwadan. 18Ɔci oŋŋa ɛkkɛ pɔŋnɛ Juaŋ te jyek nɔji ɛkkɛ neeniyɛ, ɛkkɛ aŋŋɛ kɛɛnk naŋka pwadin. 19’Ya gɔk ɛkkɛti te jyeka guaktan ma baan iñɔ baanji neeni aŋka ɛkkɛ tieŋdɛ jyek Juaŋ ne pwadan. Te ñamu waak ɛkkɛ a kɛɛnk nɔjjo. Ɛkkɛ agɛ kɛɛnk nɔji te yomg ɛkkɛ pookɔ. Ɛkkɛ balgɛ noŋɛ nɔjja yaayan. Ɔci ɛkkɛ balgɛ bɛɛyɛ jyek Juaŋ a ñaccu gɔ ɛkkɛ moki bɛɛdjɛ ɔɔn. Yeti acca dala ɛkkɛ waakɔ byerdi te naŋka pwadin. Dala ɛkkɛ agdɛ kɛɛnk naŋka pwadin te yomg ɛkkɛ. Ɔci a ɔŋŋiyɛ, ɛkkɛ pwaddɛ awarɛ. 20Ne ɛkkɛ men agɛ kɛɛnk nɔjiyɛ, jyek naŋka pwadin yaakinti noŋi genga ɛkkɛti bɛɛ. 21Ɔci acca kan ɛkkɛ ñingɔ ñiektɛ te naŋka naŋŋɛ ɛkkɛ ne ɛkkɛ agɛ kɛɛnk nɔji men neeniyɛ, ɛkkɛ lɔɔddɛ. Kan ne ɛkkɛ noŋɛ a ɔɔn wannayɛ, naŋka neeni yɔmjin te genga boki? A’a, yɔmjin te genga bɛɛ, hay! Naŋka neeni etti gena lien budan. 22Yeti acca jiek ooki da pookɛn. Acca ɛkkɛ pɔŋnɛ Jwaŋa Tolan te nɔji ɛkkɛ doki, ɔci ɛkkɛ aŋŋɛ kɛɛnk ɛkɛ doki. Ɔci a ɔŋŋiyɛ, ɛkkɛ aŋŋɛ maka pwadin, ɔci ɛkkɛ moki tuudɛ bɛɛ. Tɛɛtin neeni bala ɛkkɛti yuonginda baadi bɛɛ. 23Kan ɛkkɛ noŋdɛ naŋki nɔji oŋkandayɛ, ɛkkɛ ‘wondi nɔji gena lien budan. Yeti gena ma ‘wondi Juaŋ te yom ɛkɛ budanyɛ, gena tɛɛtin. Tɛɛtin neeni baadi ywongati bɛɛ. Ɛkɛ ma ‘wonnɛ tɛɛtin neeni te naŋki Ciɛggɔn ikin Yaccu Kiṭɔ.

will be added

X\