Ḍɔɔm 5

1Acaan ikin pwannin Juaŋti te jyenna ikin jyettin ɛkɛti neeniyɛ, ikin ŋeenin iki Juaŋ doki te naŋki Ciɛggɔn ikin Yaccu Kiṭɔ. Jiek bala moki bɛɛ. 2Te naŋki Yaccuyɛ, Juaŋ yomɛ pwada a pwani ikinti. Ɛkɛ yomɛ pwanna a pwani ikinti oŋkanda ɔɔn te yom ɛkɛ parɛ. Ɔci coodi ikin neeniyɛ, pwad pwado. Ɔci ikin ciyin yomgɔ ñɔɔna ñɔɔn oŋkanda acaan ikin jyettin ɔci balkin kɛɛyin pwani Juaŋ pwanna bɛya ne baaṭi ikintiy. 3Ikin yomgɔ ñɔɔna ñɔɔn te jyeka bɛya ne ŋoyɔ neeni pookɛn bɛɛ, te jyeka acca daŋkun. Kan taab bala ikintiyɛ, ikin yaakinti yomgɔ ñɔɔna ñɔɔn men. Çeecin ikin kan taab bala ikinti ɔci kan ikin yomgɔ pwadɔ men ɔɔnyɛ, ikin yomgɔ tɛya te taab neeni. 4Ɔci te yom tɛɛn neeniyɛ, ikin balkin ba kɛɛgin moki bɛɛ. Ikin loonnin doki, ɔci acaan a ɔŋŋiyɛ, ikin yaakinti poŋin paŋi Jwaŋa Tolan ne pwadan, ɔci ikin jyettin kɛɛyin te naŋki ɛkɛ. 5Ɔci kɛɛna ikin kɛɛyin naŋki Juaŋ neeniyɛ, cwamnɛ ɛkɛ doki. Acaan ani Juaŋ bala ikin yomgɔti te naŋki Boŋ Jwaŋa Tolan boŋa ikin ‘wonninti Juaŋ neeni. 6Ne ikin balkin ciyin te war koñi budanyɛ, Kiṭɔ bɛɛn ɔci tuun te nɔji ikin waakida. Oŋŋa ɛkɛ bɛɛni neeniyɛ, yɔmjin. 7Çeecin ikin menga warɛ ‘wondɛ lien acaan te mena parɛ gɛɛl a maam budan bɛɛ. Yeti a oŋki dita menga tuwa acaan te mena pwadan gɛɛl. 8Yeti naŋki Juaŋ da parɛ. Anna ɛkɛ ani ikinyɛ, ŋeecin ikin ne pwadan te naŋki Yaccu ne ɛkɛ tuuni te ikin ne ikin akin nɔɔtk meny. 9Acaan ne Yaccu tuuni te ikin ne ikin akin nɔɔtk menyɛ, acca ikin buayin ywobji Juaŋ moki bɛɛ, acaan ikin pwannin ɛkɛti doki. 10Te ñamu ikin yoyyin ñin iki Jwaŋa Tolan. Yeti te lyen Kaci ɛkɛ Yaccu Kiṭɔ neeniyɛ, ikin ŋeenin iki ɛkɛ doki. Ikin aŋŋin mung Jwaŋa Tolan doki. Ɔci a ɔŋŋiyɛ, ŋeecin ikin ne pwadan ikin yɔɔtin Yaccu te tɛɛtin ɛkɛ tɛɛtin woonɛ neeni. 11Ɔci jwalla parɛ gɛɛl bala daŋkun agi ikin yomgɔ ñɔyɔ Jwaŋa Tolanti oŋkanda, acaan ikin ŋeenin iki ɛkɛ te lyen Yaccu. 12Te nɔji Adam parɛyɛ, ma waakɛnda aŋi nɔɔtko, aŋka a ɔŋŋiyɛ, lien bɛɛn mati baan warda acaan ma waakɛnda noŋi nɔjjo. 13Ne ganuun Muuca baawi mati menyɛ, nɔji bala mati te baaṭi doki. Yeti acaan ma ‘wonnɛ Jwaŋa Tolan ganuun men bɛɛyɛ, Juaŋ bala poki nɔji ɛkkɛn bɛɛ. 14Lien bala te oŋŋa Adam baali, ɔci ne Muuca bɛɛni moki ɔɔn. Menga ɛkkɛnti yaakinti lien oldɛ ɔntɔ bɛɛ. Ɛkkɛn waakɛnda buannɛ lieno. Ɔci kan mena nɔji ɛkɛ da parɛ bala ba nɔji Adam bɛɛyɛ, jyek lien bala ɛkɛti daŋkun. Ɔci ba jyek Adam neeniyɛ, bala ba jyek Yaccu daŋkun. 15Bɔɔkin ikin bɔɔŋninti Juaŋ te nɔji ikin budan te yom ɛkɛ neeniyɛ, bala ba jyeka bɛɛn te Adamti bɛɛ, naŋki Adam a nɔjjo. Ɔci te nɔji mena ne cyɛɛlɔ neeniyɛ, lien bɛɛn ma baanti. Naŋki Adam tol tolo, yeti naŋki ɛkɛ tol tol bala ba naŋki Juaŋ bɛɛ. Juaŋ yomɛ pwad pwad mati waakɛnda. Ɔci gena ‘wonnɛ ɛkɛ ma te yom ɛkɛ budanyɛ, bala mati waakɛnda. Ɔci acaan ɛkɛ yomɛ pwanna pwani mati a ɔɔnyɛ, ɛkɛ maka coŋin ‘wonnɛ gena neeni budan te yom ɛkɛ. Juaŋ noŋi a ɔɔn te naŋka naŋŋi mena ne cyɛɛlɔ neeni. Gena Yaccu Kiṭɔ. 16Jyek naŋki Yaccu ɔci jyek naŋki Adam ɛkkɛn kɛɛptin. Ɔci te nɔjja naŋŋɛ Adam parɛ neeniyɛ, ma waakɛnda ḍɛɛmdin iñɔ. Ɔci te naŋka naŋŋɛ Yaccu parɛ neeniyɛ, maka balki nɔji ne tolanyɛ, ɛkkɛn pwadgin Juaŋ ñamɛti doki. Ma ‘wonnɛ Yaccu naŋka neeni budan te yom ɛkɛ. 17Te nɔji mena ne cyɛɛlɔ neeniyɛ, lien bɛɛni, ɔci menga yaakinti lien oldɛ ɔntɔ bɛɛ. Jyek lien tɛy tɛy mati oŋkanda. Yeti maka Juaŋ yomɛ pwanna pwani ɛkkɛnti neeniyɛ, maka pwadgin ɛkɛ ñamɛti neeniyɛ, ɛkkɛn aŋka ciyi ne pwadan. Ɛkkɛn bwandɛ genga bɛɛ. 18Yeti te naŋka ne cyɛɛlɔ yaayan a nɔji neeniyɛ, jiek bɛɛn ma wyetkɛnti waakɛnda. Ɔci te naŋka naŋŋɛ Yaccu te lyen ɛkɛ pwadan ne cyɛɛlɔ neeniyɛ, ma waakɛnda yaakinti pwaddi Juaŋ ñamɛti, ɔci ɛkkɛn ‘wondɛ ɛkɛ tɛɛtin. 19Yeti mena ne cyɛɛlɔ aŋka jyek Juaŋ bɛɛññɛji. Ɔci te naŋki ɛkɛ ma waakɛnda aŋi nɔɔtko. Ɔci mena parɛ gɛɛl bala jyek Juaŋ tiiññiyɔ, ɔci te naŋki ɛkɛyɛ, ma waakɛnda pwadgin Juaŋ ñamɛti. 20Worga ganuun bala, ɔci ma yookɔn te worga ganuun, a ɔɔnyɛ, ɛkkɛn nɔji ‘uotkiti, ɔci nɔji toli ne pɛñan. Nɔji tol tol awarɛ, yeti ɛkɛ tol tol ba yom pwani Jwaŋa Tolan mati bɛɛ. 21Te ñamu ma a kɛɛnk nɔjjo, ɔci jyek lien bala. Accayɛ, jyek yom pwani Juaŋ bala mati. Ɔci te yom pwani Juaŋ neeniyɛ, ma pwadgin ɛkɛ ñamɛti, ɔci a ɔŋŋiyɛ, tɛɛtin Juaŋ bala mati te Yaccu Kiṭɔ, ɔci tɛɛtin neeni baadi ywongati bɛɛ.

will be added

X\