Ḍɔɔm 4

1Oŋ ikin gɔktin a ɔki te Abrahim mena yɔr ikin neeni? 2Kan te Abrahim pwanni Jwaŋa Tolan ñamɛti te naŋki ɛkɛ parɛyɛ, te Abrahim aŋka jieddi warɛ parɛ. Yeti ɛkɛ yaakinti jieyi warɛ Juaŋ ñamɛti bɛɛ acaan gena Juaŋ aŋka ɛkɛ naŋŋɛ pwani wanna. 3Jyeka kiigin neeni gɔki a ɔki te jyek Abrahim? Jyeka kiigin gɔki agi, “Abrahim jyeti Juaŋti ɔci ɛkɛ pwani Juaŋ ñamɛti.” 4Kan men noŋi kanŋayɛ, ɛkɛ ‘wontan ma waak budan bɛɛ. Ɛkɛ ‘wontan ma waak ba kanŋa ɛkɛ. 5Jwaŋa Tolanyɛ, ɛkɛ a mena yomɛ pɔktɛ noŋi naŋki ɛkɛ naŋka pwadan maka nɔɔtkti aŋka ɛkkɛn pwatti ɛkɛ ñamɛti neeni. Maka naŋdi ɛkɛ pwaddi neeniyɛ, gena maka jyeddi ɛkɛtiy. Juaŋ noŋi a ɔɔn te yom ɛkɛ. Ɛkɛ noŋi a ɔɔn te naŋki ma baan bɛɛ. 6Maka naŋdi Juaŋ ɔci pwaddi ɛkɛ ñamɛti te yom ɛkɛ parɛ pwaddi te naŋki ɛkkɛn pookɛn bɛɛ, ɛkkɛn ciyi yomgɛn ñɔɔna ñɔɔn ba jyeka guaŋŋɛ Daawud ne ɛkɛ gɔki agi, 7“Kan mena bɔɔktɛ Juaŋ te nɔji ɛkɛyɛ, ɔci kan nɔji ɛkɛ kwomdi ñin Juaŋyɛ, ɛkɛ ciyi yomɛ ñɔɔna ñɔɔno. 8Kan mena bɔɔŋnɛ Juaŋ te nɔji ɛkɛ dokiyɛ, kan Juaŋ jiek duaktɛ ɛkɛ wyeñɛti bɛɛyɛ, ɛkɛ yomɛ niin ñɔɔna ñɔɔno.” 9Gena ma yomgɛn ñɔɔki neeni bala te ma Icrayiil maka ŋuodɛ ma pookɛn? Walla bala te Keedin Pookɛn maka ŋuodɛ ma bɛɛ daŋkun? Ikin gɔkin agi Abrahimyɛ, ɛkɛ pwani Juaŋti te jyenna jyetti ɛkɛ neeni. 10Oŋŋa ɛkɛ pwanni Juaŋti neeniyɛ, ɛkɛ ŋudɛ ma doki? Walla ɛkɛ ŋudɛ ma men bɛɛ? Ɛkɛ pwani Juaŋti te ñamu ne ɛkɛ ŋutkiti ma men bɛɛy. 11Ɛkɛ ŋudi ma ne ŋoyɔ. Ɛkɛ ‘wonnɛ Juaŋ jyek ŋwoti aŋka ɛkɛ ŋeettan ma ɛkɛ pwani Juaŋti te ñamu doki te jyenna jyetti ɛkɛ Juaŋti neeni. Abrahim naŋŋɛ Juaŋ aŋi yɔr maka pwadgin Juaŋ ñamɛti waakɛnda te jyenna ɛkkɛn jyetki Juaŋti neeni. Gena maka ciyi budan te jyek ŋwotiy. 12Ɔci ɛkɛ aŋi yɔr maka balki jyek ŋwoti daŋkun. Maka balki jyek ŋwoti neeniyɛ, ɛkkɛn jyeti Juaŋti ba Abrahim ɔɔn ne Abrahim ŋutkiti ma men bɛɛy. 13Ne Juaŋ gɔŋni Abrahimti agi dala ṭɛra neeni agdɔ ṭɛr ma ɛkta baan wardandayɛ, Juaŋ gɔki a ɔɔn acaan Abrahim pwani ɛkɛti te jyenna jyetti ɛkɛ neeni. Jyeka neeni a ganuun bɛɛ. 14Kan ɛkkɛ poŋɛ gɔki agi gena ḍuaññɛ Juaŋ te jwali neeni aga gen maka tieci ganuunyɛ, a ɔŋŋiyɛ, bala ba ɛkkɛ gɔkɛ agi jyenna ma jyetki Juaŋti neeniyɛ, a genga moki bɛɛ, ɔci jyeka guaŋŋɛ Juaŋ Abrahimti neeniyɛ, aŋi jyeka budan daŋkun. 15Ma pwaddi Juaŋti te ganuun bɛɛ. Gena jyek ywobji aŋka bɛya mati te ganuun. Te jyek ganuun baaki matiyɛ, te genga bala lɛktan ma jitin bɛɛ. 16Jyeka guaŋŋɛ Juaŋ Abrahimti agi dala ṭɛra neeni agdɔ ṭɛr ma ɛkta baan kondan warda neeniyɛ, bala te jyenna ma jyetki Juaŋti, acaan Juaŋ yomɛ pwad pwado. Ɔci a ɔɔnyɛ, jyeka guaŋŋɛ Juaŋ Abrahimti neeniyɛ, bala te kɛɛgin Abrahim waakɛnda. Gena maka balki ganuun ɔci maka jyeti Juaŋti ba Abrahim ɔɔn. Ɛkɛ a yɔr ikin waakida, 17bala ba jyeka kiigin jyeka guaŋŋɛ Juaŋ Abrahimti agi, “I naŋdin ‘ya agdi yɔr kɛɛna coŋin.” Jyenna Abrahim jyetti Juaŋti neeniyɛ, yɔmjin, acaan jyeka guaŋŋɛ Juaŋ Abrahimti neeniyɛ, a jyeka budan bɛɛ. Gena jyek mena yaakinti ma luoldɛ ñaalɔ te lientiy. Ɔci ɛkɛ yaakinti moki ma myettɛ te jyeka bɛya ne ŋoyɔy. 18Ne pɔy jiedi kaci baawi menyɛ, Abrahim bala kɛɛy naŋki Juaŋ men. Ɔci a ɔŋŋiyɛ, ɛkɛ aŋi ‘yɔr kɛɛna coŋin bala ba jyeka guaŋŋɛ Juaŋ ɛkɛti agi, “Kɛɛgin i coŋdi ɔci ma yaaktanti poki ɛkkɛn bɛɛ.” 19Çeejɛ Abrahim ɛkɛ aŋi daan doki, kaci bɛya te ɛkɛti moki bɛɛ, acaan yuong ɛkɛ aŋi miyya ne cyɛɛlɔ (100) doki. Yeti ɛkɛ bala poŋi jiek bɛɛ. Ɛkɛ jyeti jyeka guaŋŋɛ Juaŋ ɛkɛti te ñamuy. Ɔci ŋeejɛ Abrahim daŋkun ɛŋ ɛkɛ Caara yaakinti jieda moki bɛɛ. 20Yeti Abrahim yomɛ yaañi oŋ gɛɛlti tieki jyeka guaŋŋɛ Juaŋ ɛkɛti neeni bɛɛ, ɛkɛ yomɛ tɛy tɛy te jyenna ɛkɛ jyetti Juaŋti neeni. Ɔci ɛkɛ bala jieyi Juaŋ agi Juaŋ yaakiti noŋdɔ ba jyeka guaŋda ɛkta te ñamu ɛkɛti neeni. 21Abrahim gɔki a ɔɔn, acaan ŋeejɛ ɛkɛ yomɛti Juaŋ yaakinti noŋdi ba jyeka guaŋŋɛ ɛkɛ ɛkɛti neeni. 22Ne Abrahim jyetti Juaŋti a ɔɔnyɛ, bala ba jyeka guaŋŋɛ Juaŋ agi, “Ɛkɛ pwani Juaŋ ñamɛti te jyenna ɛkɛ jyetti neeni.” 23Ne jyeka kiigin gɔkki agi “Abrahim pwani Juaŋtiyɛ,” jyek pwani neeni bala te ɛkɛ parɛ bɛɛ. 24Jyek pwani bala te ikin maka jyeti Juaŋti daŋkuny. Kan ma jyeddi Juaŋti ba Abrahimyɛ, ɛkkɛn pwaddi Jwaŋa Tolan mena Ciɛggɔn ikin Yaccu Kiṭɔ luolnɛ ñaalɔ te koolji tɛɛti neeni ñamɛti daŋkun. 25“Yaccu tuun te nɔji ikin, ɔci ɛkɛ luolnɛ Juaŋ ñaalɔ, aŋka ikin pwannin Juaŋ ñamɛti te naŋki ɛkɛ neeni.”

will be added

X\