Ḍɔɔm 3

1Ɛkkɛ toocɛ agi ma Icrayiil bala ñamu te genga boki? Ɔci moki ɛkkɛ gɔkɛ agi jyek ŋwoti neeni yɔmjin te genga boki? 2Ɛɛ, dala ŋeeddɛ ɛkkɛ ma Icrayiil neeniyɛ, ɛkkɛn bala ñamu te worga Juaŋo, acaan gena ɛkkɛn ‘wonnɛ ɛkɛ worga ɛkɛ te ñamuy. 3Yeti ma Icrayiil gɛɛgyɛ, ɛkkɛn jyek Juaŋ tiiyɛyɔ bɛɛ. Ɔci kan ne ɛkkɛn jiek bɛɛkitiji a ɔɔnyɛ, ɔci Juaŋ daŋkun jyeka guaŋŋɛ ɛkɛ te ma Icrayiil neeni agdɛyɔ? 4Hayɛllɛ! Kan ikin gɔkin agi ma waakɛnda jomi jiekyɛ, naa ikin gɔktin a ɔɔn Jwaŋa Tolanti bɛɛ. Jwaŋa Tolanyɛ, ɛkɛ a Mena awarɛ. A ɔɔnyɛ, bala ba jyeka kiigin ne gɔkki te Juaŋ agi, “Jyeka guaŋŋi iyɛ, dala ɛkkɛn ŋeettan ma ɛkkɛn a jyeka awarɛ. Kan ma gɔkti a naŋki i bala a ɔɔn walla a ɔɔnyɛ, dala jyek i jyek ɛkkɛn bwantan.” 5Ma gɛɛg gɔki agi ikin akin nɔɔtko. Ɔci acaan a ɔŋŋiyɛ, ne ma gɔkki agi ikin akin nɔɔtk ɔci Jwaŋa Tolan aŋka pwad pwad parɛ a ɔɔnyɛ, bala ba jwalla pwadan bɛɛn Juaŋti. Ɔci kan jwalla pwadan bɛya Juaŋtiyɛ, oŋ ɛkɛ moki noŋdi ywobji ikinti ogo? Ywobji ɛkɛ yaayɛ bɛɛ? 6Hayɛllɛ! Ywobji Juaŋ yaayɛ bɛɛ. Kan ywobji ɛkɛ yaayɛyɛ, oŋ ɛkɛ noŋdi godan maka ciyi ṭɛɛrji a ɔki? 7Kan jomi jiek ‘ya pwani Juaŋ lɛɛldɛ boray, oŋ jiek dɔɔkti ‘ya wyeñuti moki ba mena nɔɔdɔn ɔɔn ogo? 8Oŋ ba ikin gɔktin agi dala ikin noŋtin ne yaayan aŋka naŋka pwadan bɛya ikinti bɛɛ? Ma gɛɛg gɔki agi ‘ya lorcɔ ma a ɔɔn. Jyeka bɛya ɛkkɛn wyetkɛnti wanna yaayɛ bɛɛ. Yɔmjin. 9Jiek bala a ɔki? Ikin ma Icrayiil pwatkin te Keedin Pookɛn? Hayɛllɛ! A ɔɔn bɛɛ. ‘Ya gɔkkan ɛkkɛti doki ka ma waakɛnda a nɔɔtko. 10Jyeka kiigin gɔki agi, “Mena pwadan gɛɛl bala bɛɛ. 11Ɔci men gɛɛl tieŋŋin jyek Juaŋ bɛɛ, ɔci menga bala lieṭi jyek Juaŋ bɛɛ. 12Ɛkkɛn jyetcin ɔntɔ waakɛnda. Ɛkkɛn yeyɔ waakɛnda. Menga bala noŋi ne pwadan ne cyɛɛlɔ bɛɛ. Baawo. 13Jyek ɛkkɛn bala ba kool tukɛ ne pɔkkiti ma ɔci ŋooyi ne yaayany. Ɔci te lɛmi ɛkkɛnyɛ, jyeka guaktan ɛkkɛn a jyeka a jomgin budan. Jyek ɛkkɛn bala ba ñaang kaaŋ ɛkkɛn tuggɛnti. 14Ɛkkɛn tuggɛn kumgin te ‘wali ma te jyeka yeyin. 15Ɛkkɛn ani nooŋi mako. 16Nona ootti ɛkkɛnyɛ, jiek yiegdi te naŋki ɛkkɛn, ɔci ma cooddɛn yiegdi doki. 17Ɛkkɛn jyek coodda pwadan ŋeecɔn bɛɛ. 18Ɛkkɛn buayi Jwaŋa Tolan bɛɛ.” 19Jwaŋa Tolan ma ‘wonnɛ ganuun. Gena jyek naŋki ɛkɛ naŋka ɛkɛ buagiti naŋtan may. Ganuun jitkɛn waakɛnda bɛɛn maka neeniti budan bɛɛ. Juaŋ ma myennɛ te naŋka neeni aŋka ŋeettan ɛkkɛn naŋki ɛkkɛn yɔmjin bɛɛ. Ɔci a ɔŋŋiyɛ, menga yaakinti gɔɔdi agi ɛkɛ pwadjɛ bɛɛ. Ɔci iñɔ baanji wɛnniyɛ, menga yaakinti gɔɔdi agi godan ɛkɛ baawɔ ne baaṭi Juaŋti bɛɛ. 20Menga yaakinti pwada Jwaŋa Tolan ñamɛti te jyek ganuun bɛɛ. Te jyek ganuunyɛ, ŋeettan ma naŋki ɛkkɛn yaayɛ a nɔjjo. 21Pɔya ma baan pwatti Jwaŋa Tolan ñamɛtiyɛ, yuarɛ ma doki. Gena jyek ganuun bɛɛ. Pɔya neeni guagɛ maka a bɔwan Jwaŋa Tolan te baaṭi, ɔci guaŋŋɛ Muuca daŋkun. 22Pɔya ma baan pwatti Jwaŋa Tolan ñamɛti neeniyɛ, gena jyenna ma jyetti Yaccu Kiṭɔtiy. Pɔya neeni bala te ma waakɛnda maka jyeddi ɛkɛtiy. Acaan ma waakɛnda bala bolja ne cyɛɛlɔ. 23Acaan ma waakɛnda noŋi nɔji doki. Ɔci men gɛɛl bala pwad pwad ba Jwaŋa Tolan bɛɛ, naŋki ma waakɛnda bɔɔnjin. 24Ɔci acaan a ɔŋŋiyɛ, men gɛɛl yaakinti pwada parɛ bɛɛ. Ma pwaddi te naŋki Jwaŋa Tolan naŋka pwadan naŋka naŋŋɛ ɛkɛ te yom ɛkɛ parɛ oŋŋa ɛkɛ ikin wanninti ɛkɛ te yimg Yaccu Kiṭɔy. 25Ɔci a ɔŋŋiyɛ, maka jyeddi ɛkɛtiyɛ, ɛkkɛn yaakinti ŋeedi iki ɛkɛ. Ɔci te naŋki ɛkɛ neeniyɛ, ɛkɛ ŋeejji ma ɛkɛ pwad pwado. Te ñamu ma bala poŋi agi naŋki ɛkta baali a ɔki ne ɛkɛ ñingɛ yalnɛ ɔntɔ te nɔji ma baanti neeniy. 26Ɔci te lyen Yaccuyɛ, Jwaŋa Tolan pwani ɛkɛ lɛɛlnɛ bora mati aŋka pwani ɛkɛ ŋeettan ma. A ɔŋŋiyɛ, Jwaŋa Tolan mieti a ɛkɛ maka jyeddi ɛkɛti te yenti Yacuuyɛ, naŋdɛ pwaddi ɛkɛ ñamɛti. 27Men gɛɛl yaakinti jieyi warɛ parɛ agi ɛkɛ pwadjɛ Jwaŋa Tolan ñamɛti bɛɛ. Jyek jiɛta jieki ma waakɛn neeniyɛ, bala moki bɛɛ. Bawwin doki. Bawwin te jyek naŋka naŋtin ikinyɛ? A’a, bawwin te jyek jyenna ma jyetti Yaccu Kiṭɔtiy. 28Ikin gɔkin agi ma pwaddi Juaŋ ñamɛti te jyenna ma jyetti Yaccuti neeni parɛ, ma pwaddi te tiit jyek ganuun bɛɛ. 29Jwaŋa Tolan a Juaŋ ma Icrayiil pookɛn? Walla ɛkɛ a Juaŋ Keedin Pookɛn daŋkun? Ɛɛ, ɛkɛ a Juaŋ Keedin Pookɛn daŋkun. 30Maka jyeddiyɛ, kan ɛkkɛn a ma Icrayiil, walla kan ɛkkɛn a Keedin Pookɛnyɛ, ɛkkɛn pwaddi Juaŋ ñamɛti te jyenna ɛkkɛn jyetki Juaŋti neeni. Jwaŋ ɛkkɛn a Jwaŋa ne cyɛɛlɔ. 31Te jyenna ma jyetki Juaŋti neeniyɛ, ganuun aŋi jyeka budan doki? A’a, aŋi jyeka budan bɛɛ. Ganuun pwad pwado, ɔci kanŋa ɛkɛ bala daŋkun.

will be added

X\