Ḍɔɔm 2

1Hay, i gɔk kaapun agi ɛkɛ pwadjɛ, ɔci maka pookcɛn aŋka yiegɔ acaan i a men ma Icrayiil kaapun. Kan i gɔk agi maka pookɛn yeyɔyɛ, bala ba i wook war i paru, acaan naŋki i bala ba naŋki ɛkkɛn daŋkun ɔɔn. 2Çeecin ikin kan ma noŋdi nɔjja neeniyɛ, ywobji Jwaŋa Tolan bɛya ɛkkɛn wyetkɛnti, ɔci a ɔɔn yaayɛ bɛɛ, yɔmjin. 3Kan i gɔk maka pookɛn noŋi amaam ɔci kan nɔji i bala ba nɔji ɛkkɛn daŋkunyɛ, i poŋ gɔk ywobji Jwaŋa Tolan bɛya iti bɛɛ? Bɛya, hay! 4Jwaŋa Tolan yomɛ pwad pwad mati. Ɛkɛ mwondi te ma ne pɛñan bɛɛ. Acaan ywobji Juaŋ bɛɛn mati men bɛɛyɛ, ɛkkɛ poŋɛ gɔkɛ agi ywobji ɛkta bɛɛdɔ moki bɛɛ. Jwaŋa Tolan buagɔn ɛkkɛ waakɔ yaldɛ te nɔji ɛkkɛ aŋka ɛkɛ yomɛ pwanni a pwani ɛkkɛti neeni. 5Kan ɛkkɛ ciyɛ wyetkɔ tɛy tɛy ɔci kan ɛkkɛ wiaktɛ te nɔji ɛkkɛ bɛɛyɛ, ne baaṭi oŋŋa Juaŋ ywobji ɛkɛ lɛɛldɛ borayɛ, ywobji ɛkɛ yuardɛ ɛkkɛ pookɔ daŋkun. Kan Juaŋ noŋdi godan matiyɛ, naŋki ɛkɛ neeni a nɔji bɛɛ. 6Acaan ne ɛkɛ noŋdi godan matiyɛ, “Juaŋ ma ‘wondɛ waak menga da ba naŋki ɛkɛ, ɔci menga da ba naŋki ɛkɛ.” 7Maka noŋi ne pwadan oŋkanda a ɔɔnyɛ, ɛkkɛn ‘wondɛ Juaŋ tɛɛtin, ɔci tɛɛtin neeniyɛ, baadi oŋgati bɛɛ. Maka neeniyɛ, ɛkkɛn a maka lieṭi jyeka pwadin. Ɛkkɛn buagɔn agi dala Jwaŋa Tolan gɔkti agi ɛkkɛn pwadginti. Ɔci ɛkkɛn moki lieṭi tɛɛtin baadi bɛɛy. 8Maka noŋi ba yomg ɛkkɛn pookɛn ɔci yookɔn te jyeka pwadin ɔci tyeŋi gena jyeka yeyin oŋkandayɛ, ɛkkɛn ywobji Juaŋ yuartan ne baaṭi, acaan Juaŋ looñi te naŋki ɛkkɛn. 9Ma waakɛnda maka noŋi ne yaayan neeni kan a ma Icrayiil walla kan a Keedin Pookɛnyɛ, taab ɛkkɛn pɛñ pɛñ ɛkkɛnti pwatcin bɛɛ, ɔci ɛkkɛn yomgɛn yiegdi ne pɛñan. 10Maka noŋi ne pwadan oŋkandayɛ, kan a ma Icrayiil walla kan a Keedin Pookɛnyɛ, waka pwadin yuartan ɛkkɛn. Juaŋ jieddi ɛkkɛn ɔci andi ɛkkɛn ɔci coodda pwadan bala ɛkkɛnti. 11Jwaŋa Tolanyɛ, ɛkɛ kɛɛb ma jitkɛn bɛɛ. Ɛkɛ gɔki agi ma balgi bolja ne cyɛɛlɔ waakcinda. 12Maka balki ganuun Muuca bɛɛyɛ, ɔci kan ɛkkɛn noŋi nɔji oŋkandayɛ, ɛkkɛn ḍakti daŋkun. Maka balki ganuun Muucayɛ, ɔci kan ɛkkɛn noŋi nɔji men ɔɔnyɛ, godan ɛkkɛn bala daŋkun, ɔci nona godantiyɛ, Jwaŋa Tolan jiek lɛɛldɛ bora ɛkkɛnti te ganuun Muuca ganuun bala ɛkkɛntiy. 13Kan ma tieŋdi jyek ganuun a tieŋŋin oŋkanda te jyetkɛn budan ɔci noŋi ba jyek ganuun bɛɛyɛ, ɛkkɛn pwaddi Juaŋ ñamɛti bɛɛ. Gena maka tieŋdi ɔci noŋi ba jyek ganuun aŋka pwaddi Juaŋ ñamɛtiy. 14Keedin Pookɛn ɛkkɛn balki ganuun Muuca bɛɛ. Yeti kan naŋka naŋtan ɛkkɛn neeni bala ba ganuunyɛ, a ɔɔn bala ba ɛkkɛn balki ganuun doki. 15Ɔci a ɔɔnyɛ, bala ba ganuun jitkɛn bala ɛkkɛn yomgɛnti doki. Ɔci ne ɛkkɛn noŋti gengayɛ, jiek gɔkti ɛkkɛn yomgɛnti agi naŋka neeniyɛ, pwatcin, walla naŋka neeniyɛ, yaayɛ. 16Jyeka neeni bɛya bora te oŋa Jwaŋa Tolan gɔrti jyeka bala a coggɔn ma yomgɛnti te naŋki godan bala ba jyeka loṭa ‘ya ma a jyeka wonkɛn jyeka pwadin neeni. Godan neeni ‘wonnɛ Juaŋ Yaccu bieŋɛti aŋka naŋdɛ ɛkɛ. 17Hay i, i bor war i agi i a men Ma Yahuud, ɔci i tier waru jyek ganuunti, ɔci i jieyi waru agi i ag men Jwaŋa Tolan, 18ɔci naŋki Juaŋ naŋka ɛkɛ buagiti ŋeej i, ɔci jyek naŋka pwadan ŋeej i acaan i lalki ma te ganuun. 19I gɔk agi maka kɛɛna pookcɛnyɛ, ɛkki balgi ba maka ñingɛn ulɔ, ɔci agi ɛkki balgi ba maka ciyi nona mielo. Ɔci i gɔk agi i a mena wɛɛyi maka neeni, ɔci agi i a mena dɛki maka ciyi nona ulan neeniti. 20I gɔk agi i a mena loṭi maka jiek kwoyɔny, ɔci agi i a mena loṭi maka ḍyɛrin moki. Çeej i ne pwadan te ganuunyɛ, i waak ŋeeji, ɔci naŋka awarɛ moki ŋeej i. 21Ne i loṭi maka pookɛn a ɔɔn wannay, oŋ i daŋkun waru lala bɛɛ? I lor ma agi, “Naa ma korti waak bɛɛ. Yeti ne i loṭi ma a ɔɔn wan, i waanu kor waak bɛɛ?” 22I gɔk maka pookɛnti ne pɛñan agi, “Naa ma noŋdi tomi bɛɛ.” Yeti i noŋ tomi bɛɛ? Ɛkkɛ dɛyɛ ma agi naa ma mortɔ jɔkinti bɛɛ, ɛkkɛ gɔkɛ agi dala ma morti aŋa Jwaŋa Tolanti pardan. Oŋ ɛkkɛ woodgɔ jitkɔ moṭɛ Jwaŋa Tolanti te yoma awarɛ bɛɛ ogo? 23I poŋ gɔk agi i baal ñamu acaan i balki worga Jwaŋa Tolan, yeti i lɛɛwi ganuun Juaŋ jitkɛn dɔki bɛɛ? Ɔci a ɔɔn i noŋ ne yaayan Jwaŋa Tolanti bɛɛ? 24Jyeka kiigin gɔki agi, “Te naŋki ɛkkɛyɛ, maka keedin Pookɛn neeniyɛ, ḍori agi yenti Jwaŋa Tolan yaayɔ.” 25I poŋ kaapun agi acaan i ŋutki mayɛ, i a men Juaŋ waanɛ te naŋka wanna. Hayɛllɛ! Yeti ne i jyek Juaŋ tiidi ñinyɛ, a ɔɔn aŋka pwatcin bala ba ne i ŋutkiti ma no. Kan i ganuun Juaŋ tiyayɔyɛ, jyek ŋwoti yɔmdi iti. Yeti kan i bɛɛy ganuun Juaŋ jitkɛnyɛ, i baal ba mena ciyi budan te jyek ŋwotto. 26Yeti kan mena ŋudi ma bɛɛ jyek ganuun tiidɛ ñinyɛ, a ɔɔn pwatcin. 27Kan i jyek ganuun tiya ñin bɛɛyɛ, mena ŋudi ma bɛɛ neeni aŋka pwatcin ne tolan te i nɔñji. 28I a men Juaŋ acaan i a men ma Icrayiil budan bɛɛ, ɔci walla acaan ma gɔki agi i pwadji acaan i ŋutki ma iñuti bɛɛ. 29I a men Juaŋ acaan yom i pwatcin. A ɔɔnyɛ, Juaŋ oŋ gɔkti agi i pwadji oŋo. Gena jyek naŋki Jwaŋa Tolan te Boŋ ɛkɛ ma yomgɛnti. Maka neeni buagɔn naa ma baan gɔki agi ɛkkɛn pwadginti bɛɛ. Ɛkkɛn buagɔn gena Juaŋ aŋka gɔkti agi ɛkkɛn pwadginti.

will be added

X\