Ḍɔɔm 14

1Kan men gɛɛl tɛy tɛy te jyek Jwaŋa Tolan men bɛɛyɛ, dala ɛkɛ balgɛ iki ɛkkɛ a cyɛɛlɔ oŋkanda ɔɔn. Kan ɛkɛ buayi gengayɛ, naa ɛkkɛ wookɛ ɛkɛ bɛɛ. 2Ma Kiṭɔ gɛɛg yaakinti omi waak waakɛnda. Yeti ma gɛɛg kan ɛkkɛn tɛy tɛy te jyek Juaŋ men bɛɛyɛ, ɛkkɛn buayi te ami waka pookɛn ba yoŋgi ɔɔn. Ɛkkɛn omi waka jang ṭɔlgɛn pookɛn budan. 3Maka omi waakyɛ, ɔci maka omi bɛɛyɛ, naa ɛkkɛ woowɛ yɔtin pookɔ bɛɛ, acaan Juaŋ ani ɛkkɛ waakida. 4I a menɛ aŋka i wooki kɛɛngɔn Juaŋy? Kanŋa mena kɛɛngɔn kan pwatcin walla kan yaayɛyɛ, gena jyek i bɛɛ. Gena jyek kɛɛngɔn Weegɛn. Ɔci ɛkɛ magdɛ Ciɛggɔn ɔci yɔɔtti iñɔ acaan Ciɛggɔn yaakinti ɛkɛ magdɛ. 5Ma gɛɛg gɔki agi oŋki iidn gɛɛg ḍwaŋgɔ. Ɔci maka pookɛn gɛɛg moki gɔki agi oŋki iidn waakcinda balgɔ bolja ne cyɛɛlɔ. Dala ɛkkɛ waakida menga da jyek yom ɛkɛ ŋeejɛ ne pwadan. 6Kan men gɛɛl poŋi gɔki agi oŋ gɛɛl tolɔ ɛkɛtiyɛ, oŋŋa neeni tolcin ɛkɛti te Juaŋo. Mena omi waakyɛ, ɛkɛ omi waak budan bɛɛ, ɛkɛ omi waak te Juaŋo. Ɔci ɛkɛ gɔkti ɛkɛti agi pwatcin. Ɔci mena gwoṭi koñyɛ, ɛkɛ gwoṭi koñ budan bɛɛ. Ɛkɛ gwoṭi koñ te Juaŋo. Ɔci ɛkɛ da gɔkti ɛkɛti a pwatcin daŋkun. 7Ikin menga yaakinti ciyi parɛ budan bɛɛ. Ɔci ikin menga tuwa parɛ budan bɛɛ, acaan Juaŋ bala. 8Kan ikin balkin meni, ɔci walla kan ikin tuunin dokiyɛ, ikin akin ma ɛkɛ men ɔɔn. 9Yaccu Kiṭɔ aŋi Ciɛggɔn maka tɛɛtan ɔci maka tuutan. Gena jyek cyɛgja neeni aŋka Yaccu tuuni ɔci jɔlni ñaalɔ tɛɛti moki neeni. 10Te gena yeti aŋka i wooki mod ɛkkɛy? Ɔci te gena yeti i noŋ ba ne mod ɛkkɛ a genga bɛɛy? Ne baaṭi godan bala ikinti waakida. Ɔci ikin yɔɔttin Juaŋ ñamɛti te godan ikin. 11Jyek Ciɛggɔn jyeka kiigin gɔki agi, “Awarɛ, ne oŋ gɛɛltiyɛ, ma waakɛnda ḍwondi iñɔ ‘ya ñamuti, ɔci ma waakɛnda jieddi ‘ya.” 12Ɔci te oŋŋa wannayɛ, ikin waakida Juaŋ myettin te naŋki ikin. 13Acaan a ɔŋŋiyɛ, naa ikin woowin yɔtin pookɔ moki bɛɛ. Dala ikin poŋtin jiek yomgɔti aŋka naa mod ikin gɛɛl ḍɛmdi iñɔ bɛɛ. 14Acaan ‘ya baal Yaccutiyɛ, ŋeej ‘ya ne pwadan genga yaayɛ mengati budan bɛɛ, yeti kan men gɛɛl yookɔn te gengayɛ, ɔci gena neeni da yaayɛ ɛkɛti daŋkun. 15Kan mod ɛkkɛ gɛɛl bala poŋi jiek te waka amdɛ ɛkkɛ a waka ‘yɛrtan ma jɔkinti ɔci kan ɛkɛ gɔki agi a ɔɔn yaayɔ Juaŋti ɔci kan ɛkkɛ omɛ men ɔɔnyɛ, a ɔɔnyɛ, bala ba ɛkkɛ yomgɔ baaw mod ɛkkɛti neeni. Naa mod ɛkkɛ gɛɛl lɛgdɛ ɛkkɛ jitin te jyek waka amdɛ ɛkkɛ bɛɛ, acaan Yaccu tuun te ɛkɛ daŋkun. 16Kan naŋki i pwad pwad ɔci kan maka pookɛn poŋi gɔki agi naŋka neeni pwadɔ bɛɛyɛ, dala naŋki i neeni dalja acaan te ɛkkɛn. 17Jyek cyɛgji Juaŋyɛ, gena jyek waka amtin bɛɛ, ɔci a jyek waka maattan ma bɛɛ. Gena jyek naŋka pwadin, ɔci jyek coodi pwani mati ɔci jyek yom ñɔɔno. Yom ñɔɔn neeniyɛ, bɛɛn te Boŋ Juaŋti. 18Ne ɛkkɛ kanŋi Juaŋti ɔci waka pwadin balki ɛkkɛtiyɛ, a ɔɔn pwatcin Juaŋti ɔci pwatcin mati daŋkun. 19Acaan a ɔŋŋiyɛ, dala ikin jyek coodda pwadan tiitinyɔ, ɔci dala moki ikin woŋgɔ tiittin te jyek moowin yɔtin pookɔ aŋka ikin yɔɔttin ne tɛyan te jyek Yaccu. 20Naa ɛkkɛ kanŋa Juaŋ lɛgdɛ jitin te jyek waka amdɛ bɛɛ. Waka amtin pwadɔ waakɛnda, gen gɛɛl yaayɛ budan bɛɛ. Yeti kan men gɛɛl bala omi genga ɔci kan mena parɛ poŋi jiek ɔci ḍɛmdi iñɔ te naŋka neeniyɛ, a ɔɔn bala ba ɛkɛ lɛɛŋŋɛ men jitin, ɔci a ɔɔn amma ɛkɛ omi neeniyɛ, yaayɛ. 21Kan i poŋ gɔk men gɛɛl ḍɛmdi te naŋki i ne i omdi yoŋga ‘yɛrtan ma jɔkinti, ɔci walla ne i motti mooy, ɔci kan i waka neeni dalja te mod ɛkkɛyɛ, a ɔɔn yɔmjin. 22Kan ŋeej i yomuti gen gɛɛl pwatcin Juaŋtiyɛ, dala i noŋja Juaŋ ñamɛti parɛ. Kan i noŋ genga, ɔci kan yom i poŋi jiek bɛɛyɛ, a ɔɔnyɛ, i yomu pwanna pwanno. 23Kan men gɛɛl omi genga ɔci kan ɛkɛ poŋi jiek yomɛti te gena amdɛ ɛkɛ neeni ɔci kan ɛkɛ omi men ɔɔnyɛ, a ɔɔn yaayɛ. A ɔɔnyɛ, bala ba naŋki ɛkɛ neeniyɛ, bɛɛn te jyenna ɛkɛ jyetti Juaŋti neeni bɛɛ. Kan ikin noŋtin genga ɔci kan ikin jyettin yomgɔti bɛɛyɛ, a ɔɔn a nɔjjo.

will be added

X\