Ḍɔɔm 13

1Dala ma waakɛnda noŋdi ba jyek akuuma ban ɛkkɛn, acaan gena Jwaŋa Tolan ‘woñi ma te jyek akuumay. 2Ɔci kan men gɛɛl yookɔn te jyek akuumayɛ, a ɔɔn bala ba ɛkɛ yookɔn te jyek naŋka ma ‘wonnɛ Juaŋy. Ɔci maka yookɔn te naŋki Juaŋ neeniyɛ, jiek bɛya ɛkkɛn wyetkɛnti. 3Maka noŋi ne pwadanyɛ, ɛkkɛn buayi jyek akuuma bɛɛ. Gena maka noŋi ne yaayan aŋka buayi jyek akuumay. Kan ɛkkɛ buayɛ jyek akuumayɛ, dala ɛkkɛ naŋka yeyin neeni daldɛ ɔci ɛkkɛ noŋdɛ naŋka pwadin, ɔci jyek bwajja neeniyɛ, bɛya ɛkkɛti moki bɛɛ. Ɔci akuuma gɔkti ne pwadan ɛkkɛti. 4Ma akuumayɛ, ɛkkɛn a kɛɛnk Juaŋo. Ɛkkɛn gɔṭi ɛkkɛ aŋka naa ɛkkɛ ciyɛ ne yaayan bɛɛ. Kan ɛkkɛ noŋɛ ne yaayanyɛ, dala ɛkkɛ woŋgɔ tiittɛ. Ma akuuma jiek oltan ma wyetkɛnti budan bɛɛ. Ɛkkɛn a kɛɛnk Juaŋ awarɛ, kan men gɛɛl noŋdi ne yaayanyɛ, jiek duaktɛ akuuma ɛkɛ wyeñɛti. 5Acaan a ɔŋŋiyɛ, dala ɛkkɛ tieŋdɛ jyek ma akuuma. Naa ɛkkɛ tieŋdɛ jyek akuuma te bwaji ywobji Jwaŋa Tolan parɛ bɛɛ. Dala ɛkkɛ tieŋdɛ jyek akuuma te jyek Juaŋ daŋkun, aŋka naa jyeka yeyin neeni bɛya ɛkkɛ yomgɔti bɛɛ. 6Ɔci moki te jyeka neeniyɛ, dala ɛkkɛ ma akuuma ‘wondɛ bilk tulba. Acaan ma akuumayɛ, ɛkkɛn a kɛɛnk Juaŋ ɔci ɛkkɛn bala gɔṭi jyek kanŋa Juaŋo. 7Ma akuuma waakɛnda kan ɛkkɛn buagɔn tulba te ɛkkɛtiyɛ, dala ɛkkɛ ɛkkɛn ‘wondɛ. Ɔci moki kan ma akuuma buagɔn tulba te wak ɛkkɛyɛ, dala ɛkkɛ ɛkkɛn ‘wondɛ. Naa ɛkkɛ ñieyɛ a ñiek te jyek maka ḍwaŋin bɛɛ. Dala ɛkkɛ tieŋdɛ jyek ɛkkɛn ne pwadan te yoma pwadan. 8Kan dɛɛn bala itiyɛ, naa dɛna neeni ḍwaya ḍuad budan ɔci ‘uotkati i ɛka parɛ a ɔɔn bɛɛ. Yeti gena bala ɛkkɛ ḍɔɔggɔti ba dɛɛnyɛ, gena anno. Dala ɛkkɛ oondɛ yɔtin pookɔ oŋkanda, ɔci a ɔɔnyɛ, bala ba naŋki ganuun. 9Jyek ganuun jitkɛn gɔki agi, “Naa ɛkkɛ noŋdɛ tomi bɛɛ, ɔci naa ɛkkɛ nokkɛ ma bɛɛ, ɔci naa ɛkkɛ kortɛ waak bɛɛ, ɔci naa ɛkkɛ buagɛ wak maka pookɛn bɛɛ.” Jyek ganuun jitka neeni ɔci jyek ganuun jitka pookɛnyɛ, ɛkkɛn waakɛnda a jyeka ne cyɛɛlɔ i jwali ṭɔɔlɛ neeni, “Dala anna ɛkkɛ anɛ maka pookɛnyɛ, yoomdi i anna ɛkkɛ ani waak ɛkkɛy.” 10Kan mena ani mayɛ, ɛkɛ noŋi ne yaayan mati bɛɛ. Mena ani mayɛ, ɛkɛ yaakinti Jyek ganuun tiidɛyɔ ne pwadan. 11Dala ɛkkɛ ciedɛ a ɔɔn ba jyeka neeni. Ɔci dala ɛkkɛ woŋgɔ tiittɛ te coodi ɛkkɛ. Naa ɛkkɛ ciyɛ ba maka wici budan ɔɔn bɛɛ. Dala ɛkkɛ jiek ŋeeddɛ ne pwadan acaan oŋŋa Yaccu bɛɛdi ɔci ikin yɔɔtintiyɛ, looncin moki bɛɛ. Oŋŋa neeni bɛya ne cwakanti. 12Ween jiñɛ looncin moki bɛɛ. Noon noŋi bɔwa doki. Naa ikin noŋtin ba naŋka naŋtan ma te ween jiñɛ nona mielti wanna bɛɛ. Dala ikin cietin ne pwadan ba maka ciyi te nona bɔwan. 13Dala ikin noŋtin naŋka pwadan ba maka ciyi te nona bɔwan. Naa ikin noŋin amaam ba maka nokkin mooy, walla ba maka noŋi tomi, ɔci walla ba maka balki jyek pɛɛdin, ɔci walla ba maka korkɛn modin bɛɛ. 14Yeti dala ikin wɛɛtin gena Ciɛggɔn ikin Yaccu Kiṭɔti ne pwadan. Naa ikin poŋin te paŋi yoma te baaṭi aŋka paŋi yoma te baaṭi neeni bɛya ikinti moki bɛɛ.

will be added

X\