Ḍɔɔm 12

1Modg ɔɔn, Jwaŋa Tolan yomɛ pɔŋnɛ ikinti, ɔci acaan a ɔɔnyɛ, ‘ya gɔk ɛkkɛti dala ɛkkɛ Juaŋ ‘wondɛ waak ɛkkɛ. Dala waak ɛkkɛ daldɛ, dala Juaŋ noŋdi ba yom ɛkɛ, ɔci a ɔɔnyɛ, yɔmjin Juaŋti. Ne ɛkkɛ Juaŋ ‘wondɛ waak ɛkkɛ a ɔɔnyɛ, bala ba ɛkkɛ gɔkɛ yomgɔti agi Jwaŋa Tolanyɛ, ɛkɛ parɛ a Juaŋo. 2Naa ɛkkɛ noŋɛ ba naŋki maka ciyi budan te jyek Juaŋ bɛɛ. Paŋŋa yaayan daldɛ. Dala ɛkkɛ ooktɛ paŋŋa parɛ paŋŋa woonɛ aŋka ɛkkɛ agdɛ maka wonkɛn, ɔci a ɔŋŋiyɛ, jyeka Juaŋ buagiti agi naŋji ɛkkɛyɛ, ŋeeddɛ ɛkkɛ jyek naŋka naŋdɛ ɛkkɛ neeniyɛ, pwadɔ, ɔci Juaŋ yomɛ ñɔya te naŋka neeni. Ɔci a ɔɔnyɛ, jyeka neeni yɔmjin. 3Jwaŋa Tolan yomɛ pwad pwad ‘yati, acaan a ɔŋŋiyɛ, ‘ya gɔkka ɛkkɛti, naa ɛkkɛ yomgɔ ḍwaŋdi bɛɛ. Ɔci naa ɛkkɛ gɔkɛ agi ɛkkɛ pwadgɛ bɛɛ. Ɛkkɛ ‘wonnɛ Juaŋ jyenno, ɔci magga jyeti ne tolan ɔci magga jyeti ne ḍiɛran. Ɔci maka jyeti ne ḍiɛran neeniyɛ, naa ɛkkɛn gɔki agi jyeni ɛkkɛn tolɔ bɛɛ. Dala ŋeettan ɛkkɛn waakɛnda ne jyenna ɛkkɛn ‘wonnɛ Juaŋ neeni baali a ɔkiy. 4Men warɛyɛ, balki jyetkɛ, ɔci woŋgɛ, ɔci ‘womgɛ, ɔci tukɛ, ɔci waka pookɛn daŋkun. Ɔci waka bala men warɛti neeniyɛ, balki kanŋan, genga da te kanŋa ɛkɛ, ɔci genga da te kanŋa ɛkɛ. 5Ɔci a ɔɔnyɛ, bala ba ikin daŋkun. Ikinyɛ, coŋkin, yeti acaan ikin balkin Yaccu Kiṭɔtiyɛ, ikin balkin ba mena ne cyɛɛlɔ. Ɔci moki ikin kɛɛptin jitin te kanŋa, menga da te kanŋa ɛkɛ, ɔci menga da te kanŋa ɛkɛ. Ɔci ikin moowin yɔtin pookɔ. 6Juaŋ yomɛ pwad pwad ikinti. Ikinyɛ, ‘wonnin ɛkɛ ñing tɛɛno, menga da te ñing tɛɛn ɛkɛ, ɔci menga da te ñing tɛɛn ɛkɛ. Ɔci acaan a ɔŋŋiyɛ, dala ikin kantin te ñing tɛɛna ‘wonninti ɛkɛy. Kan men gɛɛl ‘wonnɛ Juaŋ ñing tɛɛn te kanŋa mieti ɛkɛ mayɛ, dala ɛkɛ mieti ma ne pwadan ba ñing tɛɛn ɛkɛ ‘wonnɛ Juaŋ neeni. 7Ɔci kan men gɛɛl ‘wonnɛ Juaŋ ñing tɛɛn te kanŋa maŋi ma Juaŋ te kanŋa waakyɛ, dala ɛkɛ kandi ne pwadan. Ɔci kan men gɛɛl ‘wonnɛ Juaŋ ñing tɛɛn te lali ma te jiekyɛ, dala ɛkɛ loṭi ma ne pwadan. 8Ɔci mena ṭeyi mayɛ, dala ɛkɛ waŋɛ tiittɛ te ṭeen mako. Mena ‘woñi ma te waakyɛ, dala ɛkɛ ma ‘wondɛ waak te yoma pwadan yoma bɔwan. Ɔci mena ḍuaŋayɛ, dala ɛkɛ noŋdi kanŋa ɛkɛ ne byeran. Ɔci mena moki mayɛ, dala ɛkɛ moki ma te yoma ñɔyan. 9Dala ɛkkɛ anɛ ma te yoma awarɛ. Ɔci dala ɛkkɛ yookɛ te jyek naŋka yeyin, ɔci dala ɛkkɛ woŋgɔ tiittɛ te jyek naŋka pwadin. 10Dala ɛkkɛ oondɛ yɔtin ne pwadan bala ba oonnin maka modin. Dala maka pookɛn bala ñamu te ɛkkɛ. 11Naa ɛkkɛ noŋɛ kanŋa Jwaŋa Tolan morndɛ a morŋin a ɔɔn bɛɛ. Dala ɛkkɛ byerdɛ a byergin te kanŋa ɛkɛ. 12Dala ɛkkɛ yomgɔ ñɔɔgdi ne ɛkkɛ balgi kɛɛyɛ jyeka pwadin jyeka bɛya ne ŋoyɔ neeniy. Ɔci ne taab baali ɛkkɛti te jyek Yaccuyɛ, naa ɛkkɛ yomgɔ yiegdi ne pɛñan bɛɛ. Dala ɛkkɛ yomgɔ tɛya. Dala ɛkkɛ cɔktɛ Juaŋti oŋkanda ɔɔn. Naa cɔŋi daldɛ bɛɛ. 13Ɔci kan wak Ma Kiṭɔ bɔɔnjinyɛ, dala ɛkkɛ ɛkkɛn magdɛ te waako. Ɔci kan maka wɛlg bala ciyi ban ɛkkɛyɛ, dala ɛkkɛ ɛkkɛn magdɛ te waka amtin, ɔci te nona ninki ɛkkɛn daŋkun. 14Kan ma noŋi ne yaayan ɛkkɛtiyɛ, dala ɛkkɛ gɔktɛ ne pwadan ɛkkɛnti. Naa ɛkkɛ ɛkkɛn ḍardɛyɔ bɛɛ. Dala ɛkkɛ gɔktɛ ne pwadan ɛkkɛnti ɔɔn. 15Kan ma yomgɛn ñɔyɔyɛ, dala ɛkkɛ yomgɔ ñɔɔgdi iki ɛkkɛn daŋkun. Ɔci kan ma bala wiakyɛ, dala ɛkkɛ wiaktɛ iki ɛkkɛn daŋkun. 16Dala ɛkkɛ ciedɛ ba yoma ne cyɛɛlɔ. Naa ɛkkɛ poŋɛ gɔkɛ agi maka pookɛn yeyɔ bɛɛ. Naa ɛkkɛ yookɛ te maka ŋoyɔ bɛɛ. Dala ɛkkɛ ñoodɛ iki ɛkkɛn. Naa ɛkkɛ noŋɛ ba maka yɛcin ɔɔn bɛɛ. 17Kan ma noŋdi ne yaayan ɛkkɛtiyɛ, naa ɛkkɛ noŋdɛ ne yaayan ɛkkɛnti bɛɛ. Dala ɛkkɛ woŋgɔ tiittɛ te coodi ɛkkɛ aŋka coodi ɛkkɛ pwada ma ñomgɛnti waakɛnda. 18Dala ɛkkɛ ciedɛ ba maka nɔji ɛkkɛn baaw ɔci ywobji ɛkkɛn baawo. Kan maka pookɛn balki jiekyɛ, aŋi ba jyek ɛkkɛn pookɛn doki. 19Maka ana ‘yay, kan ma noŋdi ne yaayan ɛkkɛtiyɛ, naa ɛkkɛ noŋdɛ ne yaayan ɛkkɛnti bɛɛ. Dala ɛkkɛ jyeka neeni oldɛ aŋa Juaŋti, ɔci kan ɛkɛ buagɔn noŋdi ywobji ɛkkɛntiyɛ, gena yom ɛkɛ. Jyeka kiigin jyeka guaŋŋɛ Juaŋ gɔki agi, “‘Ya waru yoddo, ‘ya jiek olji ma wyetkɛnti.” 20Ɔci worga gɔki moki agi, “Kan men gɛɛl yookɔn te ɛkkɛ ɔci kan ɛkɛ amɛ koñyɛ, dala ɛkkɛ ɛkɛ ‘wondɛ waka amtin. Ɔci kan ɛkɛ amɛ yiɛnyɛ, dala ɛkɛ ‘wondɛ pieg motti. Ɔci a ɔɔnyɛ, naŋki ɛkkɛ neeni pɛñ pɛñ ɛkɛti, ɔci ɛkɛ warɛ aga lɔɔno.” 21Naa ɛkkɛ bwantɛ naŋka yeyin bɛɛ. Dala ɛkkɛ aŋka naŋka yeyin bwandɛ te naŋka pwadin.

will be added

X\