Ḍɔɔm 11

1’Ya toocca ɛkkɛti, Jwaŋa Tolan mwonnin te ma ɛkɛ ma Icrayiil waakɛnda boki? Hayɛllɛ! Ɛkɛ mwonnin te ɛkkɛn bɛɛ. Acaan ‘ya daŋkun a men ma Icrayiil. ‘Ya a kaci Abrahim, ɔci ‘ya bɛɛn te kɛɛn Benjaminti. 2Maka jyek ɛkkɛn ŋeejɛ Juaŋ te ñamuyɛ, Juaŋ mwonnin te ɛkkɛn bɛɛ. Jyeka bala worgaji a jyek Iliiya ŋeejɛ ɛkkɛ bɛɛ? 3Iliiya bala tɛki ma Icrayiil waakɛn Juaŋti agi, “I, Ciɛggɔn, ma Icrayiilyɛ, ɛkkɛn bɔwan i nogɛ waakɛnda, ɔci nonka ɛrki ma waak itiyɛ, lɛɛkci ɛkkɛn iñɔ doki. ‘Ya dalka ɛkkɛn paru, ɔci acca ɛkkɛn buagɔn noki ‘ya daŋkun.” 4Ɔci Juaŋ ṭwokcin ɛkɛti a ɔki? Juaŋ ṭwokcin ɛkɛti agi, “Te naŋka naŋi ‘ya neeniyɛ, maka ‘uay bala men a alpn ne dɔɔyɔ wyetkɛn ne yyɛɛwɔ (7,000). Ɛkkɛn a ma ‘ya. Ɛkkɛn ḍwoñjin iñɔ morcin jwaŋa yenti Baalti oŋgati bɛɛ.” 5Ɔci bala ba te baaṭi, ɔci acca moki, ma Icrayiil gɛɛgyɛ, ɛkkɛn a ma Juaŋo. Juaŋ yomɛ pwad pwad ɛkkɛnti, ɔci ɛkkɛn kɛnnɛ ɛkɛ bora te yom ɛkɛ parɛ. 6Acaan maka neeni kɛnnɛ Juaŋ bora te yom ɛkɛ parɛyɛ, ɔci acaan ɛkɛ yomɛ pwad pwad ɛkkɛntiyɛ, ŋeecin ikin ɛkkɛn kɛnnɛ Juaŋ bora te kanŋa ɛkkɛn bɛɛ. Kan ma kɛndɛ Juaŋ bora te kanŋa ɛkkɛnyɛ, jyek yom pwani Juaŋ bala a ɔki? 7Kan a ɔŋŋiyɛ, oŋ ikin poŋtin a ɔki? Gena liltan ma Icrayiil maka coŋin neeniyɛ, yuarɛ ɛkkɛn men bɛɛ. Ɛkkɛn bala lieṭi men. Maka kɛnnɛ Juaŋ borayɛ, ɛkkɛn aŋka gena neeni yuarɛ doki. Yeti ma Icrayiil maka coŋin neeniyɛ, ɛkkɛn wyetkɛn tɛɛna tɛɛno. 8A ɔɔnyɛ, bala ba jyeka bala worgaji te baaṭi ne gɔkki agi, “Jwaŋa Tolan ma dalda ma wyetkɛn tɛyɔ. Ɔci a ɔɔnyɛ, ɛkkɛn yaakinti gɔṭi te woŋgɛn moki bɛɛ, ɔci yaakinti tyeŋi te jyetkɛn moki bɛɛ, ne acca neeniti men ɔɔn.” 9Ɔci Daawud gɔki agi, “Dala waka amtin aga ba gena yiecki ma waak ɛkkɛnti. Ɔci a ɔɔnyɛ, bala ba ɛkkɛn ḍɛɛmdi kola loorɛ ɛkkɛn pookɛn dɔkiy. Ɔci a ɔɔnyɛ, ywobji bɛɛn ɛkkɛnti doki. 10Dala ɛkkɛn ñingɛn ula, naa ɛkkɛn gɔrti noon moki bɛɛ. Ɔci dala ɛkkɛn jualtan iñɔ waka eetan ɛkkɛn oŋkanda.” 11’Ya gɔkka ɛkkɛti moki, ne ma Icrayiil ḍɛɛmki iñɔy, ɛkkɛn kookinti jɔllin ñaalɔ moki? Hayɛllɛ, a ɔɔn bɛɛ! Te oŋŋa ɛkkɛn ḍɛɛmki iñɔ neeniyɛ, jyek yɔɔd Jwaŋa Tolan ati Keedin Pookɛnti doki aŋka dala ma Icrayiil yomgɛn bwagdɛ naŋka naŋdɛ Juaŋ pwadin Keedin Pookɛntiy. 12Oŋŋa ɛkkɛn ḍɛɛmki iñɔyɛ, jyeka pwadin ati maka pookɛnti baan warda. Oŋŋa kɛɛn Icrayiil yiekiyɛ, Keedin Pookɛn ati ñamu doki. Ɔci ne baaṭi ne ma Icrayiil waakɛn yaltiti Juaŋti waakɛndayɛ, Juaŋ yaakinti noŋdi aŋka jyeka neeni pwaddi ne pɛñan mati baan warda. 13Keedin Pookɛn, ‘ya gɔkka ɛkkɛti. ‘Ya kanŋ ne tolan 14acaan ‘ya buaga maka a kɛɛn ‘ya dala ɛkkɛn yomgɛn bwagdɛ naŋka naŋdɛ Juaŋ Keedin Pookɛnti neeni aŋka ɛkkɛn yɔɔdɛ Juaŋ daŋkun. 15Te jyek kyɛŋŋa Juaŋ kɛŋni te ma Icrayiilyɛ, maka pookɛn maka ciyi baan konɛ wardayɛ, ɛkkɛn ŋeewin iki Juaŋo. Ɔci oŋŋa bɛya ne ŋoyɔ oŋŋa ma Icrayiil akti ma Juaŋyɛ, jyeka pwadin ooddi mati, ɔci jyeka neeni pwadɔ te ɛkkɛn te ñamu. Acaan maka ‘wondɛ Juaŋ tɛɛtin ɛkɛyɛ, ɛkkɛn bala ba maka tuutan moki bɛɛ. 16Kan ma etti poñña ñamuyɛ, poñña neeni a poñi Juaŋo, ɔci a ɔɔnyɛ, bala ba pokkin pookɛn waakɛnda aŋi pokkin Juaŋ doki. Kan jaan bɛɛkkɛ pwadɔyɛ, ɔci jaan jyetkɛ pwadɔ daŋkun, a ɔɔnyɛ, bala ba ma Icrayiil daŋkun Juaŋti ne ɛkkɛn dɔɔkti ɛkɛtiyɛ, ɛkkɛn pwaddi. 17Ma Icrayiilyɛ, gɛɛg bala ɔntɔ te Jwaŋa Tolanti. Ɛkkɛn yookɔn te Yaccu Kiṭɔ, ɔci a ɔɔnyɛ, ɛkkɛn bala ba jaan kɛrka yiegin ne tɔɔckiti ma ɔntɔy. Ɔci ɛkkɛ Keedin Pookɛnyɛ, ɛkkɛ cɔɔckɛ ma nona neeniti aŋka ɛkkɛ ñoowɛ i ma Icrayiil a cyɛɛlɔ, ɔci a ɔɔnyɛ, ɛkkɛ balgɛ ba jan jɛtuun kɛrkɛ jana yuli bora budan ne cɔɔckiti ma jana parɛ neenitiy. Ɔci ba kɛrka neeni ne tɛɛtki te jaan mɛɛgɛnyɛ, ɔci bala ba ɛkkɛ daŋkun. Jyek Juaŋ bɛɛn ma Icrayiilti te ñamu, ɔci acca bala ɛkkɛti daŋkun. 18Ɔci a ɔŋŋiyɛ, naa ɛkkɛ jieyɛ waakɔ pookɔ agi ɛkkɛ pwadgɛ te ma Icrayiil maka ḍɛɛmdin iñɔ neeni bɛɛ. Kan ɛkkɛ buagɛ jieyɛ waakɔyɛ, dala ɛkkɛ poŋdɛ te jyek ma Icrayiil neeni ñamu. Acaan ba ne jaan kɛrkɛ yɔɔtki ne tɛyan te jaan mɛɛgɛnyɛ, ɔci ɛkkɛ da yɔɔdɛ ne tɛyan te jyeka bɛɛn te ma Icrayiilti te ñamu neeni. 19Ɔci ɛkkɛ gɔkɛ kaapun, agi jaan kɛrka wanna tɔɔnnɛ Juaŋ ɔntɔ aŋka dala ɛkkɛ cɔttɛti ɛkɛ non ɛkkɛn kaapun. 20Awarɛ, kɛrka wannayɛ, ɛkkɛn tɔɔnnɛ Juaŋ ɔntɔ acaan jyenna ɛkkɛn jyetki Yaccuti bala bɛɛ. Ɛkkɛyɛ, ɛkkɛ balgɛ ciyɛ jaan warɛti te naŋki ɛkkɛ pookɔ bɛɛ. Ɛkkɛ balgɛ jaan warɛti oŋkanda te jyenna ɛkkɛ jyettɛ Yaccuti neeni. Ɔci acaan a ɔŋŋiyɛ, naa ɛkkɛ jieddɛ waak ɛkkɛ pookɔ bɛɛ. Dala ɛkkɛ buayɛ te ḍɛɛmdin ɛkkɛ ḍɛɛmdɛ iñɔ ba ɛkkɛn ɔɔny. 21Jaan kɛrkɛ woodgɛn jitkɛn tɔɔnnɛ Juaŋ ɔntɔ doki, ɔci ɛkkɛ poŋɛ gɔkɛ agi kɛrka oonɛ ɛkɛ ɔci cɔɔnnɛti ɛkɛ jaanti neeni kan ɛkkɛn yeyɔyɛ, ɛkkɛn daldɛ ɛkɛ boki? A’a. 22Dala Juaŋ ŋeeddɛ ɛkkɛ ne ɛkɛ yomɛ pwadi matiy, ɔci dala ŋeeddɛ ɛkkɛ moki jyek ɛkɛ a jyeka a ñiek bɛɛ. Jyek ɛkɛ tɛy tɛyo. Ma Icrayiil maka ḍɛɛmdin iñɔyɛ, jyek Juaŋ tɛy tɛy ɛkkɛnti. Yeti ɛkkɛ, kan ɛkkɛ ciyɛ te yom pwani Juaŋ oŋkandayɛ, ɛkɛ da yomɛ pwad pwad ɛkkɛti oŋkanda ɔɔn daŋkun. 23Ɔci maka ḍɛɛmdin iñɔ a ma Icrayiil neeniyɛ, ne ɛkkɛn mwonti te yookin jyek jyeniyɛ, ɔci Juaŋ yaakinti ɛkkɛn cɔttɛti jaan mɛɛgɛnti moki. 24Ɛkkɛ Keedin Pookɛnyɛ, ɛkkɛ balgɛ ba jan jɛtuun kɛrkɛ jana yuli luom jitin parɛ ne kɛnɛ tɔɔkiti ma ɔci olkiti ma jana pwadantiy. Kan Juaŋ yaakinti noŋi a ɔɔnyɛ, oŋ ɛkɛ yaakinti jaan kɛrkɛ woodgɛn cɔttɛti bɛɛ? Yaakinti, hay! 25Modg ɔɔn, ‘ya buaga dala ɛkkɛ poŋdɛ te jwalla guaŋi ‘ya neeni. Naa ɛkkɛ poŋɛ gɔkɛ agi ɛkkɛ jiek waakɛnda ŋeejɛ bɛɛ. Wyeñ tɛɛn ma Icrayiilyɛ, bala yuonginda bɛɛ. Ɛkkɛn wyetkɛn tɛy tɛy acca ɔɔn ne Keedin Pookɛn maka muonɛ Juaŋ bora neeni jyetti ɔɔn. 26Ɔci ma Icrayiil oŋ yɔɔdɛ Juaŋ oŋo. A ɔɔnyɛ, bala ba jyeka kiigin ne gɔkki agi, “Mena Yuoci Ma bɛya te ban Icrayiil ɔci yuoci ma Icrayiil. Ɔci te naŋki ɛkɛyɛ, ma Icrayiil mwondi te nɔjja naŋtan ɛkkɛn Juaŋti neeni.” 27Jwaŋa Tolan gɔki agi, “Ne ‘ya nɔji ɛkkɛn eeda ɔntɔyɛ, ‘ya jiek naŋdin iki ɛkkɛn a cyɛɛlɔ te jyek yɔɔta neeni.” 28Ma Icrayiil maka yookɔn te jyeni jyeka wonkɛn jyeka pwadin neeniyɛ, ɛkkɛn yoyi ñin iki Juaŋ agi ɛkkɛ Keedin Pookɛn aŋka aŋŋɛ mung Juaŋo. Yeti Juaŋ ani ma Icrayiil men ɔɔn acaan Juaŋ jiek naŋɛ iki yɔrg ma Icrayiil te baaṭi. Ɔci acaan ma Icrayiil muonɛ ɛkɛ bora te baaṭiyɛ, ɛkɛ jiek agdiyɔ te ɛkkɛn moki bɛɛ. 29Acaan Juaŋyɛ, kan ɛkɛ boor mayɛ, ɔci kan ɛkɛ buagɔn ma ‘wondɛ waakyɛ, ɛkɛ jiek agdiyɔ bɛɛ. 30Te baaṭiyɛ, ɛkkɛ balgɛ noŋɛ ba jyek Juaŋ bɛɛ. Yeti accayɛ, ɛkkɛ ciyɛ te jyek ɛkɛ acaan ɛkɛ yomɛ pɔŋnɛ ɛkkɛti. Ɔci ma Icrayiil maka muonɛ Juaŋ bora te baaṭi neeniyɛ, ɛkkɛn aŋka yookɔn te jyek ɛkɛ. 31Ɔci acca ma Icrayiil yookɔn men te yom pɔkkin Juaŋ ɛkkɛnti men ɔɔn, yeti acaan Juaŋ yomɛ pɔŋnɛ ɛkkɛti dokiyɛ, ɔci ma Icrayiil poŋdi te naŋka neeni. Ɔci ne oŋ gɛɛltiyɛ, ɛkkɛn waakɛn yaltan Juaŋti, ɔci Juaŋ yomɛ pɔktɛ ɛkkɛnti daŋkun. 32Ma Icrayiil ɔci Keedin Pookɛnyɛ, ɛkkɛn bɛɛyi jyek Juaŋ oŋkanda, ɔci ɛkkɛn yaakinti waakɛn pɔktan pookɛn te bɛɛn jiek bɛɛ. A ɔɔnyɛ, Jwaŋa Tolan ɛkkɛn dalnɛ nɔji jitin aŋka ɛkkɛn pɔktɛ ɛkɛ waakɛnda te naŋki ɛkɛ ne ɛkɛ yomɛ pɔktɛ ɛkkɛntiy. 33Paŋi Jwaŋa Tolan tol tol ne pɛñan hay! Ɔci ñing tɛɛn ɛkɛyɛ, tɛy tɛy ne pɛñan. Ɛkɛ waak ŋeejɛ waakɛnda. Gena kwoyi ɛkɛ gɛɛl bala bɛɛ. Menga yaakinti paŋi Juaŋ pagdɛ bɛɛ. Menga yaakinti naŋki ɛkɛ ŋeeddɛ bɛɛ. 34A ɔɔnyɛ, bala ba jyeka kiigin ne gɔkki agi, “A menɛ paŋi Juaŋ ŋeejɛy? Juaŋ tooccin mengati te jwali gɛɛl aŋka ɛkɛ maktan ma te jwali gɛɛl boki? A’a.” 35“Jwaŋa Tolan balki dɛɛn mengati boki? A’a, ɛkɛ eci genga te mengati boki? A’a.” 36Waak waakɛnda bɛɛn te ɛkɛti, ɔci te war tɛɛn ɛkɛyɛ, waak waakɛnda bala oŋkanda ɔɔn. Ɔci waak waakɛnda aŋŋɛ ɛkɛ te ḍwaŋ ɛkɛ parɛ. Dala ma jieyi ɛkɛ oŋkanda yuonginda ɔɔn. Amɛɛn.

will be added

X\