Ḍɔɔm 10

1Modg ɔɔn, ‘ya yomu wiak te ma Icrayiil ma ɔɔn. ‘Ya baal cɔk Juaŋti oŋkanda te ɛkkɛn aŋka dala ɛkkɛn yɔɔdɛ Juaŋo. 2Çeej ‘ya ɛkkɛn waakɛn byerɔ te jyek Juaŋo, yeti paŋi ɛkkɛn bala ɔntɔ, acaan ɛkkɛn jyek Juaŋ ŋeecɔn ne pwadan bɛɛ. 3Pɔya naŋŋɛ Juaŋ aŋka ma pwatti ɛkɛ ñamɛtiyɛ, ŋeecɔn ɛkkɛn bɛɛ. Ɛkkɛn poŋi gɔki agi ɛkkɛn pwadginti Juaŋ ñamdanti te naŋki ɛkkɛn pookɛn. Ɔci acaan a ɔŋŋiyɛ, pɔya naŋŋɛ Juaŋ aŋka ma pwatti neeniyɛ, dalji ɛkkɛn doki. 4Naa ma poŋi gɔki agi ɛkkɛn pwanninti Juaŋ ñamdanti te tiit jyek ganuun waakɛn bɛɛ. Jyeka neeni bawwin doki. Yaccu aŋka a pɔyo. Maka jyeddi ɛkɛtiyɛ, ɛkkɛn pwaddi Juaŋ ñamɛti. 5Muuca ikin ‘wonnin gena jwalla tɛyan jwalla gɔki agi, “Kan i jyek ganuun tiya ñin waakɛndayɛ, i uddi.” 6Yeti Jwali jyeniyɛ, ɛkɛ tɛɛcin a ɔɔn bɛɛ. Ɛkɛ gɔki agi, “I yaakiti kaacca ñaalɔ pɔliji” (aŋka Yaccu owwa iñɔ aŋka i yɔɔdi bɛɛ.) 7“I yaakiti ootta iñɔ” (aŋka Yaccu luolla ñaalɔ ɔci dɔwwa te lienti bɛɛ.) 8“Yeti jwali bala cualcinti iti, i yaakiti gɔkca ɛkɛ ɔci jyedda ɛkɛ.” Gena jyenna neeni ɔɔn nɔɔtɔn i te ɛkɛ neeni. 9Kan i gɔŋni te tuk i agi Yaccu agi Ciɛggɔn ɔci kan i jyetti te yoma awarɛ agi Yaccu luolnda Juaŋ ñaalɔ te koolji tɛɛti mokiyɛ, i yɔɔdi Juaŋo. 10Kan ma jyeddi te yomg ɛkkɛn awarɛyɛ, ɛkkɛn pwaddi Juaŋ ñamɛti, ɔci kan ɛkkɛn ma nɔɔttan a ɔɔnyɛ, ɛkkɛn yɔɔdɛ Juaŋ awarɛ. 11A ɔɔnyɛ, bala ba jyeka kiigin ne gɔkki agi, “Kan mena jyeddi ɛkɛtiyɛ, ɛkta lɔɔddɔ oŋgati bɛɛ.” 12Ma Icrayiil ɔci Keedin Pookɛnyɛ, ɛkkɛn waakɛnda a maka ne cyɛɛlɔ acaan Jwaŋ ɛkkɛn a Jwaŋa ne cyɛɛlɔ. Ɔci kan ma cɔkti ɛkɛtiyɛ, ɛkɛ yomɛ pwanna pwani ɛkkɛnti waakɛnda. 13Jyeka kiigin gɔki agi, “Maka borti te yenti Juaŋyɛ, ɛkkɛn yɔɔdɛ ɛkɛ waakɛnda.” 14Yeti kan ma jyeti menti men bɛɛyɛ, ɛkkɛn yaakinti cɔkti ɛkɛti boki? A’a, ɔci kan ma tieŋŋin jyek mena neeni men bɛɛyɛ, ɛkkɛn yaakinti jyeddi ɛkɛti boki? A’a, ɔci kan ma ooddi ɛkkɛn myettan bɛɛyɛ, ɛkkɛn yaakinti tieŋdi jyek ɛkkɛn boki? A’a. 15Ɔci kan ma cundɛ Juaŋ bɛɛyɛ, ɛkkɛn yaakinti ooddi mieti ma boki? A’a, jyeka kiigin gɔki agi, “Maka etti jyeka wonkɛn jyeka pwadin jyeka etti coodda pwadanyɛ, ɛkkɛn ciegɛn pwanna pwanno.” 16Yeti ma waakɛnda jyeti jyeka wonkɛn jyeka pwadin neeni bɛɛ. Bala ba jyeka guaŋŋɛ Icaaya ne ɛkɛ baali cɔki Juaŋti agi, “Ciɛggɔn, men gɛɛl jyeti jyeka ɔɔn ɛkkɛn myennɔn neeni boki?” 17Jyeni bɛya te tieŋŋin jyek Yaccu Kiṭɔ. 18Yeti ‘ya toocca ɛkkɛti, jiek ati mati bɛɛ? Ɛɛ, jiek ati mati baan konɛ warda pɔli ŋwayyɛ waakɛnda. “Pɔɔdg ɛkkɛn ati baan konɛ warda ɔci jyek ɛkkɛn ati baan konɛ warda moki.” 19’Ya toocca ɛkkɛti moki, ma Icrayiil tieŋŋin jiek jitkɛn ne pwadan boki? A’a, Juaŋ gɔkcin mati te lɛmi Muuca agi, “Ma Icrayiil yomgɛn yiegdi keedin pookɛnti te naŋka naŋdi ‘ya pwandin keedin pookɛntiy. Gena maka guaktan ɛkkɛn agi maka budany. Ma Icrayiil loondi maka kɛɛna ñingɛn morŋanti te naŋki ‘ya ɛkkɛnti.” 20Ɔci Juaŋ gɔkcin te lɛmi Icaaya daŋkun, ɔci Icaaya buayi ma te miti ma bɛɛ. Juaŋ gɔki agi, “Maka bala lieṭi ‘ya te ñamu bɛɛyɛ, ɛkkɛn ‘ya yuarka doki, ɔci maka bala tooci ‘ya bɛɛyɛ, ɛkkɛn ‘ya ŋeecka doki te naŋki ‘ya.” 21Yeti Icaaya gɔki te ma Icrayiil agi, “‘Ya baal boor ma ‘ya oŋkanda oŋkanda ɔɔn, yeti ma tieŋdi bɛɛ. Ɛkkɛn wyetkɛn tɛy tɛyo.”

will be added

X\