Ḍɔɔm 1

1Gena ‘ya Buuluc kiewan worga ɛkkɛti neeni. ‘Ya a kɛɛngɔn Yaccu Kiṭɔ. ‘Ya muŋŋa Jwaŋa Tolan naŋŋa a cuuda ɛkɛ. ‘Ya muona ɛkɛ bora ‘wonna kanŋa lali jyeka wonkɛn jyeka pwadin. 2Jyeka neeniyɛ, gena jyeka guaŋŋɛ Jwaŋa Tolan mati te baaṭi te Kaci ɛkɛy. Gena jyeka kiiwɛ bɔwan Jwaŋa Tolan worganjiy. 3Jyeka wonkɛn jyeka pwadin neeniyɛ, gena jyek Kaci Jwaŋa Tolan. Ne ɛkɛ aŋŋi men baanyɛ, ɛkɛ bɛɛn te yɔr ɛkkɛn Daawud ḍuaŋa tolanti. 4Te oŋŋa ɛkɛ jɔŋni ñaalɔ te koolji tɛɛti mokiyɛ, ɛkɛ ŋeejji ma ɛkɛ a Kaci Jwaŋa Tolan awarɛ, ɔci pwani Jwaŋa Tolan bala ɛkɛti. Mena guagdi ‘ya neeniyɛ, gena Yaccu Kiṭɔ Ciɛggɔn ikin. 5Ɔci te yom ɛkɛ yoma pwadanyɛ, ‘ya ‘wonna Juaŋ kanŋa, ɔci ‘ya naŋŋa ɛkɛ aŋi cuuda Yaccu te yenti ɛkɛ aŋka ‘ya maka Kɛɛna Pookɛn myetka aŋka ɛkkɛn jyeddi waakɛnda ɔci noŋdi ba jyek Juaŋo. 6Ɔci ɛkkɛ daŋkun bornɛ Juaŋo, ɔci ɛkkɛ aŋŋɛ ma Yaccu Kiṭɔ. 7Maka ani Juaŋ ban Ḍɔɔm maka muonɛ Juaŋ bora waakɛnda ɔci naŋŋɛ aŋi ma ɛkɛ nɛ, ‘ya kiewan worga ɛkkɛti. Wey ikin Jwaŋa Tolan ɔci Ciɛggɔn ikin Yaccu Kiṭɔyɛ, dala ɛkkɛn ɛkkɛ ‘wontɛ naŋki pwani ɔci coodi pwanno. 8Acca ɛkkɛ myettin, te ñamu ne ‘ya baala cɔka Juaŋti te yenti Yaccu Kiṭɔyɛ, ‘ya yomu pwanna pwani Juaŋti te ɛkkɛ, acaan ma bonk jitin tieŋŋin agi ɛkkɛ jyetcɛ Juaŋti doki. 9Ɔci Jwaŋa Tolan mena kanŋa ɛkɛ naŋdi ‘ya neeniyɛ, jyeka guagdi ‘ya neeni ŋeejɛ ɛkɛ a jyeka awarɛ. Oŋkanda ne ‘ya baala cɔkayɛ, ‘ya cɔk te ɛkkɛ daŋkun. 10Oŋkanda ne ‘ya baala cɔka Juaŋtiyɛ, ‘ya tooc ɛkɛti ka dala ɛkɛ ‘ya noŋda pɔy ba yom ɛkɛ aŋka ne oŋ gɛɛltiyɛ, ikin yɔɔrtin iki ɛkkɛ, 11ɔci ɛkkɛ magdin ‘ya te jyek Juaŋ aŋka ɛkkɛ yomgɔ tɛɛtɛ. 12Ne ikin baltin iki ‘yayɛ, ikin ṭeettin yɔtin pookɔ te jyek Juaŋ acaan ikin akin maka jyeti jyek ɛkɛy. 13Modg ɔɔn, ‘ya buaga jwalla parɛ gɛɛl ŋeeddɛ ɛkkɛ daŋkun. ‘Ya baal gɔk jyek woon oŋkanda ka ‘ya bɛɛd aŋka ɛkkɛ magdin te jyek Juaŋ aŋka ma gɛɛg ɛkkɛti jyeddi Juaŋti daŋkun ba jyeka mugɛ Keedin Pookɛn gɛɛg neeni. Yeti woon tɛy tɛy aŋa ‘yati men. 14Acaan jyeka neeni bala ‘ya ḍwaŋuti aŋka eed keedin pookɛnti waakɛnda ɔci ma ‘yati. Kan ɛkkɛn a maka ñingɛn tɛyan ɔci walla kan ɛkkɛn a maka ñingɛn morŋanyɛ, ‘ya buaga jiek eed ɛkkɛnti ɔɔn. 15’Ya cyegga woon ban Ḍɔɔm ka ‘ya bɛɛd aŋka ‘ya pocca ɛkkɛ laldin te jyeka wonkɛn jyeka pwadin neeni daŋkun. 16’Ya buay te miti ma te jyeka wonkɛn jyeka pwadin neeni bɛɛ. Te jyeka wonkɛn jyeka pwadin neeniyɛ, Jwaŋa Tolan yaakinti yuoci maka jyeddi jyeka neenitiy. Kan ɛkkɛn a ma Icrayiil walla kan a Keedin Pookɛnyɛ, ɛkkɛn yɔɔdɛ Juaŋ waakɛnda ɔɔn. 17Te ñamu jyek pɔya ma pwatti Jwaŋa Tolan ñamɛtiyɛ, ŋeecɔn ɛkkɛn ne pwadan bɛɛ. Ɔci acca te jyeka wonkɛn jyeka pwadin neeniyɛ, jyek pɔy ŋeennin ikin doki. Pɔya neeniyɛ, gena pɔya jyetti ma Juaŋtiy. A ɔɔnyɛ, bala ba jyeka kiigin ne gɔkki agi, “Maka pwadgin Juaŋ ñamɛti neeniyɛ, ɛkkɛn uda te jyenna ɛkkɛn jyetki Juaŋti neeni.” 18Jwaŋa Tolan looñi maka nɔɔtk maka noŋi naŋka yeyin neeniti, acaan jyek ɛkɛ jyeka awarɛ yiegin ɛkkɛnti aŋi ba jyeka budan. 19Ne ɛkkɛn noŋti a ɔɔn, ɛkkɛn jyek Juaŋ kwoyɔn bɛɛ. Ɛkkɛn nɔɔnnɛ Juaŋ te jyek ɛkɛ doki. 20Ɔci te oŋŋa ɛkɛ okki noon warda, ɔci ne acca ɔɔnyɛ, kan ma gɔrti waka aŋŋɛ ɛkɛyɛ, ŋeettan ɛkkɛn a Jwaŋa Tolan bala, ɔci ŋeettan ma Juaŋ tɛɛna tɛɛno. Kan ɛkkɛn noŋi ne yaayan oŋkanda a ɔɔnyɛ, ɛkkɛn yaakinti waakɛn byɛrtan te genga Juaŋti bɛɛ. 21Acaan ɛkkɛn Juaŋ ŋeeckɔn doki, yeti ɛkkɛn noŋi ba ɛkɛ agi Jwaŋa Tolan bɛɛ, ɔci ɛkkɛn gɔkti Juaŋti a pwatcin bɛɛ. Paŋi ɛkkɛn aŋi paŋŋa budan ɔci wyetk ɛkkɛn wyetka baaki jiek neeni aŋi myelko. 22Ɛkkɛn bala poŋi ba paŋi ɛkkɛn pookɛn budan. Ɔci acaan a ɔŋŋiyɛ, ɛkkɛn bala ba maka ñingɛn tɛyan, yeti ɛkkɛn ñingɛn tɛɛcin awarɛ bɛɛ, ɛkkɛn bala ba maka aamman. 23Jwaŋa Tolan pwanna pwanno. Ɔci ɛkɛ bala oŋkanda ɔɔn baadi bɛɛ, yeti ma yookɔn te ɛkɛ. Ɔci ma bala moṭi waka pɔɔtan ɛkkɛn a pɔɔt waka naŋtan ma ba ma baan, ɔci ba ḍiirg, ɔci ba leyi, ɔci ba kogi ɔɔny. 24Ɔci ne ɛkkɛn Juaŋ dalkiti a ɔɔnyɛ, Juaŋ daŋkun ɛkkɛn dalnɛ noŋi ba yomg ɛkkɛn pookɛn budan te naŋki tommo. Ɔci ɛkkɛn bala noŋi ne yaayan waak ɛkkɛnti. 25Ɛkkɛn yookɔn te jyek Juaŋ ɔci jyeti gena jyeka jomginti. Ɔci ɛkkɛn bala moṭi waka cɔnnɛ Juaŋ a cɔniy. Ɔci Juaŋ Mena Oki Waak mena pwadan mena bala yuonginda neeniyɛ, ɛkɛ aŋka dalji ɛkkɛn te mallo. 26Ɔci acaan a ɔŋŋiyɛ, ɛkkɛn dalnɛ Jwaŋa Tolan noŋi ba naŋki ɛkkɛn pookɛn neeni. Naŋki ɛkkɛn a tommo. Maka moongyɛ, yookɔn te ‘uay ɛkkɛn, ɔci ɛkkɛn bala noŋi amaam waak ɛkkɛnti pookɛn. 27Maka ‘uayyɛ, ɛkkɛn moong ɛkkɛn daljɛ, ɔci ɛkkɛn bala tob yɔtin pookɛn. Yomg ɛkkɛn buagɔn ɛkkɛn tob yɔtin pookɛn ne pɛñan. Ɔci te naŋka neeniyɛ, maka ‘uay yiegin ne pɛñan. Ɛkkɛn aŋi ba maka amgin te naŋka neeni doki, ɔci naŋki ɛkkɛn neeni ɛkkɛn yaaññɛ bala ba ywobji Juaŋ bɛɛn ɛkkɛnti doki. 28Ɔci ne ɛkkɛn yookɛti waakɛn te ŋeejjin ɛkkɛn Jwaŋa Tolan ŋeettitiyɛ, ɛkkɛn dalnɛ Juaŋ poŋi ba paŋi ɛkkɛn, ɔci noŋi ba naŋki ɛkkɛn. Paŋi ɛkkɛn ɔci naŋki ɛkkɛn neeni yeyɔ ne tolan. 29Nɔji ɛkkɛn tol tolo. Naŋka yaayan gɛɛl dalji ɛkkɛn bɛɛ. Ɛkkɛn waakɛn ḍigɔ. Ɛkkɛn cooddɛn yeyɔ acaan ɛkkɛn a ywobko. Ɛkkɛn korkɛn modɔ. Ɛkkɛn ani nooŋi mako. Ɛkkɛn woowɔ yɔtin pookɛn. Ɛkkɛn noŋi ma ñingɛn. Ɛkkɛn yomgɛn yeyɔ mati. Ɛkkɛn lɔṭi ma waakɛn. 30Ɛkkɛn wooki maka pookɛn. Ɛkkɛn yomgɛn yeyɔ Jwaŋa Tolanti. Ɛkkɛn wyetkɛn yeyɔ. Ɛkkɛn poŋi agi ɛkkɛn pwadginti ɔci maka pookcɛn aŋka yiegɔ. Ɛkkɛn jieyi waakɛn pookɛn. Maka neeni etti naŋka wonkɛn naŋka yeyin. Ɛkkɛn tyeŋi jyek weyyɛn ɔci jyek mɛyyɛn bɛɛ. 31Ɛkkɛn ciyi amaam budan. Ɛkkɛn tieci jiek waakɛn bɛɛ. Ɛkkɛn ani ma bɛɛ. Ɛkkɛn yomgɛn baaw mati. 32Ɛkkɛn jiek ŋeecɔn ne Juaŋ gɔki agi kan mena noŋdi ba nɔjja neeniyɛ, ɛkta tuudɔ. Jiek ŋeecɔn ɛkkɛn, yeti ɛkkɛn noŋi men ɔɔn. Yeti maka noŋi nɔjja neeniyɛ, kan maka pookɛn noŋdi ba naŋka neeniyɛ, ɔci ɛkkɛn gɔki agi a ɔŋŋiyɛ, pwadɔ.

will be added

X\