Liɛlto 9

1Ɔci malɛɛka akki dɔɔyɔ kuotcin ṭwoŋ ɛkɛ, ɔci ‘ya gɔrcan gen gɛɛl bala ba kɛɛli ḍɛmmin te ñaalɔ pɔliji ḍɛmmin iñɔ ṭɛɛrji. Ɔci ɛkɛ ‘woñgi ma mɔpta kola beyan. 2Ɔci kɛɛlla neeni kola beyan pɔŋŋɛ tukɛti, ɔci jien bɛɛn bora ne tolan bala ba jien ḍwoŋa tolany. Ɔci pɔli konɛ kuumi te jien koolo, ɔci oŋ waŋɛ moki aŋi mielo. 3Ɔci ṭooŋgi wɔɔwwin bora te jienti ɔci ṭɛɛr wyeñɛ kuumi warda, ɔci ɛkkɛn ‘wonnɛ menga war tɛɛn bala ba war tɛɛn jiidga bala iñɔ ṭɛɛrji wɛnniy. 4Ɔci menga gɔkcin ɛkkɛnti agi, “Naa i jang ɔci lwomk ɔci waka ṭeyan iñɔ ṭɛɛrji wɛnni gɛɛl naŋa ɔŋka bɛɛ. A’a, gena maka baaki mañ Jwaŋa Tolan ñomgɛnti aŋka kootan ṭooŋgi pookɛny.” 5Ɔci ɛkkɛn noktan bɛɛ, yeti ɛkkɛn ñaktanji waak te kood ponk ne dɔɔyɔ. Ɔci ṭooŋga neeni tuggɛn bala ba jiidg te pɛñño. 6Ɔci te oŋŋa wannayɛ, ma bwagdɛ lieno, yeti lien kwaya te ɛkkɛnti, ɔci ɛkkɛn kɛɛdi agi dala ɛkkɛn tuudintɛ, yeti lien kwaya te ɛkkɛnti. 7Ɔci ṭooŋga neeni bala ba muntan ne ɛɛŋkiti ma wak ṭwaŋy. Ɔci waka bala ɛkkɛn wyetkɛnti bala ba taaggan cyɛgji taaggan naŋi ma te dahab, ɔci ɛkkɛn woŋgɛn bala ba woŋgi ma baano. 8Ɔci jyeyi ɛkkɛn bala ba jyeyi maka moongo, ɔci ɛkkɛn lɛkɛn bala ba jiɛl gɔrŋgɛ. 9Ɔci ɛkkɛn jɔtkɛn bala ba kɔɔrjin naŋi ma te bily, ɔci ɛkkɛn kɔggɛn wiak bala ba babin wuatan muntan ne atki ootti ṭwaŋtiy. 10Ɔci ɛkkɛn wilkɛn balki kuwi bala ba kun jiin ɔɔn, ɔci ɛkkɛn balki war tɛɛn aŋka noŋdi ne yaayan mati ponk ne dɔɔyɔ. 11Ɔci ɛkkɛn balkɔn ḍuaŋa ɛkkɛn, gena men Jwaŋa Yaayan mena mwoki kola beyan, ɔci ɛkɛ yenti Abaadon te tuk Ma Icrayiil, ɔci ɛkɛ yenti Apɔɔlyɔn te tuk Giriik. (Ɔci yenta neeni kon ɛkɛ te tuk Mabaan agi, “Mena Yooci Noono.”) 12Ywobja ñamu ati doki, ɔci ywobja pookɛn bala bɛya ne yyɛɛwɔ men. 13Ɔci malɛɛka akki ne dɔɔyɔ wilin ne cyɛɛlɔ kuotcin ṭwoŋ ɛkɛ, ɔci ‘ya tieŋŋan pwan bɛɛn te gena ɛrki ma waak ṭwoŋka ne ŋaanɔ neeniti, ɔci gena neeni naŋi ma te dahab, ɔci bala yɔɔd Jwaŋa Tolan ñamɛti. 14Ɔci ɛkɛ gɔkcin malɛɛka akki makɛn ne dɔɔyɔ wilin ne cyɛɛlɔ malɛɛka eci ṭuoŋ bieŋɛti neeni agi, “Dala i malɛɛkan ne ŋaanɔ malɛɛkan bala toolji Tol Yuprɛɛtic tola tolan byeŋkɛn a ḍɛɛggin neeni lookka!” 15Ɔci ne pɛñan wyeng waakɛn lookkɛ, ɔci malɛɛkan neeni waakɛn ywaŋɛ aŋka ɛkkɛn ma noktan te cani jiña wanna, ɔci te ninka wanna, ɔci te ponka wanna, ɔci te yuonga wanna, gena oŋŋa ḍuaññɛ Jwaŋa Tolany. Ɔci ɛkkɛn ma noktan ne coŋɔn. 16Ɔci ‘ya tieŋŋan pwan gɔki agi, “Ackan taab te muntan a alpn coŋgin a coŋgin bala ba milyuunn a miyyan ne yyɛɛwɔ.” 17Ɔci muntan waakɛn lɛɛllɛ bora ‘yati, ɔci maka taab ɛkkɛnti neeni waka dooŋki ɛkkɛn waak bala ba maañ lɛmmɛ, ɔci ɛkkɛn garŋa a garŋ bala ba ḍoŋ pɛɛpkɛ. Ɔci muntan neeni wyetkɛn bala ba jyeṭo. Ɔci maaño, ɔci jiena yaayan bɛya bora te ɛkkɛn tuggɛnti. 18Ɔci te waka ne ḍoogɔ neeniyɛ, ma tuun ne coŋɔn te maañ, ɔci jiena yaayan jiena bɛɛn bora te muntan tuggɛntiy. 19Ɔci war tɛɛn bala muntan tuggɛntiyɛ, bala ba war tɛɛn bala ɛkkɛn wilkɛntiy. Ɛkkɛn kooyi ma te wilkɛn ba kogi, ɔci noŋi ne yaayan mati te wyetk ɛkkɛn neeni. 20Ɔci maka uni te naŋka neenitiyɛ, ɛkkɛn waakɛn yali te mali waka naŋi ɛkkɛn te byeŋkɛn neeni bɛɛ, ɔci ɛkkɛn mwonnin te mali jɔkin yeyin bɛɛ, ɔci walla te mali waka pɔɔyi ɛkkɛn te byeŋkɛn te dahab, ɔci te bilk, ɔci te bilka tidan, ɔci te gwoyi, ɔci te jang neeni bɛɛ. Ɔci waka neeni yaakinti gɔṭi bɛɛ, ɔci walla tieŋdi bɛɛ, ɔci walla ati bɛɛ. 21Ɔci walla ɛkkɛn waakɛn yali mwonnin te nooŋi ma bɛɛ, ɔci walla te omji bɛɛ, ɔci walla te tomi bɛɛ, ɔci walla te kali waak bɛɛ.

will be added

X\