Liɛlto 8

1Ɔci ne waka marci ma worgati ne ɛka akki dɔɔyɔ wyetkɛn ne yyɛɛwɔ ne pɔɔnnɛ bora Kalŋyɛ, waka bala pɔliji coon lieda waakɛnda, genga warɛ jaŋŋɛ ne cyɛɛlɔ bɛɛ, bala ba oŋ ḍulnɛ ɔɔn. 2Ɔci ‘ya gɔrcan, ɔci malɛɛkan ne dɔɔyɔ wyetkɛn ne yyɛɛwɔ neeni yuarcan ‘ya bala yɔɔd Juaŋ ñamɛti, ɔci ɛkkɛn ‘wonnɛ ɛkɛ ṭwoŋki byeŋkɛnti waakɛnda. 3Ɔci malɛɛka gɛɛl yuarcan ‘ya moki, ɔci ɛkɛ eci gena ṭuorki ma maañ bieŋɛti, gena neeni naŋi ma te dahab, ɔci ɛkɛ yɔɔtcin gena ɛrki ma waak wyeñɛti. Ɔci ɛkɛ ‘woñgi ma ḍɔŋi poom ne tolan aŋka ṭuuldɛ ɛkɛ maccu iki cɔŋi ma Juaŋ maka pwadin neeni gena ɛrki ma waak wyeñɛti, Jwaŋa Tolan ñamɛti. 4Ɔci jien ati ñaalɔ iki cɔŋi ma Juaŋ maka pwadin neeni te byeŋ malɛɛka Jwaŋa Tolan ñamɛti. 5Ɔci moki malɛɛka gena ṭuorki ma jien luullɛ, ɔci kuomnɛ te maañ nona ɛrki ma waak neeni, ɔci yiɛmnɛ iñɔ ṭɛɛrji, ɔci pwan bala wiak ne pɛñan, ɔci noon wildan ne tolan, ɔci ṭɛɛr warɛ ḍiedan ne tolan. 6Ɔci malɛɛkan ne dɔɔyɔ wyetkɛn ne yyɛɛwɔ neeni waakɛn ywaŋɛ aŋka kuotti ṭwoŋko, gena ṭwoŋka ne dɔɔyɔ wyetkɛn ne yyɛɛwɔ neeni. 7Ɔci ne malɛɛka ñamu kuonni ṭwoŋ ɛkɛyɛ, ɔci tomŋin ɔci maañ ḍɛɛmdin iñɔ ṭɛɛrji, ɔci ɛkkɛn waakɛn a yimgo, ɔci ṭɛɛr taaŋɛ gɛɛl ammɛ maaño, ɔci jang taaŋɛn gɛɛl ammɛ maaño, ɔci lwomk waakɛnda ammɛ maañ iki lwomka ṭeyan. 8Ɔci malɛɛka akki ne yyɛɛwɔ neeni kuotcin ṭwoŋ ɛkɛ, ɔci gen gɛɛl ḍɛmmin te ñaalɔ ḍɛmmin galŋji bala ba poma tolan, ɔci bala koldan ne tolan, ɔci galŋ konɛ taaŋɛ gɛɛl aŋi yimgo. 9Ɔci waka cɔnnɛ Juaŋ ciyi galŋji gɛɛg tuuni, ɔci murkan ati galŋji a murkan ḍwaŋin gɛɛg lɛɛktin jitin. 10Ɔci malɛɛka akki ne ḍoogɔ kuotcin ṭwoŋ ɛkɛ, ɔci kɛɛlla tolan gɛɛl ḍɛmmin te ñaalɔ pɔliji, ɔci ɛkɛ dɛki bala ba maañ lɛmmɛ ne koldi a koldin. Ɛkɛ ḍɛmmin toolji wɔɔrg gɛɛg woŋgɛnti. 11(Ɔci kɛɛlla neeni yenti “Jana Cyɛyan.”) Ɔci ɛkɛ pieg naŋŋɛ cyɛñña cyɛñño. Ɔci maka moti pyega neeniyɛ, ma gɛɛg tuun ne coŋɔn te cyɛñi piego. 12Ɔci malɛɛka akki ne ŋaanɔ kuotcin ṭwoŋ ɛkɛ, ɔci oŋ waŋɛ ɔci paan ɔci kɛltan monnɛ Jwaŋa Tolan aŋka naa ɛkkɛn dɛki ne tolan moki bɛɛ, ɔci oŋ konɛ ɔci ween konɛ ɛkkɛn yaakinti dɛkti ne tolan moki bɛɛ. 13Ɔci ‘ya gɔrcan, ɔci ‘ya tieŋŋan yan goow tolan gɛɛl bala peyi yeccu ñaalɔ pɔliji, ɔci ɛkɛ gɔki te pwana tolan agi, “Ywobjo! Ywobjo! Ywobji bala bɛya maka ciyi iñɔ ṭɛɛrji wɛnniti ne malɛɛkan ne ḍoogɔ neeni kuotti ṭwoŋki ɛkkɛny!”

will be added

X\