Liɛlto 7

1Ɔci ne naŋka neeni baaniyɛ, malɛɛkan ne ŋaanɔ bala yɔɔd ṭɛɛr toŋka ne ŋaanɔ neeniti, ɔci ɛkkɛn jwamtan bala ṭɛɛrji ne ŋaanɔ neeni muogɛyɔ aŋka naa ɛkkɛn yiŋi ṭɛɛrji moki bɛɛ, kan bora, walla galŋji, walla jang jitin moki bɛɛ. 2Ɔci ‘ya gɔrcan malɛɛka gɛɛl bala bɛya te pɔya tyɛrñanti aŋan eci mañ Jwaŋa Tolan mena tɛɛti neeni bieŋɛti. Ɔci ɛkɛ gɔkcin malɛɛkan ne ŋaanɔ malɛɛkan ‘wonnɛ Juaŋ war tɛɛnti aŋka noŋdi ne yaayan nona iwanti, ɔci galŋji, ɔci jangti neeni te pwana tolan. 3Ɔci ɛkɛ gɔkcin ɛkkɛnti agi, “Naa ɛkkɛ noŋdɛ ne yaayan nona iwanti, ɔci toolji, ɔci jangti meni bɛɛ, yɔɔddɛ lakun ɔɔn maka moṭi Jwaŋa Tolanti noŋdɔn maañ ñomgɛnti lakun waakɛnda.” 4Ɔci ‘ya tieŋŋan maka naŋi ma te mañ Jwaŋa Tolan ñomgɛnti kɔɔna kɔɔnno. Ɛkkɛn a alpn a miyya ne cyɛɛlɔ ɔci alpn a ma baan ne yyɛɛwɔ wyetkɛn ne ŋaanɔ (144,000), gena keedin ma Icrayiil waakɛnda, kɛɛna ne cyɛɛlɔ balki ma a alpn ne inyaakkɛn wyetkɛn ne yyɛɛwɔ (12,000). Ɔci keedin neeni jitk ɛkkɛn bala a ɔŋŋi, Kɛɛn Yahuuja, Kɛɛn Ḍubɛn, Kɛɛn Gaad, Kɛɛn Acar, Kɛɛn Naptali, Kɛɛn Manaaca, Kɛɛn Cimyan, Kɛɛn Laawi, Kɛɛn Icikar, Kɛɛn Jɛbuluun, Kɛɛn Yuocip, Kɛɛn Benjamin. 9Ɔci ‘ya gɔrcan, ɔci poli ma polla tolan yuarcan ‘ya, ɔci maka neeni menga yaakinti ɛkkɛn pagdɛ bɛɛ. Keedin pookɛn, ɔci bonk waakɛnda, ɔci maka coŋin magga da te tuk ɛkkɛn, ɔci ɛkkɛn bala yɔɔd kaakci Ciɛggɔn Tolan ñamɛti, malɛɛkan coŋin neeni ŋotkɛnti, ɔci Kalŋ ñamɛti daŋkun. Ɛkkɛn ɛŋi bworŋin bɔwan ɔci eci tuum jyetkɛ byeŋkɛnti. 10Ɔci ɛkkɛn bala yaadan te pwana tolan agi, “Yɔɔt bala Jwaŋ ikin Jwaŋa ciyi te kaakci neenitiy, ɔci bala Kalŋti daŋkun!” 11Ɔci malɛɛkan bala yɔɔd kaakci yudiyɔ, ɔci cyekin, ɔci waka tɛɛti ne ŋaanɔ neeni yudiyɔ. Ɔci ɛkkɛn ḍɛɛmdin ñingɛn kuomjɛ iñɔ ɔci morcin Juaŋti. 12Ɔci gɔki agi, “Amɛɛn! Dala bala a ɔɔn. Dala jied, ɔci pwani, ɔci ñing tɛɛn bala ɛkɛti, ɔci dala ma gɔkti a pwatcin ɛkɛti, ɔci dala ma noŋdi ne pwadan ɛkɛti, ɔci dala war tɛɛn bala Jwaŋ ikinti oŋkanda ɔɔn. Amɛɛn!” 13Ɔci maka cyekin neeni gɛɛl tooccin ‘yati agi, “A makɛ ɛŋi bworŋin bɔwan wannay? Ɔci ɛkkɛn bɛɛn te aŋɛ?” 14Ɔci ‘ya ṭwokcan ɛkɛti agi, “Çeej ‘ya bɛɛ. Çeej i, Ciɛggɔn.” Ɔci ɛkɛ gɔkkin ‘yati agi, “Maka neeniyɛ, gena maka uni te taab tolantiy, bworŋin ɛkkɛn tuogɛ te yimg Kalŋo, ɔci ɛkkɛn bɔɔna bɔɔno. 15A ɔŋŋiyɛ, ɛkkɛn bala kaakci Juaŋ ñamɛti orɔ on Juaŋ ñaalɔ moṭi ɛkɛti te oŋ konɛ, ɔci te ween konɛ. Ɔci mena ciyi te kaakci neeni ɛkkɛn kɛɛdiyɔ. 16Ɔci ɛkkɛn amdɛ koñ bɛɛ, ɔci ɛkkɛn amdɛ yiɛn bɛɛ, ɔci oŋ ɛkkɛn amdɛ bɛɛ, walla nona myɛlan gɛɛl bɛɛ. 17Acaan Kalŋa bala yeccu kaakciti neeniyɛ, a ḍɛɛnin ɛkkɛn, ɔci ɛkɛ ɛkkɛn wɛɛdɛ nona balki pyega tɛɛtki ma, ɔci Juaŋ ɛkkɛn puudɛ ñingɛnti te pieg waakɛnda.”

will be added

X\