Liɛlto 6

1Ɔci ‘ya gɔrcan Kalŋ waka marci ma worgati ne dɔɔyɔ wyetkɛn ne yyɛɛwɔ neeni gɛɛl pɔɔnnɛ bora, ɔci ‘ya tieŋŋan waka tɛɛti ne ŋaanɔ neeni gɛɛl gɔkcin, ɔci pwan ɛkɛ bala ba ñaal ne wiagi a joony. Ɛkɛ gɔkcin mena taab muntanti neeni agi, “Bɛɛdi!” 2Ɔci ‘ya gɔrcan ɔci muntan bɔwan gɛɛl bɛɛni, ɔci mena taab ɛkɛti eci kay bieŋɛti, ɔci ɛŋi taagga bɔnnin, ɔci kaaccin bora aŋka ma bwandɛ. 3Ɔci ne gena akki yyɛɛwɔ pɔɔnnɛ bora Kalŋyɛ, ‘ya tieŋŋan gena tɛɛti akki yyɛɛwɔ gɔki agi, “Bɛɛdi!” 4Ɔci muntan tidan bɛɛn bora, ɔci mena taab ɛkɛti balki war tɛɛn aŋka naŋka pwadin eedɛ ɛkɛ te ṭɛɛr wyeñɛti, ɔci ma noogdi ɔci tuwa, ɔci ɛkɛ ‘woñgi ma byeŋgaaran beyan byeŋgaaran tolan. 5Ɔci ne gena akki ḍoogɔ ne pɔŋŋɛ Kalŋyɛ, ‘ya tieŋŋan gena tɛɛti akki makɛn ne ḍoogɔ gɔki agi, “Bɛɛdi!” Ɔci ‘ya gɔrcan, ɔci muntan ulan bɛɛni, ɔci mena taab ɛkɛti neeni eci cyerñi bieŋɛti (Gena kɛɛrki ma waak aŋka waak ninti a tyɛlgay.) 6Ɔci ‘ya tieŋŋan pwan te yeccu waka tɛɛti ne ŋaanɔ neeniti gɔki agi, “Cigga pok tuka ne cyɛɛlɔ eci bilk kanŋa oŋ kona ne cyɛɛlɔ waakɛnda, ɔci cigga pokkin tuggɛ ne ḍoogɔ eci bilk kanŋa oŋ kona ne cyɛɛlɔ waakɛnda. Yeti ñɔɔn ɔci mooy naa ɛkkɛn naŋa a ɔŋka bɛɛ.” 7Ɔci ne gena akki ŋaanɔ ne pɔɔnnɛ Kalŋ borayɛ, ‘ya tieŋŋan gena tɛɛti akki makɛn ne ŋaanɔ gɔki agi, “Bɛɛdi!” 8Ɔci ne ‘ya gɔrnayɛ, muntan ṭeyan yuarcan ‘ya, ɔci mena taab ɛkɛti neeni yenti Lieno, ɔci Non Lien bala booti ɛkɛ, ɔci ɛkkɛn ‘woñgi ma war tɛɛn aŋka ɛkkɛn ṭɛɛr taaŋɛ gɛɛl noktan te byeŋgaaran ɔci ṭwaŋ, ɔci koñ, ɔci waja, ɔci wak luom waka bala iñɔ ṭɛɛrji wɛnniy. 9Ɔci ne gena akki dɔɔyɔ ne pɔɔnnɛ Kalŋ borayɛ, ‘ya gɔrcan ɔci gena ɛrki ma waak pwanɛtiyɛ, boŋki maka tuutan gɛɛg bala nini, gena maka ŋaarɛ ma te bolja ɛkkɛn jyetki jwali Jwaŋa Tolanti, ɔci te jyeka lorki ɛkkɛn may. 10Ɔci ɛkkɛn yaajjin te pwana tolan agi, “Ne tuwa, hay, Ciɛggɔn, Ciɛggɔn pwadan awarɛ ɔci balki war tɛɛny! I jiek olja maka bala ciyi iñɔ ṭɛɛrji wɛnni wyetkɛnti ɔci noŋja ne yaayan ɛkkɛnti aŋka yimg ɔɔn dɔwwa i bora bɛɛ?” 11Ɔci ɛkkɛn waakɛnda ‘wonnɛ Ciɛggɔn bworŋin bɔwan, ɔci ɛkɛ gɔkcin ɛkkɛnti agi ɛkki woodɔ ne ḍiɛran ne modg ɛkkɛn Ma Kiṭɔ makɛn noktiti ma ba ɛkkɛn ɔɔn. 12Ɔci ‘ya gɔrcan Kalŋ gena akki dɔɔyɔ wilin ne cyɛɛlɔ pɔŋnɛ bora, ɔci noon warɛ Jiɛññɛ ne tolan, ɔci oŋ waŋɛ uli bala ba bworŋa ulan, ɔci paan tinna tini ba yimgo. 13Ɔci kɛltan bala ñaalɔ ḍɛɛmdin iñɔ ṭɛɛrji bala ba ŋuami ṭɔlgɛ ne Jiɛññɛyɔ jwamma tolan ɔɔn. 14Ɔci pɔli tukɛ pɔŋnɛ bala ba gaan ne wiñkiti ma ne beyany, ɔci pomk ɔci kaki wyetkɛn waakɛnda waakɛn uutci ɔntɔ te nonkɛnti. 15Ɔci ḍuaŋan ṭɛɛrji wɛnni, ɔci maka ḍwaŋin ɔci maka ñingɛn tɛyan, ɔci maka cyɛgan ɔci ‘uay ṭwaŋ ɔci maka kɛɛnk ɔci maka a kɛɛnk bɛɛyɛ, ɛkkɛn waakɛnda yooŋdi kɔki jitin, ɔci waakɛn yiiktan pomk jitin. 16Ɔci ɛkkɛn gɔkti pomkti agi, “Dala ɛkkɛ ḍɛɛmdɛ ɔɔn wyetkɔti aŋka ɔɔn kwomdintiyɔ te woŋgi mena ciyi te kaakci neeni, ɔci te loñk Kalŋo! 17Oŋ loñk ɛkɛ oŋŋa tolan bɛɛn doki, ɔci a menɛ yaakinti yɔɔtti iñɔy?”

will be added

X\