Liɛlto 5

1Ɔci ‘ya worga yuarcan bala tiidɛ mena ciyi te kaakci neeni bieŋɛti byeŋa a byerɔn. Ɔci worga neeni kiikan bala konɛti ɔci ŋoyɛti, ɔci ɛkɛ balkɛ jitkɛ ne dɔɔyɔ wyetkɛn ne yyɛɛwɔ, ɔci jiña ne cyɛɛlɔ da marciti ma te waka moorki ma waaky. 2Ɔci malɛɛka warɛ tɛyan gɛɛl yuarcan ‘ya, ɔci ɛkɛ bala boor te pwana tolan agi, “A menɛ yaakinti waka marci ma ɛkɛti neeni puattɛ ɔntɔ ɔci worga neeni pɔgdɛy?” 3Ɔci menga ne cyɛɛlɔ yaakinti waka bala marci ma worgati neeni pɔɔnnɛ bora bɛɛ, worga neeni pɔŋŋɛ menga bɛɛ. Gena maka bala ñaalɔ pɔliji, ɔci maka bala iñɔ ṭɛɛrji, ɛkkɛn gɛɛl yaaŋnɛti naŋka neeni naŋŋɛ aŋka ɛkɛ gɔrti waka bala jiju neeni bɛɛ. 4Ɔci ‘ya baal wiak ne tolan acaan menga bala yaakinti worga neeni pɔgdɛ aŋka jyeka bala jiju neeni pagdɛ, ɔci walla gɔrti worgati bɛɛ. 5Ɔci mena ciɛggɔn gɛɛl gɔkkin ‘yati agi, “Naa wiak bɛɛ, acaan Yaccu Kiṭɔ mena bartan ma a jiɛl bɛɛn te kɛɛn Yahuujati ɔci ma Daawudti neeniyɛ, ɛkɛ yaakinti waka marci ma worgati ne dɔɔyɔ wyetkɛn ne yyɛɛwɔ neeniyɛ, pɔɔktɛ ɔntɔ waakɛnda ɔci worga neeni pɔgdɛ.” 6Ɔci Kalŋ yuarcan ‘ya bala yɔɔd yiika cyekin i waka tɛɛti ne ŋaanɔ neeni, ɔci ɛkɛ bala ba ŋaarkiti ma a ŋarti ɔɔn. Ɔci Kalŋa neeni balki woŋgɛ ne dɔɔyɔ wyetkɛn ne yyɛɛwɔ, ɔci ṭwoŋkɛ ne dɔɔyɔ wyetkɛn ne yyɛɛwɔ. Ɛkɛ noon yuartɛ warda awarɛ, ɔci ɛkɛ warɛ tɛɛcin awarɛ. Ɔci waka neeni gena boŋki Jwaŋa Tolan boŋka cuonnɛ ɛkɛ iñɔ ṭɛɛr konɛ warday. 7Ɔci Kalŋa neeni bɛɛn ɔci worga luullɛ te Mena ciyi te kaakci neeni bieŋɛti byeŋa a byerɔn. 8Ɔci ne ɛkɛ worga luullɛyɛ, waka tɛɛti ne ŋaanɔ, ɔci cyekin a men baan wyetkɛn ne ŋaanɔ (24) neeni ḍɛɛmdin ñingɛn kuomjɛ iñɔ Kalŋa neeni ñamɛti. Ɔci ɛkkɛn waakɛnda balki coŋkɔn byeŋkɛnti, ɔci paltan ṭɔlgɛn naŋi ma te dahab, ɔci waka neeni kuomgɛ ɛkkɛn te ḍɔŋi poomo. Ɔci ḍɔka ṭultan ma neeni gena cɔŋi maka jyeti Juaŋtiy. 9Ɔci ɛkkɛn bala ‘uali ɔɔlla woonɛ gɔki agi, “Te lyen iyɛ, ma waakɛnda keedin jitkɛn waakɛnda magga da te tuk ɛkkɛn ɔci ma da te ban ɛkkɛn wanni i te yimg i neeni. A ɔŋŋiyɛ, i yɔmni aŋka worga lula ɔci pɔga. 10Ɔci ɛkkɛn naŋŋi i aŋi ḍuaŋan ɔci gaciicin Juaŋti ɔci ɛkkɛn aga ḍuaŋan ṭɛra neeni ne cwakanti.” 11Ɔci ‘ya gɔrcan, ɔci ‘ya tieŋŋan pwan malɛɛkan a alpn coŋgin a coŋgin. Ɛkkɛn bala yɔdi kaakci yuugiyɔ i waka tɛɛti ne ŋaanɔ ɔci cyekin. 12Ɔci ɛkkɛn bala ‘uali te pwana tolan agi, “Kalŋa ŋaarɛ ma neeni ɛkɛ yɔmjin aŋka dala war tɛɛn bala ɛkɛti, ɔci dala ɛkɛ aga mena cyɛgan, ɔci dala ñing tɛɛn bala ɛkɛti, ɔci dala ɛkɛ tɛya a tɛɛn, ɔci dala ma jieyi ɛkɛ!” 13Ɔci ‘ya tieŋŋan waka cɔnnɛ Juaŋ ñaalɔ pɔliji ɔci iñɔ ṭɛɛrjiy, ɔci waka bala toolji baan konɛ warda ‘uali agi, “Mena ciyi te kaakci neeni, naŋka pwadan bala ɛkɛti ɔci Kalŋti, ɔci war tɛɛn moki yuonginda baadi bɛɛ.” 14Ɔci waka tɛɛti ne ŋaanɔ gɔkcin agi, “Amɛɛn!” Ɔci cyekin ḍɛɛmdin ñingɛn kuomjɛ iñɔ morcin ɛkɛti.

will be added

X\