Liɛlto 3

1“Dala i kiejja mena bala wɛɛyi ma kaniica ban Cardicti agi, Gena jyeka guagdɛ mena balki boŋki Jwaŋa Tolan boŋka ne dɔɔyɔ wyetkɛn ne yyɛɛwɔ, ɔci kɛltan ne dɔɔyɔ wyetkɛn ne yyɛɛwɔ neeniy. Naŋki i ŋeej ‘ya. I tɛɛt te yenti budan, yeti i ag tuuta. 2A ɔŋŋiyɛ, dala i ṭiewwa, ɔci dala i waka bala iti tɛɛti neeni yɔɔtca iñɔ ne tɛyan wona lien bɛɛni ɛkkɛnti men bɛɛy. Ɔci moki ‘ya naŋka awarɛ gɛɛl yuarŋ ‘ya iti Juaŋ ñamɛti bɛɛ. 3Ɔci dala i poŋja te gena lalli iy, ɔci ɛkɛ muŋŋi i a ɔki, ɔci dala ɛkɛ naŋa i, ɔci dala i waru yala nɔji dalja. Kan i winniyɛ, ‘ya baal bɛɛd ba mena ɛɛno, oŋ waŋa bɛɛda ‘ya ne pɛñan neeni ŋeej i bɛɛ. 4Yeti ma gɛɛg bala iti ban Cardic aŋan, ɛkkɛn yomgɛn cuuliyɔ bɛɛ. Ɔci ne oŋgati ɛkkɛn ooddin iki ‘ya te yoma bɔwan te yɔmjin ɛkkɛn yɔmki neeni. 5Maka naŋka yeyin bwantanyɛ, ɛkkɛn ɛɛŋdi bworŋin bɔwan, ɔci ‘ya yeng ɛkkɛn nuutca bora te worga kiewi Juaŋ yeng maka ‘wondɛ ɛkɛ tɛɛtinti neeni bɛɛ. Yeti ‘ya gɔkca Wey ɔɔnti ɔci malɛɛkan ɛkɛti te maka neeni, ka maka neeni ɛkkɛn a ma ‘ya. 6Kan mena balki jyetkɛyɛ, dala ɛkɛ tieŋdi jyeka guagdɛ Boŋ Jwaŋa Tolan ma kaniicantiy! 7“Dala i kiejja mena bala wɛɛyi ma kaniica ban Piladɛɛlpyati agi, Gena jyeka guagdɛ mena pwadan ɔci mena awarɛy. Ɛkɛ a mena mwoki waka bɛɛn te Daawudtiy. Ɛkɛ a mena balkɛ war tɛɛn aŋka ma kaattɛ Ban Juaŋ ñaalɔ pɔliji, walla ma kaaktɛti aŋka naa ɛkkɛn kaatti ban Juaŋ bɛɛy. 8Naŋka naŋa i wanna ŋeej ‘ya. ‘Ya pɔy tukɛ pɔkkan te kanŋa iti kanŋa neeni menga yaakinti ɛkɛ uuldɛti bɛɛ. War koñi i ŋeej ‘ya, yeti i jwali ‘ya tiiññiyɔ, ɔci yenti ‘ya yiɛmni i ɔntɔ bɛɛ. 9Ɔci ne oŋgati ma Jwaŋa Yaayan maka gɔki agi ɛkkɛn aginti Ma Yahuud, ɔci ɛkkɛn jomi jiek neeniyɛ, ‘ya ɛkkɛn naŋdi bɛya, ɔci ḍwondi iñɔ i ñamuti, ɔci ŋeettan ɛkkɛn ‘ya an i awarɛ. 10Ɔci acaan i baal kɛɛy ba jwalla guaŋi ‘ya itiyɛ, ‘ya i tiidinyɔ ne oŋŋa naŋka yaayan bɛɛdi iñɔ maka bala ciyi ṭɛra neeni wyeñɛtiy. 11’Ya baal bɛɛd ne cwakanti doki, ɔci dala gena bala iti neeni tiyayɔ aŋka naa waka ‘ya buaga ‘wondin i pwadin neeni luldi menga bɛɛ. 12Mena naŋka yeyin bwandɛyɛ, ɛkɛ naŋdi ‘ya tɛya a tɛɛn non Juaŋ ɔci ɛkɛ koodi bora te ɛkɛti bɛɛ. Ɔci ‘ya yenti Jwaŋ ‘ya kiija ɛkɛti, ɔci yenti ban Jwaŋ ‘ya moki kiija ɛkɛti. Gen ban Urcaliim woonɛ bana bɛɛn te ñaalɔ Juaŋtiy. Ɔci ‘ya moki yenti ‘ya kiija ɛkɛti. 13Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicantiy! 14“Ɔci dala i kiejja mena bala wɛɛyi ma kaniica ban Lɛyoduciiyati agi, Gena jyeka guagdɛ mena pwadan neeni, ɛkɛ a mena waak cɔnnɛ Juaŋ waakɛnda te ɛkɛy. 15Naŋki i ŋeej ‘ya, ɔci moki ŋeej ‘ya i luy bɛɛ ɔci i myɛl bɛɛ. Ɔci dala te i luuni walla te myɛlli. 16Ɔci a ɔŋŋiyɛ, ‘ya i ŋuuldin ɔntɔ te ‘ya tukuti te poli i neeni. Dala te i myɛlli walla luuni. 17I gɔk waruti agi, ‘‘Ya cyɛgo, ‘ya buaga genga moki bɛɛ.’ Yeti war i ŋeej ne i agi mena baaki waak bɛɛ, ɔci moki ŋeej i ne i agi ulli ɔci baakiti waka ‘yɛŋa i bɛɛy. 18’Ya gɔkka iti, dala i toocca ‘yati te waka ñaalɔ pɔliji aŋka i agdi mena cyɛgan awarɛ. Ɔci i ɛɛŋja bworŋin bɔwan aŋka lɔn i kwomgayɔ, ɔci dala toocca ‘yati te dowa juoki ma woŋgɛn aŋka i woŋgɔ jwoya te ɛkɛ aŋka i ñorca noon ne pwadan. 19’Ya gɔkca ne pɛñan mena ana ‘yati, ɔci ɛkɛ ṭeed ‘ya, ɔci dala i byerdi ɔci waru yala nɔji i dalja. 20Gɔṭṭɛ, ‘ya baal yɔɔd on tukɛti ɔci booro, ɔci kan menga tieŋŋin pwan ‘ya ɔci on tukɛ pɔŋŋɛyɛ, ‘ya kaacca orɔ ɛkɛti, ɔci ɔɔn omdɔn yaakkɔ, ɔci ɛkɛ da omdin i ‘ya. 21Mena naŋka yeyin bwandɛyɛ, ɛkɛ ‘woñga ‘ya noon cootti ‘ya taaŋuti aŋka ɛkɛ noŋin iki ‘ya kanŋa cyɛgji Juaŋo, ba ‘ya ne naŋka neeni buannayɛ, ‘ya cooccan Wey ɔɔn taaŋɛti. 22Kan mena balki jyetkɛyɛ, dala ɛkɛ tieŋdi jyeka guagdɛ Boŋ Jwaŋa Tolan ma kaniicantiy!”

will be added

X\