Liɛlto 22

1Ɔci moki malɛɛka ‘ya lɛɛrna tol tɛɛtin lirŋin a lirŋin bala ba kajaaja. Tola neeni wɔɔdi bora te kaakci Jwaŋa Tolan ɔci Kalŋti. 2Ɔci tool bala yiŋi pɔy bana tolan neeni konɛti, ɔci jana tɛɛtki ma bala yɔɔd tool ḍɔɔggɛti. Ɔci ɛkɛ jied ṭɔlgɛ jitkɛn a inyaakkɛn wyetkɛn ne yyɛɛwɔ, ɛkɛ jied ṭɔlgɛ ponk waakɛnda. Ɔci keedin waakɛn pwaddi te aamk ɛkɛ. 3Naŋka yaayan gɛɛl bala moki bɛɛ. Kaakci Jwaŋa Tolan ɔci Kalŋ bala bana tolan neeniti, ɔci maka moṭi ɛkɛti ḍwondi iñɔ ɛkɛti. 4Ɔci ɛkkɛn gɔrti woŋgi ɛkɛ, ɔci yenti ɛkɛ bala ɛkkɛn ñomgɛnti. 5Ween jiñɛ baawo, ɛkkɛn buagɔn dyɛka ɔci oŋ waŋɛ moki bɛɛ, Jwaŋa Tolan Ciɛggɔn ikin ɛkɛ dɛki ɛkkɛn. Ɔci ɛkkɛn noon muktan aga ḍuaŋan ḍwaŋin yuonginda yuonginda ɔɔn. 6Ɔci malɛɛka gɔkkin ‘yati agi, “Jyeka neeni ɛkkɛn a jyeka awarɛ. Ɔci Ciɛggɔn Jwaŋa Tolan, mena maka a bɔwan ɛkɛ ‘wonnɛ Boŋ ɛkɛ neeniyɛ, malɛɛka ɛkɛ cuonnɛ aŋka maka moṭi ɛkɛti neeni myettɛ te gena bala bɛya ne pɛñan neeniy.” 7Yaccu gɔki ‘yati agi, “‘Ya baal bɛɛd ne pɛñan. Yom ñɔɔn bala maka bala noŋi ba jyeka jiju worga neeni konɛtiy.” 8Ɔci ‘ya Yɔhannayɛ, tieŋjan ɔci gɔrcan. Ɔci ne ‘ya tieŋna waka neeniyɛ, ‘ya ḍɛmman iñɔ malɛɛka ciegɛti ka morca ɛkɛti. 9Yeti ɛkɛ gɔkkin ‘yati agi, “Naa noŋja a ɔɔn bɛɛ! ‘Ya a kɛɛngɔn Juaŋ ba i, ɔci ba modg ɛkkɛ maka a bɔwan Jwaŋa Tolan, ɔci maka noŋi ba jyeka bala worga neenijiy. Dala i morca gena Juaŋti parɛ! 10Naa i jyeka bala worga neeni konɛti gɛɛl cogayɔ bɛɛ, oŋŋa bɛɛdɛ Juaŋ cɔɔllin doki. 11Mena omi ma korkɛn te waakyɛ, dala ɛkɛ noŋdi ba naŋki ɛkɛ wanna ɔɔn. Ɔci mena noŋi ne pwadanyɛ, dala ɛkɛ noŋdi ba naŋki ɛkɛ wanna ɔɔn. Ɔci mena noŋi waka yeyinyɛ, dala ɛkɛ noŋdi ba naŋki ɛkɛ wanna ɔɔn, ɔci mena pwadanyɛ, dala ɛkɛ ciya ba pwani ɛkɛ wanna ɔɔn, ɔci mena giikin baaw yomɛtiyɛ, dala ɛkɛ ciya ba bolji ɛkɛ wanna.” 12Yaccu gɔkkin ‘yati moki agi, “Tieŋŋa. ‘Ya baal bɛɛd ne cwakanti! ‘Ya bɛɛd aŋka ‘ya ma ‘woñga waak ba naŋki ɛkkɛn, menga da ba naŋki ɛkɛ, menga da ba naŋki ɛkɛ, kan ɛkɛ noŋi ne pwadan walla ne yaayany. 13’Ya a mena bala te ñamu, ɔci ‘ya a mena bala ne ŋoyɔ. 14“Yom ñɔɔn bala maka bala noŋi ba jyek Juaŋ aŋka ɛkkɛn aga maka mwoki jan tɛɛtin, ɔci aŋka ɛkkɛn kaatti bana tolanti neeni te kaañ tuggɛ. 15Yeti maka bala bana tolan neeni ŋoyɛtiyɛ, ɛkkɛn bala ba gɔkko, ɔci oomko, ɔci nɔɔtko, ɔci maka noki mako, ɔci maka moṭi jɔkin yeyinti, ɔci maka jomi jieko, ɔci maka ani jyeka a jomgin waakɛnda. 16“‘Ya Yaccu, malɛɛka ‘ya cuoññan aŋka ɛkɛ ma myettɛ te naŋka neeni kaniican jitin. ‘Ya bɛɛn te Daawudti ɔci te kɛɛgin ɛkɛti. ‘Ya a kɛɛli liin, kɛɛlla dɛkiy.” 17Boŋ Juaŋ ɔci Ñooni gɔkti agi, “Bɛɛdɛ!” Mena tieŋŋinyɛ, dala ɛkɛ gɔkti agi, “Bɛɛdɛ!” Mena ami yiɛnyɛ, dala ɛkɛ bɛya. Ɔci mena buagɔnyɛ, dala ɛkɛ pyega tɛɛtki ma neeni eedɛ budan. 18Ɔci ‘ya Yɔhanna gɔkka maka tyeŋi jyeka guagɛ ma jiju worga neeni konɛti neeni waakɛnda aŋka naa ɛkkɛn jwali gɛɛl jiettanti ne cyɛɛlɔ bɛɛ, dita Juaŋ ɛkkɛn jiedditi ink tuggɛn ywobji ɛkɛ ink tuggɛn guagɛ ma worga neeni konɛti neeni dita. 19Ɔci kan men gɛɛl jwali waŋɛ gɛɛl kyɛññɛyɔ ne cyɛɛlɔ te jyeka neenitiyɛ, gena da ɛkɛ ‘wonnɛ Juaŋ te jan tɛɛtinti neeni, cyɛndɛ ñin Juaŋ te ɛkɛti daŋkun, ɔci te bana tolanti bana pwadanti neeni, ɔci waka guagɛ ma jiju worga neeni konɛtiy. 20Mena te jyeka neen neeniyɛ, gɔki agi, “Ɛɛ, ‘ya baal bɛɛd ne pɛñan.” Ɛɛ, dala i bɛɛdi, hay, Ciɛggɔn Yaccu! 21Dala Ciɛggɔn Yaccu yomɛ pwada a pwani ɛkkɛti waakida. Amɛɛn.

will be added

X\