1 Ɔci ‘ya pɔlla woonɛ ɔci ṭɛra woonɛ yuarcan. Acaan pɔlla ñamu ɔci ṭɛra ñamu baaw yien doki, ɔci galŋ bala moki bɛɛ. 2 Ɔci ‘ya Yɔhanna bana pwadan Urcaliim woonɛ yuarcan bɛɛn te pɔlla ñaalɔ Juaŋti. Ɛkɛ warɛ ywaŋŋɛ bala ba ñooni ne luoṭṭi ‘uarɛtiy. 3 Ɔci ‘ya tieŋjan pwan ne tolan te ñaalɔ pɔliji gɔki agi, “Gɔrtɛ on Juaŋ bala iki mako! Ɔci ɛkɛ cootti iki ma a cyɛɛlɔ, ɔci ɛkkɛn aga ma ɛkɛ. Ɔci Juaŋ waanɛ aga Jwaŋ ɛkkɛn. 4 Ɔci Juaŋ ɛkkɛn puudɛ ñingɛnti te piego. Ɔci lien bala moki bɛɛ. Ɔci yom yoñ, ɔci yook, ɔci pɛñi ɛkkɛn gɛɛl bala moki bɛɛ. Acaan naŋka ñamu bawwin doki.” 5 Ɔci mena ciyi te kaakci gɔkcin agi, “Gɔṭṭi, ‘ya waak naŋdi aga waka wonkɛn waakɛnda!” Ɔci ɛkɛ gɔkkin ‘yati moki agi, “Kiejja jyeka neeni a jyeka awarɛ ɔci pwadɔ.” 6 Ɛkɛ gɔkkin ‘yati moki agi. “Bawwin. ‘Ya a mena bala te ñamu, ɔci ‘ya a mena bala ne ŋoyɔ. ‘Ya mena ami yiɛn ‘woñga pieg budan te bwan waŋi pyega tɛɛtki may. 7 Mena naŋka neeni bwandɛyɛ, ‘ya agdi Jwaŋ ɛkɛ ɔci ɛkɛ aga kaci ‘ya. 8 Yeti maka buayi ɔci maka jyeti bɛɛ, ɔci maka yeyin, ɔci maka noki ma, ɔci maka noŋi tomi, ɔci maka oomk, ɔci maka moṭi jɔkin pɔɔtan ma a pɔɔt, ɔci maka jomi jiek waakɛndayɛ, gen ɛkkɛn waakɛnda a coodi galŋa koldan maañ ɔci jiena yaayany. (Ɛkɛ a lyena akki ne yyɛɛwɔy.)” 9 Malɛɛkan a dɔɔyɔ wyetkɛn ne yyɛɛwɔ gɛɛl bɛɛn ‘yati moki, gena malɛɛkan tieci ilban kuumi te ink tuggɛn ne dɔɔyɔ wyetkɛn ne yyɛɛwɔ ink tuggɛn ne ŋoyɔ byeŋkɛntiy. Ɔci ɛkɛ gɔkkin ‘yati agi, “Bɛɛd ɔci ‘ya i lɛɛrtin Ñoonno, gena ɛŋ Kalŋo.” 10 Ɔci ɛkɛ ‘ya eñña te Boŋ Juaŋ ne poma tolan beyanti, ɔci ɛkɛ ‘ya lɛɛrna bana tolan ban Urcaliim bana pwadan bɛɛn te ñaalɔ pɔliji te Jwaŋa Tolantiy. 11 Ɛkɛ balki pwani Jwaŋa Tolan. Ɔci ɛkɛ galdan bala ba guonan pwadan lirŋany. 12 Ɔci bana tolan neeni balki kaña tolan beyany, ɔci kañ ɛkɛ balki tuggɛ a inyaakkɛn wyetkɛn ne yyɛɛwɔ. Ɔci ‘yegin tuggɛn neeni balkin malɛɛkan a inyaakkɛn wyetkɛn ne yyɛɛwɔ. Ɔci yeng bala kiinnɛ Juaŋ ‘yeginti, gena yeng keedin ma Icrayiil keedin a inyaakkɛn wyetkɛn ne yyɛɛwɔy. 13 Taaŋŋa ne cyɛɛlɔ balki ‘yegin ne ḍoogɔ. ‘Yegin ne ḍoogɔ yoṭi pɔya tyɛrñanti, ɔci ɛkkɛn ne ḍoogɔ yoṭi pɔya cuayati, ɔci ɛkkɛn ne ḍoogɔ yoṭi pɔya ‘wollanti, ɔci ɛkkɛn ne ḍoogɔ yoṭi pɔya kooriyati. 14 Ɔci kañ baan balki gwoyi kaañ ŋwayyɛ a inyaakkɛn wyetkɛn ne yyɛɛwɔ, ɔci balki yeng Cuudan Kalŋ a inyaakkɛn wyetkɛn ne yyɛɛwɔ. 15 Ɔci malɛɛka gɔwwin i ‘ya neeni balkɔn kɔmña naŋi ma te dahab bieŋɛti aŋka poṭṭi ɛkɛ bana tolan neeni i kaak tuggɛn ɔci kaañ waanɛ daŋkun. 16 Ɔci bana tolan neeni pɔɔyi ma a mɔɔlla, ɛkɛ lɛkɛ poorŋɛ a porto. Ɔci malɛɛka baan poorŋɛ te kɔmñi yomgɛ bɛɛn wɔɔkan a alpn a inyaakkɛn wyetkɛn ne yyɛɛwɔ (12,000). Ɔci beñi baan i baan yomɛ i wara ñaalɔ yoom a yoommin. 17 Ɔci ɛkɛ kaañ pɔɔññɛ, ɔci bɛɛn duran a miyya ne cyɛɛlɔ ɔci ma baan ne yyɛɛwɔ ɔci ne ŋaanɔ (144). Malɛɛka bala poci te duran pocki may. 18 Ɔci kaañ cɔdi ma te gwoyya pwadin galdan gwoyya wiɛlɛn pɛñan yenti alyaacib. Ɔci baan da cɔdi ma te dahab pwadin ne tolan lirŋin a lirŋin bala ba kajaajay. 19 Ɔci kañ baan ŋwayyɛ waakɛnda naŋiyɔ ma te gwoyya pwadin. Ɛkkɛn cyɛli ma a cyɛli te gwoyya pwadin galdan gwoyya wiɛlɛn pɛñany. Ɛkkɛn menga da te cyeni ɛkɛ parɛ. Çwaya ñamu naŋi ma te alyaacib, ɔci ɛka akki yyɛɛwɔ naŋi ma te yakuut ulan, ɔci ɛka akki ḍoogɔ naŋi ma te akik bɔwan, ɔci ɛka akki ŋaanɔ naŋi ma te jamurd. 20 Ɔci ɛka akki dɔɔyɔ naŋi ma te akik katim, ɔci ɛka akki wilin ne cyɛɛlɔ naŋi ma te akik tidan, ɔci ɛka akki wyetkɛn ne yyɛɛwɔ naŋi ma te jabriij, ɔci ɛka akki wyetkɛn ne ḍoogɔ naŋi ma te jaca, ɔci ɛka akki wyetkɛn ne ŋaanɔ naŋi ma te yakuut garan, ɔci ɛka akki inyaakkɛn naŋi ma te yakuut ṭeyan, ɔci ɛka akki inyaakkɛn wilin ne cyɛɛlɔ naŋi ma te piruuc, ɔci ɛka akki inyaakkɛn wyetkɛn ne yyɛɛwɔ naŋi ma te jamacti. 21 Ɔci ‘yegin a inyaakkɛn wyetkɛn ne yyɛɛwɔtiyɛ, luulan bala a inyaakkɛn wyetkɛn ne yyɛɛwɔ. Ɔci ‘yegin waakɛnda men da naŋɛ ma te luula ne cyɛɛlɔ. Ɔci pɔy bana tolan naŋi ma te dahab pwadin lirŋin a lirŋin bala ba kajaaja pwadany. 22 ’Ya on Juaŋ ona tolan gɛɛl yuarcan baanji bɛɛ. Acaan Jwaŋa Tolan ɔci Kalŋ ɛkkɛn bana tolan neeni kuomgɛ warda. 23 Bana neeni buagɔn oŋ waŋɛ ɔci paan aŋka dɛki ɛkɛti bɛɛ, gena pwani Jwaŋa Tolan ɔci pwani Kalŋ aŋka bala dɛki ɛkɛtiy. 24 Keedin iñɔ baanji wɛnni ati te dyɛŋi ɛkkɛn, ɔci ḍuaŋan ḍwaŋin ṭɛɛrji wɛnni cyɛŋi ɛkkɛn ootan ɛkɛti. 25 Kaak tuggɛn bana neeniyɛ, yɔɔd a pɔkin oŋkanda, ɛkkɛn uultan bɛɛ, acaan ween jiñɛ bala aŋan bɛɛ. 26 Keedin waakɛnda ḍɔŋ ɛkkɛn i cyɛŋi ɛkkɛnyɛ, ootan bana neeniji. 27 Yeti gena a giikin gɛɛl kaatti bana neeniji bɛɛ, walla mena noŋi waka etti lɔɔn walla jomi jiek gɛɛl kaatti bana neeniji bɛɛ. Gena maka yengɛn bala worga Kalŋ worga tɛɛtinji aŋka kaatti bana neeniji pookɛny.
