Liɛlto 20

1Ɔci ‘ya gɔrcan, ɔci malɛɛka yuarcan ‘ya kooyin te ñaalɔ pɔliji. Ɛkɛ eci mɔpta ṭɔɔli kola beyan bieŋɛti i jiŋgɔn tolan. 2Ɔci ɛkɛ kaaŋ muŋŋɛyɔ ɔci ḍɛɛŋŋɛ aŋka ciya a ḍɛɛggɔn yuong a alp ne cyɛɛlɔ (1,000). (Gena Jwaŋa Yaayan mena noŋi ma ñingɛn.) 3Ɔci malɛɛka ɛkɛ yiɛmnɛ jiju jiidɔ kola beyanti ɔci ‘uornɛti, ɔci mornɛ kitim aŋka naa kɛɛna pookɛn jyɛttɛ ɛkɛ ɔntɔ moki bɛɛ. Ɔci naŋka neeni bala a ɔɔn ne yuong a alp ne cyɛɛlɔ (1,000) neeni baati ɔɔn. Ɛkɛ oŋ pɔktɛ Juaŋ ne ḍiɛran te wɔɔka ne ḍuulan budan. 4Boŋki maka morcin gen luomti, ɔci walla morcin pɔɔyama ɛkɛti bɛɛ, ɔci walla mañ gen luom mugɛ ɛkkɛn ñomgɛnti walla byeŋkɛnti bɛɛ neeniyɛ, yuarcan ‘ya. Ɛkkɛn nogɛ ma te mitta ɛkkɛn ma myetkɛti te jwalla awarɛ jwalla lɛɛlnɛ Yaccu Kiṭɔ boray. Ɔci ɛkkɛn ma myetkɛ te jwali Jwaŋa Tolan. Ɛkkɛn ‘uowin, ɔci cooccin kokin wyetkɛnti. Ɛkkɛn wonnɛ Juaŋ war tɛɛn aŋka ɛkkɛn ma gottan, ɛkkɛn noon mugɛ i Kiṭɔ yuong a alp ne cyɛɛlɔ (1,000). 5(Maka pookɛn maka tuunyɛ, ɛkkɛn ‘uowin moki bɛɛ ne yuonga a alp ne cyɛɛlɔ (1,000) neeni baaki ɔɔn.) Gena jɔŋŋin ma jɔŋti ñaalɔ ñamu neeni. 6Maka balki genga jɔŋŋin ma jɔŋti ñamuti neeniyɛ, yom ñɔɔn bala ɛkkɛnti, ɔci ɛkkɛn pwad pwado. Ɔci lyena ne ŋoyɔ bala ɛkkɛnti moki bɛɛ, yeti ɛkkɛn aga gaciicin Juaŋ ɔci Yaccu Kiṭɔ. Ɔci ɛkkɛn noon muktan i ɛkɛ yuong a alp ne cyɛɛlɔ (1,000). 7Ɔci ne yuong a alp ne cyɛɛlɔ (1,000) neeni baatiyɛ, Jwaŋa Yaayan oŋ pɔktan ma te ciginji, 8ɔci ɛkɛ koodi bora aŋka kɛɛna pookɛn maka ciyi ṭɛɛrji pɔli ŋwayyɛ waakɛnda neeni jyɛttɛ ɔntɔ ɛkɛ moki. (Gena Gɔɔg ɔci Mɛgɔg.) Ɔci Jwaŋa Yaayan ɛkkɛn limdiyɔ ṭwaŋti. Ɔci ɛkkɛn kɔɔna kɔɔni bala ba ŋɔmi galŋo. 9Ɔci ɛkkɛn ati ṭɛɛr konɛ warda, ɔci ɛkkɛn non ma Juaŋ yudiyɔ, ɔci bana anki ɛkkɛn moki yudiyɔ. Yeti maañ bɛɛn te ñaalɔ Juaŋti ɔci ɛkkɛn ammɛ. 10Ɔci Jwaŋa Yaayan mena ɛkkɛn jyɛnnɛ ɔntɔ neeni yiɛpcɛ malɛɛkan galŋ maañ ɔci jiena yaayanti. Ɔci nona neenitiyɛ, gen luom ɔci bɔwa jomi jiek bala wɛnan. Ɔci ɛkkɛn ciyi aŋan aŋka taabdi yuonginda yuonginda ne baaṭi ɔɔn. 11Ɔci kaakca bɔwan tolan yuarcan ‘ya moki. Ɔci mena ciyi te kaakca neeniyɛ, yuarcan ‘ya moki. Ɔci ɛkɛ a mena waka bala ṭɛɛrji ɔci pɔliji yiŋi ɔntɔ te ɛkɛ ñamɛti, ɔci ṭɛɛr ɔci pɔli baaw yieni. 12Ɔci ‘yeeñga bala galŋji kooyin bora. Ɔci lien ɔci non lien maka naŋki ɛkkɛn yeyin bala ɛkkɛn korkɛntiyɛ, kooyin bora te nona tuuki ɛkkɛny. Ɔci maka tuutan maka naŋki ɛkkɛn yeyin, maka ḍwaŋin ɔci maka ḍyɛrin, ɛkkɛn yuarcan ‘ya bala yɔɔd mena ciyi te kaakci ñamɛti. Ɔci worgan korkɛn pɔɔggɛ, ɔci worga parɛ konɛ pɔŋnɛ, gena worga tɛɛtin. Ɔci jiek olnɛ Juaŋ maka tuun maka yeyin neeni wyetkɛnti bala ba jyeka bala worga neeni konɛti, menga da ba naŋki ɛkɛ. 14Ɔci lien i bana maañyɛ, ɛkkɛn yiɛmnɛ Juaŋ galŋ maaño. (Ɔci ba jyek galŋa neeniyɛ, gena lyena ma oldɛ Juaŋ maccuy. Gena lyena akki ne yyɛɛwɔy.) 15Ɔci maka yengɛn baaw worga tɛɛtinjiyɛ, ɛkkɛn yiɛmnɛ Juaŋ galŋji galŋ maaño.

will be added

X\