Liɛlto 2

1“Dala i kiejja mena bala wɛɛyi ma kaniica ban Ɛpacacti agi, Gena jyeka guagdɛ mena mwoki kɛltan ne dɔɔyɔ wyetkɛn ne yyɛɛwɔ te byeŋa a byerɔn neeni, ɔci mena bala ati yeccu dyɛkan a dɔɔyɔ wyetkɛn ne yyɛɛwɔ dyɛkan naŋi ma te dahaby. 2Naŋki i ŋeej ‘ya, ɔci kanŋa i kanŋa pɛñan ɔci kɛɛna i kɛɛyi moki ŋeej ‘ya. Ɔci ŋeej ‘ya i buagi maka yeyin bɛɛ, ɔci i gɔrni naŋki maka gɔki agi ɛkkɛn aginti cuudan Yaccuy, yeti ɛkkɛn a cuudan Yaccu bɛɛ. Ɛkkɛn yuarŋi i ɛkkɛn jomi jiek a jomi budan. 3I baal kɛɛy ne pwadan, ɔci i taabni ne pɛñan te yenti ‘ya, ɔci i kanŋa dalni bɛɛ. 4Yeti ‘ya balka genga aŋka gɔkka iti, i ani i anna ñamu dalni i. 5Ɔci dala i poŋja i ḍɛmni aŋɛ, ɔci dala i waru yala, ɔci noŋja ba naŋki i naŋka te baaṭiy. Kan i waru yala bɛɛyɛ, ‘ya baal bɛɛd ɔci dyɛka i eed ɔntɔ te noonɛti. 6Yeti naŋka neeni aŋka bala iti, i yooki te naŋki maka bartan ma a ma ‘Nikɔla’ naŋka yookati ‘ya daŋkuny. 7Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicanti agi, ‘Mena naŋka yeyin bwandɛyɛ, ɛkɛ ‘woñga ‘ya omdi jana tɛɛtki ma Bal Jwaŋa Tolanti.’ 8“Dala i kiejja mena bala wɛɛyi ma kaniica ban Camiirnati agi, Gena jyeka guagdɛ mena bala te ñamu ɔci mena bala ne ŋoyɔy. Ɛkɛ a mena tuuny, yeti ɛkɛ jɔŋŋin ñaalɔ bala tɛɛti acca. 9Taab i ŋeej ‘ya, ɔci bɔɔna i bɔwi te waak moki ŋeej ‘ya, yeti i a mena cyɛgan te wak Jwaŋa Tolan! Ɔci ŋɛɛgga ḍorki ma yeyin neeniyɛ, ŋeej ‘ya moki, gena maka gɔki agi ɛkkɛn aginti Ma Yahuud, yeti ɛkkɛn a Ma Yahuud bɛɛ! Ɛkkɛn a ma Jwaŋa Yaayan! 10Naa i buay naŋka bɛya iti pɛñan neeni bɛɛ! Yeti ɛkkɛ magga oldɛ Jwaŋa Yaayan jiju ciginji aŋka ɛkɛ poci ɛkkɛ, ɔci ɛkkɛ taabdɛ ba nink ne inyaakkɛn ɔɔn. Dala i yomu pwada ne i tuudi ɔɔn, ɔci ‘ya i ‘wondin tɛɛtin baadi bɛɛy. 11Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicanti agi, ‘Kan mena naŋka yeyin neeni bwandɛ waakɛndayɛ, jyeka bɛya ma wyetkɛnti ne ŋoyɔ neeniyɛ, bɛya ɛkɛ wyeñɛti moki bɛɛ.’ 12“Dala i kiejja mena bala wɛɛyi ma kaniica ban Pargaamomti agi, Gena jyeka guagdɛ mena jwali ɛkɛ bala ba byeŋgaaran beyan byeŋgaaran lɛkɛ a ñɔdgy. 13Nona ciyi i ŋeej ‘ya, non cyɛgji Jwaŋa Yaayan bala nona wannatiy, yeti i baal tiec yenti ‘ya awarɛ, ɔci jyenna jyetti i ‘yati ɛkɛ dalni i bɛɛ. Antipac mena pwadan neeni nogɛ ma nona ciyi Jwaŋa Yaayan bana ciyi wanna. 14Yeti ‘ya balka genga aŋka gɔkka iti, acaan ma gɛɛg bala ɛkkɛti noŋi naŋki Balaam naŋka loṭi ɛkɛ Baalak aŋka Baalak noŋdɔ ne yaayan ma Icrayiilti aŋka ma Icrayiil noŋdɔ nɔjiy. Ɔci moki aŋka ɛkki omdɔ waka ‘yɛrtan ma boŋka yeyinti, ɔci noŋdi tommo. 15Ɔci i balki maka bootcin naŋki ma Nikɔla maka yookati ‘yay. 16Yeti dala i waru yala, ɔci kan i waru yalli ne pɛñan bɛɛyɛ, ‘ya baal bɛɛd ne cwakanti aŋka noowin i ɛkkɛn te jwali ‘ya jwalla bala ba byeŋgaaran neeni. 17Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicanti agi, ‘Kan mena naŋka yeyin bwandɛ waakɛndayɛ, ɛkɛ ‘woñga ‘ya ama ñaalɔ pɔliji ama yuartan ma bɛɛy, ɔci ɛkɛ ‘woñga ‘ya guonan ṭɔɔlɛ bɔwan, ɔci guonan neeni balki yenti warɛti, ɔci yenta neeni menga yaakinti poki bɛɛ, gena mena eci ɛkɛ aŋka yaakinti paŋi ɛkɛ parɛ.’ 18“Dala i kiejja mena bala wɛɛyi ma kaniica ban Tayataayrati agi, Gena jyeka guagdɛ Kaci Jwaŋa Tolan mena woŋgi ɛkɛ bala ba maañ ne omi a ami, ɔci cieg ɛkɛ bala ba bila garan ne piɛlkiti ma maccuy. 19Naŋki i ŋeej ‘ya, ɔci ŋeej ‘ya moki ne i balkiti ani ɔci jyeni ɔci naŋka pwadin, ɔci ne i baali kɛɛy moki ɔɔn. Ɔci ŋeej ‘ya naŋki i naŋka ñamu buannɛ naŋka ŋoyɔ. 20Yeti ‘ya balka genga aŋka gɔkka iti, i Jɛcabɛl ɛŋa gɔki agi ɛkɛ agjɛ bɔwa neeni ‘wonni wɔɔka ɔci ɛkɛ maka moṭi ‘yati naŋŋiyɔ, ɔci ɛkɛ ɛkkɛn lallɛ agi dala ɛkki noŋdɔ tomi, ɔci omdɔ waka ‘yɛrdi ma jɔkin yeyinti. 21Ɔci ɛkɛ ‘woñgan ‘ya wɔɔka ka aŋka ɛkɛ warɛ yaldɛ, yeti ɛkɛ yookɔn buagɔn warɛ yaldɛ tomi ɛkɛ neeni daldɛ bɛɛ. 22Ɔci a ɔŋŋiyɛ, ɛkɛ yiɛpca ‘ya iñɔ, ɔci ‘woñga waka pɛñin warɛti, ɔci maka noŋi tomi neeniyɛ, ɛkkɛn yiɛpca nona yaayan nona pɛñanti neeni, kan ɛkkɛn waakɛn yaltan te naŋki ɛkkɛn naŋka yaayan neeni bɛɛy. 23Ɔci ‘ya kɛɛgin ɛkɛ nogdi aŋka ŋeettan kaniican waakɛnda ‘ya a mena waak waakɛnda yuartɛ, ɔci yomg ma moki yuarca ‘ya, ɔci ɛkkɛ waakida ‘wondin ‘ya waak menga da ba naŋki ɛkɛ. 24Yeti ‘ya gɔkka ɛkkɛti ɔci maka pookɛn maka bala ban Tayataayra, maka balki jyeka neeni bɛɛy, ɔci maka Jwaŋa Yaayan ŋeecɔn bɛɛy. Ɛkkɛ urnɛti waka bartan ɛkkɛn agi wak Jwaŋa Yaayan waka kuolinwi ma neeni bɛɛ. ‘Ya waka cyɛgan gɛɛg olja ɛkkɛ ḍɔɔggɔti moki bɛɛ. 25Yeti dala gena bala ɛkkɛti neeni tiidɛyɔ ɛkkɛ ne ‘ya bɛɛda ɔɔn. 26Ɔci mena naŋka yeyin bwandɛ, ɔci naŋki ‘ya tiidɛyɔ ne baaṭi ɔɔnyɛ, ‘ya da ɛkɛ ‘woñga wɛɛn warda bieŋɛti. 27Ɔci ɛkɛ ɛkkɛn bwandɛ, ɔci ɛkɛ ɛkkɛn lɛgdɛ jitin bala ba waka eetan ma te lomi ne ɛkkɛn wɛttiti ma jitiny. A ɔɔn bala ba war tɛɛn muŋi ‘ya te Wey ɔɔntiy. 28Ɔci ɛkɛ ‘woñga ‘ya war ‘ya, wara bala ba kɛɛlla bɛya te liidɔy. 29Kan mena balki jyetkɛyɛ, dala ɛkɛ tieŋdi jyeka guagdɛ Boŋ Juaŋ ma kaniicantiy.

will be added

X\