Liɛlto 18

1Ɔci ne naŋka neeni baaniyɛ, malɛɛka parɛ yuarcan ‘ya moki kooyin iñɔ te pɔliji. Ɛkɛ balki war tɛɛn ne tolan, ɔci ṭɛɛr dyɛŋŋɛji ne tolan te dyɛŋi ɛkɛ. 2Ɔci ɛkɛ yaajjin te pwana tolan agi, “Ḍɛmmin! Ban Baabil bana tolan, ḍɛmmin! Non ɛkɛ aŋi nona cieki jɔkin ṭɔlgɛn, ɔci jɔkin yeyin i ḍiirga yeyin yookiti may. 3Acaan kɛɛn waakɛnda moti mooya noŋi ɛkɛ tomiy. Ɔci ḍuaŋan ḍwaŋin iñɔ ṭɛɛrji noŋi tomi iki ɛkɛ. Ɔci maka taajin iñɔ ṭɛɛr konɛ warda, ɛkkɛn cyɛŋi te wak ɛkɛ waka yeyin.” 4Ɔci ‘ya tieŋŋan pwana parɛ moki te pɔliji gɔki agi, “Koodɛ bora te ɛkɛti hay, ma ‘ya, naa ɛkkɛ ñoodɛ i ɛkɛ te nɔji ɛkɛ bɛɛ, ɔci naa naŋka bɛya ɛkɛti yaayan neeni bɛya ɛkkɛti bɛɛ. 5Nɔji ɛkɛ kɔɔni dɛñjin ne ñaalɔ pɔliji, ɔci Juaŋ poŋjin te nɔji ɛkɛ neeni. 6Dala ɛkkɛ noŋdɛ ɛkɛti bala ba naŋka naŋdɛ ɛkɛ ɛkkɛtiy. Ɔci ɛkɛ ‘uottɛti ɛkkɛ oŋki ne yyɛɛwɔ, ba naŋka naŋŋɛ ɛkɛ waakɛnda. Ɔci ɛkɛ ‘wondɛ ɛkkɛ oŋki ne yyɛɛwɔ, bala ba mooya loommiyɔ ɛkɛ kubaayaji neeni. 7Ɔci dala ɛkkɛ noŋdɛ ne yaayan ɛkɛti bala ba jiɛta jieyi ɛkɛ warɛ agi ɛkɛ pwadjɛ wanna, ɔci dala ɛkɛ yaadɛ yomɛti. Ɛkɛ gɔki agi, ‘‘Ya ciy ba ɛŋa a ḍuaŋa! ‘Ya a ɛŋa cieñ bɛɛ, ɔci ‘ya yom yoñ ŋeej bɛɛ!’ 8A ɔŋŋiyɛ, naŋka yeyin bɛya ɛkɛti te oŋŋa ne cyɛɛlɔ. Gena waja, ɔci yom yoño, ɔci koño. Ɔci ɛkɛ amdɛ maañ acaan Ciɛggɔn mena ɛkɛ wannɛ neeniyɛ, gena Jwaŋa Tolan Mena Yaakɛnti Naŋki Waak Waakɛnday. 9“Ɔci ḍuaŋan ḍwaŋin noŋi iki ɛkɛ tomi ɛkkɛn wiakti te ɛkɛ, ɔci ɛkkɛn yomgɛn yiegdi ne ɛkkɛn gɔrti jien ɛkɛ ḍuuŋiy. 10Ɔci ɛkkɛn buaya, ɔci yɔɔtti te nona loonan, ɔci gɔkti agi, ‘Aa, cca cca cca! Hay, i bana tolan ban Baabil! Ywobji bɛɛn iti te oŋŋa ne cyɛɛlɔ doki!’ 11“Ɔci taajin iñɔ ṭɛɛrji wɛnni wiakti waakɛnda moki, acaan wak ɛkkɛn menga bala wɛɛṭi moki bɛɛ. 12Wak ɛkkɛn neeni gena dahab, ɔci bil pɔddan, ɔci gwoyya pwadin, ɔci luulan, ɔci tiil bɔwan, ɔci bworŋa a buol, ɔci bworŋa tidan, ɔci janga piedgɛn milin jitkɛn waakɛnda, ɔci waka naŋi ma te liañ lɛkɛ waakɛnda, ɔci waka naŋi ma te janga wiɛlɛn pɛñan, ɔci bila noŋki ma girin tidan, ɔci bila tɛyan, ɔci gwoyya cɔtki ma oorg pwadin, 13ɔci girpa ɔci janga noŋki ma kilk, ɔci waka ṭultan ma, ɔci ḍɔŋi poom, ɔci mooy, ɔci ñɔɔn, ɔci ḍuobja liŋñan, ɔci pok, ɔci dok, ɔci kulin, ɔci muntan, ɔci babin wuatan muntan, ɔci maka kɛɛnk, ɔci ma baano. 14“Ɔci taajin gɔkti ɛkɛti agi, ‘Acca naŋka war i buagiti ne pɛñan neeni waakɛnda ati te iti doki. Ɔci wak i waka coŋin ɔci pwani i ḍakcin budan doki, menga ɛkkɛn yuarŋɛ moki bɛɛ!’ 15Ɔci maka wɛɛṭi waka neeni ɔci aŋi maka cyɛgan neeni, ɛkkɛn yɔɔtti te nona loonan. Ɛkkɛn buayi te taab bɛɛn ɛkɛti yaayan neeni. Ɛkkɛn wiakti ɔci kuuddi ne tolan. 16“Ɔci gɔkti agi, ‘Aa cca, cca cca! Ɛkɛ a bana tolan, ɛkɛ bala ɛŋi bworŋa tiil, ɔci bworŋa eci bilk ne coŋɔn bworŋa buol, ɔci bworŋa tidan. Ɔci ɛkɛ ɛŋi dahab, ɔci gwoyya wiɛlɛn pɛñan, ɔci luulan! 17Ɔci te wɔɔka ḍuulan neeni wak ɛkɛ waka cyɛgan neeni ḍakcin!’ “Ɔci maka ‘uoti murkan ḍwaŋin, ɔci maka bala murkan jitin, ɔci maka kanŋan murkan jitin. Ɛkkɛn bala yɔɔd te nona loonan, 18ɔci yaadan ne ɛkkɛn gɔrki jien maañy, ɔci ɛkkɛn gɔki agi, ‘A bana ɔki pari bala ba bana tolan neeniy!’ 19Ɔci ɛkkɛn ṭɛrk tuokci wyetkɛnti, ɔci bala yaadan, ɔci kuuyi, ɔci wiak gɔki agi! ‘Aa cca cca cca! Hay, i bana tolan! Maka ati galŋji korkɛn kuumi te wak ɛkɛ waka pwadin. Ɔci te wɔɔka ne ḍuulan ɛkɛ yaañi doki! 20Hay, ɛkkɛ maka pɔliji, dala ɛkkɛ yomgɔ ñɔya te lɛɛktin ɛkɛ neeni! Hay, ma Juaŋ ɔci cuudan Juaŋ ɔci maka a bɔwan Jwaŋa Tolan, dala ɛkkɛ yomgɔ ñɔya! Juaŋ ywobji olnɛ ɛkɛ wyeñɛti te naŋka naŋŋɛ ɛkɛ ɛkkɛtiy!’ ” 21Ɔci malɛɛka tolan guonan tolan ba pom jien ɔɔn luolnɛ ñaalɔ, ɔci yiɛmnɛ galŋji, ɔci ɛkɛ gɔki agi, “Baabil bana tolan neeni, ɛkɛ yiɛptɛ Juaŋ iñɔ ne pɛñan a ɔɔn, ɔci ɛkɛ yuartan ma oŋgati moki bɛɛ. 22Ɔci pwan maka ciepi coŋkɔn, ɔci maka ‘uali, ɔci maka kuoti luañ, ɔci maka kuoti ṭwoŋki gɛɛg tieŋtan ma iti moki bɛɛ! Ɔci maka a gɔɔñk yuartan ma iti moki bɛɛ, ɔci walla pom jien gɛɛl tieŋtan ma iti moki bɛɛ! 23Ɔci dyɛka gɛɛl dɛkti moki bɛɛ, ɔci pwan mena ñooni ɔci ‘war ñooni gɛɛl tieŋtan ma moki bɛɛ, acaan taajin i ɛkkɛn a maka iñɔ wɛnni, ɔci oomk i kɛɛna pookɛn jyɛnni i ɔntɔ waakɛnda! 24Yimg maka a bɔwan Jwaŋa Tolan yuarɛ ma ban Baabil i yimg ma Juaŋ, ɔci yimg maka noŋŋɛ ɛkɛ ṭɛɛr wyeñɛti waakɛnda.”

will be added

X\