Liɛlto 17

1Ɔci malɛɛkan ne dɔɔyɔ wyetkɛn ne yyɛɛwɔ malɛɛkan balki ilban byeŋkɛnti neeni gɛɛl bɛɛn ‘yati, ɔci gɔkkin ‘yati agi, “Bɛɛd, ɔci i lɛɛrtin ‘ya jyeka bɛya ɛŋa tommi tolan ɛŋa ciyi pyega coŋin wyetkɛnti neeni wyeñɛtiy. 2Ɔci ḍuaŋan ḍwaŋin bala iñɔ ṭɛɛrji wɛnni noŋi tomi iki ɛkɛ, ɔci maka bala ciyi ṭɛɛrji wɛnni nogɛ mooya noŋi ɛkɛ tomiy.” 3Ɔci ‘ya eñña malɛɛka wɔɔŋji te Boŋ Juaŋo. Ɔci ɛɛŋ gɛɛl bala taab gen luom tidanti aŋan, gena gen luom warɛ kuumi te yenga yeyin yenga ḍori Jwaŋa Tolany. Ɛkɛ balki wyetkɛ ne dɔɔyɔ wyetkɛn ne yyɛɛwɔ, ɔci ṭwoŋkɛ ne inyaakkɛn. 4Ɔci ɛŋa neeni ɛŋi bworŋa buol ɔci bworŋa tidda, ɔci ɛkɛ ɛŋi dahab, ɔci gwoyya wiɛlɛn pɛñan, ɔci luulan. Ɔci ɛkɛ eci kubaaya naŋi ma te dahab bieŋɛti, ɔci kubaaya neeni kuumi te waka yeyin ne tolan wak tomi ɛkɛy. 5Ɔci kiikan neeni bala ɛkɛ ñamɛti agi, “Baabil A Mɛy Maka Noŋi Naŋka Yeyin Ne Tolan Iñɔ Šɛɛrji Wɛnniy.” 6Ɔci ‘ya gɔrcan ɛɛŋ nogɛ yimg maka pwadin, ɔci yimg maka tuun te yenti Yaccuy. Ɔci ne ɛkɛ yuarna ‘yayɛ, ‘ya yomu buañi ne tolan. 7Ɔci malɛɛka gɔkkin agi, “I buay ogo? Ɛŋa neeni konɛ lɛɛlla ‘ya bora iki gen luom taabi ɛkɛ neeni iti, gena gen luom balkɛ wyetkɛ ne dɔɔyɔ wyetkɛn ne yyɛɛwɔ, ɔci ṭwoŋkɛ ne inyaakkɛny. 8Gena neeni oŋ gɛɛlti ɛkɛ lakun tɛɛti, yeti acca ɛkɛ tɛɛti moki bɛɛ. Ɛkɛ noŋi koodi bora te kola beyan, ɔci ooddi bora aŋka nuotti jitin. Ɔci ne maka ciyi iñɔ ṭɛɛrji wɛnni gen luom yuartitiyɛ, ɛkkɛn yomgɛn buaya. Gena maka yeng ɛkkɛn baaw worga tɛɛtinti te wona ṭɛɛr cɔnnɛ Juaŋ men bɛɛy. Gen luom neeni ɛkɛ bala tɛɛti lakun, ɔci acca ɛkɛ bala bɛɛ, yeti ɛkɛ warɛ lɛɛldɛ bora moki. 9“Ɔci wɛnniyɛ, dala ñing tɛɛn bala ɔci wyeñ wɔŋŋo. Wyetka ne dɔɔyɔ wyetkɛn ne yyɛɛwɔ neeniyɛ, gena pomka ne dɔɔyɔ wyetkɛn ne yyɛɛwɔ ciyi ɛŋa neeniy. Ɔci ɛkkɛn a ḍuaŋan ḍwaŋin ne dɔɔyɔ wyetkɛn ne yyɛɛwɔ mokiy. 10Ɔci ɛkkin ne dɔɔyɔ ḍɛɛmdin, ɔci ɛka ne cyɛɛlɔ aŋka bala mwoki noon men, ɔci ɛka parɛ bala bɛya. Ɔci ɛkɛ ne bɛɛdiyɛ, ɛkɛ noon mugdɛ wɔɔka ne ḍuulan budan. 11Oŋ yeti gen luom mena bala te baaṭi oŋ baaw acca dɔɔkti moki neeniyɛ, ɛkɛ a ḍuaŋa tolan akki makɛn a dɔɔyɔ wyetkɛn ne ḍoogɔ. Yeti ɛkɛ te ɛkkin ne dɔɔyɔ wyetkɛn ne yyɛɛwɔ neeniti, ɔci ɛkɛ ooddi tuwa. 12“Ɔci ṭwoŋka yuarca i a inyaakkɛn neeniyɛ, gena ḍuaŋan ḍwaŋin ne inyaakkɛn, ḍuaŋan kanŋa ɛkkɛn mugɛ men bɛɛy, yeti ɛkkɛn aga ḍuaŋan ḍwaŋin wɔɔka ne ḍuulan iki gen luomo. 13Maka neeni ɛkkɛn jiek ñaagɛyɔ aŋka gen luom ‘wontan ɛkkɛn war tɛɛn ɛkkɛn ɔci ḍwaŋji ɛkkɛn. 14Ɔci ɛkkɛn noŋdi ṭwaŋ iki Kalŋo, yeti Kalŋ ɛkkɛn bwandɛ acaan Kalŋ a Ciɛggɔn ḍuaŋan ḍwaŋin waakɛnda, ɔci maka bala moki ɛkɛ neeniyɛ, gena maka borni ɛkɛy, ɔci maka kɛnnɛ ɛkɛ boray, ɔci maka jyeti ɛkɛtiy.” 15Ɔci malɛɛka ‘ya myenna te pyega ciyi ɛŋa toban neeni agi, “Pyega neeni a maka coŋin, ɔci kɛɛna pookɛn, ɔci keedin, makan da te tuk ɛkkɛn. 16Yeti ṭwoŋka yuarca i gen luomti a inyaakkɛn neeniyɛ, ɛkkɛn yooktan te ɛŋa toban neeni, ɔci ɛkɛ yaatan ɛkkɛn, ɔci ɛkɛ daltan ɛkkɛn warɛ budan. Ɔci yoŋgi ɛkɛ tontan ɛkkɛn maaño. 17Ɔci acaan Juaŋ ɛkkɛn naŋŋɛ yomgɛnti aŋka paŋi ɛkkɛn ñaaktanyɔ, ɔci ɛkkɛn gen luom ‘wontan ḍwaŋji ɛkkɛn ne jyeka guaŋŋɛ Juaŋ neeni baati ɔɔn. 18“Ɔci ɛŋa yuarca i neeniyɛ, ɛkɛ a bana tolan. Ɔci ḍuaŋan ḍwaŋin ṭɛɛrji wɛnni bala ɛkɛ bieŋɛti waakɛnda.”

will be added

X\