Liɛlto 16

1Ɔci ‘ya tieŋjan pwan ne tolan te on Juaŋ ñaalɔ gɔkcin malɛɛkan ne dɔɔyɔ wyetkɛn ne yyɛɛwɔti agi, “Ɔgdɛ ooddɛ waka bala ḍwayi ṭɔlgɛn ywobji Juaŋji neeni pwoktɛ ṭɛɛr wyeñɛti!” 2Ɔci malɛɛka ñamu ati, ɔci waka bala elba ɛkɛji pwoŋnɛ ṭɛɛr wyeñɛti. Ɔci kɔɔgga yeyin kɔɔgga noki ne pɛñan bɛɛn maka moṭi pɔɔyama gen luomti, ɔci maka balki mañ ɛkɛti daŋkun. 3Ɔci malɛɛka akki ne yyɛɛwɔ waka bala ilba ɛkɛji pwoŋnɛ galŋji. Ɔci pieg waakɛn naŋɛ aŋi yimg bala ba yimg mena tuuta. Ɔci waka tɛɛti galŋji waakɛnda tuuni. 4Ɔci malɛɛka akki ne ḍoogɔ waka bala ḍwayi ṭɔlgɛn ɛkɛji pwoŋnɛ bɔɔdg woŋgɛnti, ɔci pieg aŋi yimgo. 5Ɔci ‘ya tieŋŋan malɛɛka mwoki pieg gɔki agi, “Ywobji i neeniyɛ, ɛkɛ awarɛ. Hay Mena Pwadan, i a mena bala te baaṭi ɔci acca! 6Te lyena ɛkkɛn Ma Kiṭɔ ɔci maka a bɔwan Jwaŋa Tolan nokkitiyɛ, ɛkkɛn ‘wonni i yimg aŋka maattan ɛkkɛn. A ɔɔn yɔmjin te ɛkkɛn doki. Yɔmjin.” 7Ɔci pwana parɛ tieŋŋan ‘ya te nona ɛrki ma waak gɔki agi, “Ɛɛ, hay Ciɛggɔn Jwaŋa yaakinti Naŋki Waak Waakɛnday, ywobji i a tyɛlga ɔci awarɛ!” 8Ɔci malɛɛka akki ne ŋaanɔ waka bala ilba ɛkɛji pwoŋnɛ oŋ waŋɛti, ɔci ma ammɛ oŋ waŋɛ ne pɛñan ba maaño. 9Ɔci ma ammɛ oŋ ne tolan, ɔci ɛkkɛn bala ḍori yenti Juaŋ mena balki war tɛɛn ink tuggɛn neenitiy. Yeti ɛkkɛn waakɛn yali aŋka jieddi naŋki pwani ɛkɛ bɛɛ. 10Ɔci malɛɛka akki ne dɔɔyɔ waka bala ilba ɛkɛji pwoŋnɛ kaakci gen luomti. Ɔci cyɛgji ɛkɛ aŋi mielo. Ɔci ma bala kooyi lɛpɛn te pɛñi noono. 11Ɔci te waka pɛñin ɛkkɛnti neeniyɛ, ɛkkɛn bala ḍori Jwaŋa Tolan Jwaŋa ñaalɔ. Yeti te kɔɔgi ɛkkɛn neeniyɛ, ɛkkɛn waakɛn yali te naŋki ɛkkɛnti bɛɛ. 12Ɔci malɛɛka akki ne dɔɔyɔ wilin ne cyɛɛlɔ waka bala ilba ɛkɛji pwoŋnɛ tola tolan, Tol Yuprɛɛtic. Ɔci ɛkɛ piegɛ iinɛ aŋka aga pɔy ḍuaŋan ḍwaŋin bonka pɔya tyɛrñantiy. 13Ɔci ‘ya gɔrcan jɔkin yeyin gɛɛg ne ḍoogɔ bala ba ɔɔŋan. Ɛkkɛn bala koodi bora te gen luom tukɛti, ɔci te kaaŋ tukɛti, ɔci te bɔwa jomi jiek tukɛti. 14Ɛkkɛn a boŋki jɔkin ṭɔlgɛn, ɔci ɛkkɛn noŋi naŋka tɛyan naŋka ñyecki may. Ɔci ɛkkɛn maka ḍuaŋan ḍwaŋin ṭɛɛrji waakɛnda ḍɔɔltanyɔ ɛkkɛn te oŋ ṭwaŋ oŋŋa tolan, oŋ Ciɛggɔn Jwaŋa yaakinti Naŋki Waak Waakɛnday. 15Ɔci Yaccu gɔki agi, “Tieŋdɛ, ‘ya bɛɛd ba mena ɛɛn neeni! Yom ñɔɔn bala mena wici bɛɛti ɔci ɛkɛ bworŋin ɛkɛ ywaŋdɛyɔ aŋka naa ɛkɛ ooddi warɛ budan ɔci war ɛkɛ yuartan ma bɛɛ.” 16Ɔci jɔkin yeyin neeni ḍuaŋan ḍwaŋin ḍɔɔltanyɔ nona bartan ma te tuk Ma Icrayiil agi Armagɛdan. 17Ɔci malɛɛka akki ne dɔɔyɔ wyetkɛn ne yyɛɛwɔ waka bala ilba ɛkɛji pwoŋnɛ jwamiji ñaalɔ. Ɔci pwan bɛɛn te on Juaŋ ñaalɔ te kaakciti gɔki agi, “Bawwin!” 18Ɔci pɔɔdg bala ṭɛɛntan, ɔci noon wildan ne pɛñan, ɔci warɛ ḍiedan ne tolan. Ɔci ḍiedin neeni yuarŋi menga oŋgati, ṭɛɛr wyeñɛti wɛnni wona men baan aŋŋɛ Juaŋ bɛɛ! 19Ɔci bana tolan ŋuottin jitin korki ne ḍoogɔ, ɔci bonk keedin pookɛn waakɛnda ḍɛɛmdin iñɔ. Juaŋ poŋjin te ban Baabil bana tolan aŋka moottɛ ɛkɛ kubaaya mooy ywobji ɛkɛ. 20Ɔci kaki wyetkɛn waakɛnda ɔci pomk waakɛnda yien doki. 21Ɔci tomŋin ḍwaŋin ḍɛɛmdin ma wyetkɛnti te ñaalɔ pɔliji, ɔci tamñan ne cyɛɛlɔ eci gena kierki ma waak tuggɛ a miyya ne cyɛɛlɔ (100). Ɔci ma bala ḍori Juaŋ te ḍɔŋ tomŋin neeni.

will be added

X\