Liɛlto 15

1Ɔci ‘ya naŋka tɛyan naŋka parɛ yuarcan ñaalɔ pɔliji, ɛkɛ tol tol ɔci parɛ. Malɛɛkan ne dɔɔyɔ wyetkɛn ne yyɛɛwɔ bala eci ink tuggɛn ne dɔɔyɔ wyetkɛn ne yyɛɛwɔ neeni, gena ink tuggɛn ne ŋoyɔ aŋka Juaŋ loñk ɛkɛ cwamdɛ matiy. 2Ɔci genga yuarcan ‘ya bala ba puol ne naŋkiti ma te kajaaja iki maañy. Ɔci ‘ya maka gen luom ɔci pɔɔyama ɛkɛ ɔci mañ ɛkɛ ɔci nimra yenti ɛkɛ buanɛyɛ, yuarcan. Ɛkkɛn bala yɔdi pwol kajaaja neeni taaŋɛti, ɔci ɛkkɛn tieci coŋkɔn ɛkkɛn ‘wonnɛ Juaŋ byeŋkɛnti. 3Ɔci ɛkkɛn bala ‘uali ɔɔli Muuca kɛɛngɔn Juaŋ, ɔci ɔɔli Kalŋ, ɔci ɛkkɛn gɔki agi, “Hay, Ciɛggɔn, i a Jwaŋa Yaakinti Naŋki Waak Waakɛnda, Naŋki i tol tol ɔci ɛkɛ da parɛ! Ciɛggɔn keedin waakɛnda. Pɔy i a tyɛlga ɔci awarɛ! 4A menɛ buayi i bɛɛy, hay Ciɛggɔn? A menɛ noŋi ne pwadan yenti iti bɛɛy? I pwad paru. Kɛɛna pookɛn waakɛnda bɛya ɔci morti iti, acaan naŋki i naŋka pwadin waakɛn liɛli doki yuarcɛ ma te woŋgɛn waakɛnda.” 5Ɔci ‘ya gɔrcan on Juaŋ nona pwadan ne tolan tukɛ pɔŋnɛ ñaalɔ pɔliji. 6Ɔci malɛɛkan ne dɔɔyɔ wyetkɛn ne yyɛɛwɔ malɛɛkan eci ink tuggɛn ne dɔɔyɔ wyetkɛn ne yyɛɛwɔ neeni kooyin wu te orɔ on Juaŋo. Ɛkkɛn ɛŋi bworŋa tiil bɔwan, ɔci bworŋa neeni pwanna pwani ɔci galla gallo. Ɔci ɛkkɛn yomgɛn ḍɛɛgɛ te buarka naŋi ma te dahab. 7Ɔci waka tɛɛti ne ŋaanɔ neeni gɛɛl ne cyɛɛlɔyɛ, ɛkɛ malɛɛkan ne dɔɔyɔ wyetkɛn ne yyɛɛwɔ neeni ‘wonnɛ ilban ṭɔlgɛn ilban naŋi ma te dahab ne dɔɔyɔ wyetkɛn ne yyɛɛwɔ byeŋkɛnti, menga da te ɛki ɛkɛ. Ɛkkɛn kuumi te ywobji Jwaŋa Tolan mena tɛɛti yuonginda yuonginda neeni. 8Ɔci on Juaŋ ñaalɔ konɛ kuumi te jien naŋka pwadan Juaŋ, ɔci te war tɛɛn ɛkɛ moki. Ɔci menga yaaktanti kaatti orɔ moki te jien bɛɛ, ne ink tuggɛn eetan malɛɛkan ne dɔɔyɔ wyetkɛn ne yyɛɛwɔ neeni baati ɔɔn.

will be added

X\