Liɛlto 14

1Ɔci ‘ya ñorcan, ɔci Kalŋ yuarcan ‘ya bala yɔɔd Pom Ciyɔn wyeñɛti ban Urcaliimji iki maka coŋin a alpn a miyya ne cyɛɛlɔ ɔci alpn a ma baan ne yyɛɛwɔ wyetkɛn ne ŋaanɔ (144,000). Ɔci yenti kalŋ ɔci yenti Weegɛn ɛkɛ bala kiinnɛ Juaŋ maka neeni ñomgɛnti. 2Ɔci ‘ya tieŋŋan pwan te ñaalɔ pɔliji bala ba pɔɔkɔ ne yiŋi wiagi a joony, ɔci bala ba ñaal ne wiagi ṭɛɛnti a ṭɛɛntin ne tolany. Ɔci pwana tieŋŋan ‘ya neeni bala ba pwan maka ciepi coŋkɔn ne ɛkkɛn ciepkiy. 3Ɔci ɛkkɛn bala ‘uali ɔɔlla woonɛ Jwaŋa Tolan ñamɛti, ɔci waka tɛɛti ne ŋaanɔ ñomgɛnti, ɔci cyekin kaniica ñomgɛnti. Ɔci menga bala yaakinti ɔɔlla neeni bɛɛ, yeti maka coŋin neeni pookɛn a alpn a miyya ne cyɛɛlɔ ɔci alpn a ma baan ne yyɛɛwɔ wyetkɛn ne ŋaanɔ (144,000) aŋka urkinti ɔɔlla neeni pookɛny, ɛkkɛn a maka wannɛyɔ Juaŋ te iñɔ ṭɛɛrji wɛnniy. 4Maka neeni ɛkkɛn waakɛn yaayi te naŋki maka moong bɛɛ, ɔci ɛkkɛn a maka yeyin bɛɛ, maka neeni ɛkkɛn a maka bootcin Kalŋtiy, nona ɛkɛ ooddi gɔ ɛkkɛn moki bootcin ɔɔn. Maka neeni ɛkkɛn wannɛyɔ Juaŋ te ma jitin. Ɔci ɛkkɛn a ma ɛkɛ maka lɔɔnnɛ Juaŋ boray, ɔci ɛkkɛn a ma Kalŋ moki. 5Ɛkkɛn pwadgin Juaŋ ñamɛti doki. A ɔŋŋiyɛ, ɛkkɛn balki jomi jiek bɛɛ. 6Ɔci malɛɛka parɛ yuarcan ‘ya bala pey yeccu ñaalɔ pɔliji eci jyeka wonkɛn jyeka pwadin jwalla baadi bɛɛ neeni aŋka ɛkɛ maka bala ciyi ṭɛɛrji wɛnni myettɛ, ma baan jitkɛn waakɛnda ɔci keedin waakɛnda, magga te ban ɛkkɛn, ɔci magga te kɛɛn ɛkkɛn, ɔci magga da te tuk ɛkkɛn. 7Ɔci ɛkɛ bala yaadan te pwana tolan agi, “Buattɛ Juaŋ ɔci jieddɛ pwani ɛkɛ! Oŋ ywobji Juaŋ bɛɛn doki, ɔci dala ɛkkɛ mortɛ mena oki pɔli ɔci ṭɛɛr ɔci tool ɔci bɔɔdgti!” 8Ɔci malɛɛka parɛ malɛɛka akki ne yyɛɛwɔ bootcin ɛkɛti ɔci bala yaadan gɔki agi, “Aa, cca cca cca! Ban Baabil bana tolan ḍɛmmin. Ɛkɛ ḍɛmmin te motta ɛkɛ keedin pookɛn moonnɛ te mooya noŋi ɛkɛ tomiy.” 9Ɔci malɛɛka parɛ, malɛɛka akki ne ḍoogɔ boottin ɛkɛti, ɔci yaajjin te pwana tolan agi, “Mena morti gen luomti ɔci pɔɔyama ɛkɛti, ɔci balki mañ ɛkɛ ñamɛti walla bieŋɛtiyɛ, 10ɛkɛ daŋkun motti mooy ywobji Jwaŋa Tolan mooya bala ḍwan ṭɔɔlɛ ywobji ɛkɛji mooya ñaagɛyɔ ma iki pieg bɛɛ neeni! Ɔci ɛkɛ beeldɛ Juaŋ te maañ ɔci jiena yaayan malɛɛkan pwadin ñomgɛnti ɔci Kalŋ ñamɛti. 11Ɔci jien ɛkkɛn bala ṭuul oŋkanda, baadi bɛɛ. Maka moṭi gen luomti ɔci pɔɔyama ɛkɛtiyɛ, ɛkkɛn balki wowwin bɛɛ. Taab ɛkkɛn bala oŋkanda te ween jiñɛ ɔci te oŋ jiñɛ. Ɔci maka balki yenti gen luom ñomgɛnti walla byeŋkɛntiyɛ, ɛkkɛn balki wowwin daŋkun bɛɛ.” 12Wɛnniyɛ, dala Ma Kiṭɔ maka pwadin, maka tieci jyek Juaŋ waakɛn, maka jyeti Yaccu Kiṭɔtiyɛ, dala ɛkkɛn yomgɛn tiektan. 13Ɔci ‘ya tieŋŋan pwan te ñaalɔ pɔliji gɔki agi, “Kiejja agi, Yom ñɔɔn bala maka tuwa acca ne ɛkkɛn a maka kanŋan kanŋa Ciɛggɔny!” Ɔci Boŋ Juaŋ gɔkti agi, “Ɛɛ, aŋka ɛkkɛn waakɛn wooktan te taab ɛkkɛn ba bolja ɛkkɛn balki noŋki ne pwadan ne ɛkkɛn balki iñɔ ṭɛɛrji wɛnniy.” 14Ɔci ‘ya gɔrcan, ɔci pɔlla bɔwan bɛɛni. Ɔci menga bala taab pɔliti bala ba Yaccu Mena bartan ma agi, “Kaci Ma Baano.” Ɔci ɛkɛ ɛŋi taagga cyɛgji taagga naŋi ma te dahab, ɔci ɛkɛ eci ‘yɛra lɛkɛ a ñɔdg bieŋɛti. 15Ɔci malɛɛka parɛ kooyin bora te on Juaŋ ona bala ñaalɔ, ɔci ɛkɛ bala yaadan ne pɛñan mena ciyi te pɔliti agi, “Jyɛm i lula ɔci ɛrca. Oŋŋa ɛrki ma waak bɛɛn doki, ɔci waka ‘yɛrtan ma iñɔ ṭɛɛrji wɛnni ‘yɛggin doki!” 16Ɔci mena taab te pɔli neeni jyɛm ɛkɛ wimnɛ iñɔ ṭɛɛrji, ɔci waka bala iñɔ ṭɛɛrji wɛnni ‘yɛrŋɛ ɛkɛ. 17Ɔci malɛɛka parɛ kooyin wu te on Juaŋ ona bala ñaalɔ pɔlijiy, ɔci ɛkɛ eci jyɛma lɛkɛ a ñɔdg bieŋɛti daŋkun. 18Ɔci malɛɛka parɛ kooyin wu te nona ɛrki ma waakti. Ɛkɛ a mena mwoki maañy. Ɔci ɛkɛ yaajjin ne pɛñan malɛɛka tieci jiɛmti agi, “Jyɛm i lula, ɔci luutkin cuarkɛn ŋuodda wu te balk jitin, ɛkkɛn ‘yɛggin doki!” 19Ɔci malɛɛka jyɛm ɛkɛ wimnɛ ṭɛɛrji, ɔci ɛkɛ luutkin ṭɔlgɛn limmiyɔ, ɔci pwoŋnɛ nona wyeṭi Jwaŋa Tolan luutkin loñka pɛñan loñk ɛkɛ neeni. 20Ɔci luutkin buuri ma jitin baan ŋoyɛti aŋan te gena wyerki ma luutkiny. Ɔci yimg bɛɛn te gena wyerki ma luutkinti kɔɔna kɔɔni, ati ñaalɔ ne jiŋgin wɛnki ma muntan tuggɛnti ɔɔn. Ɔci yimga neeni jooti ne nona loonan ba jali ati ba wɔɔkan a miyyan ne yyɛɛwɔ (200).

will be added

X\