Liɛlto 13

1Ɔci ‘ya gen luom gɛɛl yuarcan bala koodi wu te galŋji, ɛkɛ wyetkɛ a dɔɔyɔ wyetkɛn ne yyɛɛwɔ, ɔci ṭwoŋkɛ ne inyaakkɛn. Ɔci ṭwoŋka ne inyaakkɛn neeni balki taaggan waakɛnda. Ɔci yenga yeyin kiijji ma ɛkɛ wyetkɛti. Yenga neeniyɛ, ḍori Jwaŋa Tolan. 2Ɔci gen luom gena yuarcan ‘ya neeniyɛ, ɛkɛ bala ba kaño, ɔci ciegɛ kɛyyɛn tɛɛna tɛɛno, ɔci ɛkɛ tukɛ bala ba jiɛlo. Ɔci gen luom ‘wonnɛ kaaŋ war tɛɛn ɛkɛ, ɔci kaakci ɛkɛ, ɔci cyɛgji ɛkɛ cyɛgja tolan. 3Ɔci ɛkɛ wyeñɛ gɛɛl yuarcan ‘ya bala ba ŋaarkiti ma a ŋarti noŋi tuudi doki no, yeti kɔɔŋ tuka noŋi ɛkɛ nogdi neeniyɛ, polli. Ɔci maka iñɔ ṭɛɛrji wɛnni yomgɛn poni ɔci bootcin gen luomti waakɛnda. 4Ɔci ma waakɛnda morcin kaaŋti acaan ɛkɛ gen luom ‘wonnɛ cyɛgji ɛkɛ. Ma morcin gen luomti, ɔci ɛkkɛn gɔki agi, “A menɛ bala ba gen luomy? Ɔci a menɛ yaaktanti noogdi iki ɛkɛy?” 5Ɔci gen luom ‘woñgi ma tuka gɔki ne yaayan, ɔci ɛkɛ noŋi warɛ. Ɔci ɛkɛ ‘woñgi ma war tɛɛn aŋka kandi yuong ne ḍoogɔ ɔci ponk ne dɔɔyɔ wilin ne cyɛɛlɔ. 6Ɔci ɛkɛ bala gɔki ne yaayan Jwaŋa Tolan ɔci ḍori yenti Jwaŋa Tolan ɔci non Jwaŋa Tolanti ɔci maka ñaalɔ pɔliji moki waakɛnda. 7Ɔci ɛkɛ ‘woñgi ma war tɛɛn aŋka noŋdi ṭwaŋ iki Ma Juaŋo, ɔci ɛkɛ Ma Juaŋ bwandɛ. Ɔci maka kɛɛna pookɛn ɔci keedin waakɛnda, makan da te tuk ɛkkɛn, ɔci makan da te ban ɛkkɛn ɔci ma baan jitkɛn waakɛnda mugdɛ ɛkɛ bieŋɛti. 8Ɔci maka ciyi ṭɛɛrji morti gen luomti waakɛnda. Oŋ yeti gena maka yeng ɛkkɛn bala jiju worga Kalŋa ŋaarɛ ma worga tɛɛtinti ne wona ṭɛɛr cɔnnɛ Juaŋ men bɛɛyɛ, ɛkkɛn aŋka morti gen luomti bɛɛ. 9Mena balki jyetkɛyɛ, dala ɛkɛ tieŋdi! 10Kan men gɛɛl buagɔn ɛkɛ kuatayɛ, ɛkɛ kuatan ma. Ɔci kan men gɛɛl buagɔn ɛkɛ noktanyɛ, ɛkɛ noktan ma. Ɔci a ɔŋŋiyɛ, dala Ma Kiṭɔ balti jyeni ɔci kɛɛno. 11Ɔci gen luom gena akki ne yyɛɛwɔ yuarcan ‘ya bala koodi wu te ṭɛɛrji. Ɔci ɛkɛ balki ṭwoŋkɛ ne yyɛɛwɔ. Ɛkkɛn bala ba ṭwoŋki kalŋo, yeti ɛkɛ gɔki ba kaaŋo. 12Ɔci ɛkɛ kandi te war tɛɛn gen luom ñamuy, ɔci ɛkɛ ṭɛɛr ɔci maka ciyi ṭɛɛrji wɛnni waakɛnda iirtɛ morti gen luom ñamuti, gena mena balki kɔŋa noŋi ɛkɛ nogdɛ ɔci kɔɔŋ poli dokiy. 13Ɔci gen luom gena akki ne yyɛɛwɔ noŋjin naŋka tɛyan ma ñomgɛnti. Ɔci maañ bɛɛn te ñaalɔ pɔliji, bɛɛn iñɔ ṭɛɛrji yuarcɛ ma waakɛnda. 14Ɔci te naŋka neeniyɛ, maka ciyi ṭɛɛrji wɛnni diennɛ ñin ɛkɛ, ɔci ɛkkɛn jyetcin ɔntɔ te naŋka tɛyan naŋŋɛ ɛkɛ gen luom ñamu ñamɛti neeni. Ɔci gen luom gɔkcin mati waakɛnda agi dala ɛkki genga pɔɔdɛ ba bolji gen luom balki bilgin byeŋgaaran beyan wyeñɛti ɔci uni dɔki wanna. 15Ɔci gen luom gena akki ne yyɛɛwɔ ‘woñgi ma war tɛɛn aŋka booŋ kuuttɛ pɔɔyama neeni konɛti aŋka ɛkɛ gɔkti jiek, ɔci maka morti ɛkɛti bɛɛyɛ, nogdɛ. 16Ɔci pɔɔyama neeni ma eedɛ waakɛnda, maka ḍwaŋin ɔci maka ḍyɛrin, maka cyɛgan ɔci maka bɔwan, maka kɛɛnk ɔci maka kɛɛnk bɛɛy. Maka neeni eedi ɛkɛ aŋka ɛkkɛn noŋtan ma maañ byeŋkɛnti byeŋa byerɔn, walla ñomgɛnti. 17Ɔci menga yaakinti wɛrdi genga moki bɛɛ, walla menga yaakinti genga wiɛldɛŋɔ moki bɛɛ, gena mena balki cyeni yenti gen luom walla mañ ɛkɛ aŋka wɛrdi ɔci wɛɛrtiy. 18Dala ñing tɛɛn bala wɛnni. Mena ñingɛ tɛyanyɛ, dala ɛkɛ nimra yenti gen luom neeni pagdɛ. Ɛkɛ a nimra yenti men baano, ɔci nimra ɛkɛ a miyyan ne dɔɔyɔ wilin ne cyɛɛlɔ ɔci ma baan ne ḍoogɔ ɔci ne dɔɔyɔ wilin ne cyɛɛlɔ (666).

will be added

X\