Liɛlto 12

1Ɔci naŋka tɛyan warɛ liɛllɛ pɔliji. Ɛɛŋ gɛɛl bala ɛŋi oŋ waŋɛ warɛti, ɔci paan bala yɔɔd ɛkɛ ciegɛti, ɔci kɛltan a inyaakkɛn wyetkɛn ne yyɛɛwɔ neeni bala ‘yɛŋdɛ ɛkɛ wyeñɛti a tɔŋi cyɛgjo. 2Ɔci ɛkɛ laaccin, ɔci ɛkɛ bala yaadan te pɛñi kaci ne ɛkɛ baali jiediy. 3Ɔci gena parɛ moki warɛ liɛllɛ ñaalɔ pɔliji. Kaŋa tolan tidan ba maañ yuarcan ‘ya, ɛkɛ balki wyetkɛ ne dɔɔyɔ wyetkɛn ne yyɛɛwɔ, ɔci ṭwoŋka ne inyaakkɛn, ɔci wyetka neeni balki taaggan cyɛgji waakɛnda. 4Ɔci ɛkɛ kɛltan gɛɛg ne coŋɔn te pɔliji wɔɔnɛ iñɔ te wiilɛ, ɔci yiɛmnɛ ɛkɛ iñɔ ṭɛɛrji. Ɔci kaaŋ bala yɔɔd ɛŋa ami jiedi neeni ñamɛti kɛɛy aŋka ne ɛɛŋ jieddiyɛ, ɛkɛ kaci laddɛ. 5Ɔci ɛɛŋ jieni kacca ‘uan aŋka aga ciɛggɔn ma waakɛnda. Ɔci cyɛgji ɛkɛ tɛya tɛɛn ba bilo. Yeti kacca neeni ɛkɛ eññɛ Juaŋ non kaakci ɛkɛti. 6Ɔci ɛɛŋ yiŋi wɔɔŋji nona ywaŋŋɛ Juaŋ te ɛkɛ aŋka ɛkɛ ciya aŋan yuong ne ḍoogɔ ɔci ponk ne dɔɔyɔ wyetkɛn ne yyɛɛwɔ. 7Ɔci ṭwaŋ bɛɛn pɔliji. Malɛɛka yenti Maykal iki malɛɛkan ɛkɛ, ɛkkɛn bala noowɔ iki kaŋa neeni ɔci jɔkin yeyin ɛkɛ. 8Ɔci ɛkkɛn buannɛ Maykal, ɔci a ɔŋŋiyɛ, ɛkkɛn balki noon gɛɛl ñaalɔ pɔliji moki bɛɛ. 9Ɔci kaŋa a daan mena bartan ma agi Jwaŋa Yaayan Cɛtan neeni yiemnɛ Jwaŋa Tolan iñɔ ṭɛɛrji wɛnni i malɛɛkan ɛkɛ. Ɔci ɛkɛ a mena maka ṭɛɛrji diennɛ ñin waakɛnda ɔci ɛkkɛn ḍɛɛmdin iñɔ iki ɛkɛ waakɛnda. 10Ɔci ‘ya tieŋjan pwan ne tolan te pɔliji gɔki agi, “Te oŋŋa neeni yɔɔd Jwaŋ ikin bɛɛn doki! Ɔci war tɛɛn ɛkɛ, ɔci cyɛgji ɛkɛ, ɔci war tɛɛn Kiṭɔ Mena Muonɛ ɛkɛ bora neeni bɛɛn moki! Acaan mena bala tɛki modg ikin waakɛn Jwaŋa Tolan ñamɛti te oŋ jiñɛ ɔci te ween jiñɛyɛ, yiɛmnɛ Jwaŋa Tolan ɔntɔ te pɔliji doki. 11Ɔci modg ikin ɛkɛ buanɛ te yimg Kalŋ Jwaŋa Tolan, ɔci te jwalla mietkɛ ɛkkɛn may. Ɔci ɛkkɛn ani waak ɛkkɛn bɛɛ, walla buayi lien bɛɛ. 12A ɔŋŋiyɛ, dala ɛkkɛ yomgɔ ñɔya. Hay, maka ciyi pɔlijiy, dala ɛkkɛ yomgɔ ñɔya! Yeti naŋka yaayan bɛya ṭɛɛrji ɔci galŋji te bolja Jwaŋa Yaayan kooni iñɔ ɛkkɛtiy. Ɔci ɛkɛ balki loñk yomɛti ne tolan, acaan ŋeejɛ ɛkɛ ninka ɛkɛ ḍakti cɔɔllin doki.” 13Ɔci ne kaaŋ gɔrni ɛkɛ ḍɛmni iñɔ ṭɛɛrjiyɛ, ɛkɛ bala ŋɔɔṭi ɔci noŋjin ne yaayan ɛŋa jieni kacca a ‘uan neenitiy. 14Ɔci ɛɛŋ ‘wonnɛ Jwaŋa Tolan kɔgi yan goowa tolan aŋka ɛkɛ peya wɔɔŋji non ɛkɛ, ɔci ɛkɛ ciya aŋan yuong ne ḍoogɔ ɔci ponk ne dɔɔyɔ wilin ne cyɛɛlɔ te kaaŋo. 15Ɔci ne ɛɛŋ baali atiyɛ, kaaŋ pieg ŋwaŋnɛ ɛɛŋ ŋoyɛti bala ba tool aŋka ɛɛŋ eedɛ. 16Yeti ṭɛɛr ɛɛŋ maŋŋɛ, ṭɛɛr tukɛ pɔŋnɛ ɔci pieg lannɛ. 17Ɔci kaaŋ looñjin ɛɛŋti ne tolan, ɔci ɛkɛ ati aŋka noowɔ iki kɛɛgin ɛɛŋ kɛɛgin pookɛn maka noŋi ba jyek Juaŋ ɔci balki jwali Yaccu Kiṭɔ waakɛnday. 18Ɔci kaaŋ bala yɔɔd kɔmi ḍwaŋɛti.

will be added

X\