Liɛlto 10

1Ɔci malɛɛka warɛ tɛyan gɛɛl yuarcan ‘ya bala bɛya te ñaalɔ pɔliji ɛŋi pɔli warɛti, ɔci jwaŋa yɔɔd ñaalɔ bala yɔɔd ɛkɛ wyeñɛti. Ɔci ɛkɛ woŋgɛ bala ba oŋ waŋɛ, ɔci tɛrkɛ bala ba maaño. 2Ɔci ɛkɛ balki worga ḍiɛran bieŋɛti, ɔci worga neeni a pɔggɔn. Ɔci ɛkɛ ciya a byerɔn yɔɔnnɛ galŋji pieg wyetkɛnti, ɔci ciya a aam yɔɔnnɛ nona iwan. 3Ɔci ɛkɛ yaadjin te pwana tolan bala ba jiɛl ne wiagi a joony. Ɔci waka ṭɛɛntan ne dɔɔyɔ wyetkɛn ne yyɛɛwɔ neeni, ɛkkɛn bala gɔki ṭɛɛntan ne pɛñan. 4Ɔci ne waka neeni balki ṭɛɛnkiyɛ, ɔci ‘ya buaga ka jyeka guaktan ɛkkɛn neeni kiido, yeti ‘ya tieŋŋan pwan te ñaalɔ pɔliji, gɔki agi, “Dala jyeka guagɛ waka ne dɔɔyɔ wyetkɛn ne yyɛɛwɔ waka ṭɛɛntan neeni kuomjati, naa kiijja jiju worgaji bɛɛ!” 5Yeti malɛɛka yuarcan ‘ya yɔɔd galŋji pieg wyetkɛnti ɔci nona iwan neeniyɛ, ɛkɛ byeŋa byerɔn laŋnɛ ñaalɔ pɔliji, 6ɔci ɛkɛ gɔkcin te yenti Jwaŋa Tolan mena tɛɛti yuonginda, mena cɔti pɔli ɔci waka bala pɔlijiy, ɔci ṭɛɛr ɔci waka bala ṭɛɛrjiy, ɔci galŋ ɔci waka bala galŋji neeni agi, “Wɔɔka gɛɛl bala moki bɛɛ! 7Yeti ne wɔɔka neeni cɔɔldiyɛ, malɛɛka akki makɛn ne dɔɔyɔ wyetkɛn ne yyɛɛwɔ kuotti ṭwoŋ ɛkɛ, ɔci jyek Juaŋ jyeka jitkɛn a coggin, jyeka mietki maka a bɔwan Jwaŋa Tolan ma neeni jitkɛn gorti bora.” 8Yeti pwana tieŋŋan ‘ya te ñaalɔ pɔliji neeniyɛ, gɔkkin ‘yati moki agi, “Ɔgdi ootta worga ḍiɛran konɛ a pɔggɔn wanna lula te malɛɛka yɔɔd ciya parɛ yɔɔnnɛ galŋji pieg wyetkɛnti, ɔci ɛka parɛ yɔɔnnɛ nona iwanti neeni.” 9Ɔci ‘ya ati malɛɛkati, ɔci gɔkcan ɛkɛti agi, “Dala i ‘ya ‘wonda worga ḍiɛran neeni.” Ɔci ɛkɛ gɔkkin ‘yati agi, “Anti, lula ɔci ama, ɔci ɛkɛ milla mili ba cyeñ i tukuti, yeti i juugdi konuti!” 10Ɔci ‘ya worga luuli ɔci ammo, ɔci ɛkɛ milla mili ‘ya tukuti bala ba cyeño, yeti ne ɛkɛ amma ‘ya dokiyɛ, ɛkɛ ‘ya juuŋŋa konuti. 11Ɔci ɛkɛ gɔkkin ‘yati agi, “Dala i gɔkca jyek Juaŋ mati moki, gena maka coŋin maka kɛɛna pookɛn ɔci ma baan jitkɛn waakɛnda, ɔci keedin, magga da te tuk ɛkkɛn, ɔci maka ḍuaŋan ḍwaŋin ne coŋɔn.”

will be added

X\