Pilimun 1

1I, Pilimun, gena ‘ya Buuluc ɔci mod ikin Timutawuc ñiepɔn i neeni. ‘Ya a mena bala jiju ciginji te jyek Yaccu Kiṭɔy. Ɔɔn anɔn i acaan i a mena kanŋin iki ɔɔny. 2Ɔɔn ñiepɔn kow ikin Apya, ɔci ɔɔn ñiepɔn Arkippoc mena noŋi kanŋa Kiṭɔ ba ikin ɔɔny. Ɔci ɔɔn moki ñiepɔn ma kaniica maka ḍwoṭi wyetkɛn oŋkanda on iy. 3Wey ikin Jwaŋa Tolan ɔci Ciɛggɔn ikin Yaccu Kiṭɔyɛ, dala ɛkkɛn yomgɛn pwada a pwani ɛkkɛti, ɔci dala ɛkkɛn ɛkkɛ ‘wontɛ coodi pwanno. 4Oŋkanday ne ‘ya baala cɔka Jwaŋ ‘yatiyɛ, ‘ya gɔk Juaŋti a pwatcin te i. 5’Ya gɔk a pwatcin Juaŋti te i a ɔɔn acaan ‘ya tieŋŋan te jyenna i jyetti Ciɛggɔn Ikin Yaccu Kiṭɔti, ɔci te anna ani i ma ɛkɛ ne tolany. 6’Ya cɔk Jwaŋa Tolanti ka dala i maka pookɛn daŋkun myetka te Kiṭɔ te jyenna i jyetti neeni aŋka dala ɛkkɛn jyeka pwadin ŋeettan waakɛnda daŋkun. Gena jyek naŋka pwadin, naŋka bɛya maka jyeti Yaccu Kiṭɔti neeni. 7Mod ɔɔn, ‘ya yomu ñɔɔna ñɔɔn ne tolan te naŋki i. ‘Ya yomu wiak moki bɛɛ. Te anna i ani ma neeniyɛ, modg ɛkkɛ Ma Kiṭɔyɛ, ɛkkɛn yomgɛn tɛɛn te naŋki i neeni ɛkkɛnti. 8Gɔṭṭi, mod ɔɔn Pilimun, ‘ya tuku a jwali ṭɔɔlɛ iti. ‘Ya dita te gɔkka iti ne pɛñan te yenti Yaccu ka dala i noŋja gena guagdi ‘ya neeni, acaan naŋka neeni gena naŋka te naŋa i te yom i paruy. Oŋ yeti te oonnin ikin oonnin yɔtinyɛ, ‘ya buaga toocca iti ba yom i. Dala jwalla neeni muga i te ‘yati ba jwali ‘ya mug ɛkkɛ Buuluc muka aŋi daan, mena bala ciginji acca te jyek Yaccu Kiṭɔ neeniy. 10Acca ‘ya tooc iti te kaci ‘ya Ɔnɛɛcimac. Ne ‘ya baala ciginjiyɛ, ‘ya aŋi ba wey ɛkkɛn te jyek Jwaŋa Tolan. 11Te ñamu ɛkɛ pwatcin iti bɛɛ, acaan ɛkɛ yiŋi ɔntɔ te iti. Yeti accayɛ, ɛkɛ yaakinti noŋdi kanŋa i ne pwadan bala ba ne ɛkɛ baali noŋi kanŋa ‘ya wɛnni ne pwadany. 12’Ya baal ɛkɛ cuoñña dɔwwa iti dɔki. Ne ‘ya ɛkɛ cuonda iti a ɔɔnyɛ, bala ba gena yom ‘ya aŋka cuoñña iti wanna. 13’Ya yomu pwanna pwani ka dala ɛkɛ ciedin iki ‘ya wɛnni aŋka ‘ya magda. A ɔɔn bala ba gena i waanu aŋka mok ‘ya ne ‘ya baala jiju ciginji te jyeka wonkɛn jyeka pwadin neeni. 14Ɔci acca ‘ya toocca iti te ɛkɛ. ‘Ya ɛkɛ ‘woñga kanŋa ‘ya budan te yom ‘ya bɛɛ. Kan ‘ya ɛkɛ muŋiyɔ ciya te wɛnniyɛ, a ɔɔn bala ba i noŋ ne pwadan ‘yati te yom i paru bɛɛ. A ɔɔn, bala ba i moki ‘ya te yom ‘ya no. Yeti ‘ya buaga kan i noŋja ne pwadan ‘yatiyɛ, dala i noŋja te yom i paru. 15Ɔci naŋka ɛkɛ yiŋŋi ɔntɔ amaam neeniyɛ, naŋka neeni bɛɛn iti budan bɛɛ. Jwaŋa Tolan naŋka neeni yallɛ ñin aŋi pwani iti. Ɔci ɛkɛ dɔɔdɛ Jwaŋa Tolan iti moki. Ɔci ɛkɛ baldi iki i yuonginda ɔɔn. 16Ɔci acca ɛkɛ bala ba mena kɛɛngɔn budan iti moki bɛɛ. Ɛkɛ aŋi mod ɛkkɛ moda ani i doki. ‘Ya an ɛkɛ daŋkun. Ɔci acca i yaakiti an ɛkɛ ne tolan acaan ɛkɛ bala kanŋan ne pwadan. Ɔci moki dala i anja ɛkɛ acaan ɛkkɛ agɛ Ma Kiṭɔ yaakkɔ doki. 17Gɔṭṭi, i baal ba mod ɔɔn waanɛ. A ɔŋŋiyɛ, ‘ya gɔkka iti te Ɔnɛɛcimac. Ne ɛkɛ bɛɛdiyɛ, dala i noŋja ɛkɛti ne pwadan bala ba gena ‘ya waanu aŋka naŋda i wanna. 18Ɔci kan ɛkɛ noŋi ne yaayan te gengayɛ, walla kan ɛkɛ balki dɛɛn gɛɛl itiyɛ, dala i waka neeni kiijja worgaji, dala aga dɛn ‘ya. 19Gena ‘ya Buuluc kiewan jyeka neeni te byeŋ ‘ya iti neeni. I wondin ‘ya waka bala ɛkɛ ḍwaŋɛti neeni waakɛnda. Ɔci naa i ñingu yeya te naŋki ‘ya bɛɛ. Te ‘ya baawayɛ, te i jyetti Jwaŋa Tolanti bɛɛ. 20Mod ɔɔn, dala i yomu pɔkka ‘yati, ɔci noŋja ne pwadan Ɔnɛɛcimacti. ‘Ya yomu ñɔɔna ñɔɔn acaan ikin yaakkɔ akin Ma Kiṭɔ. 21Çeej ‘ya yomuti i buagi noŋja ba jyek ‘ya neeni. Ɔci i buagi noŋja naŋka pookɛn naŋka pwadin Ɔnɛɛcimacti daŋkun. 22Ɔci jwalla parɛ gɛɛl bala daŋkun. Dala ‘ya yɔŋda on maka wɛlg gɛɛl jiñɛ acaan ‘ya buaga bɛɛd ban ɛkkɛ moki. Ɛkkɛ balgɛ cɔkɛ Jwaŋa Tolanti te ‘ya. Dala Juaŋ tieŋdi cɔŋi ɛkkɛ, aŋka ‘ya ooda ɛkɛ nona ɛkkɛti. 23Ɛpaprac, mena bala ciginji te jyek Yaccu Kiṭɔ ba ‘ya ɔɔn neeniyɛ, ɛkɛ ñiepi i. 24Maka kanŋin iki ‘ya wɛnniyɛ, ɛkkɛn ñiepi i daŋkun. Gena Mark ɔci Ɛrictaarkoc, ɔci Dimac ɔci Luuk. 25Dala Ciɛggɔn ikin Yaccu Kiṭɔ yomɛ pwada a pwani ɛkkɛti waakida.

will be added

X\