Pilibbi 4

1Modg ɔɔn Ma Kiṭɔ modga ana ‘yay, te naŋka bɛya neeniyɛ, dala ɛkkɛ yɔɔddɛ ne tɛyan te jyek Ciɛggɔn ikin. ‘Ya ñingu boŋi te ɛkkɛ. ‘Ya yomu ñɔɔna ñɔɔn te ɛkkɛ. 2’Ya gɔk Yuadyati yaakkɛn i Cintiki, dala ɛkkɛn ciya te yoma ne cyɛɛlɔ te jyek Yaccu, naa ɛkkɛn yoyi ñin yaakkɛn a ɔɔn bɛɛ. 3Hay! Mena kanŋin iki ‘yay, ‘ya gɔkka iti, dala moonga neeni magdɛ te jyek ɛkkɛn, acaan moonga neeniyɛ, ɛkkɛn bala kanŋin iki ‘ya te jyeka wonkɛn jyeka pwadin neeni. Ɛkkɛn bala kanŋin iki ‘ya i Klɛmanti i maka pookɛn daŋkun, maka yeng ɛkkɛn bala worgajiy. Worga neeniyɛ, a worga balki yeng maka tɛɛtiy. 4Dala ɛkkɛ ciyɛ te yoma ñɔyan te jyek Ciɛggɔn ikin oŋkanda ɔɔn. ‘Ya gɔkka ɛkkɛti moki ka dala ɛkkɛ ciedɛ te yoma ñɔyan! 5Dala ŋeettan ma waakɛnda yomg ɛkkɛ pwadɔ mati, ɔci dala ŋeeddɛ ɛkkɛ Ciɛggɔn ikin bala bɛya ne cwakanti ikinti. 6Naa ɛkkɛ poŋɛ jiek te jyek waagga bɛɛ. Dala yeti ɛkkɛ aŋka cɔktɛ gena Jwaŋa Tolanti te jiek waakɛnda. Ɔci oŋkanda ne ɛkkɛ cɔktɛ ɛkɛtiyɛ, dala ɛkkɛ toottɛ te waka ɛkkɛ buagɛy. Dala ɛkkɛ gɔkti ɛkɛti a pwatcin. 7Kan ɛkkɛ noŋi a ɔɔnyɛ, ɔci ɛkkɛ ‘wondɛ ɛkɛ coodi pwanno. Ɔci Yaccu Kiṭɔ waŋɛ tiittɛ te yomg ɛkkɛ, ɔci te paŋi ɛkkɛ moki. Naŋki ɛkɛ neeniyɛ, da parɛ. Naŋka neeni jiñɛ yuartanji ma baan te wyetk ɛkkɛn bɛɛ. 8Modg ɔɔn, jwali gɛɛl bala ne cyɛɛlɔ. Dala ɛkkɛ poŋdɛ te waka pwadin jitkɛn waakɛnda. Waka pwadin neeniyɛ, gena naŋka awarɛ, ɔci naŋka pwadan, ɔci ani mako, ɔci yenta pwadan, ɔci naŋka balki yom pwani, ɔci jiɛt Juaŋ jiɛta pwadan. Dala ɛkkɛ ñingɔ caŋdɛ te gena paŋi waka neeni. 9Dala ɛkkɛ ciedɛ noŋdɛ ba jyeka ɛkkɛ lallin ‘ya neeni. Ɛkkɛ tieŋnɛ jyek ‘ya, ɔci ɛkkɛ gɔrnɛ naŋki ‘ya. Ɔci dala ɛkkɛ noŋdɛ a ɔɔn daŋkun. Ɔci a ɔŋŋiyɛ, Jwaŋa Tolan mena ‘woñi ma te coodi pwani ɛkɛ neeniyɛ, ɛkɛ baldɛ iki ɛkkɛ. 10Ɛɛ, te baaṭi ɛkkɛ balgɛ poŋɛ te ‘ya, ɔci ‘ya maŋŋata ɛkkɛ. Ɔci acca ‘ya yomu ñɔɔna ñɔɔn acaan ɛkkɛ balgɛ poŋɛ te ‘ya ɔci mokɛ ‘ya men. Çeej ‘ya ɛkkɛ yomgɔ bala ‘yati ɔci buagɛ mokɛ ‘ya oŋkanda, yeti pɔya ɛkkɛ ‘ya magdatɛ gɔ bala bɛɛ. 11’Ya gɔk a ɔɔn ɛkkɛti acaan ‘ya bɔw bɛɛ. Acca ‘ya poŋ te jyek waka ciya ‘ya acca moki bɛɛ. Acca kan waak bala, ɔci walla kan waak baaw ‘yatiyɛ, ‘ya men yomu pwad pwad ɔɔn. 12’Ya yaakati ciy ba mena bɔwan waak baaw ɛkɛtiy, ɔci ‘ya yaakati ciy ba mena cyɛgan waak bala ɛkɛtiy. Naŋka neeni yuarŋ ‘ya doki. Kan baan yooŋ yoŋ, walla kan baan yaayɛ moki a koñyɛ, ‘ya yaakati ciy ne pwadan men ɔɔn. 13’Ya yaakati naŋki waakɛnda te war tɛɛna ‘ya ‘wondata Kiṭɔ oŋkanday. 14Ɛkkɛ yomgɔ pwanna pwani ‘yati ne ɛkkɛ ‘ya maŋŋata te oŋŋa taab baali ‘yatiy. Taab ‘ya aŋi ba taab ɛkkɛ doki. 15Ɛkkɛ maka ban Pilibbi, jiek ŋeejɛ ɛkkɛ doki. Ne ɛkkɛ lallin ‘ya te ñamu, ɔci ne ‘ya koona bora te ban Macɛdɔɔnyayɛ, ‘ya makka ma kaniican gɛɛg bɛɛ, ‘ya maŋŋata gena ɛkkɛ pookɔ. 16Ɔci moki ne ‘ya baala ban Tacalunikayɛ, ‘ya maŋŋata ɛkkɛ oŋki aŋi ne yyɛɛwɔ doki. 17Yom ‘ya buagɔn ɛkkɛ ‘ya ‘wondata waka neeni budan bɛɛ. Yom ‘ya buagɔn dala Juaŋ aŋka noŋdi ne pwadan ɛkkɛti te naŋka naŋdɛ ɛkkɛ pwadin neeni. 18Ɛkkɛ ‘ya cuonnata bilk ne coŋɔn. Ɔci waka ‘ya cuonnata ɛkkɛ te byeŋ Ipaprodaaytoc neeniyɛ, yɔmjin te ‘ya doki. Ne ɛkkɛ ‘ya ‘wonnata waka neeniyɛ, bala ba ɛkkɛ ne Jwaŋa Tolan ‘wonnɛ gena ‘yɛrŋɛ ɛkkɛ gena pwadan gena ɛkkɛ buagɛ neeni, ɔci Juaŋ yookɔn te naŋka neeni bɛɛ. Naŋka neeni pwanna pwani ɛkɛti. 19Dala Jwaŋ ‘yayɛ, ɛkɛ ɛkkɛ ‘wondɛ waka baaw ɛkkɛti neeni ba bolja ɛkɛ agi mena cyɛgan neeni te byeŋ Yaccu Kiṭɔ. 20Jwaŋ ikin ɔci Wey ikinyɛ, dala ma jieddi ɛkɛ oŋkanda yuonginda ɔɔn. 21Dala ɛkkɛ ma Yaccu Kiṭɔ ñiibdɛ waakɛnda te ‘ya. Modg ikin modga bala wɛnniyɛ, ɛkkɛn ñiepi ɛkkɛ daŋkun. 22Ma Kiṭɔ maka bala wɛnniyɛ, ɛkkɛn waakɛnda ñiepi ɛkkɛ. Ɔci maka bala on Kɛɛcartiyɛ, ɛkkɛn ñiepi ɛkkɛ ne pɛñan daŋkun. 23Dala yom pwani Ciɛggɔn ikin Yaccu Kiṭɔ bala ɛkkɛti oŋkanda ɔɔn.

will be added

X\